— Ãne, wa aima roti pese za'ra wa'wa, niwa ai'morõpãrĩ za'ra wa'aba tõ da. 2 Rowahutuzém hawi te za da te 're asani za'ra wa'wa. Tawamhã bâdâ hã te za duré wi, ni'wa hã te te ai'maiwĩrĩ aba wamhã, te za rosa'rata, 'Re ihâimana u'âsi mono te te sima iwẽzé te te i'manharĩ na hã. 3 Ãne hã te za da te 're 'manharĩ za'ra, Ĩmama hã da te waihu'u za'ra õ wa, duré da te ĩwaihu'u za'ra õ wab zama. 4 Ãne, wa aima waihu'u siromo za'ra wa'wa, ãne na romhâimana za'ra mono wamhã, ãma aipo're pu'u za'ra wa'aba da, te ãma i'aipo're pu'u za'ra wa'aba zém na hã.

Tawamhã Zezusi hã ma duré ãma uzusi, ãne:

— Ãne hã te aima rowasu'u za'ra wa'aba õ di, romhuri na te isãna'ratazém hawimhã, zahadu ai'rata 're ĩnhamra aba mono wa. 5 Tazahã, ãhã na hã apâ wa za oto mo, we ĩzatõrĩ'wai u. Tane nherẽ, asiwi ĩ'mazadanharĩ aba õ di, ãne hã: “E momo te za aimo.” 6 Ãne aima ĩsiwasu'u za'ra wa'aba wa, ma tô aipẽ'ẽzé pese za'ra wa'wa. 7 Tô sena, wa za aima rowasu'u za'ra wa'wa. Wẽ di ĩmorĩ da hã, aima 're rowẽ za'ra wa'aba mono da. Ĩmorĩ õ wamhã, Dapawapto'wa hã wei morĩ õ di za. Tazahã, ĩmorĩ wamhã, wa za we atẽme satõrĩ za'ra wa'wa, ĩsiwa'rãmi. 8 Dapawapto'wa we morĩ wamhã, ti'ai ãma 're idahâimana za'ra mono norĩ ma, te za te te 're ahâi'ré, dawasété na 're idahâimana za'ra mono na hã, duré i'uwaibaba na marĩ 're ihâimana za'ra mono zém na hã, duré 'Re ihâimana u'âsi mono dahâimanazéb zarina te te da'ãma 're i'arowairébé mono zém na zama. 9 Ti'ai ãma 're idahâimana za'ra mono norĩ hã dawasédé da te 're i'manharĩ za'ra mono na, te da te ãma 're rosa'rata upa za'ra, da te 're ĩzaze za'ra mono õ wa. 10 I'uwaibaba na uburé marĩ 're ihâimana za'ra mono zém na te duré da te ãma 're rosa'rata za'ra i'upa na, Ĩmama u ĩmorĩ wa, za oto. Tawamhã asiwi ĩ'madâ'â zahu aba õ di za. 11 Te duré da te ãma 're rosa'rata za'ra i'upa na, dahâimanazéb zarina da'ãma rowairébézém na hã. E marĩ wa. Ti'ai ãma 're idahâimana za'ra mono norĩ wada'uri wasété 'wa hã^a 'Re ihâimana u'âsi mono hã te te ãma rowairébé siromo wa.

12 — Zahadu ahâ di, te aré aima irowasu'u za'ra wa'aba da hã. Tane nherẽ, aré tawamhã ãhã na hã 'wapé za'ra wa'aba õ di. 13 Tazahã, 'Re ihâimana u'âsi mono Pẽ'ẽzani, tô sena Ĩmama hâimanazé te te dama 're i'ahâi'ré mono hã wei morĩ wamhã, te za te te asimroi wa'wa, tô sena 'Re ihâimana u'âsi mono nhimiroti u hã. Sihawim na te te aima 're waihu'u za'ra wa'aba mono õ di za. 'Re isimipari mono zéb zarina si, te za te te aima 're awaihu'u 'wa. Te za duré aima hâi'ré za'ra wa'wa, za marĩ 're i'awairébé mono hã. 14 Te za ĩhâi'ré, ĩwaihu'u pese uptabi na 're ĩhâimana mono zé hã, ĩnhimiroti hã za tãma hâimana wa. Tawamhã ta hã te za te te aima 're awaihu'u 'wa. 15 Uburé marĩ Ĩmama ma 're ihâimana za'ra mono hã te duré ĩma 're hâimana. Tahawa, wa tô aima wasu'u za'ra wa'wa, Ĩmama Pẽ'ẽzani hã ĩhawi za te te i'âri na, taha na te te aima 're awaihu'u aba mono da.

16 — Romhuture di, za oto asiwi ĩ'madâ'â za'ra wa'aba õ zé hã. Tane nherẽ, ronomro pese õ ré, te za duré apâ asiwi ĩ'madâ'â 'wa. — Ãne te Zezusi hã tãma siwasu'u za'ra.

17 Tawamhã nima norĩ isiré 're inomro mono hã ma tô ãne ãma sisadanharĩ za'ra:

— E niha na te merẽ sina tinha: “Romhuture di, za oto asiwi ĩ'madâ'â za'ra wa'aba õ zé hã. Tane nherẽ, ronomro pese õ ré, te za duré apâ asiwi ĩ'madâ'â 'wa.” Ãne te duré sina tinha: “Ĩmama u za oto ĩmorĩ wa.” 18 E niha na te sina tinha: “Ronomro pese õ ré.” Wa te sadaihu'u za'ra õ di, te te sina inharĩzé hã.

19 Tawamhã Zezusi hã ma tô waihu'u, te te sina inharĩ u'âbâ, te te siwi sadanharĩ da, te te sima iwẽ za'ra na hã. Tahawa ma tô ãne sadanharĩ za'ra:

— E te asisadanharĩ za'ra wa'wa, niha na te ĩsina nharĩ zô, ãne te nharĩ wamhã: “Romhuture di, za oto asiwi ĩ'madâ'â za'ra wa'aba õ zé hã. Tane nherẽ, ronomro pese õ ré, te za duré apâ asiwi ĩ'madâ'â 'wa.” 20 Tô sena wa za ãne hã aima waihu'u za'ra wa'wa: Te za ai'ru'ru wa'wa. Te za duré aiwi tirobzei'õ pese za'ra wa'wa. Tane nherẽ, ti'ai ãma 're idahâimana za'ra mono ĩzazei'õ'wa norĩ hã te za dasima rowẽ za'ra ni. Tane nherẽ, aiwi irobzei'õ za'ra wa'aba zé hã te za sisaprĩ za, rowẽ uptabi na 're aihâimana za'ra wa'aba mono da oto. 21 Pi'õi ãma iwasã sépu'u wamhã, i'ra tãma poto da hã, te za tiwi tirobzei'õ, bâdâ hã tãma wisi wa, te te irobzépatazé hã. Tane nherẽ, ai'uté tãma poto parimhã, te za tãma tirowẽ pese, i'ra hã ti'ai ãma ipotozém na. Te te irobzépatazém na, te te oto ãma rosa'rata õ di za. 22 Tane te za duré aima tiromhâimana za'ra wa'wa: Ãhã na hã aima robzei õ za'ra wa'aba di. Tane nherẽ, te duré ai'madâ'â zahu za'ra wa'aba wamhã, te za aima tirowẽ pese za'ra wa'wa za. Tawamhã ta hã rowẽ hã ni'wa te te aiwi sani waihu'u za'ra wa'aba õ di za.

23 — Ta hã bâdâ wisi wamhã, marĩ na asiwi ĩzadanharĩ aba õ di za. Tô sena wa za ãne aima waihu'u za'ra wa'wa: Ĩmama hã te za uburé marĩ hã te te aima 're anhomri 'wa, ĩnhisi na marĩ tiwi 're iwaptẽrẽ za'ra wa'aba mono hã. 24 Ãwa bâtâ u hã, marĩ hã ĩnhisi na zahadu waptẽrẽ za'ra wa'aba õ di. Ma'ãpé waptẽrẽ za'ra wa'aba. Tawamhã te za iwaibui wa'wa, rowẽ hã wahuré aima hâimana za'ra wa'aba da.

25 — Ãne hã wa tô romnhimiré'é na si aima rowasu'u za'ra wa'wa. Tane nherẽ, bâdâ hã te za wi, romnhimiré'é na te oto aima 're irowasu'u za'ra wa'aba mono õ zé hã. E marĩ wa. Sõ'awi wa za oto Ĩmama hã te aima 're wasu'u za'ra wa'wa. 26 Ta hã bâdâ wisi wamhã, marĩ hã te za Ĩmama wi ĩnhisi na 're iwaptẽrẽ za'ra wa'aba mo. Tane nherẽ, wa za tô sena ãne aima waihu'u za'ra wa'wa. Ĩnhimnhasi õ di za, Ĩmama wi marĩ hã te aima iwaptẽrẽ za'ra wa'aba da hã, 27 Ĩmama hã te te 're ai'azawi pese uptabi aba mono wa. Tãma asawi uptabi za'ra wa'aba di tô, asiwi 're ĩzawi pese aba mono wa, duré 'Re ihâimana u'âsi mono hawi we ĩmorĩ na ĩzaze za'ra wa'aba wa. 28 Ĩmama hawi wa tô wei mo, ti'ai ãma 're idahâimana za'ra mono u hã. Tane nherẽ, ãhã na hã wa za oto mo, ti'ai ãma 're idahâimana za'ra mono hawi, apâ Ĩmama u.

29 Tahawa, isiré 're inomro mono norĩ hã ma tô ãne tãma nharĩ za'ra:

— Ãhã na hã sõ'awi te oto wama asiwasu'u za'ra. Romnhimiré'é na oto wama asiwasu'u za'ra õ di. 30 Ãhã na hã wa tô oto aiwaihu'u pese za'ra ni, uburé marĩ hã aima iwaihu'u pese na hã duré 're i'asimnhasi mono õ na hã, ni'wa hã marĩ na te te 're asadanharĩ mono da hã. Tahawa wa tô asaze za'ra ni, 'Re ihâimana u'âsi mono hawi we i'aimorĩ na hã.

31 Tahawa, te Zezusi hã sadanharĩ za'ra, ãne:

— E tawamhã ãhã na hã ma tô oto ĩzaze za'ra wa'wa. 32 Bâdâ hã ma tô oto wi, da te ai'ãma iropéi wa'aba zé hã. Tawamhã asõrõwa mono bâ te za iropéi wa'wa. Ãne wa, te za ĩsiwaprosi asiwi ĩrẽme 'wa. Tane nherẽ, ĩsiwaprosi ĩhâimana õ di za, Ĩmama hã tô ĩsiré 're hâimana u'âsi mono wa. 33 Ãne hã wa tô aima waihu'u za'ra wa'wa, ĩ'ãma 're aihâimana u'âsi za'ra wa'aba mono wa, rowẽ hã aima 're hâimana za'ra wa'aba mono da. Ti'ai ãma hã te za 're irobzépata za'ra wa'aba mo. Tane nherẽ, asib'ru za'ra wa'aba. Wa hã wa tô ãma ai'uté, ti'ai ãma ĩzazei'õ'wa 're ihâimana za'ra mono norĩ nhiptetezéb ãma hã.