— Aiwi robzei'õ za'ra wa'aba tõ, aipẽ'ẽ 'remhã. 'Re ihâimana u'âsi mono si saze za'ra wa'aba. Duré ĩzaze za'ra wa'aba. 2 Ĩmama nhorõwa ãma hã rob're za'ẽtẽ di, 're idasi'ubumroi mono zéb da hã. Tamemhã wa za asô robza'ra pese za'ra wa'wa. Ãnei õ 'wa'âhã, te aré aima rowasu'u za'ra wa'aba õ di. 3 Ĩmorĩ wamhã, duré te asô robza'ra pese za'ra wa'aba parimhã, apâ wa za wei mo, ĩsiré te ãma asimroi wa'aba mono da, 're ĩnhamra mono zéb ãma, 're ai'ubumroi wa'aba mono da. 4 Aima waihu'u pese za'ra wa'aba di, bâdâdi hã, nimomo za ĩmorĩzé hã.

5 Tawamhã Tome hã ma tô sadanha, ãne:

— Wanhib'apito, nimomo i'aimorĩzé hã wa te waihu'u za'ra õ di. E niha wa za waihu'u za'ra ni, bâdâdi hã.

6 Tawamhã Zezusi hã te tãma siwasu'u, ãne:

— Wa hã bâdâdi uptabi duré tô sena 'Re ihâimana u'âsi mono nhimiroti duré dahâimanazém nhomri'wa. Ni'wa hã ĩ'ãma 're morĩ õ nherẽ, Ĩmama u hã wisi waihu'u õ di za. 7 Tô sena aima ĩwaihu'u pese za'ra wa'aba wamhã, Ĩmama zama te za duré oto iwaihu'u za'ra wa'wa. Tawamhã ã hawim haré te za oto iwaihu'u za'ra wa'wa. Ma tô duré i'madâ'â za'ra wa'wa.

8 Tawamhã Filipi hã te duré tãma tinha, ãne:

— Wanhib'apito, ma'ãpé Aimama hã wama hâi'ré za'ra na. Tawamhã marĩ zô oto wanhimnhasi za'ra õ di za.

9 Tahawa Zezusi hã ma sada'â, ãne:

— Filipi, ai'rata wa 're ĩnhamra hâ za'ra wa'wa. E tane nherẽ, zahadu bété ĩwaihu'u õ di. Ni'wa hã te te ĩ'madâ'â wamhã, Ĩmama zama te duré 'madâ. E niha te ãne nherẽ, ĩma inha: “Ma'ãpé, Aimama hã wama hâi'ré za'ra na.” 10 E ĩzazei õ di, Ĩmama ãma 're ĩhâimana mono na hã duré Ĩmama hã ĩ'ãma 're ihâimana mono na hã.

— Te 're irowasu'u mono zé hã ĩsihawib õ di. Tazahã, Ĩmama, ĩsiré 're ihâimana mono te tite romhuri hã te te 're 'manharĩ. 11 Ma'ãpé ĩzaze za'ra wa'aba, ĩsiwasu'u wa, Ĩmama ãma 're ĩhâimana mono na duré Ĩmama hã ĩ'ãma 're ihâimana mono na. Ĩsiwasu'uzém na ĩzaze za'ra wa'aba dai õ wamhã, niwamhã pé saze za'ra wa'aba, romhuri hã te te 're i'a'manharĩ mono zém na si. 12 Tô sena wa za aima waihu'u za'ra wa'wa, ãne: Ni'wa hã te te ĩzazei wamhã, marĩ te 're i'ab'manharĩ mono zé hã te za te te 're a'manharĩ. Te 're i'ab'manharĩ mono zém nhipai u te za tô te te 're ab'manharĩ, Ĩmama u za oto ĩmorĩ wa. 13 Duré uburé marĩ hã ĩnhisi na 're iwaptẽrẽ za'ra wa'aba mono hã, wa za te aima 're a'manharĩ 'wa. Ĩmama ãma 're aiwata za'ra wa'aba mono da, te ãma aima 're a'uwaimrami aba mono wa. 14 Uburé siwa'ru marĩ hã, ĩnhisi na ĩwi 're waptẽrẽ za'ra wa'aba mono wamhã, wa za te ãma aima 're a'uwaimrami 'wa.

15 Tawamhã Zezusi hã te duré tãma nharĩ za'ra, ãne:

— Aima ĩzawi pese za'ra wa'aba wamhã, ĩnhimiroti te za 're i'madâ'â pese za'ra wa'aba mo. 16 Ĩmama wi, wa za waptẽ. Tawamhã ta hã te za we satõ Dapawapto'wa ihâiba amo hã, asiré 're hâimana u'âsi za'ra wa'aba mono da. 17 Ĩzazei'õ'wa ti'ai ãma 're idahâimana za'ra mono hã, 'Re ihâimana u'âsi mono Pẽ'ẽzani hã da te waibui waihu'u õ di, da te 'madâ'â waihu'u za'ra õ wa, duré da te iwaihu'u za'ra da hã, dama waihu'u õ wa. Tanei õ di, a norĩ wa'wa hã. Aima waihu'u pese za'ra wa'aba di, asiré 're hâimana za'ra wa'aba mono wa, duré aipẽ'ẽ 're, za 're hâimana u'âsi za'ra wa'aba mono wa.

18 — Ai'madâ'â ãna 're aihâimana za'ra wa'aba mono da, te airẽme za'ra wa'aba õ di za. Apâ wa za we atẽme ĩmorĩ 'wa. 19 Suru na ai'rata aba ĩhâimana parimhã, ti'ai ãma 're idahâimana za'ra mono hã da te oto dasiwi ĩ'madâ'â õ di za. Tanei õ di, a norĩ wa'wa hã. Te za asiwi ĩ'madâ'â 'wa za. Ĩhâiba ré, za 're ĩhâimana u'âsi mono wa, tane te za duré a norĩ wa'wa hã aihâiba ré 're aihâimana u'âsi za'ra wa'aba mo za. 20 Ta hã bâdâ wisi wamhã, te za iwaihu'u za'ra wa'wa, Ĩmama ãma 're ĩhâimana mono na hã duré ĩ'ãma 're i'aihâimana za'ra wa'aba mono na hã, ai'ãma 're ĩhâimana za'ra wa'aba mono ne hã.

21 — Ni'wai ma ĩnhimiroti hã waihu'u pese wamhã, duré te te 're ab'madâ'â pese mono wamhã, ta hã ĩzawi pese 'wa. Te te 're ĩzawi pese mono wa, te za Ĩmama hã te te 're sawi pese. Ĩzama wa za duré te 're sawi pese. Tawamhã wa za tãma hâi'ré, 're ĩhâimana mono zé hã.

22 Tawamhã Zudasi hã (Zudasi Iscarioti õ di, ihâiba amo) ma tô sadanha, ãne:

— Wanhib'apito, e marĩ wa, te za wama za'ra si 're asihâi'ré mo, 're i'aihâimana mono zém na hã. E niha bâ bété, uburé ti'ai ãma asazei'õ'wa norĩ 're ihâimana za'ra mono norĩ ma hã.

23 Tawamhã Zezusi hã ma ãma sada'â, ãne:

— Ni'wa hã te te 're ĩzawi pese mono wamhã, te za ĩnhimiroti hã te te 're ab'madâ'â pese. Taha zarina te za Ĩmama hã te te 're sawi pese. Tawamhã wa za we itẽme wanem ni, isiré 're wahâimana mono da 'râwi. 24 Ni'wa ĩzawi'õ'wa hã, ĩnhimiroti te te 're ab'madâ'â mono õ di za. Ã hã ĩnhimiroti iwapari za'ra wa'wa hã, ĩsihawib õ di. Ĩmama we ĩzatõrĩ'wa nhimiroti.

25 — Ai'rata ĩnhamra aba ré, wa tô ãne na ĩnhimiroti na aima roti pese za'ra wa'wa. 26 Tazahã, Dapawapto'wa hã Ĩmama Tipẽ'ẽzani hã, ĩnhisi na za te te we isatõrĩ hã, te za uburé pese marĩ hã te te aima 're waihu'u za'ra wa'wa. Uburé ĩnhimiroti na te za duré te te 're aipo're pu'u za'ra wa'wa.

27 — Rowẽ hã wa ĩsisa'u aima rẽme za'ra wa'wa. Ĩte rowẽ hã, wa aima sõmri za'ra wa'wa. Rowẽ ti'ai ãma 're idahâimana za'ra mono te te aima 're isõmri za'ra wa'aba mono nei õ di. Aiwi robzei'õ za'ra wa'aba tõ aipẽ'ẽ 'remhã. Duré aipahi za'ra wa'aba tõ. 28 Ma tô ĩwapari za'ra wa'wa, te aima iroti za'ra wa'aba zé hã, ãne: “Wa za oto mo. Tane nherẽ, wa za apâ we atẽme ĩmorĩ 'wa.” Ĩzawi pese za'ra wa'aba 'wa'âhã, te aré asima irowẽ za'ra wa'wa ĩzabâdâ, Ĩmama u za ĩmorĩ na waihu'u za'ra wa'aba wa, Ĩmama hã ĩnhipai u, pire wa. 29 Ãne hã wa ãhã na aima waihu'u siromo za'ra wa'wa, romhâimana wana ré, za oto romhâimana wamhã, ĩzaze za'ra wa'aba da. 30 Ĩnhimiroti na te ãma aima uzusi za'ra wa'aba õ di za, ti'ai ãma dawada'uri wasété 'wa hã za we oto morĩ wa. Taha ma, ĩ'ãma isimiroti pire hã hâimana õ di. 31 Tane nherẽ, ti'ai ãma 're idahâimana za'ra mono hã, da te iwaihu'u za'ra da si, Ĩmama hã ĩma isawi uptabi na hã. Tahawa wa za 'manha, uburé te te ĩma i'ruzé hã.

— Ma'ãpé, aiwahutu za'ra wa'aba, oto wasi'aba'ré da, ã hawi.