10
¿Bizr chee̱ naꞌ zuꞌ zituꞌ, Xran?¿Bizr chee̱ naꞌ dxucache cuinuꞌ gate dxeledé xel-laꞌ ziꞌ
bénneache chiuꞌ?
2 Benneꞌ we̱n da cale̱la dxenáu ziꞌ xuzre̱ꞌ benneꞌ xacheꞌ
lu xel-laꞌ dxucáꞌana szren cuine̱ꞌ,
naꞌ xeajchaze benneꞌ xacheꞌ naꞌ lu da ba nucuéza bénneaꞌ.
3 Dxucáꞌana szren cuine̱ꞌ ca naca da dxezá lazre̱ꞌ.
Nupé̱ꞌe̱ dizraꞌ da dxenné̱ꞌ chee̱ benneꞌ dxucudeꞌ,
naꞌ dxucáꞌana dítaje̱ꞌ Xránadxu Dios.
4 Benneꞌ we̱n da cale̱la naꞌ lu xel-laꞌ dxucáꞌana szren cuine̱ꞌ
quebe dxapeꞌ Dios ba láꞌana,
ne quebe dxéquene̱ꞌ che zua Dios.
5 Tu dxúnzqueze̱ꞌ da cale̱la,
ne quebe dxéquene̱ꞌ guchiꞌu Lueꞌ ca da dxune̱ꞌ.
Dxuzúe̱ꞌ chaláꞌala xúgute̱ benneꞌ dxeledábague̱ꞌ le̱ꞌ.
6 Lu xichaj lázrdawe̱ꞌ dxenné̱ꞌ: “Quebe bi sequeꞌ guzaga na nedaꞌ.
Cabataꞌ bi gaca chiaꞌ da cale̱la.”
7 Tu dxenné̱zqueze̱ꞌ dizraꞌ schanniꞌ,
ne da we̱n lazreꞌ, ne ca naca da cale̱la da gune̱ꞌ.
Dxeledxúaj dxuꞌe̱ dizraꞌ cale̱la, ne dizraꞌ xálaze.
8 Dxuꞌa xe̱zre caꞌ dxucache cuine̱ꞌ chee̱ que̱le̱ꞌ bénneache.
Bagácheze dxutie̱ꞌ benneꞌ dxeledeze̱ꞌ naꞌ.
Bagácheze dxenné̱ꞌe̱ chee̱ bi gune̱ꞌ chee̱ benneꞌ xacheꞌ caꞌ.
9 Bagácheze dxebeze̱ꞌ ca dxun be̱zre xixreꞌ.
Dxebeze̱ꞌ ga séquene̱ꞌ que̱l-le̱ꞌ benneꞌ xacheꞌ caꞌ.
Dxe̱l-le̱ꞌ benneꞌ xacheꞌ lu xralaj chee̱ꞌ, ne dxexuꞌe̱ le̱ꞌ.
10 Dxine̱ꞌ xu bénneaꞌ gude̱l-le̱ꞌ.
Dxusaca zie̱ꞌ benneꞌ zan nen ne̱ꞌe̱ wal-la.
11 Lu xichaj lázrdawe̱ꞌ dxenné̱ꞌ: “Nal-la lazreꞌ Dios benneꞌ caní.
Nucache lawe̱ꞌ, ne quebe léꞌene̱ꞌ da dxunaꞌ.”
12 Guxasa, Xranaꞌ Dios, ne bze̱ naꞌu.
Quebe gal-la lazruꞌu benneꞌ xacheꞌ caꞌ.
13 ¿Ájazra che̱nꞌ benneꞌ caꞌ dxelune̱ꞌ da cale̱la
dxuluzúe̱ꞌ Dios chaláꞌala?
Lu xichaj lázrdawe̱ꞌ dxelenné̱ꞌ: “Quebe xebéaj lazreꞌ Dios.”
14 Dios, Lueꞌ bléꞌequeznuꞌ da nigá,
laweꞌ da dxennáꞌu benneꞌ we̱n da cale̱la,
ne da caꞌ dxune̱ꞌ quebe naca na xrlátaje,
naꞌ xebéaj lázrequezuꞌ bénneaꞌ.
Dxuluzúa cuina benneꞌ xacheꞌ caꞌ lu naꞌu.
Lueꞌ dxácale̱quezuꞌ bi we̱zé̱bedu caꞌ.
15 Dxugúꞌ xel-laꞌ wal-la chee̱ benneꞌ we̱n da cale̱la.
Guleaj láwela da cale̱la da nune̱ꞌ, da naꞌ be̱ne̱ꞌ lu da bagacheꞌ.
16 Chadía chacanna naca Xránadxu Wenná Bea chee̱dxu.
Lu xe̱zr la xu chee̱ꞌ ba gulebía xiꞌ benneꞌ dxelecuídene̱ꞌ Le̱ꞌ.
17 Bnézrujuꞌ ca da bululáwizra benneꞌ dxexruj lázreꞌdu caꞌ Lueꞌ, Xran.
Lueꞌ dxupaꞌu lázxdau bénneꞌdu caꞌ chee̱ xuluzé̱ nague̱ꞌ xrtizruꞌ,
18 chee̱ guchiꞌu chee̱ bi we̱zé̱bedu caꞌ,
ne chee̱ benneꞌ dxeledée̱ꞌ xel-laꞌ ziꞌ,
chee̱ québedxa bi da cale̱la xelún benneꞌ caꞌ
dxelune̱ꞌ da cale̱la chee̱ bénneꞌdu caní.