4 Esté hã sa'ẽtẽ na te robzépata, ite romhuri'wa norĩ duré ite eunucu norĩ hã te te ãne tãma rowasu'u za'ra wa, iromhâimanazém na hã. Tahawa Mordecaihi ma, ma tô da'uza hã 'maime, ãma si'uza da. Tane nherẽ, te te sima wẽ õ di, te te sima isẽrẽ da hã. 5 Tahawa Esté hã, Hataqui eunucu apito nhimiromhurizé 'ri 'rãihâ ãma 're ihâimana mono, te te 're 'madâ'â mono da, da te ipisutu zô, ma tô hâ. Tawamhã ma tô tãma ti'ru, Mordecaihi tẽme morĩ da, te te sadanharĩ da, iromhâimanazém na duré marĩ te te tiwi iro'wa'rutuzé hã te te waihu'u da. 6 Tawamhã Hataqui hã ma tô mo, Mordecaihi zô rĩtĩ mono da, apito nhimiromhurizé 'ri 'rãihâ nho're 're idasisõpẽtẽ pese za'ra mono zéb u. 7 Tame ma tô Mordecai hã tãma rowasu'u pese, marĩ tãma ihâimanazém na. Hama hã uburé Zudeu norĩ uprosizé wa'â hã apito te cofri 're, za te te tãma isẽrẽ na te te tãma iropisutuzém na ma tô duré tãma rowasu'u. 8 Tawamhã Mordecai, Hataquihi ma, ma tô tisõ, uburé 'rinho'u Susã ãma apito nhimiroti na rob'ui'éré, da te isõrézé warõ hã, Zudeu norĩ za da te isimrozém na rob'ui'éré hã. Tawamhã Mordecai hã Hataquihi wi, ma tô waptẽ, Estéhé ma iwarõ hã te te âri da, uburé te te ãma tãma irowasu'u da hã, duré apito u imorĩzé te te duré tiwi waptẽrẽ da, te te tãma nharĩ da, ite a'uwẽ ãma isiwamrizéb zarina te te tãma 'ru za'ra da. 9 Tawamhã Hataqui hã, Mordecai te te tiwi iwaptẽrẽzé hã ma tô 'manha. 10 Ma tô duré Esté hã Hataquihi ma ti'ru, ãne te te ãma isada'âbâzém na te te tãma rowasu'u da, Mordecaihi ma: 11 “Uburé dama hã waihu'u pese di, apito nhimiromhurizé 'ri 'rãihâ 're romhuri'wa norĩ ma hã, duré uburé a'uwẽ 'ri wa'õtõ mono bâ 're ihâimana za'ra mono norĩ ma hã, niwamhã aibâ, duré niha wamhã pi'õ, 'ripara u apito tẽme isébré waihu'u õ na hã, marĩ na te te tãma irobzanhamri da hã, ãne da, sô dahârâ õ nherẽ. Ãhã na apito nhimiroti hã ãne: Ni'wa hã apito te te tãma rowairébé õ nherẽ, sébré wamhã, te za dârâ za. Apito hã ẽtẽ waipo oru 'manharĩ na tisiwazusizé, hâimo te te tãma wẽ wapsi, te za pibui pese na itẽme ta'mazébré ni. Wa hã misi a'amo apito ĩzô ihârâ ãna hã ma tô oto ĩ'ãma ai'utõ.”

12 Tawamhã Estéhé hawi romreme iwi te te waihu'u wamhã, 13 ma tô ãne Mordecai romreme na hã ãma tãma siri asa Estéhé ma: “Asi'ãma rosa'rata tõ, apito nhimiromhurizé 'ri 'rãihâ 're, 're aihâimana mono wẽ te, aiwétési atâ'â ãna aiwatobro da newa, uburé Zudeu norĩ 're, 're aihâimana mono nherẽ. 14 Ãhã na awa'awi na ari'iwi aihâimana wamhã, te za Zudeu norĩ pawaptobzé duré isõ'reptu za'ra zé nima hawi tãma tihâimana za'ra. Õ norĩ ma si, te za tô isõ'reptu za'ra zé hã tãma tihâimana za'ra. Tane nherẽ, a hã aimama hawi a'uwẽ norĩ me, te za ai'utõrĩ 'wa za. Tane nherẽ, ãté niha te za aimawi tiromhâiba. Ãté a hã ma tô apito sipi'õ na 're i'aihâimana mono da, aipisutu ni, ãne na iromhâimanazém na dapawaptob da hã.”

15 Tawamhã Esté ma tô Mordecaihi ma, ãne te te ãma tãma iwa'rãmizé hã tisõ: 16 “Ma'ãpé aimorĩ, uburé Zudeu norĩ hã 'rã'õtõ da, Susã ãma ihâimana za'ra norĩ hã. Tawamhã te za a'â asaihuri aba ãna ĩ'ãma irowaptẽrẽ za'ra wa'wa za. Si'ubdatõ bâtâ na duré mara si'ubdatõ na te za asaihuri aba ãna duré âhuri aba ãna aihâimana za'ra wa'wa. Tawamhã wa hã ĩma romhuri'wa norĩ me, wa za duré wasai ãna wahâimana za'ra ni za. Taha parip si, wa za mo za apito ma, te inharĩ da hã, tô apito nhimirotizé wa'rãmim nherẽ. Duré ãne zarina tô ĩdâ'â da wamhã, wa za tô dârâ za. Tihai õre di.”

17 Tawamhã Mordecai hã morĩ wamhã, ma tô Esté te te tãma i'ruzé hã uburé 'manha.