9
Xran, dute̱ lázrdawaꞌ güe láꞌanaꞌ Lueꞌ.Guzendaꞌ bénneache ca zaj naca da zrente̱ da be̱nuꞌ.
2 Wabéquezdaꞌ, ne gúl-laquezaꞌ ca naca chiuꞌ.
Gul-laꞌ chee̱ lauꞌ Lueꞌ, nacuꞌ Dios zrente̱.
3 Buluzrunnuj benneꞌ dxeledábague̱ꞌ nedaꞌ.
Xeajlechazie̱ꞌ, ne belexenitie̱ꞌ lau Lueꞌ
4 laweꞌ da nucáꞌana chawuꞌ da xrlátaje da dxunaꞌ.
Dxeꞌu lataj blau chiuꞌ, ne lu da xrlátaje dxuchiꞌu.
5 Gudil-luꞌ benneꞌ xe̱zr la xu caꞌ,
ne bzria xiꞌu benneꞌ we̱n da cale̱la caꞌ.
Bsuluꞌ la benneꞌ caꞌ chadía chacanna.
6 Ba gulebía xiꞌ benneꞌ dxeledábague̱ꞌ nedaꞌ.
Chadía chacanna zaj nazrinnaj lataj chee̱ benneꞌ caꞌ,
ne xe̱zre chee̱ꞌ caꞌ, da caꞌ bchínnujuꞌ Lueꞌ.
Netú benneꞌ cheajsá lazre̱ꞌ benneꞌ caꞌ.
7 Xránadxu Dios súatequeze̱ꞌ chadía chacanna.
Ba nucueze̱ꞌ lataj blau chee̱ꞌ naga guchiꞌe̱ chee̱ bénneache.
8 Lu da xrlátaje guchiꞌe̱ chee̱ bénneache dute̱ xe̱zr la xu,
ne chee̱ benneꞌ xúgute̱ xe̱zre caꞌ lu da naca li lazreꞌ.
9 Xránadxu Dios gaque̱ꞌ ca tu lataj ga xelezrá chaweꞌ benneꞌ xacheꞌ,
naga xelezré̱ꞌe̱ chawe̱ꞌ gate zrin zra chee̱ da ziꞌ da xaꞌ.
10 Benneꞌ caꞌ zaj núnbeꞌe̱ Lueꞌ, Xran, xuluxrén lazre̱ꞌ Lueꞌ,
laweꞌ da quebe bsan lazruꞌ benneꞌ caꞌ belexílaje̱ꞌ Lueꞌ.
11 Le gul-la chee̱ Xránadxu, Bénneaꞌ zue̱ꞌ xe̱zre Sión.
Le guzén benneꞌ xe̱zre caꞌ ca zaj naca da caꞌ nune̱ꞌ,
12 laweꞌ da dxeajsá lazre̱ꞌ chee̱ benneꞌ caꞌ,
ne dxexebéaj lazre̱ꞌ chee̱ benneꞌ we̱te benneꞌ.
Quebe gul-la lazre̱ꞌ ca da dxululáwizra benneꞌ ba xacheꞌ caꞌ Le̱ꞌ.
13 Bexache lazreꞌ nedaꞌ, Xran.
Gunnáꞌ da dxezacaꞌ lu niꞌa naꞌ benneꞌ caꞌ dxelecuídene̱ꞌ nedaꞌ.
Dxecaꞌu nedaꞌ lu naꞌ xel-laꞌ gute,
14 chee̱ guzendaꞌ bénneache da dxue láꞌanaꞌ Lueꞌ,
naga dxuꞌuntuꞌ xe̱zre Sión,
ne chee̱ bedaꞌ laweꞌ da bseláuꞌ nedaꞌ.
15 Xeajlechaze benneꞌ xe̱zr la xu caꞌ lu xe̱dxu da gule̱ne̱ꞌ.
Xeajlechuꞌe̱ lu xralaj da bulucueze̱ꞌ.
16 Xránadxu Dios bléꞌene̱ꞌ ca da zaj naque̱ꞌ ne̱ chee̱
da ziꞌ da xaꞌ da gudichaj beꞌe̱ chee̱ benneꞌ caꞌ dxelune̱ꞌ da cale̱la.
Xeajchaze benneꞌ we̱n da cale̱la naꞌ lu da nun niꞌa náꞌqueze̱ꞌ.
17 Benneꞌ we̱n da cale̱la caꞌ xeledéqueze̱ꞌ lu lataj ba xaꞌ.
Xúgute̱ benneꞌ caꞌ dxelal-la lazre̱ꞌ Xránadxu Dios.
18 Quegá chadía chacanna gal-la lazreꞌ Dios benneꞌ xacheꞌ caꞌ,
ne quegá tu chiꞌize xenite da dxelebeza lazre̱ꞌ le̱ꞌ.
19 Guxasa, Xranaꞌ Dios.
Quebe guꞌu lataj xelexegáꞌana szrénqueze bénneache.
Xeleláꞌ lauꞌ benneꞌ xe̱zr la xu caꞌ chee̱ guchiꞌu chee̱ꞌ.
20 Xran, be̱n xelezrebe benneꞌ caꞌ Lueꞌ.
Be̱n xelexúnbea benneꞌ xe̱zr la xu caꞌ zaj naque̱ꞌ bénneacheze.