Izaraéu ma, rob'manharĩ pipa zé wasu'u
6
Aima za'ra wa'aba hã tô sena iropipa uptabi za, Zeruzalẽ ãma asima iwẽ na 're i'aihâimana za'ra wa'aba mono norĩ, duré Samaria ãma aihâtâ'â ãna 're i'aihâimana za'ra wa'aba mono norĩ, duré ã hã ti'ai wa'õtõ nho'u isa'ẽne Izaraéu ãma aipire na 're i'aihâimana za'ra wa'aba mono norĩ, duré 're dapawaptob za'ra wa'aba mono da, da te aiwi 're irowaptẽrẽ za'ra wa'aba mono norĩ! 2 Ma tô a'uwẽ norĩ ma ãne na 're inharĩ za'ra wa'aba mo: “Ma'ãpé 'ri nho'u Calne na isisi 'madâ'â za'ra wa'aba da, ai'aba'réi wa'aba. Taha parimhã te za duré 'ri nho'u Hamati na isisi isa'ẽtẽ u ai'aba'réi wa'wa. Ta hawi te za duré oto aihutu 'wa, Gati na 'ri nho'õmo nhisi u filisteu norĩ nhipti'ai 'remhã. E ta norĩ hã a'uwẽ isibro pese uptabi bâ wanhipai u za'ra. Duré e isa'ru za'ra hã isa'ẽtẽ uptabi bâ, wate daza'ru nhipai u hã.” 3 A norĩ wa'wa, asima wẽ za'ra wa'aba õ di, ãma asimizaze za'ra wa'aba da hã, aima rob'manharĩ za'ra wa'aba zé bâdâ oto 'râwim na hã. Tane nherẽ, asimirob'manharĩ wasété za'ra wa'aba zéb zarina, te za ropipazé bâdâ hã iwa waptã'ã su. 4 Aima za'ra wa'aba hã tô sena iropipa uptabi za, dato isa'ẽtẽ si aima iwẽ za'ra wa'aba norĩ, dasimasisizé ihâ tete'õ wap si 're i'asimi'wara aba mono norĩ hã, pone'ẽrebâ zéré mapure i'rare nhi si powawẽ zapu hâipese nhi me 're ihuri aba mono norĩ hã! 5 A norĩ wa'wa, apito Davi tinho're te te 're i'manharĩ mono ne, te asõ're hã asima 're i'manharĩ za'ra wa'aba mo. Te duré asima 're iwẽ za'ra wa'aba mo, ãma 're i'asõ're za'ra wa'aba mono da si, rowamremezé harpa isisi na hã. 6 Te duré hâsizé isa'ẽtẽ 'rep si uva 'rãi wa'u isé hã 're i'âhuri aba mo. Duré dasisadazezé iwa'âbâ za'ẽtẽ na si te 're asisada ze za'ra wa'aba mo. Tane nherẽ, asa'ru za'ra wa'aba 're, iromhâimana pipa zé hã te te aiwi 're robzei'õ za'ra wa'aba mono õ di. 7 Tahawa, te za a norĩ wa'wa hã uimrehẽne dawana aiwaibui aba ni, asa'ru za'ra wa'aba nhiti, da te asimroi wa'aba mono da, asito pese na dama 're aihâimana za'ra wa'aba mono da. Ãhã wa, dato isa'ẽne rowẽzéb da, aima 're ihâimana zahu za'ra wa'aba mono da hã mare di za oto.8 Uburé Danhib'apito Isiptete uptabi, ãne te 'râwi sima ropisutu:
— 'Ri nho'u Samaria hã wa za isitob'ru norĩ nhib'rata tãma sõmri za'ra, uburé marĩ iwa ihâimana za'ra te te isõpẽtẽ za'ra mono hã te te 'wasari da. E marĩ wa. A'uwẽ Izaraéu 're isi'madâ'â ze za'ra mono zé hã ĩma 'rui uptabi wa. Duré ta norĩ te, apito nhimiromhurizé 'ri 'rãihâ norĩ hã ĩma 'rui uptabi wa.
9 Nimahã 'ri're 10 na a'uwẽ hã hâimana za'ra wamhã, te za uburé pese ai'utõ. 10 Duré ni'wa, tisisãnawã hâiba hâ 'ri para hawi te te wazere da, duré te te 'rãmi da, wisi wamhã, te za da'mazadanha za, zahadu dahâiba ré da'maihâimana zô 'ri paramhã: “E zahadu daré hã 'ri paramhã.” Tawamhã ihâiba amo te za ãma sada'â za, ãne: “Mare di, da'maihâimana õ di. Robaba di.” Tawamhã imorĩ'rada hã te za tãma tinha za, ãne: “Ari'iwi asa na! Uburé Danhib'apito nhisi na, wa te inharĩ da hã, mare di za duré.” 11 E marĩ wa. Uburé Danhib'apito te za uburé 'ri isa'ẽtẽ norĩ ãma, duré isurure norĩ ãma tinhimiroti zahi hã 'manha za, uburé pese za isi'utõrĩzém na hã.
12 E awaru norĩ hã ẽne isimi'wara norĩ na hã wara waihu'u pese di. E duré powawẽ norĩ, âporé na ti'ai hâipo'ozé hã te te sari waihu'u pese di. Mare di. Tane nherẽ, a norĩ wa'wa i'uwaibaba na marĩ na dama 're rowairébé za'ra wa'aba mono da nherẽ, te ro isé si dama 're isani za'ra wa'aba mo. I'uwaibaba õ na si te dama 're irowairébé za'ra wa'aba mo, i'uwaibaba na rowairébézé wa'rãmi. 13 A norĩ wa'wa hã ma tô 're asi'madâ'â ze za'ra wa'aba mo, 'ri nho'u Lo-Deba na isisi ãma ai'uté za'ra wa'aba wẽ te. Ãne te duré asima inharĩ za'ra wa'wa: “Wa norĩ hã 'râwi wanhiptete na si wa tô Carnaĩ ãma hã ai'uté za'ra ni.”
14 Uburé Danhib'apito, 'Re ihâimana u'âsi mono Isiptete-Uptabi hã te tinha, ãne:
— A'uwẽ Izaraéu norĩ, wa za a'uwẽ aimawi ma rob'ru za'ra, asa'rui wa'aba u sisisi da hã. Tawamhã te za uburé na ai'ãma ro'wa'rutu za'ra wa'aba ni, Lebo-Hamati hawi hâiwa nhimi'e niwĩmhã, romharé Araba na isisi u, hâiwa nhimire niwĩmhã.