Hama te te sima irowa'õtõzé, Zudeu norĩ te te uprosi da
3
Ãne pari, apito Zersi ma tô aibâ Hama na isisi hã tisẽ, imorĩ'rata na dama ipire nhimiromhurizém na 're hâimana mono da. Hama hã, Hamedataha 'ra, Agaguihi nhihudu. 2 Tawamhã apito, ma tô waihu'u, uburé isimiromhurizé 'ri 'rãihâ 're romhuri'wa norĩ hã, Hamahã ma, isõ'remhã tãma 're siwẽ'ẽ za'ra mono da, duré hi'rãtitõ tãma 're si'ubumroi mono da, te te siwi 're iwazé pese mono zéb zarina. Tahawa uburé tãma romhuri'wa norĩ hã ma tô ãne na ãma sãna'rata za'ra. Tane nherẽ, Mordecaihi si nasi tãma siwẽ'ẽi õ di. Duré hi'rãtitõ nasi dame tãma simasisi õ di. 3 Tahawa te apito ma romhuri'wa hâiba amo norĩ hã siwi sadanha Mordecai hã, marĩ wa, apito te te iwaihu'uzé hã te te nasi dame i'manharĩ õ na. 4 Tahawa bâtâ bâre te nasi tãma 'ru zahi u'âsi za'ra, apito te te iwaihu'uzé te te wapari da. Tane nherẽ, te te wapari za'ra õ di, nasi te te tãma i'ru za'ra zé hã. Tawamhã te nasi tãma siwasu'u za'ra, Zudeu wa, apito te te iwaihu'uzé hã te te iwapari õ na hã. Tahawa, ma tô ai'aba'ré Hamahã ma, ãne hã te te tãma wasu'u za'ra da, Mordecai, apito nhimiroti zahi te te iwapari õ zém na te te ãma uzusi u'âsi mono zô, te te 'madâ'â za'ra da. 5 Tawamhã Hama hã, Mordecai, iwazéb sina tãma isiwẽ'ẽi õ na, te te 'madâ'â u'âsi wa, ma tô nasi sada tizahi. 6 Tawamhã Mordecai hã Zudeu na te te tãma wasu'u za'ra wamhã, ma tô waihu'u, õhõ si siwaprosi te te wĩrĩ tõ da. Uburé Zudeu norĩ te te uprosi da, ma tô rowa'õno hã sima 'manha, Zersi dama i'rãnho'õmo na hâimana ré.
7 Tawamhã Zersi dama i'rãnho'õmo na 're hâimana mono ré 12 na ãma iwahum ãma, nisã na a'amo isãna'rata nhisi ãma, ma tô Hama hã 'ru zahi, datoire da te isãmra da hã (isisi hã “purĩ na”), te te ãma rowairébé da, bâtâ na hã, duré a'amo na hã, Zudeu norĩ za da te isimrozéb da hã. Tawamhã datoire da te sãmra wamhã, bâdâ hã dia 13 na ma tô wasu'u zahi, a'amo za'ratazé 12 na ihâimana ãma, ada na a'amo nhisi ãma. 8 Tawamhã Hama hã apito u morĩ wamhã, ma tô ãne tãma tinha:
— Uburé asimi'madâ'âzéb 're, daro wa'õtõ mono na te a'uwẽ aimawi hã 're hâimana za'ra, aiwab õ na roti 're ihâimana mono na. Apito, ã hã iwasété uptabi. Asimiroti hã te te 're wapari za'ra mono õ di. Tahawa, a hã ãma i'aiwa'a su'u za'ra õ na hã aihâimana tõ, ãne na te te ãma 're uzusi za'ra mono nherẽ. 9 Tahawa a hã asima wẽ wamhã, ma'ãpé ãma asisihâtâ asimiroti na ãma irowaihu'u mono zém na hã, da te simro da, ta norĩ hã. Tawamhã wa za aima ropisutu, dama i'rãnho'õmo te cofri 're za te isẽrẽzém na hã 342 miu na ẽtẽ waipo prã prata ipire pibuzém na dama i'rãnho'õmo nhimirowa'âbâzéb da hã.
10 Tawamhã apito tite danhiptõmohi tétézé tinhimiroti zahi te te ãma 're itob'ratato mono zé hã ma tô waze. Taha pari ma tô Hama, Hamedataha 'ra, Agaguihi nhihudu, Zudeu 'rui'wai ma hã tisõ. 11 Tawamhã apito te duré ãne tãma tinha:
— Tô aima hâimana ate rob'uiprazé hã. Ã norĩ a'uwẽ, wa za asib'rata aima sõmri za'ra, marĩ hã asima iwẽzéb zarina ãma 'manharĩ za'ra da.
12 Tawamhã Hama dia 13 a'amo isãna'rata te na apito nhimiromhurizé 'ri 'rãihâ 're romhuri'wa norĩ zô ma tô hâ. Ma tô tãma waihu'u za'ra, uburé apito nhimi'madâ'âzéb 're, 're imreme zusizé mono bâ ãma isaprĩ na te te ãma rob'ui'éré za'ra da, daza'rui wa'õtõ mono na a'uwẽ 're imreme zusi mono norĩ, taha zarina ãma 're hâimana za'ra mono da. Tawamhã uburé danhib'ihâ'a na dama 're ihâimana za'ra mono norĩ ma, duré dama i'rãnho'õmo na 're ihâimana za'ra mono norĩ ma, duré uburé a'uwẽ mono bâ danhib'apito na dama 're ihâimana za'ra mono norĩ ma, te za tãma sõmri za'ra ni za ãhã romnhihâdâ hã. Tawamhã apito tinhisi te te ãma isãrĩ hã, duré tinhiptõmohi tétézém na te te itob'rata to hã, 13 ma tô dama romreme 'wapéi'wa norĩ hã siwi ti'â, uburé daza'rui wa'õtõ mono na dama i'rãnho'õmo norĩ ma. Rowaihu'uzé uburé Zudeu norĩ, da te isimro na misi bâtâ na hã, a'amo isãna'rata te dia 13 ãma, ada na a'amo nhisi ãma. Uburé Zudeu norĩ si'utõrĩ da, ãma dapẽ'ẽzé za'ra ãna, ipréduptém norĩ na, ihi norĩ na, pi'õ norĩ na, duré ai'uté norĩ na zama. Tawamhã duré Zudeu norĩ nhimarĩ hã, za dama i'rãnho'õmo norĩ ma ihâimana za'ra na rowaihu hã ma tô tãma me za'ra ni. 14 Tawamhã rowaihu'uzé hã daza'rui wa'õtõ mono na te za dasiwa'wamhã dasiwi sõré ni za, bâtâ pisutu zahi iwisizém na danhimiza'rese dahâimana za'ra da hã.
15 Tawamhã apito ma tô tãma 'ru zahi za'ra, dama romreme 'wapéi'wa norĩ sa'ẽtẽ si'aba'ré da, uburé daza'rui wa'õtõ mono u. Tawamhã, Susã dahu nho'õmo ãma hã ma tô dasiwa'wa roti zahi hã dasiwi sõré ni. Tawamhã apito norĩ, Hamahã me ma tô aimasisi zahuré, marĩ te te hâsi da hã, taha 'ri nho'õmo 're ro'wa'rudu te te iropéi mono siwaprã.