— E marĩ te za iwaptẽ. Ma'ãpé asima iwẽzéb zarina tô waptẽrẽ, wa hã za te aima isõmri da hã, niwamhã tô ĩte i'rãnho'õmo na 're ĩhâimana mono zé hã aiwa ãma isipo'o da, ĩwi waptẽrẽ nherẽ.

3 Esté ma sada'â ãne:

— Apito, ĩwẽsãmri wamhã, duré ãne hã aima wẽ wamhã, ma'ãpé te ĩsima iwẽzéb zarina ĩnho'reptu na za, duré ĩte a'uwẽ norĩ hã sõ'reptu za'ra na za. 4 E tihai wa. Wa hã ĩte a'uwẽ norĩ me, ma tô dasiwi wawede za'ra ni, da te wanhimro da, uburé pese wasi'utõrĩ pese da. Taré uburé wapawa'âbâ ãna, wa te 're romhuri za'ra mono da si, da te dasiwi wawede za'ra da 'wa'âhã, wa hã aré te aima inharĩ da hã maze di. E tihai wa. I'uwaibaba õ wa aré ĩma hã, te aiwi iro'wa'rézé hã, ã hã robzépatazé aré duré pire õ wa.

5 Tawamhã apito Zersi te apito sipi'õ Esté hã sadanha ãne:

— E 'wa hã aibâ, te te bété ãne na irosa'rada te te aima 'manharĩ da hã. E mame te tihâiba.

6 — Wanhitob'ru, wazada 're ihâimana mono hã, Hama, ta hã aibâ iwasédé! — Ãne Esté hã ma te asa ãma sada'â.

Tawamhã pahi uptabi na, Hama te apito hã 'madâ, duré apito sipi'õ Esté hã. 7 Tawamhã apito sahi sina ma tô 'ri're wa'õno isa'ẽtẽ hawi watobro. Ma tô mo, 'ri mana ãma rob're ihâimana u. Tawamhã Hama hã za te te tãma irob'manharĩzém na, ma tô sina waihu'u. Tahawa te 'ri're wa'õtõ za'ẽtẽ ãma nhamra u'â, apito sipi'õ Estéhé wi, tinho'reptuzé te te tiwi waptẽrẽ da. 8 Tawamhã daza'warizé ihâtete'õ wa, ma tô Esté inomrozéb u sime, ãma isiwamrizé te te tiwi waptẽrẽ da. Taha ré, ma tô apito hã sina siri, rob're hawimhã. Hama te te 'madâ'â wamhã, ma tô ãne tinha:

— E apito sipi'õ, ĩnho're te te wazéb'õ da, ma tô wei wi, ĩnhimiromhurizé 'ri u hã.

Ãne hã apito te te nharĩ wi, ma tô tãma iromhuri'wa norĩ hã Hama oto siwi 'rã'ubu. 9 Tawamhã ite romhuri'wa norĩ 're, Harbona na isisi hã te ãne tinha:

— Hamahã nhorõwa 'ratamhã danho'retizéb da 20 metru na i'rãihâ pibu na da te 'manharĩ da, te te i'ru hã te tihâiba, aré Mordecai, da te ãma isõ'reti da hã, aibâ te te i'asõ'reptu hã.

— Ma'ãpé Hama hã taha na asiwi sõ'reti wa'aba! — Ãne apito te tãma 'ru zahi za'ra.

10 Tawamhã Hama, Mordecaihi da, danho'retizé da te 'manharĩ da, te te i'ru na, ma tô oto sõ'reti ni.

Taha zarina ma tô apito nhiti'ruzé hã mazazâ oto.