3 Uburé Danhib'apito 'Re ihâimana u'âsi mono hã te tinha, ãne:

— Nimahã 'ri nho'u, miu na aibâ norĩ dasi'wapéi u si'aba'ré da, te te tãma irob'ru za'ra hã, te za apâ ni'wam norĩ si 100 na ihâiba na hâiba ré sina siri za'ra. Duré 100 na ihâiba na aibâ norĩ ma, te te tãma rob'ru za'ra wamhã, te za 10 na si ihâiba na apâ sina siri za'ra.

4 Uburé Danhib'apito te duré a'uwẽ Izaraéu norĩ ma tinha, ãne:

— Ma'ãpé apâ ĩtẽme aipizari za'ra wa'aba, ai'utõrĩ aba ãna aihâiba ré 're aihâimana za'ra wa'aba mono da. 5 Tane nherẽ, Bétéu ãma hã, Gilgau ãma hã, duré Beseba ãma hã ĩzô asõpré wa'aba tõ. E marĩ wa. A'uwẽ Gilgau ãma hã za da te waibui wa, sito pese na dama 're hâimana za'ra mono da, ti'ai wa'õtõ nho'õmo hawi da te simroi mono wamhã. Ãhã wa, Bétéu 'ri nho'u hã te za oto sipru pese na tihâiba za.

6 Uburé Danhib'apito tẽme ma'ãpé apâ aipizari za'ra wa'aba. Tawapsi ai'utõrĩ aba ãna aihâiba ré, te za 're aihâimana za'ra wa'aba mo. Apâ ĩtẽme aipizari za'ra wa'aba õ wamhã, õ hã te za unhama ro'o ne we si'ra, Izaraéu ti'ai wa'õtõ nho'u te te uprosi da. Duré Bétéu ãma hã ni'wa uzâ te te wĩrĩ waihu'u õ di za. 7 A norĩ wa'wa i'uwaibaba na marĩ na dama 're rowairébé za'ra wa'aba mono da nherẽ, te i'uwaibaba õ na si dama 're irowairébé za'ra wa'aba mo. Taha zarina te ro isé hã dama 're isani za'ra wa'aba mo. Duré 're wazéb za'ra wa'aba mono õ di, we ãma 're idahâimana za'ra mono zé hã.

10 A norĩ wa'wa ma tô 're asiti'ru za'ra wa'aba mo, i'uwaibaba na dama rowairébézém na ro'wapéi'wa norĩ zada. Te duré 're i'ruiwapari pese za'ra wa'aba mo, sena na tisiwasu'u na te te 're inharĩ za'ra mono norĩ hã. 11 Isibrob'õ norĩ hã te duré 're iwati pese za'ra wa'aba mo. Asiptede te duré sada 're i'manharĩ za'ra wa'aba mo, amnho trigu te te aima 're sõmri za'ra wa'aba mono da hã. Tahawa, ẽtẽ na 'ri iwẽ uptabi, asima 're i'manharĩ za'ra wa'aba mono 'remhã, 're i'aihâimana za'ra wa'aba mono da hã mare di za. Duré uva 'ru iwẽ uptabi 'rãi wa'u hã niwamhã 're i'âhuri aba mono da hã mare di za. 12 Ĩma waihu'u pese di, aiwasété za'ra wa'wa i'ahâ uptabi na hã, duré aiwasédé ipire uptabi 're i'manharĩ za'ra wa'aba mono zém na hã. I'uwaibaba na 're ihâimana za'ra mono norĩ hã te 're iwati pese za'ra wa'aba mo. Duré rob'uiprazé te pi'uriwi dawi asima 're iwaibui wa'aba mo, i'uwaibaba na dama rowairébézé hã dawi ãma 're si'oto za'ra wa'aba mono da. Duré isibrob'õ norĩ ma, i'uwaibaba na rowairébézé hã 're wazéb za'ra wa'aba mono õ di. 13 Tahawa, rowaihu'u wẽ 'wa norĩ hã te ari'iwi mreme ãna 're hâimana za'ra. E marĩ wa. Tô ãhã bâtâ mono na romhâimanazé hã wasété uptabi wa.

14 Asima 're asõpré wa'aba mono, marĩ i'uwaibaba si 're i'manharĩ za'ra wa'aba mono zéb zô. Mare di, i'uwaibaba õ na marĩ 're i'manharĩ wasété za'ra wa'aba mono na 're i'aihâimana za'ra wa'aba mono zéb zô hã. Ãne wamhã, te za tô sena na 're inharĩ za'ra wa'aba mo, Uburé Danhib'apito, 'Re ihâimana u'âsi mono Iwaihu'u pe Isiptete-Uptabi hã asiré 're ihâimana za'ra wa'aba mono na hã. 15 Ma'ãpé uburé marĩ iwasédé 're 'ruiwapari u'âsi za'ra wa'aba mono. Iwẽ si te za asima 're isawi pese za'ra wa'aba mo. Te za duré 're i'manharĩ za'ra wa'aba mo, dama rowairébézéb ãma i'uwaibaba na si dama rowairébézé hã da te dasima ãma 're i'uwaimrami za'ra mono da si. Ãhã wamhã, Uburé Danhib'apito, 'Re ihâimana u'âsi mono Isiptete-Uptabi hã ãté te za da'ãma 're siwamri, tinhib'a'uwẽ isi'atarẽme norĩ ãma hã.

16 Uburé Danhib'apito, 'Re ihâimana u'âsi mono Iwaihu'u Pese Uptabi te tinha, ãne:

— 'Ri nho'õmo mono bâ te za robzé te, 're dazadari za'ra za. Duré 'ri nhi'ridi hã te za da'ahâ uptabi na dasiwi sitom ni, 're ida'ru'ru mono hã. Tawamhã robzuri'wa norĩ zô zama te za tahãsi ni, idasi'utõrĩ hâiba na dame 'ru'ru da, tisiwa'õ na dapawapto'wa norĩ siré. 17 Uburé te za uva 'ru na ta'ru'ru ni. Ãne te za uburé tiromhâiba, wa hã za we ĩmorĩ wa, te aihâ za'ra wa'aba da. Wa hã Uburé Danhib'apito, wa tinha.

18 A norĩ wa'aba ma hã iropire za, Uburé Danhib'apito te, bâdâ za we iwisizéb zô i'asimipari za'ra wa'aba ma. E marĩ da, ma tô ãhã bâdâ hã asima iwẽ za'ra wa'wa. Ta hã te za robra na si tiromhâiba za, rowa'a ãna. 19 Aibâ, hu'u zérépa wi simani da, wara nherẽ, robzahi ursu te te oto isõpẽtẽ ne, te za aima tiromhâimana za'ra wa'wa. Duré ni'wa tinhorõwa u sébré wa, tinhib'rada 'ri na'rata na ãma si'upari da, te te hiri ré, wahi te te isari ne, te za tô tiromhâiba. 20 Uburé Danhib'apito te, bâdâ hã tô robra na si te za tihâiba. Rowa'a na iromhâimana da hã mare di za. Robra uptabi di za.

21 Uburé Danhib'apito te tite a'uwẽ ma tinha, ãne:

— Wa hã wa te te 're 'ruiwapari pese, dato ĩma 're i'manharĩ za'ra wa'aba mono zé hã. Duré ĩma 're i'ai'rã'õtõ wa'aba mono zé hã te te ĩma 're rowẽ zani mono õ di. 22 Abaze zata na ĩma 're i'asõprub za'ra wa'aba mono hã te ĩsima 're wẽ mono õ di, duré amnho na danhoprubzé hã, duré abaze ihâipese na ãma irowẽ za'ẽtẽ na 're i'asõprub za'ra wa'aba mono zé hã. 23 Ma'ãpé sahâri za'ra wa'aba, ĩma 're i'ai'rã'õtõ aba mono zéb ãma, asõ're na 're irobruru'u za'ra wa'aba mono zé hã. Te ĩsima wẽ zahu õ di oto, harpa rowamremezém na ropta'azé te iwapari da hã. 24 Taha wa'rãmi wa ĩsima wẽ upta, â 're i'âpusi mono 're ipraba za'ra mono ne, sena na i'uwaibaba na si dama rowairébézé hã sina hâ'â pese da, duré sena na 're idahâimana za'ra mono zé hã, pa nho'õmo â praba nhimizahâri ãna ihâimana ne, hâimana da hã.

25 — A'uwẽ Izaraéu norĩ, e ma tô abaze zata na, duré amnho na danhoprubzém na ĩma 're asõprub za'ra wa'aba mo, 40 na wahub 'remhã supara 'ré na rop si 're irosa'wari mono na 're anomro aba mono ré hã. Mare di. 26 Taha wa'rãmi, te za oto Sicuti na ihâiba'õ nhisi hâibarĩ hã duré Quium na wasi hâibarĩ nhisi hã 're i'wasari aba mo, ãma 're aiwata za'ra wa'aba mono da, asima 're i'manharĩ za'ra wa'aba mono hã. Ãhã hâibarĩ norĩ hã te za tô 're i'wasari aba mo, 27 Damascu u, te asimroi wa'aba mono wamhã, aipawa'âbâ ãna tãma 're romhuri za'ra wa'aba mono da hã. Wa hã, Uburé Danhib'apito, Ĩwaihu'u pese-uptabi, wa tinha.