Amosi
'Re ihâimana u'âsi mono, Izaraéu norĩ hâiba na Amosihi ma, timreme te te isõmrizé wasu'u
1
à hã 'Re ihâimana u'âsi mono timreme, Izaraéu norĩ hâiba na, Amosi pone'ẽrebâ 'madâ'â'wa 'ri nho'u Tecoa na isisi ãma 're ihâimana mono ma, te te isõmri. Ãne hã ma tô tiromhâiba, maparane wahu ihâimana 're, ti'ai popo hâimana wana ré, Uzias, Zuda ti'ai ãma, apito na 're hâimana mono ré, duré Zeroboã, Zoasihi 'ra, Izaraéu ti'ai ãma apito na 're hâimana mono ré hã. 2 Amosi hã te tinha, ãne:“Zeruzalẽ ãma, Siã na ẽtẽ 'rãihâ nhisi hawi te Uburé Danhib'apito hã mreme 'rãihâ na tinha, tãirãrã'ã ne.
Du hã te uburé we 'ré mono. Duré uburé Carmelu na ẽtẽ nhisi ãma hã te we 'ré pese.”
'Re ihâimana u'âsi mono, Izaraéu waptoma 're idahâimana za'ra mono norĩ, te te siwi iwẽ'õ za'ra zé wasu'u
Siria na romnhisi
3 Uburé Danhib'apito hã te tinha, ãne:
— Damascu ãma a'uwẽ 're ihâimana za'ra mono norĩ hã wasété za'ẽtẽ uptabi za'ra di. Wasété ahâ za'ra wa, wa hã wa za hâ za'ra. Ta norĩ hã ma tô Giliadi ãma a'uwẽ norĩ ma hã te te 're rob'manharĩ wasété za'ra. Amnho pré'ézé isi'uwazi na i'wa, isisiwib za'ra te te 're ro'rahâri mono wa, te te ãma 're hâpâ pese za'ra mono da, ma tô te te tãma 're 'manharĩ za'ra. 4 Tahawa, wa za apito Hazaéu nhimiromhurizé 'ri 'rãihâ na ãma sazu, unhama na. Tô ã hã uzâ te za duré apito Bẽ-Hadadehe nhorõwa siptete uptabi na 're isa mono hã pru. 5 'Rinho'u Damascu te, 'ridawa za'ẽne hã wa za te a'marõpãrĩ. Duré i'rãnho'õmo na 're ihâimana zahuré mono norĩ Biqueati-Avé na romnhisi ãma hã, Bete-Édẽ na romnhisi ãmab zama, wa za uprosi zahuré. Tawamhã Siria ãma a'uwẽ norĩ hã te za Qui na romnhisi ti'ai u da te simro. Wa hã, Uburé Danhib'apito, wa ãne tinha.
Filistéa na romnhisi
6 Uburé Danhib'apito te duré tinha ãne:
— A'uwẽ daza'ru Gaza na isisi ãma 're ihâimana za'ra mono norĩ hã wasété za'ẽtẽ uptabi za'ra di. Wasété ahâ za'ra wa, wa za hâ za'ra. Ta norĩ hã nimahã rom hawi ma tô uburé a'uwẽ tame 're ihâimana za'ra mono te te iwaibu za'ra hã te te simro, sito pese na tãma 're hâimana za'ra mono da. Taha pari a'uwẽ Edõ na romnhisi ãma 're ihâimana za'ra mono ma hã, ma tô wede za'ra, pawa'âbâ ãna dama romhuri'wa na 're hâimana za'ra mono da. 7 Tahawa, Gaza 'ri 'wawi wa'ra 'rãihâ 'manharĩ ãma wa za sazu. Duré tô ãhã uzâ, 'ri nho'õmo 're, 'ri isiptete norĩ 're isimasa mono zama te za te te apru. 8 Apito norĩ hã wa za uprosi zahuré, Asidodi te hã duré Asquerõ te hã. 'Ri nho'u Ecrõ na isisi hã wa za uprosi. Uburé pese filisteu norĩ ihâiba amo hã wa za duré uprosi za'ra. Wa hã, Uburé Danhib'apito, wa tinha.
Tiru na 'ri nho'õmo nhisi
9 Uburé Danhib'apito te tinha, ãne:
— A'uwẽ Tiru ãma 're ihâimana za'ra mono norĩ hã wasété za'ẽtẽ uptabi za'ra di. Wasété ahâ za'ra wa, wa za hâ za'ra. Ta norĩ hã, Edõ u ma tô nimahã rom hawi uburé a'uwẽ 're ihâimana za'ra mono te te iwaibu za'ra hã te te simro, sito pese na tãma 're hâimana za'ra mono da, ta norĩ me, sisaze za'ra nherẽ, marĩ na si'wapéi ãna siré 're hâimana za'ra mono da. 10 Tahawa, Tiru ãma 'ri 'wawi wa'ra na unhama na wa za ro'o. Duré tô õ hã uzâ, te za 'ri nho'õmo 're, 'ri isiptete norĩ 're isimasa mono zama uprosi.
Edõ na romnhisi
11 Uburé Danhib'apito te ãne tinha:
— A'uwẽ norĩ daza'ru Edõ na isisi ãma 're ihâimana za'ra mono norĩ hã wasété za'ẽtẽ uptabi za'ra di. Wasété ahâ za'ra wa, wa za hâ za'ra. Tisisãnawã Izaraéu nhihudu norĩ 'râwibre nherẽ, ma tô te te 're 'wapé za'ra, ãma 're siwamri za'ra mono ãna, duré ãma 're pẽ'ẽzé za'ra mono ãna. Edomita norĩ zahizé hã 'rãtõ waihu'u õ di. Õne u'â te siti'ru na 're hâimana za'ra. 12 Tahawa, 'ri nho'u Tema na isisi ãma unhama na wa za ãma ro'o. Duré tô õ hã uzâ, te za 'ri nho'u Bosra na isisi 're, 'ri isiptete norĩ 're isimasa mono zama hã uprosi.
Amo na romnhisi
13 Uburé Danhib'apito te duré ãne tinha:
— A'uwẽ norĩ daza'ru Amo na isisi ãma 're ihâimana za'ra mono norĩ hã wasété za'ẽtẽ uptabi za'ra di. Wasété ahâ za'ra wa, wa za hâ za'ra. Giliadi na darom nhisi ãma ti'a te te sima sa'ẽtẽ za'ra da, te te 're da'wapé za'ra mono wamhã, ma tô pi'õ wasã ré 're ihâimana za'ra mono norĩ hã te te 're nomo wazu za'ra. 14 Tahawa, Raba 'wawi wa'ra ãma hã wa za ro'o, unhama na. Tô õ hã uzâ te za duré 'ri nho'õmo 're, 'ri isiptete norĩ 're isimasa mono zama uprosi. Taha siwaprã, te za dasi'wapé na dasipãrĩ ahâ hã watobro. Te za duré aibâ norĩ hã 're hãsi, si'wapé za'ra sina. 15 Tawamhã apito, dama ipire norĩ me te za waibu ni, sito pese na dama 're hâimana za'ra mono da. Wa hã, Uburé Danhib'apito, wa ãne tinha.