— 'Re ihâimana u'âsi mono, wawasédé wa'ãma 'madâ'â za'ra tõ da, wa ãma aiwi rowaptẽ. Ate a'uwẽ hã sib'uware di. E niha wa za bété wahâiba ré ré 're wahâimana za'ra.

3 Tawamhã tinhimirosa'rata na ma tô ãma saprĩ. Ãne ma te ãma ĩzada'â:

— A hã marĩ i'madâ'âzéb zarina, iromhâimana da hã mare di za.

4 Uburé Danhib'apito, ĩnhotõ 'rowim ne marĩ ihâiba amo te duré 'madâ'â da, ma tô ĩma hâi'ré: Tite a'uwẽ ma, unhama na za oto te te rob'manharĩ da, te te sima irowairébézé hã wa tô 'madâ. Ta hã uzâ, ma tô âporé ti'ai 'rowi ihâiba hã te te â'ré. Duré uburé pese rob're norĩ hã ma tô te te uprosi. 5 Uburé Danhib'apito ma, wa tô tinha ãne:

— 'Re ihâimana u'âsi mono, ma'ãpé ãma rosazâri! Ate a'uwẽ hã sib'uware di. E niha wa za bété wahâiba ré 're wahâimana za'ra.

6 Tawamhã tinhimirosa'rata na te te ãma saprĩ wa, ma tô ãma ĩzada'â, ãne:

— Ãne zama tô iromhâimana da hã mare di za.

7 Uburé Danhib'apito ãne zama te 'madâ'â da hã, ma tô duré ĩma hâi'ré: Ta hã te 'ri 'wawi wa'ra prumu na awa'awi si te te isõré 'rata 'râwimhã tihâiba. Isib'rata te prumu hã tihâiba. 8 Ta hã te ãne ĩzadanha:

— Amosi, e marĩ te i'madâ.

— Prumu, marĩ nhoré rui'õzé! — Ãne wa ãma sada'â.

Ãne te ĩma tinha:

— Wa za aima hâi'ré, ĩnhib'a'uwẽ i'uwaibaba 're ihâimana mono õ zé hã. 'Ri 'wawi wa'ra nhi'oto ne, prumu na ipibuzém nhiti, da te 're isõré za'ra mono hã. Niwamhã ĩnhib'a'uwẽ ãma iwasédé hã te ãma 're i'madâ'â mono õ na 're ĩhâimana mono da hã mare di za. Wa za tô te ãma 're 'madâ'â u'âsi. 9 Uburé ĩ'ãma dawatazé, 're isimasa mono norĩ hã, duré Izaraéu ti'ai ãma ihâiba amo norĩ dawatazéb da, 're isimasa mono hã, te za dasiwi uprosi za'ra ni. Wa za duré uprosi, apito Zeroboã hã. Isihudu norĩ zama wa za uprosi.

10 Amazia, sasedoti Bétéu ãma 're ihâimana mono hã ma tô ãne Izaraéu te, apito Zeroboãhã ma romreme hã tisõ:

— Amosi hã ma tô sima rowa'õtõ, asada hâimana da, a'uwẽ norĩ wa'wa. Timreme hã ma tô tihi, daza'rui 'remhã isimimnha hã. 11 Ta hã te te nasi ãma inharĩzé hã ãne: “Zeroboã te za dârâ, dasi'wapé na. Duré a'uwẽ Izaraéu te za waibu ni, da te simroi mono da, sito pese na dama 're hâimana za'ra mono da, tiza'ru nhiti.”

12 Taha pari te Amazia, Amosihi ma hã tinha ãne:

— 'Re ihâimana u'âsi mono zadawa 'mahârâ'wa, ma'ãpé ã hawi aimorĩ! Apâ aimorĩ, Zuda asipti'ai u, tamep si 'Re ihâimana u'âsi mono mreme na 're irob'mahârâ mono zarina asi'uparizéb da, 're romhuri mono da. 13 Ãme Bétéu ãma dama 're irob'mahârâ mono zé hã te za oto isazâ. E marĩ wa. Ã hã 'ri, apito iwa 're iwata mono zé wa, duré ã hã 'ri, danhipai u ipire na daza'rui 're, 're sa mono wa, 'Re ihâimana u'âsi mono ãma 're idawata za'ra mono zéb da hã.

14 Amosi, ma te ãma sada'â ãne:

— Wa hã, 'Re ihâimana u'âsi mono zadawa 'mahârâ'wa na ĩnhimiromhuri õ di. Duré taha na ĩsi'uparizéb da, te 're romhuri mono õ di. Pone'ẽrebâ 'madâ'â'wa na si, duré rob'rã figu wede 'madâ'â'wa na zama wa tô 're ĩhâimana. 15 Tane nherẽ, Uburé Danhib'apito, pone'ẽrebâ 'madâ'â na ĩnhimiromhuri te irẽme da hã, ma tô ĩma ti'ru. Ma tô ĩma tinha ãne: “Mo oto aimorĩ, ĩnhib'a'uwẽ Izaraéu ma, ĩzadawa 'mahârâ'wa na tãma aihâimana za'ra da.” 16 Tahawa, ma'ãpé Uburé Danhib'apito mreme hã wapari. A hã te inha, ãne: “Re ihâimana u'âsi mono zadawa 'mahârâ pipa na Izaraéu norĩ zada, ãma aihâimana tõ.” 17 Tane nherẽ, te duré Uburé Danhib'apito hã we aima tinha ãne: “Aimro te za aiwi aipi'ra, siwa'âbâ zô aibâ ma, 're isi'rui mono na tihâimanazéb u hã, ãme 'ri nho'õmo ãma. Ai'ra si'aibâ norĩ hã, duré ai'ra sipi'õ norĩ hã te za dasi'wapé na uburé pese aiwi tidâ'â za'ra za. Duré asa'ru hã te za a'uwẽ norĩ te te sima wa'õtõ. A hã te za atâ za, 'Re ihâimana u'âsi mono waihu'u'õ'wa norĩ nhipti'ai ãma. Tawamhã a'uwẽ Izaraéu hã te za waibu ni, isipti'a nhiti da te simroi mono da, sito pese na dama 're hâimana za'ra mono da oto.”