— Rowahutu'wa, ã hã pi'õ hã mro ré nherẽ, aibâ aimawi ré nomro ré, ma tô dasiwi sõpẽtẽ ni. 5 Mozésihi nhimiroti zahi hã te ti'ru, ãne wamhã, ẽtẽ na wa te 're simroi mono da, pi'õ norĩ hã. A hã bété, e niha te za ãma irowaihu.

6 Tô õne si ma tô nasi ãma tãma sahu za'ra isadanharĩ na hã, te te ãma upai wa, taha na te te iwasédé hã ãma hiri za'ra da. Tane nherẽ, Zezusi hã ma tô aiwẽ'ẽ. Tinhiptõmohi na ma tô rob'ui'éré, ti'a na. 7 Ma tô nasi siwi sadanha, õne si. Tahawa Zezusi hã ma tô oto za hâiwi. Ãne te tãma nharĩ za'ra:

— Ni'wa ai'reb za'ra wa'aba hã wasété ãna 're morĩ wamhã, te te dama simrimi 'rata, ẽtẽ na.

8 Taha pari ma tô duré apâ aiwẽ'ẽ. Apâ te duré rob'ui'éré, ti'a na. 9 Tawamhã te te iwapari za'ra norĩ hã ma tô nasi wairé misisi, ihâiba prédum hawi sidâpâsi, ipréduptéb u. Tawamhã Zezusihi si ma tô oto si'atarẽ. Duré pi'õ si te isõ're za oto. 10 Tawamhã Zezusi hã ma tô duré wahudu. Ãne te pi'õ sadanha:

— E mahãta te te we siwi i'asaprõni norĩ hã. E ni'wai õ di, aiwasédé te te ai'ãma ihiri wasété da hã, da te aima rob'manharĩ wasété da.

11 Tawamhã pi'õ hã ma sada'â, ãne:

— Maze di. Ni'wa hã sab õ di.

Tawamhã Zezusi hã te tãma tinha, ãne:

— Tane tô. Wa hã te duré aiwasédé hã ai'ãma hiri õ di za, da te aima rob'manharĩ wasété da hã. Mo oto aimorĩ. Aiwasédé hã 're 'manharĩ zahu mono tõ.

12 Tawamhã Zezusi hã te te duré dama rowasu'u wamhã, te ãne dama siwasu'u:

— Wa hã dama rowa'a'wa, ti'ai ãma 're idahâimana za'ra mono norĩ ma hã. Ni'wa hã ĩzarina morĩ wamhã, niwa robra na ihâimana da hã, mare di. Rowa'a si 're ihâimana u'âsi mono zéb 'remhã te za tãma 're hâimana.

13 Tahawa te farizeu norĩ hã tãma nharĩ za'ra, ãne:

— Asihawim na te 'râwi asiwasu'u. Tahawa i'asiwasu'uzé hã marĩ dai õ di.

14 Tawamhã Zezusi hã ma sada'âbâ za'ra, ãne:

— Ĩsihawim na ĩsiwasu'u nherẽ, tô sena wa ĩsiwasu'u. E marĩ wa. Ĩma waihu'u pese di, nima hawi we ĩmorĩzé hã duré nimomo za ĩmorĩzé hã. Tazahã, aima waihu'u za'ra wa'aba õ di, nima hawi we ĩmorĩzé hã duré nimomo za ĩmorĩzé hã. 15 Ti'ai ãma danhimirob'madâ'â na si te dahâimanazéb zarina da'ãma 're irowairébé za'ra wa'aba mo. Tane nherẽ, wa hã te da'ãma 're arowairébé mono õ di. 16 Tane nherẽ, dahâimanazéb zarina te da'ãma 're arowairébé mono da wamhã, tô sena wa za dahâimanazéb zarina te da'ãma 're arowairébé, ĩsiwaprosi õ wa. E marĩ wa. Ĩmama we ĩzatõrĩ'wa hã ĩsiré 're hâimana mono wa. 17 Ate za'ra wa'wa roti zahi na hã, ni'wam norĩ hã sisazei wẽ zahuré wamhã, te te irowasu'u zahuré zé hã, tô sena. 18 Tane wa hã ĩsihawim na wa 're ĩsiwasu'u. Ĩmama we ĩzatõrĩ'wa zama te duré te te 're ĩwasu'u.

19 Tawamhã farizeu norĩ hã te siwi sadanha, ãne:

— E mahãta tawamhã, aimama.

Zezusi hã ma sada'âbâ za'ra, ãne:

— Aima ĩwaihu'u za'ra wa'aba õ di. Duré Ĩmama zama aima waihu'u za'ra wa'aba õ di. Aima ĩwaihu'u pese za'ra wa'aba 'wa'âhã, Ĩmama hã te aré duré asiwi iwaihu'u 'wa.

20 Ãne ma tô Zezusi hã tinha, 'Re ihâimana u'âsi mono nhorõwa 'ri 'rãihâ ãma 'ri 'wawi wa'ra 're, te te dama rowahutu ré, rob'uiprazém na danhoprubzé, da te 're iséme mono zéb 'rata sab ré. Tane nherẽ, ni'wa hã te te âri õ di, zahadu ite bâdâ hã iwa waptã'ã õ wa, 'Re ihâimana u'âsi mono te te tãma ipisutuzé hã.

21 Tawamhã Zezusi hã te duré dama sina tinha, ãne:

— Wa za oto mo. Tawamhã te za ĩzô airĩtĩ za'ra wa'wa. Tane nherẽ, aiwasété ré te za atâ'â za'ra wa'wa za. Ĩmorĩzéb u hã, ãma ai'aba'réi waihu'u aba õ di za.

22 Tahawa te Zudeu norĩ hã sima nharĩ za'ra, ãne:

— Ãté te za siwĩ. Ãté tahawa te ãne tinha, “Ĩmorĩzéb u hã, ãma ai'aba'réi waihu'u aba õ di za.”

23 Tawamhã Zezusi hã te duré tãma nharĩ za'ra, ãne:

— A norĩ wa'wa hã ãme ti'ai ãma hã. Tazahã, wa hã hâiwa hawi, we ĩmorĩ. A norĩ wa'wa hã ti'ai ãma a'uwẽ, 're i'aihâimana za'ra wa'aba mono. Tazahã, wa hã ti'ai ãma a'uwẽ na 're ĩhâimana mono õ di. 24 Tahawa, wa tô aima nharĩ za'ra wa'wa, aiwasété ré, za 're i'atâ'â za'ra wa'aba mono na hã. “Wa hã tô Wa hã” na asiwi ĩzazei wa'aba õ wamhã, aiwasété ré, te za tô 're atâ'â za'ra wa'aba mo.

25 Tahawa te siwi sadanha, ãne:

— E 'wa hã a hã.

Zezusi ma sada'âbâ za'ra, ãne:

— Rowahutu na te sãna'rata hawim haré, wa tô 're ĩsiwasu'u, tô õ hã 're ĩhâimana mono na hã. 26 Marĩ na aihâimanazéb zarina, zahadu te aima irowasu'u za'ra wa'aba da hã ahâ di, marĩ hã duré te ai'ãma irowairébé za'ra wa'aba da hã. We ĩzatõrĩ'wa hã umnhasi za'ẽtẽ di. Tahawa, ta hã te te ĩma 're irowasu'u mono zéb zarina si, wa te tô te dama 're rowasu'u, ti'ai ãma 're idahâimana za'ra mono norĩ ma hã.

27 Tawamhã te te siwi sadaihu'u õ di, Timama te te tãma iwasu'u za'ra zém na hã. 28 Tahawa Zezusi hã te tãma nharĩ za'ra, ãne:

— Ti'ai ãma Dasiré Ipodo hã asiwi sasõmri aba wapsi, te za iwaihu'u za'ra wa'wa, Wa Hã na hã, duré marĩ hã ĩsihawi te 're i'ab'manharĩ mono õ na hã duré Ĩmama hã te te ĩma iwaihu'uzéb zarina si te 're irowasu'u mono na hã. 29 We ĩzatõrĩ'wa hã te ĩsiré 're hâimana u'âsi. Ĩsiwaprosi ĩhâimana da hã te te 're ĩrẽme mono õ di, te te tãma 're irowẽ mono zéb zarina si, te 're ab'manharĩ mono wa.

30 Tawamhã ãne hã imreme da te wapari za'ra wamhã, da'ahâ na ma tô saze za'ra ni.

31 Tawamhã Zezusi hã te Zudeu norĩ ma tinha, te te isaze za'ra norĩ ma, ãne:

— Asiptete sina ĩnhimiroti na 're aihâimana za'ra wa'aba mono wamhã, ĩzaze uptabi 'wa te za 're anomro aba mo. 32 Tawap si te za tô sena 'Re ihâimana u'âsi mono nhimiroti hã iwaihu'u za'ra wa'wa. Tawamhã tô sena ta hã te za aiwasété hawi asani za'ra wa'wa, asima iwẽ na 're aihâimana za'ra wa'aba mono da.

33 Tawamhã Zudeu norĩ hã ma tô ãne siwi sada'â:

— Wa norĩ hã Abra'ãhã nhihudu, wa 're wanomro. Niwa wawada'uri zarina watede'wai ma, wa te 're romhuri za'ra mono õ di. E niha te tane nherẽ, wama inharĩ za'ra, wasima iwẽ na, za 're iwahâimana za'ra mono na hã.

34 Tawamhã Zezusi hã ma ãma sada'âbâ za'ra, ãne:

— Tô sena wa za aima waihu'u za'ra wa'wa, ãne: Dawasédé hã da te 're 'manharĩ u'âsi za'ra mono wamhã, dawasété wi hã 're dawairébé waihu'u mono õ di, wada'uri zarina titede'wai ma romhuri'wa norĩ hã tinhib'ihâ'a wi 're iwairébé waihu'u mono õ ne. 35 Wada'uri zarina titede'wai ma romhuri'wa hã tinhib'ihâ'a sipoto na 're ihâimana u'âsi mono da hã waihu'u õ di. I'ra uptabi si te za isiré hã 're hâimana u'âsi. 36 Tahawa, I'ra hã aiwasété hawi te te asani za'ra wa'aba wamhã, te za tô asima iwẽ na 're aihâimana za'ra wa'aba mo oto. 37 A norĩ wa'wa hã Abra'ãhã nhihudu na ĩma aiwaihu'u pese za'ra wa'aba di. Tane nherẽ, te asõpré wa'wa, bâdâ hã aima ihâimana za'ra wa'aba zô, asiwi ĩwĩrĩ aba da hã, ĩnhimirowasu'u na ĩzaze za'ra wa'aba õ wa. 38 Ĩmama te te ĩma iwaihu'uzéb zarina, wa te tô te aima 're rowasu'u za'ra wa'wa. Tane nherẽ, a norĩ wa'wa hã aimama 're iwapari za'ra wa'aba mono zéb zarina te 're i'manharĩ za'ra wa'aba mo.

39 Tawamhã te Zezusihi ma duré nharĩ za'ra, ãne:

— Wa norĩ hã, Abra'ãhã nhihudu.

Zezusi hã ma sada'âbâ za'ra, ãne:

— Abra'ãhã nhihudu 'wa'âhã, isine romhuri hã te aré 're i'manharĩ za'ra wa'wa. 40 Tane nherẽ, te asima iwẽ za'ra wa'wa asiwi ĩwĩrĩ aba da hã, tô sena 'Re ihâimana u'âsi mono te iwaparizéb zarina, te aima rowasu'u za'ra wa'aba nherẽ. Abra'ã hã, ãne hã te te 'manharĩ õ di. 41 Aimama za'ra wa'aba nhimiromhuri hã te i'manharĩ za'ra wa'wa.

Tane nherẽ, ma Zudeu norĩ hã sada'âbâ za'ra, ãne:

— Wa norĩ hã siwa'ru da'ra na 're wahâimana za'ra mono õ di. Wamama za'ra hã misire, ta hã 'Re ihâimana u'âsi mono.

42 Tawamhã Zezusi hã te duré tãma nharĩ za'ra, ãne:

— 'Re ihâimana u'âsi mono hã, Aimama za'ra wa'aba 'wa'âhã, te aré asiwi 're ĩzawi pese aba mo. E marĩ wa. 'Re ihâimana u'âsi mono hawi we ĩmorĩ wa. Tahawa ãhã na hã wa ãme ĩhâiba. Ĩsi'uihâ na we ĩmorĩ õ di. Õ hã ma tô we ĩzatõ. 43 E niha bâ, aima ĩzadaihu'u za'ra wa'aba õ di. Ĩnhimirowasu'u hã wapari za'ra wa'aba da, asima wẽ za'ra wa'aba õ wa, te 're irowasu'u mono zé hã. 44 A norĩ wa'wa hã te aimama 'ra na 're aihâimana za'ra wa'aba mo, Wa'uburé 'ra na. Te duré asima iwẽ za'ra wa'wa, te te sima iwẽzé hã 'manharĩ za'ra wa'aba da. Ta hã te romnhana'rata hawim haré dapãrĩ'wa na 're hâimana. Duré tô sena rowasu'u iwẽ hã tãma wẽ õ di, tô sena ihâimanazé hã tãma hâimana õ wa. Dama sadawa nhipese wamhã, tô 're ihâimana mono zéb zarina, te za 'manha. E marĩ wa. Ta hã isadawa nhipe, dazadawa nhipese mama. 45 Tane nherẽ, asiwi ĩzazei wa'aba õ di, tô sena te 're rowasu'u mono wa. 46 Ai'reb za'ra wa'aba hã, e 'wa hã ĩwasédé te te ĩ'ãma hiri waihu'u pese di. Tô sena te 're rowasu'u mono wamhã, e niha bâ bété asiwi ĩzazei wa'aba õ di. 47 Ni'wa hã, 'Re ihâimana u'âsi mono nhib'a'uwẽ 're hâimana mono wamhã, te za wapa, 'Re ihâimana u'âsi mono mreme hã. Tazahã, a norĩ wa'wa hã wapari za'ra wa'aba õ di, 'Re ihâimana u'âsi mono tei õ wa.

48 Tawamhã Zudeu norĩ hã te duré tãma nharĩ za'ra, ãne:

— E tawamhã wa te ãma uwaimrami za'ra õ di, a hã Samaria hawim na hã duré wa'uburé ré, 're i'aihâimana mono na hã.

49 Tahawa Zezusi hã ma sada'âbâ za'ra, ãne:

— Mare di. Wa'uburé ré, 're ĩmorĩ õ di. Ĩmama hã wa tô te 're wazé pese. Tane nherẽ, a norĩ wa'wa hã asiwi 're ĩwazé wa'aba mono õ di. 50 Ĩ'ãma 're dawata za'ra mono zô, ĩsina 're ĩnhimnhasi mono õ di, wa hã. Misire ma tô te te sima 're wẽ ĩma, ĩ'ãma 're dawata za'ra mono da. Ta hã, Da'ãma Rowairébé'wa. 51 Tô sena wa za aima waihu'u za'ra wa'wa, ãne: Ni'wa hã ĩnhimiroti te te 're 'madâ'â pese mono wamhã, niwa idâ'â da hã, mare di.

52 Tawamhã Zudeu norĩ hã te Zezusihi ma nharĩ za'ra, ãne:

— Wa tô oto aiwaihu'u pese za'ra ni, Wa'uburé ré, 're aimorĩ na hã. Abra'ã hã ma tô dârâ. Uburé 'Re ihâimana u'âsi mono zadawa 'mahârâ'wa norĩ zama ma tô duré tidâ'â za'ra. Tane nherẽ, te inha, ãne: “Ni'wa hã ĩnhimiroti te te 're 'madâ'â pese mono wamhã, niwa dâ'â õ di za.” 53 E wamama Abra'ãhã nhipai u aipire na aihâimana bâ. Ta hã ma tô dârâ. 'Re ihâimana u'âsi mono zadawa 'mahârâ'wa norĩ zama ma tô duré tidâ'â za'ra. E 'wa hã bété, a hã. E aipire na te ãne hã asina irosa'ra.

54 Tawamhã Zezusi hã te duré tãma nharĩ za'ra, ãne:

— 'Râwi ĩsi'ãma 're ĩwata mono wamhã, ĩsi'ãma 're ĩwata mono zé hã, marĩ dai õ di. Ĩmama si te ĩ'ãma 're wata, ate 'Re ihâimana u'âsi mono za'ra wa'aba na 're iwasu'u za'ra wa'aba mono hã. 55 Tane nherẽ, ta hã aima waihu'u za'ra wa'aba õ di. Tazahã ĩma hã waihu'u pese di. Ĩma iwaihu'u õ na aima ĩsiwasu'u za'ra wa'aba 'wa'âhã, wa aré sadawa hapese, asine za'ra wa'aba. Tane nherẽ, ĩma waihu'u pese di tô. Duré isimiroti hã wa te te 're 'madâ'â pese. 56 Aihi'rata za'ra wa'wa Abra'ãhã ma, ma tô tirowẽ pese, apto'o ré we ĩmorĩzé bâdâ hã te te 'madâ'â da, 're simipari mono wa. Ta hã ma tô 'madâ we ĩmorĩzé hã. Tahawa tãma rowẽ uptabi di.

57 Tawamhã Zudeu norĩ hã te duré tãma nharĩ za'ra, ãne:

— Zahadu 50 na ai'ãma wahub õ di. E niha ma te merẽ tawamhã i'madâ, Abra'ã hã.

58 — Tô sena, wa za aima ĩsiwasu'u za'ra wa'wa. Abra'ã hã poto õ ré, wa 're ĩhâimana u'âsi, Wa Hã Tô. — Ãne ma tô Zezusi hã tãma siwasu'u za'ra.

59 Tahawa ẽne hã ma tô sada waibu za'ra. Tane nherẽ, Zezusi hã ma tô aima'u. Ma tô oto watobro, 'Re ihâimana u'âsi mono nhorõwa 'ri 'rãihâ 'wawi wa'ra hawimhã.