— A'uwẽ norĩ Moabi na romnhisi ãma 're ihâimana za'ra mono norĩ hã wasété za'ẽtẽ uptabi za'ra di. Wasété ahâ za'ra wa, wa hã wa za hâ za'ra. Edõ ãma apito hâiba te te siwi iwazéb õ zarina, ma tô siwi hâiba zata pese, si'ru'a da hã. 2 Tahawa, daza'ru Moabi na wa za unhama na ãma ro'o. Tô õ uzâ hã te za duré Queriote na romnhisi ãma 'ri norĩ siptete na 're isimasa mono zama uprosi. Dasi'wapé te za watobro, ãma idasipãrĩ ahâ hã. Te za duré sõdadu norĩ hã 're hãsi. Danhimnhihârâzém na te za duré amnhihãsi ni. Tawamhã te za tadâ'â za'ra ni. 3 Daza'ru Moabi ãma apito hã, uburé dama ipire norĩ me wa za uprosi. Wa hã Uburé Danhib'apito, wa tinha.

4 Uburé Danhib'apito hã te duré tinha, ãne:

— A'uwẽ norĩ Zuda na romnhisi ãma 're ihâimana za'ra mono norĩ hã wasété za'ẽtẽ uptabi za'ra di. Wasété ahâ za'ra wa, wa hã wa za hâ za'ra. Ta norĩ hã ma tô ĩnhimiroti zahi te te siwi 're wẽ'õ za'ra. Duré ĩmreme te i'ru hã te te 're wapari za'ra mono ãna, te 're hâimana za'ra. Ma tô duré ihâiba'õ senai'õ na 're ihâimana za'ra mono ãma si 're wata za'ra, ihi'rata norĩ, tô õ norĩ ãma 're iwata za'ra mono ãma si. 5 Tahawa, Zuda ti'ai ãma unhama na wa za ãma sazu. Duré tô õ uzâ hã te za 'rinho'u Zeruzalẽ ãma 'ri norĩ siptete na 're isimasa mono hã uprosi.

6 Uburé Danhib'apito te duré tinha, ãne:

— A'uwẽ Izaraéu nhihudu norĩ, wasété za'ẽtẽ uptabi za'ra di. Wasété ahâ za'ra wa, wa hã wa za hâ za'ra. Ni'wam norĩ hã sena na 're hâimana za'ra mono nherẽ, pawa'âbâ ãna te te dama 're iromhuri za'ra mono hã te Izaraéu norĩ hã te te dama 're wede za'ra, ropisutu na marĩ te te dawi 're iwaibui mono te te 're iwa'âbâ waihu'u za'ra mono õ norĩ hã, duré simarĩ'õ uptabi na 're hâimana za'ra mono wa, dapara uza te te 're iwaibui mono, te te 're iwa'âbâ waihu'u za'ra mono õ norĩ hã. 7 Te duré isibrob'õ norĩ zarina 're nomro, te te 're sisém nomri za'ra mono da. Te duré senai'õ a'uwẽ dama wapu na 're ihâimana za'ra mono ma hã te te 're rowairébé za'ra, sada 're hâimana za'ra mono wa. Damama norĩ ti'ra norĩ me, te tô pi'õ siwa'âbâ zô 're isisõmri za'ra mono norĩ ãma 're hâimana za'ra. Taha zarina te ĩnhisi iwazéb zahi wasété ãna 're ihâimana mono ma, rowazé hã te te siwi 're nomri. 8 Siwa'ru ihâiba'õ norĩ ãma 're idawata za'ra mono zé 'ri 'rãihâ 'rata, te ta norĩ hã 're sisimro sahâ na, da'uza te te dawi iwaibu za'ra nhisiwi, marĩ wa'âbâzé 'rãsutuzéb da, te te dawi iwaibu za'ra na. Duré tite ihâiba'õ norĩ ãma 're iwata za'ra mono 'ri 'rãihâ 'remhã, te uva 'rãi wa'uzé hã te te 're âhuri, marĩ iwa'âbâ õ nhisiwi, te te dawi 're iwaibu za'ra mono hã.

9 — E ma tô amoreu norĩ ma, te i'manharĩzém na ãma aipo're si'âri za'ra wa'wa. Wa hã wa tô ã hã aibâ norĩ, cedru wede nhinihã ne ipoto 'rãihâ, duré wede carvalhu isiptete ne hã uprosi. Uburé wa uprosi pese, ta norĩ hã.

10 Wa hã wa tô Ezitu hawimhã asani za'ra wa'wa. Wa tô duré 40 wahub 'remhã rop si 're irosa'wari mono na hã te asimroi wa'wa. Amoreu norĩ nhipti'a hã wa tô duré aima sõmri za'ra wa'wa. 11 Nima norĩ ai'ra za'ra wa'aba norĩ hã wa tô pisutu za'ra, ĩzadawa 'mahârâ'wa na 're hâimana za'ra mono da. Duré nima norĩ ate za'ra wa'wa iprédupté ihâiba amo norĩ hã wa tô pisutu za'ra, nazireu na 're hâimana za'ra mono da hã. E ãnei õ di bété, te i'manharĩzé hã. Ãne hã wa tô 'manha tô, wa hã. 12 Tane nherẽ, te a norĩ wa'wa nazireu norĩ ma, uva 'rãi wa'u isé hã tãma 're i'õb za'ra wa'aba mo. Te duré ĩzadawa 'mahârâ'wa norĩ wi, te te 're ĩmreme 'mahârâ za'ra mono tõ da hã tiwi 're isawi za'ra wa'aba mo. 13 Tahawa, awa'awi na hã wa za aihâpâ za'ra wa'wa, wedewara zapore ti'a te te 're ihâpâ za'ra mono ne, sibu 'rãihâ na amnho trigu te te 're i'wasari mono hã. 14 Tawamhã sa'ẽtẽ waptu na isisa'rei mono hã simani waihu'u za'ra õ di za. Duré isiptete norĩ hã te za siptete hai'utõrĩ pese za'ra. Duré sib'ru na 're ihâimana za'ra mono norĩ hã, tihâimanazé te te isõ'reptu za'ra da hã mare di za. 15 Simnhi'ãsi ré, duré ti'i ré ihâimana za'ra norĩ hã te te da'ãma i'ai'uté za'ra da hã mare di za. Duré hâiba ré dawi simani waihu'u za'ra õ di za. Duré para na ti'ai baba isisa'rei mono norĩ zama simani waihu'u za'ra õ di za. Duré awaru na isisa'rei mono norĩ hã isimani za'ra da hã waihu'u õ di za. 16 Taha bâtâ na dasi'wapéi 'manharĩ'wa tisiré norĩ nhipai u isib'ru uptabi norĩ hã te za tinhimnhi'ã hã sisa'u sãmra za'ra. Taha pari te za oto aimani za'ra. Wa hã, Uburé Danhib'apito, wa ãne tinha.