3
A'uwẽ Izaraéu norĩ, Uburé Danhib'apito, aihâiba za'ra wa'aba na te te inharĩzé hã ma'ãpé wapari za'ra wa'aba, Ezitu hawi we te te i'ai'awazere aba mreme hã:2 — Uburé ti'ai mono bâ 're idahâimana za'ra mono norĩ nhipai u, a norĩ wa'aba si ĩnhib'a'uwẽ na ĩma 're aihâimana za'ra wa'aba mono da hã wa tô ĩsima aipisutu za'ra wa'wa. Tahawa, uburé aiwasédé 're i'manharĩ za'ra wa'aba mono zarina, wa za aihâ za'ra wa'wa.
'Re ihâimana u'âsi mono zadawa 'mahârâ'wa, ari'iwi ihâimana waihu'u õ zé wasu'u
3 E maparane a'uwẽ norĩ hã te za siré tineb zahuré, ãma sisaze siromo zahuré õ nherẽ.
4 E hu'u zérépa marãi ãma abaze te te 'masãmri õ nherẽ, te za tiwairõ.
E te za duré hu'u zérépa hâiba tébre hã marĩ te te 'ma'âri õ nherẽ, ab're 'remhã nasi ti'é'é.
5 E sire te za timramizéb u hã aime, ĩsaire da te iwa sô hiri õ nherẽ.
E te za duré abaze mramizé hã si'uihâ na aiwasihu, abaze hã te te 'ma'âri õ nherẽ.
6 'Ri nho'õmo ãma marĩ isimimnha watobro wamhã, dapo're pu'uzéb da, danhimnhihârâzé da te hãsi wamhã, e tãma dapahi za'ra õ di za bété.
Duré e 'ri nho'õmo nhisiwi te za niha na dama rob'manharĩ pipa zé hã waptãrã, Uburé Danhib'apito marĩ watobro da, te te tãma rob'rui õ nherẽ.
7 Tane, e Uburé Danhib'apito 'Re ihâimana u'âsi mono te za marĩ hã 'manha, tite romhuri'wa tizadawa 'mahârâ'wai ma, niha na marĩ te te tãma hâi'ré õ nherẽ.
8 Hu'u zérépa wairõ wamhã, e ni'wa hã tãma pahi õ di za.
Duré Uburé Danhib'apito 'Re ihâimana u'âsi mono te te nharĩ wamhã, e 'wa hã bété isadawa 'mahârâ na hâimana õ di za.
'Ri nho'u Samaria ma iromhâimana wasété zé wasu'u
9 Ma'ãpé Asidodi ãma duré Ezitu ãma apito nhimiromhurizé 'ri 'rãihâ ãmam norĩ ma, ãma rob'mahârâ, ãne: “Ma'ãpé asi'rã'õtõ aba, Samaria ẽne te te siwi i'uirĩ ãma, 'madâ'â za'ra wa'aba da, 'ri nho'õmo ma, niha na rowaihu'u'õ we ihâimanazé hã, a'uwẽ norĩ marĩ iwasédé te te 're i'manharĩ za'ra mono u'âbâmhã.”
10 Uburé Danhib'apito, te tinha, ãne:
— A'uwẽ Samaria ãma 're ihâimana za'ra mono norĩ, sena na 're ihâimana za'ra mono zé te te 're i'manharĩ za'ra mono da hã tãma waihu'u za'ra õ di. Ite za'ra apito nhimiromhurizé 'ri 'rãihâ norĩ 'remhã, marĩ te te dawi 're isimi'uri za'ra mono zém na si, te te sô 're idanhimroi mono na, ma tô te te ãma siwi 're 'ri nhito. 11 Tahawa, i'rui'wa norĩ ite ti'ai wa'õtõ nho'u te te siwi uirĩ wamhã, te za 'ri siptete na 're isimasa mono norĩ hã siwi uprosi. Te za duré apito nhimiromhurizé 'ri 'rãihâ norĩ wa, uburé marĩ 're isimi'wara mono hã siwi 'wasa.
12 Uburé Danhib'apito, te duré tinha, ãne:
— Hu'u zérépa, pone'ẽrebâ te te 'mai'âri wamhã, i'madâ'â'wa ite si'uiwa si, niwamhã, ipo're si te te tiwi iwazere ne, tane te za Izaraéu norĩ ni'wam norĩ si umro na Samaria ãma 're ihâimana za'ra mono hã sisõ'reptu za'ra, waptâ ihâtete'õ wa, ãhã na 're iwa'utu za'ra mono norĩ hã. 13 Ma'ãpé te inharĩzé hã wapari za'ra wa'aba. Duré ĩnhib'a'uwẽ Zacoho nhihudu norĩ, ãne na ãma po're pu'u za'ra wa'aba. Wa hã Uburé Danhib'apito 'Re ihâimana u'âsi mono, Ĩwaihu'u Pese Uptabi, wa tinha. 14 Wa hã, Izaraéu norĩ iwasété za'ra zarina, te tãma rob'manharĩ za'ra wamhã, wa za Bétéu ãma danhoprubzéb zatazéb da, ẽtẽ za'ra hã prub za'ra. Duré uburé danhoprubzéb zatazé sasé mono bâ maparane si'uiwa na isimasam norĩ hã wa za prub za'ra. Tawamhã te za ti'ai u hã rere. 15 Wa za duré 'ri ahâ ãma danhorõwa mono hã duré rom na danhorõwa mono hã te dawi apru. Danhorõwa iwa'âbâ za'ẽtẽ mono iwaipo hã duré uhâ nhisi'reti 'wa'rata hi poto na 'ri wamnarĩ mono hã uburé wa za pru pese za'ra. Wa hã, Uburé Danhib'apito, wa tinha.