Zudeu norĩ ãma rotizé, iwẽ na da te pawaptob za'ra da
8
Tô taha bâtâ na apito Zersi hã ma tô Estéhé ma, Zudeu norĩ nhitob'ru Hamahã nhorõwa, duré isimarĩ hã sõmri za'ra. Tawamhã Mordecai hã ma tô apito ma, isõ're u tãma hâi'ré ni oto. E marĩ wa. Esté hã, Mordecai tisiwapru na te te tãma wasu'u wa. 2 Tawamhã apito ma tô tinhiptõmohi tétézé waze, Hamahã wi apâ te te i'âri hã. Ta hã Mordecaihi ma, ma tô tisõ. Esté hã, ma tô Mordecai hã tawamhã pisutu, uburé Hamahã nhimarĩ 'madâ'â'wa na 're hâimana mono da.3 Taha pari ma tô Esté hã apito papara waptãrã. Wawa sina ma tô tiwi waptẽ, Hama hã Agaguihi nhihudu te te iwaihu'u zahizé hã te te pari da, Hamahã nhimirowa'õno iwasété uptabi Zudeu norĩ zada ihâimanazé hã, hâimana ãna da. 4 Tawamhã apito, ẽtẽ waipo oru 'manharĩ na tisiwazusizé hã, Estéhé ma, ma tô wẽ hâimo. Te te wẽ wamhã, ma tô wahudu. Tawamhã para na te oto isõ're za. 5 Ãne te tinha:
— Apito, aima wẽ wamhã, duré ĩnhimirowaptẽrẽzé âri wẽ wamhã, duré te aiwi iwaptẽrẽ hã i'uwaibaba na wẽsãmri wamhã, te za asisihâ, roti na rob'ui'érézéb ãma, Hama hã te te iwaihu'u zahizé hã pari da, Hamedataha 'ra, Agaguihi nhihudu uburé asimi'madâ'âzéb 're, te te iwaihu'uzé hã Zudeu norĩ isi'utõrĩ da hã. 6 E tihai wa. Wa hã ĩnhiptete waihu'u õ wa aré oto, ĩnhib'a'uwẽ norĩ duré ĩsisãnawã norĩ isi'utõrĩ na hã.
7 Tawamhã Apito Zersi te apito sipi'õ Estéhé ma, duré Zudeu Mordecaihi ma tinha ãne:
— Wa hã, Hama da te sõ'reti da hã wa tô dama ti'ru, Zudeu norĩ hã da te uprosi da, te te dama 'ru za'ra 'ru te. Estéhé ma, wa tô duré uburé isimarĩ hã tãma sõmri za'ra. 8 Tane nherẽ, apito nhisi ré roti zahi hã, duré isiptõmohi tétézém na romnhihâdâ te te itob'ratato hã sipari waihu'u õ di. Tane nherẽ, asima iwẽ wa'aba zarina, rowaihu'uzé ihâiba amo hã Zudeu norĩ pawapto wẽ zém na rob'ui'éré aba. Duré ĩnhisi na ãma asisihâtâ aba. Duré ĩte danhiptõmohi tétézém na ãma tob'ratato aba.
9 Ãne hã ma tô tiromhâiba dia 23, si'ubdatõ a'amo ihâimana ãma, siwã na a'amo nhisi ãma. Tawamhã Mordecai hã, apito zapari'wa norĩ zô dahârâ za'ra da, ma tô dama ti'ru. Tame, ma tô roti 'manharĩzéb ãma Zudeu norĩ ma hã rob'ui'éré za'ra, apito norĩ ma, daza'rui wa'õtõ mono na dama i'rãnho'õmo norĩ ma, a'uwẽ norĩ ma danhib'apito ma, duré daza'rui wa'õtõ mono na uburé 127 na danhib'ihâ'a norĩ India na romnhisi hawi ihâimana za'ra ma hã, Etiopia u hã. Rotizém na ma tô dama i'rãnho'õmo norĩ ma damreme mono bâ ãma saprĩ za'ra ni. Daza'rui wa'õtõ mono bâ ma tô ãma 're idamreme zusi mono bâ ãma dama rob'ui'éré za'ra ni. Duré roti 'manharĩzéb ãma hã, ma tô Zudeu norĩ mreme na duré ta norĩ nhimirob'ui'éré za'ra zém na ãma rob'ui'éré za'ra ni. 10 Tawamhã Mordecai hã, apito Zersi nhisi na ma tô romnhihâdâ hã 'manharĩ za'ra. Ma tô duré apito nhiptõmohi tétézém na tob'ratatob za'ra. Taha pari, romreme 'wapéi'wa norĩ hã ma tô 'wasa, awaru, apito te, da te 're itébré za'ra mono na. 11 Tawamhã rob'ui'éré na hã, apito ma tô Zudeu norĩ ma hã waprosi za'ra, uburé isimi'madâ'âzéb 're, 'ri nho'õmo na 're ihâimana za'ra mono norĩ ma, si'rã'õtõ mono da, siwa'ru da te 're isusi za'ra mono na si'wawi tô 're simapa za'ra mono da. Siwa'ru a'uwẽ aibâ norĩ isimnhi'ãsi ré norĩ hã, niha wamhã, daza'rui wa'õtõ mono na apito nhimi'madâ'âzéb 're, Zudeu norĩ te te 're susi za'ra mono wamhã, te za tô sima iwẽ za'ra na te te 're 'wapé za'ra. Te za duré te te 're simro. Te za tô sima iwẽ na tinhitob'ru norĩ hã uburé te te 're uprosi, pi'õ norĩ zama, ai'uté norĩ zama, isimarĩ za'ra hã tãma 're hâimana za'ra mono da. 12 Uburé daza'rui wa'õtõ mono na, ma tô apito Zersi nhimiroti zahi hã ãzé, 13 bâtâ ãma 12 a'amoi ãma ada na a'amo nhisi ãma. 13 Apito nhimiroti zahi hã te za rob'ui'éré na 'manharĩ ni. Uburé te za 'ri wa'õtõ mono na uburé norĩ nho'a dasiwi sõré za'ra ni za, Zudeu norĩ, bâtâ tizahi na te te sima ropese za'ra da, tinhitob'ru norĩ na za oto isi'ruiwa'âbâ za'ra zém na hã. 14 Tawamhã apito te te tãma waihu'u za'ra wa, ma tô dama romreme 'wapéi'wa norĩ hã apito te, awaru tébrézém hawim na awaru iwara tete na sisa're. Si'aba'ré na ma tô sa'ẽtẽ wairé. Tawamhã roti zahi na rob'ui'éré hã ma tô Susã 'ri nho'õmo ãmab zama hã i'ahâ norĩ nho'a sõré ni.
15 Mordecai hã, apito nhimiromhurizé 'ri 'rãihâ hawimhã, ma tô danhib'ihâ'a si'uzazé ihâ uzéi ré hã, duré ihâirã ré hã watobro, oru na isõprezé isa'ẽtẽ ré zama, duré uza hâpa ihâ su'u wẽ uptabi hâ pré ré. Tawamhã 'ri nho'u Susã ãma 're ihâimana za'ra mono norĩ hã toi uptabi za'ra di. Tahawa te rowẽ te sa'ẽtẽ uptabi 're hãsi. 16 Zudeu norĩ 'remhã ma tô rowẽ isa'ẽne tãma tihâimana za'ra, duré dato za'ẽtẽ zé hã. Te duré 'râwi si'ãma tiwata za'ra, te te da'ãma ai'uté za'ra wẽ te. 17 Tawamhã apito nhimi'madâ'âzéb 're, 'ri nho'õmo mono na apito nhimiroti zahi na rob'ui'éré hã, da te isõré za'ra mono zém na hã ma tô Zudeu norĩ hã sima romhu'u za'ra, rowẽ te. Ma tô duré dasa isa'ẽtẽ na sima romhu'u za'ra. Taha nhipai u hã ma tô duré siwa'ru apito nhimi'madâ'âzéb 're, a'uwẽ 're ihâimana za'ra mono norĩ hã sizudeu za'ra. E marĩ wa. Tãma pahi pese za'ra wa oto.