2 Tawamhã rob'ui'éré te te siwi sõré wamhã, ma tô Mordecai, apito za da te iwĩrĩzém na rosa'rada te te i'upsibimezé hã siwi wasu'u, Bigtã norĩ, Teresihi me, maparane eunucu norĩ apito nhimiromhurizé te te 're i'madâ'â zahuré mono te te sima irowa'õtõ zahuré zé hã. 3 Tawamhã apito te ãma sadanharĩ za'ra ãne:

— E marĩ, te te ãne i'manharĩ zarina, wa tô Mordecaihi ãma iwawata za'ra zé hã wasiwi 'manharĩ ni. Duré e marĩ, wa te tãma sõmri za'ra õ di, ipawa'âbâzé hã.

— Marĩ hã wa te tô tãma 'manharĩ za'ra õ di, isimi'manharĩzé wa'rãmimhã! — Ãne ma tô tãma iromhuri'wa norĩ hã ãma tãma wa'rãmi za'ra.

4 Taha ré, Hama ma tô apito nhimiwaptâ ihâimana za'ra zababa 'ri zahâpâ u ãzé, Mordecai, da te dasiwi isõ'retizé te te tiwi waptẽrẽ da, duré isõ'retizéb da, da te sada 'manharĩ da, te te aré i'ruzéb zarina. Tawamhã apito te anha ãne:

— E 'wa hã te 'ri zahâpâ ãma tihâiba.

5 Apito ma romhuri'wa norĩ, ma ãne ãma sada'âbâ za'ra:

— Hama te 'ri zahâpâ ãma tihâiba.

— Ma'ãpé tãma nharĩ za'ra wa'aba, we sébré da. — Ãne te apito tãma nharĩ za'ra.

6 Hama hã oto sébré wamhã, ma tô apito ãne tãma tinha:

— Wa ĩsima wẽ, aibâ te ipisutu ãma ĩwatazé, te i'manharĩ da hã. Ma'ãpé, ãma ĩma nharĩ, za marĩ te tãma i'manharĩzéb da na.

Tawamhã Hama, ãne ma tô rosa'rata: “E 'wa aibâ, apito, ãma iwata da, te te sima iwẽ zahi hã. Tô wa hã!” 7 Hama te apito ma ãne tinha:

8 — Ma'ãpé apito uza tô ai'uza norĩ hã we da te dasiwi âri da hã, dama 'ru na, duré awaru, ãma 're i'ane mono hã. Apito nhoprezém na awaru da te ãma sõpre da, ma'ãpé duré dama 'ru na. 9 Taha pari ai'uza norĩ hã, awaru me, nimahã aima romhuri'wa dama ipire uptabi ma sõmri za'ra na. Tawamhã te za tãma iwaihu, ta hã aibâ ma, ai'uza hã te te sẽrẽ da, ãma aiwata da, asima iwẽ ma. Taha parimhã te za awaru hã oto iré saprõ, 'ri nho'õmo te, 're idasisõpẽtẽ pese za'ra mono zéb u. Tawamhã te za duré ãne aimreme 'rãihâ na dama i'mahârâ mo za: “Ãhãta ãne ma tô apito hã 'manha, aibâ ãma iwata da, te te sima iwẽ ma hã.”

10 Apito te Hamahã ma tinha ãne:

— Ma'ãpé sa'ẽtẽ aimorĩ. Duré ĩ'uza norĩ hã awaru me mrami, Zudeu Mordecaihi ma, uburé ãma inharĩ mono zéb zarina tãma 'manharĩ da. Ta hã te apito nhimiromhurizé 'ri 'rãihâ u 're idanhisisi mono zé 'ridawa ãma nhamra. Duré ãne na inharĩ mono zé hã 'mairẽme tõ, tãma i'manharĩ da hã.

11 Tawamhã Hama, apito uza norĩ, awaru me te te oto mrami wamhã, ma tô Mordecai hã ãma uza. Taha pari ma tô Mordecaihi ré oto saprõ awaru hã, 're idasisõpẽtẽ pese za'ra mono zé wa'waibaba. Taha sina, te mreme 'rãihâ na tinha ãne: “Ãhãta ãne ma tô apito hã 'manha, aibâ ãma iwata da, te te sima iwẽ ma hã!”

12 Ãne pari, ma tô Mordecai hã apâ mo, apito nhimiromhurizé 'ridawa za'ẽtẽ na 're idanhisisi mono zéb u. Taha ré, ma tô Hama hã si'ubu upsibi sina tinhorõwa u hã wara, rowazép te, duré tiwi robzei'õ pese wa. 13 Tawamhã timro ma, duré tisiwaihu'u norĩ ma, ma tô uburé marĩ tãma ihâimanazé hã wasu'u za'ra. Tahawa te imro, duré isiwaihu i'rãiwaihu'u wẽ norĩ hã tãma nharĩ za'ra ãne:

— A hã ma tô asisimini na'ra, Mordecaihi me i'asi'wapéi aba zém na hã. Õ hã Zudeu. A hã tiwi i'aiwatobro da hã mare di. Te za tô a hã isarina hã asisimini.

14 Tawamhã zahadu te te nasi tãma nharĩ za'ra ré, ma tô eunucu apito ma, te te 're iromhuri za'ra mono hã aihutu. Tawamhã ma tô Hama hã awa'awi siwi saprõ, Esté hã dasa isa'ẽne te te i'manharĩ u.