21
Benneꞌ dxenná bea dxebéle̱ꞌe̱ne̱ꞌ nen xel-laꞌ waca chiuꞌ, Xran,naꞌ ca naca xel-laꞌ weselá chiuꞌ dxebéle̱ꞌe̱ne̱ꞌ.
2 Bnézrujuꞌ le̱ꞌ da guzá lazre̱ꞌ,
ne quebe bzaguꞌ da gunabe̱ꞌ Lueꞌ.
3 Guzíꞌ lu naꞌu le̱ꞌ, ne be̱nuꞌ dxaca chaweꞌ chee̱ꞌ.
Nuzriuꞌ xíchaje̱ꞌ tu da naca na oro.
4 Gunabe̱ꞌ Lueꞌ gunnuꞌ le̱ꞌ xel-laꞌ nabán,
naꞌ bnézrujuꞌ na le̱ꞌ chee̱ súaqueze̱ꞌ zaneꞌ iza.
5 Zrente̱ naca xabáa chee̱ꞌ laweꞌ da bseláuꞌ le̱ꞌ.
Be̱nnuꞌ le̱ꞌ xel-laꞌ ba láꞌana, ne xel-laꞌ szren.
6 Laweꞌ da nunuꞌ gaca chaweꞌ chee̱ꞌ chadía chacanna
dxunuꞌ dxebéle̱ꞌe̱ne̱ꞌ lau Lueꞌ.
7 Laweꞌ da dxuxrén lazreꞌ wenná bea naꞌ Xránadxu,
xexache lazreꞌ Dios szrente̱ le̱ꞌ,
naꞌ quebe sue̱ꞌ lu da ste̱be.
8 Xulétajuꞌ xúgute̱ benneꞌ dxeledábague̱ꞌ lueꞌ.
Xel-laꞌ waca chiuꞌ xulétajuꞌ benneꞌ caꞌ dxelecuídene̱ꞌ lueꞌ.
9 Lu zra naꞌ zraꞌu le̱ꞌ gaca chee̱ benneꞌ caꞌ
ca guzúꞌ le̱ꞌ lu xiꞌ ga dxulúzrie̱ꞌ blaꞌdauꞌ.
Xránadxu guzúzruje̱ꞌ benneꞌ caꞌ lu xel-laꞌ dxezráꞌa chee̱ꞌ,
naꞌ xiꞌ naꞌ guzezxe na le̱ꞌ.
10 Xúgute̱ da belune̱ꞌ lu xe̱zr la xu nigá guzria xiꞌu,
ne xegúꞌ zriꞌine zre sue̱ꞌ ládujla bénneache,
11 laweꞌ da gulaca lazre̱ꞌ xelune̱ꞌ da cale̱la chiuꞌ Lueꞌ.
Gulilaj lazre̱ꞌ ca da xelune̱ꞌ, san quebe bi xelezéquene̱ꞌ,
12 laweꞌ da gulaguꞌ benneꞌ caꞌ.
Nucuezuꞌ xaga nalá xécheꞌze chiuꞌ chee̱ le̱ꞌ.
13 Begáꞌana szrénqueze Lueꞌ, Xran, lu xel-laꞌ wal-la chiuꞌ.
Tu gúl-lazquezdxu, ne tu güe láꞌanazquezdxu Lueꞌ
ca naca xel-laꞌ waca chiuꞌ.