22
Dios chiaꞌ, Dios chiaꞌ, ¿bizr chee̱ naꞌ nusán lazruꞌ nedaꞌ?¿Bizr chee̱ naꞌ quebe dxennuꞌ da dxenabaꞌ Lueꞌ
chee̱ guseláuꞌ nedaꞌ?
2 Dios chiaꞌ, dxuláwizraꞌ Lueꞌ te zra, ne quebe dxexeche̱buꞌ chiaꞌ.
Dxuláwizraꞌ Lueꞌ chizrela, ne quebe dxezíꞌi lazraꞌ.
3 Láꞌazxa nacuꞌ Lueꞌ.
Nacuꞌ Benneꞌ dxebeze̱ꞌ naga dxelúe láꞌana benneꞌ Israel Lueꞌ.
4 Xra xrtáuntuꞌ gulebeza lazre̱ꞌ Lueꞌ.
Gulebeza lazre̱ꞌ, naꞌ bseláuꞌ le̱ꞌ.
5 Bululáwizre̱ꞌ Lueꞌ, naꞌ belelé̱ꞌ.
Buluxrén lazre̱ꞌ Lueꞌ, naꞌ quebe belexeduéꞌene̱ꞌ.
6 Nedaꞌ nacaꞌ ca tu be̱laꞌ gúnaꞌdauꞌ, ne quegá bénneache.
Dxelecuide bénneache nedaꞌ, ne dxuluzúe̱ꞌ nedaꞌ chaláꞌala.
7 Xúgute̱ benneꞌ dxeleléꞌe nedaꞌ dxelún le̱ꞌ chiaꞌ.
Lu da dxelún le̱ꞌ chiaꞌ dxelexrá dxuꞌe̱,
ne dxulutá xíchaje̱ꞌ, dxelenné̱ꞌ:
8 “Bzua cuine̱ꞌ lu naꞌ Xránadxu chee̱ guselé̱ꞌ le̱ꞌ.
Guselé̱ꞌ le̱ꞌ che dxezaca ba lázrele̱ne̱ꞌ le̱ꞌ.”
9 Lueꞌ nacuꞌ Bénneaꞌ be̱xruꞌ nedaꞌ gate gúlajaꞌ.
Be̱nuꞌ bxren lazraꞌ Lueꞌ gate naꞌ ne dxázreteaꞌ.
10 Guxuꞌa lu naꞌu gate quebe ne gálajteaꞌ.
Gate ne xuꞌa lu le̱ꞌe̱ xrnaꞌa, báchequeze nacuꞌ Dios chiaꞌ.
11 Quebe xebiguꞌ naga zuaꞌ laweꞌ da zua gágute̱
da gusaca zi na nedaꞌ,
ne quebe nu chiláꞌ benneꞌ gácale̱ne̱ꞌ nedaꞌ.
12 Zaj naxechaj benneꞌ dxeledábague̱ꞌ nedaꞌ ca be̱zre caꞌ.
Zaj naxechaj benneꞌ nedaꞌ zaj naque̱ꞌ ca be̱zre wal-la caꞌ
chee̱ Basán.
13 Gulaca lazre̱ꞌ xuluzría xiꞌe̱ nedaꞌ
ca tu be̱zre xixreꞌ dxedunbaꞌ, ne dxebezre xaꞌabaꞌ.
14 Bebizre lazraꞌ ca nisa da nalalaj na lu xu,
naꞌ ca naca zrita xuꞌa bulusán ljwezre na.
Lázrdawaꞌ guca na ca xinaꞌ da bxuna na lu le̱ꞌa ca nisa.
15 Bexaca xel-laꞌ wal-la chiaꞌ ca tu xéꞌena xu laꞌa,
naꞌ luzraꞌ bedáꞌ na chichjaꞌ.
Nuzúꞌ nedaꞌ lu xu xrte chee̱ xel-laꞌ gute.
16 Zaj naxéchaje̱ꞌ nedaꞌ ca becuꞌ caꞌ.
Zaj naxechaj benneꞌ we̱n da zrinnaj caꞌ nedaꞌ.
Gulídue̱ꞌ niꞌa naꞌa.
17 Waca gulabaꞌ ca naca zrita xuꞌa,
naꞌ benneꞌ caꞌ dxelenné̱ꞌe̱ nedaꞌ, ne dxelennáꞌ xánnie̱ꞌ nedaꞌ.
18 Belexelé̱ꞌe̱ zra lanaꞌ lateꞌ weaj,
naꞌ laweꞌ zra lanaꞌ gulebeje̱ꞌ da gaca bea na.
19 Quebe xebiguꞌ naga zuaꞌ, Xran.
Nacuꞌ xel-laꞌ wal-la chiaꞌ.
Gudázega gácale̱nuꞌ nedaꞌ, Xran.
20 Bselá bénneꞌdu xuꞌa lu naꞌ benneꞌ guꞌe̱ nedaꞌ xia.
Bénneaꞌ guzría xiꞌe̱ nedaꞌ gune̱ꞌ ca dxun becuꞌ.
21 Bselá nedaꞌ lu dxuꞌa be̱zre xixreꞌ.
Bselá nedaꞌ lu luzu be̱zre wal-la caꞌ.
22 Guzendaꞌ bi bíchaꞌdauꞌ caꞌ lauꞌ Lueꞌ.
Güe láꞌanaquezaꞌ Lueꞌ ladaj benneꞌ zaj nazrague̱ꞌ lauꞌ.
23 Leꞌe, dxezrébele Xránadxu, le güe láꞌana Le̱ꞌ.
Le gucáꞌana szrene̱ꞌ, leꞌe, zriꞌine zre sua Jacob.
Le zrebe Le̱ꞌ, leꞌe, zriꞌine zre sua Israel.
24 Quebe bzua Dios chaláꞌala, ne quebe gucuídene̱ꞌ
da ziꞌ da xaꞌ da guledé benneꞌ xacheꞌ caꞌ,
ne quebe bcache lawe̱ꞌ lau benneꞌ caꞌ
san gate bululáwizre̱ꞌ Le̱ꞌ, benne̱ꞌ chiꞌe̱.
25 Güe láꞌanaquezaꞌ Lueꞌ laduj benneꞌ zan zaj nazrague̱ꞌ lauꞌ.
Ca da guche̱be lazraꞌ gúnquezaꞌ lau benneꞌ caꞌ dxelezrebe̱ꞌ Lueꞌ.
26 Xelagu benneꞌ dxexruj lazreꞌ, ne welélajquezne̱ꞌ.
Benneꞌ caꞌ dxelebigue̱ꞌ lau Xránadxu xelúe láꞌanaqueze̱ꞌ Le̱ꞌ.
Tu gácazqueze da ba neza chee̱ benneꞌ caꞌ.
27 Cheajlesá lazreꞌ benneꞌ dute̱ xe̱zr la xu Xránadxu,
naꞌ xelexebíꞌe̱ lau Le̱ꞌ.
Xúgute̱ cueꞌ benneꞌ chee̱ xúgute̱ cueꞌ xe̱zr la xu
xelúe láꞌanaqueze̱ꞌ Le̱ꞌ,
28 laweꞌ da xuꞌu lu naꞌ Xránadxu xel-laꞌ dxenná bea,
naꞌ nna béꞌene̱ꞌ xúgute̱ benneꞌ xe̱zr la xu caꞌ.
29 Xeláguqueze xúgute̱ benneꞌ zren caꞌ chee̱ xe̱zr la xu nigá,
ne xelúe láꞌanaqueze̱ꞌ Dios.
Xuluzú zribe lau Le̱ꞌ xúgute̱ benneꞌ caꞌ xelate,
benneꞌ caꞌ quebe xelezéquene̱ꞌ xelegúꞌu chawe̱ꞌ
bénneꞌdu zaj xuꞌe̱ chee̱ quebe xelatie̱ꞌ.
30 Zriꞌine zre sua benneꞌ caꞌ xelunbeꞌ zrin chee̱ Xránadxu.
Xuluzenne̱ꞌ zríꞌine̱ꞌ caꞌ ca naca chee̱ Xránadxu
cadxa cheajse̱te̱ chee̱ bénneache.
31 Xelezrine̱ꞌ, ne xuluzenne̱ꞌ bénneache ca naca
da xrlátaje da dxun Dios.
Xuluzenne̱ꞌ benneꞌ quebe ne xelálaje̱ꞌ be̱n Dios da caní.