Zudeu norĩ hã, tinhitob'ru te te i'uprosizé wasu'u
9
Tawamhã 13 bâtâ ãma 12 a'amoi ãma ada na a'amo nhisi ãma, ma tô oto wi apito nhimiroti zahi bâdâ te te aré sina i'uwaimrami da hã. Taha bâdâ hã Zudeu nhitob'ru norĩ aré isimipari za'ra zé, te te ãma ai'uté za'ra da hã. Tane nherẽ, ma te iwa'rãmi isiti tãma tiromhâimana za'ra. Ma tô Zudeu norĩ hã, tinhitob'ru norĩ ãma ai'uté za'ra. 2 Apito nhimi'madâ'âzéb 're, uburé 'ri nho'õmo na Zudeu norĩ 're ihâimana za'ra mono zé mono bâ ma tô si'rã'õtõ, te te susi za'ra da, te te sima iwẽ norĩ hã te te simro da. Ãhã wa, ni'wam norĩ hã sada sisapẽtẽ waihu'u za'ra õ di, uburé tãma pahi uptabi za'ra wa. 3 Uburé 'ri wa'õtõ na dama roti'wa norĩ ihâimana za'ra hã tô uburé siwa'ru Zudeu norĩ te, danhib'ihâ'a norĩ hã, duré apito te, dama i'rãnho'õmo na 'ri wa'õtõ na 're ihâimana za'ra mono norĩ hã ma tô Zudeu norĩ hã pawaptob za'ra. E marĩ wa. Mordecaihi ma, pahi uptabi za'ra wa. 4 Tawamhã iwasu'u ma tô apito nhimi'madâ'âzéb 're, ropâ te te ropé. Tahawa, ma tô uburé norĩ hã waihu'u za'ra, ta hã apito nhimi'madâ'âzéb 're, simiroti nhiptete na dama 're ihâimana mono na hã. Ãne wa, ma tô oto Mordecaihi nhiptetezé mono hã te te sina hâimo u'âsi.5 Tawamhã Zudeu norĩ hã te te sima iwẽ za'ra zéb zarina, ma tô tinhitob'ru norĩ ma rob'manharĩ za'ra. Ma tô uburé sib'ézé 'wapa na hã uprosi, ni'wa tiwi sisõ'reptu za'ra ãna. 6 Susã dahu nho'õmo ãma hã ma tô siwi uprosi, 500 na aibâ norĩ ihâiba na. 7-10 Hamahã 'ra norĩ 10 na ihâiba za'ra hã ma tô duré siwi simro. Hama hã Hamedataha 'ra, Zudeu nhitob'rui 'ra. I'ra norĩ nhisi hã ãne: Parsãdata, Dalfã, Asipata, Porata, Adaria, Aridata, Parmasta, Arisa'i, Arida'i duré Waizata. Tane nherẽ, Zudeu norĩ hã isimarĩ za'ra te te sima waibu za'ra õ di, tãma ihâimana za'ra da hã.
11 Tawamhã tô taha bâtâ na hã ma tô apito ma, Susã ãma niha da te isimro za'ra hâiba za'ratazé hã tãma wasu'u ni. 12 Ãne ma tô Estéhé ma wasu'u:
— Ãme Susã ãma, Zudeu norĩ hã 500 na aibâ norĩ ihâiba na ma tô siwi uprosi. Hamahã 'ra norĩ 10 na ihâiba za'ra zama ma tô duré siwi uprosi. Duré e niha ma tô bété daza'rui wa'õtõ ãma hã siwi danhimro. E marĩ te ãhã na awa'awi na hã asima iwẽ. Niha hã marĩ asima wẽ zahu wamhã, wa za tô aima tisõ za.
13 Tawamhã Esté, ma te ãne asa ãma sada'â:
— Apito aima wẽ wamhã, ma'ãpé Susã ãma Zudeu norĩ ma rowairébé za'ra na, awẽ bâtâ na te te siwi 'manharĩ da, tô ãhã bâtâ na te te siwi 'manharĩ da, tãma irowairébé za'ra ne. Duré wa za aiwi waptẽ, Hamahã 'ra norĩ 10 na ihâiba za'ra hã ihâiba hã da te dasiwi sasõmri za'ra da, dabutuwazizém na simnhatã da.
14 Tawamhã apito ãne hã, da te dasiwi 'manharĩ da hã ma tô dama waihu'u. Tahawa, Susã ãma ma tô Hamahã 'ra 10 na ihâiba norĩ ãma sõ'awi rob'ui'éré hã dasiwi sõré ni. Taha pari ma tô oto 10 na ihâiba hã dasiwi sasõmri za'ra ni, dabutuwazizém na. 15 Tawamhã 14 bâtâ ãma hã ada na a'amo nhisi ãma ma tô Zudeu norĩ hã si'rã'õtõ. 'Ri nho'õmo ãma ma tô 300 na aibâ norĩ hã siwi uprosi. Tane nherẽ, te te sima waibu za'ra õ di isimarĩ za'ra hã, tãma ihâimana za'ra da hã.
16-17 Tawamhã 13 bâtâ ãma ada na a'amo nhisi ãma hã, Zudeu norĩ hã daza'rui wa'õtõ mono bâ ma tô si'rã'õtõ. Ma tô si'wawi aimapa za'ra. Ãne wa, ma tô tinhitob'ru za'ra norĩ hã siwi uprosi 75 miu na. Ãne, sada isiti'ru za'ra na hã ma tô sima ropese za'ra. Tane nherẽ, te te siwi isimro norĩ nhimarĩ hã te te sima waibu za'ra õ di, tãma simi'wara da hã. Tawamhã 14 bâtâ ãma oto wa'utu za'ra wamhã, ma tô sima romhu'u za'ra dato isa'ẽne te te sima i'manharĩ za'ra na hã. 18 Tane nherẽ, Susã ãma Zudeu norĩ hã 15 bâtâ ãmap si ma tô sima romhu'u za'ra. E marĩ wa. 13 bâtâ ãma duré 14 bâtâ ãma hã, tinhitob'ru te te uprosi wa. Tawamhã 15 bâtâ ãmap si ma tô oto tiwa'utu za'ra. 19 Tahawa, te Zudeu norĩ rom na duré 'ri wa'õtõ ãma 're ihâimana za'ra mono norĩ hã 14 bâtâ ãma hã te te sima 're romhu'u u'âsi za'ra, dasa isa'ẽtẽ na duré dato na. Taha na te duré dasa na sima 're sõprub za'ra.
Purĩ na dato nhisi ihâimanazé wasu'u
20 Tawamhã Mordecai uburé iromhâimanazém na ma tô ãma rob'ui'éré. Taha pari ma tô uburé Zudeu norĩ ma tinhimiromnhihâtâ na tãma ãma ropé za'ra, apito nhimi'madâ'âzéb 're daza'rui wa'õtõ mono na 'râwim norĩ ma hã, duré romhâ na 're ihâimana za'ra mono norĩ ma. 21 Rob'ui'éré na ma tô dama waihu'u zahi, wahup sidâpâsi 14 bâtâ ãma hã, duré 15 bâtâ ãma ada na a'amo nhisi ãma te te sima 're romhu'u za'ra mono da. 22 E marĩ wa. Tô taha bâtâ norĩ na Zudeu norĩ tinhitob'ru norĩ na te te sima ropese za'ra wa, duré tô taha a'amo na tiwi irobzei'õ za'ra zé hã, duré tipẽ'ẽzé te te isépata za'ra zé hã toi uptabi na za oto ihâimana za'ra u, tãma sisaprĩ za'ra wa, duré dato isa'ẽtẽ 'manharĩzéb u. Tahawa, ma tô tinhimiromnhihâtâ na tãma waihu'u zahi za'ra, tô taha bâtâ norĩ na hã dato isa'ẽne ihâimanazém na, duré da te dasima 're iromhu'u za'ra mono zém na hã, duré dasa na sima 're isõprub za'ra mono zém na, duré isimarĩ'õ norĩ ma, 're isõprub za'ra mono na hã. 23 Ãne Zudeu norĩ hã, Mordecai nhimiromnhihâtâ zarina, taha bâtâ na te te sima 're iromhu'u za'ra mono zém na za oto ãma 're ihâimana za'ra mono na hã ma tô ãma sãna'rata za'ra.
24 Hama, Hamedataha 'ra, Agaguihi nhihudu Zudeu norĩ 'ru'wa hã ma tô aré sima rowa'õtõ, te te uprosi da hã. Ma tô duré aré datozébre (“purĩ” na isisi hã) dama ti'ru, da te dasiwi me da, bâtâ pisutu pese zé ãma ihâimana da hã da te dasiwi i'uprosizéb da hã ãma. 25 Tane nherẽ, Esté hã, apito u morĩ wa, ma tô rob'ui'éré na hã dama waihu'u zahi, Hama hã tô Zudeu norĩ zada, te te sima irowa'õtõ wasété zé hã, õhõ nhisiwip si iwaptã'ã da hã. Tahawa, ma tô Hama hã, i'ra norĩ me butu wazi na sõ'reti za'ra ni. 26 Ãne wa, ã bâtâ norĩ nhisi hã, “purĩ” na, “pur” na damreme zarina.
Tawamhã Mordecai te te iromnhihâtâzéb zarina, duré uburé Zudeu norĩ te te i'madâ'â za'ra zéb zarina, duré marĩ uburé iwatobrozéb zarina, 27 ma tô ta norĩ hã oto 'râwi sima rowairébé za'ra, duré tinhihudu norĩ ma, duré isizudeu za'ra norĩ ma, wahup sidâpâsi maparane bâtâ na te te sima 're romhu'u za'ra mono da hã, Mordecai te te ãma iromnhihâtâ zarina. 28 Tawamhã ma tô sima rowairébé za'ra, ta hawim haré uburé Zudeu hawi a'uwẽ wa'õtõ mono bâ, uburé daza'rui wa'õtõ mono na apito nhimi'madâ'âzéb 're, Purĩ na dato isa'ẽtẽ na te te sima 're romhu'u za'ra mono da, Zudeu norĩ, marĩ ihâimanazém na õne u'â ãma 're sipo're pu'u u'âsi za'ra mono da, duré niwamhã siwa'ru wahum na bâdâ dato isa'ẽtẽ 'manharĩzé hã te te siwi 're simini tõ mono da.
29 Tawamhã Abiaiuhu 'ra apito sipi'õ Estéhé zama ma tô Zudeu Mordecaihi hâiba zu rob'ui'éré hã 'manha, Mordecaihi nhimirob'ui'éré te te aré i'manharĩ hã, te te ãma siptete da, purĩ na dato isa'ẽtẽ na te te ãma irob'ui'érézé hã. 30 Tawamhã romnhihâtâ awã mono hã ma tô apito nhimi'madâ'âzéb 're, uburé Zudeu norĩ 127 na daza'rui wa'õtõ mono na te te dama ãma ropé. Taha na ma tô uburé Zudeu norĩ ma rowẽ na si 're hâimana za'ra mono da hã, sawi za'ra, duré sima iwẽ na hâtâ'â ãna 're hâimana za'ra mono da. 31 Taha na ma tô duré purĩ na dato isa'ẽne za 're ihâimana mono zéb da bâtâ norĩ hã oto siwi pisutu pese za'ra. Ãne, dato isa'ẽtẽ na te te sima 're iromhu'u za'ra mono zéb da hã, duré sai ãna a'â 're ihâimana za'ra mono zéb da hã, te te sima ipisutu za'ra zéb zarina, duré tinhihudu norĩ ma, te te ipisutu za'ra zéb zarina, te za ta norĩ hã ãma 're hâimana za'ra, ã hã Zudeu Mordecai norĩ nhimirowaihu'uzéb zahi zarina, Estéhé me hã. 32 Tawamhã Esté te te iwaihu'u zahi zé hã, ma tô purĩ na dato isa'ẽtẽ na da te dasima 're iromhu'u za'ra mono zéb da hã itepãi wasisi na ibaihâ na ãma rob'ui'éré ni.