— Amosi, e marĩ ma te merẽ i'madâ.

— Si'õno 'masisi na inomro, rob'rã isipo ré hã! — Ãne wa tô ãma sada'â.

Tawamhã te duré ãne ĩma tinha:

— Rob'rãsutuzé hã ma tô oto wi, a'uwẽ Izaraéu nhihudu norĩ ma hã, rob'rã 're isipo za'ra mono, za oto da te 're isinarĩ za'ra mono ne. Ĩnhimihâzé hã te oto tãma iba'a zahu za'ra da hã, mare di. 3 Tô taha bâtâ na hã danho're upana te za dasiwa'õ si tihâiba, apito nhimiromhurizé 'ri 'rãihâ 'remhã. Duré da'ahâ uptabi na te za tadâ'â za'ra ni. Te za duré dahâiba hâ norĩ hã siwa'ru nimomo dasiwi sãmra za'ra ni. Taha wamhã, rob'é'é zawi di za. Wa hã Uburé Danhib'apito, wa tinha.

4 Isimarĩ'õ norĩ ma, 're irob'manharĩ wasété za'ra wa'aba mono norĩ, duré dama wapu na 're ihâimana za'ra mono norĩ wi, ihâimanazé tiwi 're i'uprosi za'ra wa'aba mono norĩ, ĩwapari za'ra wa'aba asiwi. 5 Ãne te asima 're inharĩ u'âsi za'ra wa'aba mo: “A'amo itém na dato isi'utõrĩ su'u da si waptu na, amnho, wa te wede za'ra hâ! Duré dawa'utuzé sabadu isi'utõrĩ su'u da si, amnho trigu wa te wede za'ra hâ, ipibuzé pire, wa te ãma 're ti'awi za'ra mono nherẽ, wa'âbâ wazu na wa te oto 're iwede za'ra mono da hã, senai õ na wa te dama 're ipire pibu za'ra mono zéb zarina, 6 duré amnho trigu iwasétére hã wa te oto dama 're iwede za'ra mono da hã. Isibrob'õ norĩ hã sirob'uiprazéb za'ra õ di za, marĩ wa'âbâ ãna te te dawi 're iwaibui mono te te ãma 're iwa'âbâ za'ra mono zéb da hã, duré rob'uiprazé ropisutu na te te dawi 're iwaibui mono, tipara'uza wapre te te ãma sima 're i'uipra za'ra mono wa'âbâ zéb da hã. Ãne wa, te za wama 're siwede za'ra, taré wama romhuri'wa na pawa'âbâ ãna te te wama 're romhuri za'ra mono da oto!”

7 Tahawa, Uburé Danhib'apito, a'uwẽ Izaraéu norĩ, tinho're na ãma 're iwata za'ra mono hã ma tô ropisudu hã sima 'manha ãne:

— Niwamhã ãma ĩpo're si'âri da hã mare di za, uburé marĩ iwasédé te te 're i'manharĩ za'ra mono zém na hã. 8 Ãne wa, te za ti'a hã popo. Duré te za uburé iwa 're idahâimana za'ra mono hã robzei'õ zé te, 're da'ru'ru. Ti'a hã hâimo si'réi mono nherẽ, te za duré apâ pi'reba si'ré, panho'u Nilu â ne hã. 9 Taha bâtâ na hã wa za abzuma wa'wam nherẽ, bâdâ isébré da hã 'manha. Taha zarina, bâtâ ro te te rob'uiwẽ ré hã, te za ti'a, robra hã suwa. Wa hã Uburé Danhib'apito, wa tinha. 10 Dato isa'ẽne asima 're i'manharĩ za'ra wa'aba mono hã, wa za ãma aiwi saprĩ za'ra wa'wa za, adâ'â hâiba u, 're idasi'rã'õtõ mono u. Tawamhã te za ai'ru'ru wa'wa, i'asõ're za'ra wa'aba upana. Robzei'õ zé te, dasi'uzazém na te za asi'uza za'ra wa'wa, da'uza ihâiro 'manharĩ na. Te za duré asi'rãpari za'ra wa'wa. Uburé te za a norĩ wa'wa hã ai'ru'ru wa'wa, damama i'ra misi hã tiwi 're idâ'â za'ra mono zô 're i'ru'ru mono ne. Ã hã te za uburé isé pire na si ti'rãsutu.

11 — Bâdâ hã te za oto wi, uburé daza'rui mono na mra, da te 're isépata za'ra mono zé ma, te irob'ruzé hã. Uburé te za mram na 're dahâimana za'ra, dasazéb zô dawi sô 're ro'wanhi'riti za'ra mono õ nherẽ. Duré 'rubu na te za 're dahâimana za'ra, â zô dawi sô 're rowaptâ'â za'ra mono õ nherẽ. Uburé te za mrab zépatazém na, duré 'rubu zépata na 're dahâimana za'ra, Uburé Danhib'apito mreme, da te 're iwapari za'ra mono zéb zô si. 12 Tahawa, te za õne u'â 're dasisa're, âporé Â warĩrĩ hawi, âporé Mediterãniu u. Hâiwa nhimire niwĩ ro 're ihâimana mono u te za duré 're dasisa're, duré bâtâ pusizém niwĩ daza'ru 're ihâimana za'ra mono norĩ u, Uburé Danhib'apito mreme zô 're darĩtĩ za'ra mono da. Tane nherẽ, da te dasiwi isõpẽtẽ za'ra da hã mare di za. 13 Taha bâtâ mono na hã, ai'reputu norĩ, azarutu norĩ me siptete na 're ihâimana za'ra mono norĩ hã te za 're simiza'rese'õ si'utõrĩ za'ra, 'rubu zé te. 14 Samaria ãma romhâibarĩ norĩ nhisi na, te te dama 're iropisutu za'ra mono norĩ hã, ãne te te dama 're inharĩ za'ra mono hã: “Wa hã wa ropisutu, ihâiba'õ Dã na isisi na”, duré niha wamhã, “Wa ropisutu, Beseba na ihâiba'õ nhisi na”, uburé te za ã norĩ hã rere. Niwamhã iwahutu zahu za'ra da hã mare uptabi di za. Wa hã Uburé Danhib'apito, wa tinha.