— Ma'ãpé 'ri uparizé 'rãsutu mono bâ sa'ẽtẽ ahâ za'ra mono, uburé isãna'ratazé mono hã isãsã'ã za'ra zéb u, uburé pese 'ri para idahâimana za'ra norĩ 'rã nhisiwi ipru rere'e da. Tawamhã dahâiba ré idasimani za'ra hã, wa za dasi'wapé na uprosi. Ni'wa isimani da hã mare di za. Duré ni'wa hâiba ré ihâimana da hã mare uptabi di za. 2 Ti'ai 'rowi sisisi nherẽ, adâ 're ihâimana za'ra mono zéb u sihutu da, tane nherẽ, ta hawi wa za sani za'ra za. Duré hâimo hâiwa u te te sai'uri za'ra nherẽ, wa za apâ ti'ai u ta hawi ãma siri za'ra. 3 Duré Carmelu na ẽtẽ 'rãihâ nhisi nhisiwi sima'uri za'ra nherẽ, isarina za'ra wa za 're mo. Wa za waibu za'ra. Duré â 'rowi uptabi ĩwi simani za'ra nherẽ, wa za âporé â 're wahi ihâimana ma tãma 'ru za'ra, te te hâzub da. 4 Isitob'ru norĩ te te siwi waibui wa, te te simroi mono wamhã, wa hã wa za dama waihu'u zahi, sib'ézé 'wapa na da te dasiwi simro da. Wa za ta norĩ hã 'madâ'â pese za'ra, mare di, i'wawib za'ra ĩsimapa za'ra da hã. Da te i'uprosi da si, wa za 'madâ'â za'ra.

7 Uburé Danhib'apito te tinha, ãne:

— Izaraéu nhihudu norĩ, ĩma aiwẽ uptabi na 're aihâimana za'ra wa'aba mono õ di, Etiopia ãma a'uwẽ norĩ nhipai u hã. Ezitu hawi te we i'asani za'ra wa'aba ne, wa tô duré filisteu norĩ hã we sani za'ra, Creta na rob'ré za'iti nhisi hawi. Arameu norĩ hã Qui na romnhisi hawimhã wa tô duré we sani za'ra. 8 Wa hã, Izaraéu daza'ru, 're iwasété mono zé hã wa te te 're 'madâ'â. Tahawa, ti'a zô robaba da hã wa za 'manha. Tane nherẽ, uburé Izaraéu nhihudu norĩ te i'uprosi da hã mare di. Wa hã Uburé Danhib'apito, wa tinha.

9 — Wa hã roti zahi te ãma 'manharĩ za'ra wa, wa za iwẽ norĩ hã aimawi sõré, iwasété norĩ nhiti, Izaraéu 'remhã, trigu iwa'wa uptabi si da te 're isa'wari za'ra mono ne, da te simini ãna, misi iwa'ware hã. 10 Uburé ĩnhib'a'uwẽ norĩ wasété na 're ihâimana za'ra mono norĩ hã te za dasi'wapé na ai'utõ, ãne na uburé te te inharĩ za'ra norĩ hã: “'Re ihâimana u'âsi mono, siwa'ru marĩ ipipa, 'râwim na wazô watobro za'ra da, te te tãma isa'ré da hã mare di za.”

11 Uburé Danhib'apito te tinha, ãne:

— Tô taha bâtâ mono na, apito Davihi nhimi'madâ'âzé wa za apâ wahutu, 'ri iwaptã'ã ne hã. Duré nima norĩ 'ri na'rada isipru hã wa za apâ te anhito. Wa za duré apâ wahutu, 'ri hã sipru pese na ihâimana hã, imorĩ'rata na 'ri wẽ na isam ne apâ sab da. 12 Tawamhã ĩnhib'a'uwẽ norĩ, Edõ na daza'ru nhisi isi'atarẽme ãma, duré ĩte na aré daro mono bâ a'uwẽ ĩma 're ihâimana za'ra mono norĩ ãma, te za ai'uté za'ra. Wa za uburé ãne na marĩ hâimana da hã 'manha. Wa hã, Uburé Danhib'apito, wa tinha.

13 — Bâdâ hã te za tô oto wi, trigu waptui pese na 're prédub za'ra mono wa, da te 're itehâri waihu'u za'ra mono õ zéb da hã. Duré uva 'ru 'rã waptu na 're 'rã za'ra mono wa, i'rãi wa'u hã da te 're isõ'u waihu'u za'ra mono õ zéb da hã. Uva 'ru 'rã hã 'rãi pese uptabi wa, te za iwa'u hã sima iwẽ na 're praba, panho'õmo â, 're iprababa mono ne. 14 Ĩnhib'a'uwẽ norĩ, darob amoi ãma sito pese na 're ihâimana za'ra mono zém hawi, wa za isipti'ai u hã apâ te simro. Ta norĩ hã te za apâ 'ri nho'õmo norĩ sipru pese na ihâimana za'ra norĩ hã te te siwi 'ri nhoré, iwa 're hâimana za'ra mono da oto. Tawamhã te za uva 'ru hã iwa te te 're zuri. Te za duré iwa'u hã te te 're âhuri. Te za duré rob're te te 're izuri mono 'rã hã te te 're huri. 15 Ĩnhib'a'uwẽ norĩ na, wa za rob're, ti'a te tãma isõmri za'ra 'remhã. Tawamhã niwamhã taha wimhã da te isani za'ra da hã mare di za. Wa hã, Uburé Danhib'apito, ate za'ra wa'wa, 'Re ihâimana u'âsi mono hã wa tinha.