Samaria ãma, Izaraéu nhihudu nhipi'õ norĩ wasu'u
4
'Ri nho'u Samaria ãma pi'õ 're i'aihâimana za'ra wa'aba mono norĩ, ma'ãpé ã hã wapari za'ra wa'aba, powawẽ ihâipe Basã ãma 're isimasa mono ne, aihâipese na si asima 're irowẽ za'ra wa'aba mono hã. A norĩ wa'wa hã te marĩ zô tiwi 're iro'wanhi'riti za'ra mono norĩ ma, 're irob'manharĩ wasété za'ra wa'aba mo. Te duré isimarĩ'õ norĩ hã 're iwati pese za'ra wa'aba mo. Aimro norĩ wi, te duré 're iwaptẽrẽ u'âsi za'ra wa'aba mo, uva 'rãi wa'u isé hã te te aima 're 'wasari aba mono da, 're i'âhuri aba mono da hã. 2 Wa hã, Uburé Danhib'apito, ĩnhisi iwazéb zahi iwẽ uptabi na wa za ropisutu, bâdâ za we iwisizém na, azo na pe'a, da te 're waibui mono wa, da te 're i'wani za'ra mono ne, azo 'wa nhi'oto na da te ai'ãma irobâdâ za'ra wa'aba mono da hã. Ãne wamhã, a norĩ wa'wa hã tiwi i'ai'masimani aba da hã, mare uptabi di za. 3 Tawamhã a norĩ wa'wa hã te za asisarina misisi nasi aiwairébé 'wa, 'ri 'wawi wa'ra isipru hawimhã. Hermo na ẽtẽ nhisi nho'õmoi baba te za dasiwi asãmra aba ni.Izaraéu norĩ, siwẽ'õ za'ra da, te te sima iwẽ za'ra õ zé wasu'u
4 Uburé Danhib'apito 'Re ihâimana u'âsi mono, te tinha ãne:
— A'uwẽ Izaraéu norĩ, e te tô asima iwẽ za'ra wa'wa, 're i'aiwasété za'ra wa'aba mono zé hã. Tane ze te bâ, ma'ãpé Bétéu ãma duré Gilgau ãma 'Re ihâimana u'âsi mono ãma 're idawata za'ra mono zém norĩ u, ai'aba'réi wa'aba, tame asima iwẽ na 're i'aiwasété za'ra wa'aba mono zé hã waibui wa'aba da! Mararé nhidâpâsi te za abaze zata na tãma 're asõprub za'ra wa'aba mo. Duré si'ubdatõ bâdâ si'utõrĩ mono nhidâpâ te za aipawa'âbâ arĩ hã tãma 're isõmri za'ra wa'aba mo. 5 Ma'ãpé i'u'ẽtẽ wapu na 'Re ihâimana u'âsi mono ma, ãma tãma irowẽzéb da hã asõprub za'ra wa'aba. Taha parimhã te za aiwairébé 'wa za, uburé norĩ ma, asapa'abâ asihawim na i'manharĩ za'ra wa'aba zé hã dama wasu'u za'ra wa'aba mono da. E marĩ wa. Ãne hã 're 'manharĩ za'ra wa'aba mono da, tô asima 're wẽ uptabi za'ra wa'aba mono wa.
6 — Wa hã wa tô uburé 'ri nho'õmo mono na dasa zô ro'wanhi'riti da hã 'manha, mrab uptabi na uburé dahâimana za'ra da hã. Ãne nherẽ, a norĩ wa'wa hã apâ ĩtẽme aipizari za'ra wa'aba õ di. 7 Tã ta'a da hã, wa hã te tãma sa'réi õ di, si'ubdatõ a'amo imorĩ 'remhã roptehârizé hâimana wana ré hã. Nimahã 'ri nho'õmo ãmap si tã sisa'wari da hã, wa tô 'manha. Ihâiba amo norĩ u sisa'wari tõ da, wa tô duré 'manha. Rob're te te idi'i mono da si hã, wa tô duré 'manha. Rob're ihâiba amo norĩ u ta'a tõ da hã, wa tô duré 'manha. Tahawa, tamemhã ma tô uburé pese 'ré za'ra mono. 8 Tawamhã duré 'ri nho'õmo hawi, 'ri nho'u ihâiba amoi u, â zô 're darĩtĩ za'ra mono da hã, ma tô 're danomro. Tane nherẽ, da te 're sõpẽtẽ waihu'u za'ra mono õ di, â sa'ẽtẽ na ihâimana hã, 'rubu da te ãma dasima 're isimroi mono da hã aré. Ãne nherẽ, a norĩ wa'wa hã duré apâ ĩtẽme aipizari za'ra wa'aba õ di. Wa hã, Uburé Danhib'apito, wa tinha.
9 — Wa hã wa tô rowa'u'u wa'ro uptabi na, duré rob're norĩ hâzé ipipa uptabi na aima rob'manharĩ wasété za'ra wa'wa. Duré 'riti norĩ hã ma tô rob're te te siwi uprosi, uva 'ru hã, rob'rã figu wede norĩ hã, duré azeitona wede hã. Ãne nherẽ, duré ĩtẽme aipizari za'ra wa'aba õ di. 10 Duré marĩ ipipa uptabi asisiwib za'ra wa'aba waptã'ã da hã, wa tô 'manha, Ezitu da, ĩhâimana wa, te tãma i'manharĩ ne. Wa tô 'manha, ai'reputu norĩ a'ubuni wi dasi'wapé na si'utõrĩ da hã. Duré isitob'ru norĩ awaru na dasi'wapézé te te tiwi 'mapraba za'ra da hã wa tô sa'ré za'ra. Duré ihâiba wahu 'ro, 'ri tẽme te te ropéi mono da hã, wa tô tãma 'manharĩ za'ra. Ãne nherẽ, ĩtẽme aipizari za'ra wa'aba õ di. Wa hã, Uburé Danhib'apito, wa tinha.
11 — Wa hã wa tô 'ri nho'õmo norĩ hã uprosi, Sodoma duré Gomora me, te tãma i'manharĩ zahuré ne. A norĩ wa'wa, parawã pré pese õ ré, unhama hawi da te iwazere ne, ma tô aimani za'ra wa'wa. Ãne nherẽ, duré ĩtẽme aipizari za'ra wa'aba õ di. 12 Tahawa, a'uwẽ Izaraéu norĩ, wa za tô aihâ za'ra wa'wa. Duré za te aihâ za'ra wa'aba na dâ'âsina, ma'ãpé asimire sina aihâimana za'ra wa'aba, ate 'Re ihâimana u'âsi mono asiwi sõpẽtẽ aba da hã. Wa hã, Uburé Danhib'apito, wa tinha.
13 'Re ihâimana u'âsi mono, ẽtẽ 'rãihâ norĩ hã ma tô te te apoto. Rowa'u hã ma duré 'manha.
Õ hã te a'uwẽ norĩ ma tinhimirowa'õno hã te te tãma 're ahâi'ré u'âsi.
Rowa'a, mara u 're sipizari mono da, te õ hã te te 're 'manharĩ u'âsi.
Ẽtẽ 'rãihâ norĩ nhisiwi te duré ta hã 're mo.
Ãne isisi hã: Uburé Danhib'apito, 'Re ihâimana u'âsi mono Isiptete-Uptabi.