Esté hã, apito norĩ Hamahã me, dasa isa'ẽtẽ u simasisi da, te te iwaptẽrẽ zahuré zé wasu'u
5
Si'ubdatõ bâtâ na marĩ te te huri ãna ihâimana ãma, ma tô Esté hã tite apito sipi'õ uza na si'uza. Taha pari ma tô mo, apito nhimiromhurizé 'ri 'rãihâ zahâpâ u. Tame te oto simipari sina nhamra, apito te, 'ri 're wa'wa iwẽ uptabi nho're. Tame te apito 'ri para nhamra, tisimasisizém na 'ri zahâpâ 'ridawa nho're. 2 Tawamhã apito, pi'õ dama i'rãnho'u Esté 'ri zahâpâ simipari sina ihâimana na te te 'madâ'â wamhã, te te wẽsãmri wa, ma tô ẽtẽ waipo pré oru na tisiwazusizé hã tãma wẽ. Tahawa ma tô Esté hã oto ãzé. Duré 'râwi itẽme wisi wa, ma tô isiwazusizé 'rãsudu hã upi. 3 Apito, ma tô sadanha ãne:— E marĩ ma tô tihâiba, dama i'rãnho'u Esté. E marĩ te za duré iwaptẽ. Ma'ãpé marĩ asima iwẽzé hã waptẽrẽ. Wa hã wa za aima tisõ za, ĩte i'rãnho'õmo na 're ĩhâimana mono zé aiwa ãma isipo'o da, ĩwi waptẽrẽ nherẽ.
4 Tawamhã Esté ma te ãma sada'â ãne:
— Tô aima wẽ wamhã, ĩma wẽ di za, te i'aiwaptẽrẽ aba da hã, Hamahã me, dasa isa'ẽne ã bâtâ na te aima i'manharĩ u ãma aimasisi aba da.
5 Apito, ma te tãma waihu'u ãne asa:
— Ma'ãpé Hamahã ma nharĩ za'ra wa'aba, sa'ẽtẽ waptu na we ĩtẽme morĩ da, Esté te te iwawaptẽrẽzé hã wa te wasima wẽ da.
Ãne ma tô apito norĩ hã Hamahã me, Esté dasa isa'ẽne te te i'manharĩ u hã oto tineb zahuré. 6 Tawamhã uva 'rãi wa'u isé te te oto nasi âhuri ré, ma tô apito hã Esté sadanha ãne:
— E marĩ te za iwaptẽ. Ma'ãpé asima iwẽzéb zarina, tô marĩ hã waptẽrẽ. Wa za aima tisõ za, tô ĩte i'rãnho'õmo na ĩhâimanazé aiwa ãma isipo'o da, ĩwi waptẽrẽ nherẽ.
7 Esté ma te asa ãma sada'â ãne:
— Ãne wa za tô aiwi waptẽ: 8 Apito aima ĩwẽ wamhã, duré ĩnhimirowaptẽrẽzé âri wẽ wamhã, ĩma wẽ uptabi di za Hamahã me te i'aiwaptẽrẽ aba da hã, awẽ dasa isa'ẽne ihâiba amo aima wa'aba si, te oto i'manharĩ da hã. Tawap si, wa za aima nharĩ 'wa za, te ĩsima iwẽzém na hã.
Hama hã te te sima irowa'õtõzé, Mordecaihi zada za ihâimanazém na
9 Tawamhã Hamahã ma, rowẽ sina duré to sina, ma tô dasa isa'ẽtẽ hawi watobro. Tane nherẽ, apito nhimiromhurizé 'ri 'rãihâ u 're idanhisisi mono zéb u 'râwi oto wisi wamhã, ma tô tame Mordecai hã sõpẽtẽ. Tawamhã ma tô sada tizahi pese, isõ'remhã tãma siwẽ'ẽi õ wa, duré aimawi na wazéb sina te te tãma 'manharĩ õ wa. 10 Tane nherẽ, 'râwi ma tô siwi 'ma'rã. Tahawa ma tô apâ tinhorõwa u mo. Taha pari ma tô tisiwaihu'u norĩ zô hâ. Ma tô duré timro Zere zama hã waptẽ, taha zama itẽme morĩ da hã. 11 Hama hã tinhibro pese na, duré i'ra norĩ ahâ na tãma ihâimana za'ra na, duré apito uburé tãma iromhuri'wa norĩ nhipai u pire na 're hâimana mono da, te te ipisutu na hã ma tô timreme na oto sãna'rata. 12 Timreme na ma tô ãma uzusi ãne:
— Tane nherẽ, ãhã si õ di. Ĩsiwaprosi apito sipi'õ Esté hã ma tô ĩwaptẽ, apito siré dasa isa'ẽne te te tãma i'manharĩ u isiré ĩmorĩ da. Tawamhã dasa isa'ẽne te te i'manharĩ hâiba amoi u awẽmhã ĩmorĩ da, ma tô duré ĩwaptẽ. 13 Tane nherẽ, uburé ã norĩ hã tarére ĩma hã, zahadu Zudeu Mordecai apito nhimiromhurizé 'ri 'rãihâ u 're idanhisisi mono 'ridawa 'rata 're isimasisi mono, te 're i'madâ'â mono ré hã.
14 Tawamhã imro, duré uburé isiwaihu'u norĩ, ma tô tinhimirosa'rada hã ãne tãma mei pibu za'ra:
— Ma'ãpé isõ'retizéb da hã 20 metru hâimo ipibuzém na, da te dasiwi 'manharĩ da, dama 'ru na. Tawamhã awẽm na mararé te za apito wi iwaptẽ, Mordecai, da te dasiwi isõ'retizéb da hã. Tawamhã a hã ato sina te za apito siré dasa isa'ẽne ihâimana u hã aimo.
Tawamhã isimirowa'õtõ za'ra Hama hã ma tô wẽsã. Tahawa, ma tô da te dasiwi isõ'retizéb da hã dama ti'ru, da te dasiwi 'manharĩ da.