— Apito, ma'ãpé sô da'mazatõrĩ za'ra na, pi'õi ubuni wẽ uptabi na asimi'madâ'â na 're ihâimana za'ra mono norĩ zô, sô rĩtĩ za'ra da. 3 Ma'ãpé duré uburé daza'rui wa'õtõ mono na ni'wam norĩ hã romhuri'wa da, pisutu za'ra na, duré tãma waihu'u za'ra na, tô õ norĩ pi'õ iprédupté iwẽ uptabi hã we te te simroi mono da ãwa, Susã 'ri nho'u dama isa'ẽtẽ u. Tawamhã Hegai eunucu hã uburé apito mro norĩ 'madâ'â'wa hã te za isõwa're'reb zara rob'madâ'â za'ra, pi'õ norĩ te te iwaibui wẽ za'ra da hã, 'madâ'â wẽ da, te te nasi ihâiba 'ma'wamarĩ wẽ za'ra da hã. 4 Apito, pi'õ iprédupté danhipai u te te aima irowẽ hã te za si'apito za, Vastihi nhowa're'remhã.

Tawamhã apito ma tô wẽsã, tinhimirosa'rada te te tãma ipibu za'ra zé hã.

5 Susã ãma hã te Zudeu 're hâimana, Mordecai na isisi hã. Ta hã Ja'ihi 'ra, Simehe nhihudu, duré Quisihi nhihudu, Bẽzamihĩ hawi a'uwẽ. 6 Babilonia te, apito Nabucodonozo, Zeruzalẽ hawi Zudaha nhihudu norĩ te apito Zoaquĩ, te te saprõni wamhã, ma tô Mordecai hã Zoaquĩ norĩ, da te isimroi mono 'remhã dame tihâiba. 7 Mordecai, te tihidiba Hadasa na isisi hã siré saprõ, Esté na isisi amo hã. Ta hã pi'õ i'ubu 'madâ'â ze, duré ihâiba 'madâ'â zei uptabi. Imama norĩ ina me tiwi idâ'â zahuré. Tahawa, ba'õtõre ré, Mordecai te te âri wa, ma tô ti'ra ne prédu.

8 Tawamhã apito, tãma iromhuri'wa norĩ ma, te te oto tãma 'ru za'ra wa, isimiroti pire na te te dama ãma rob'mahârâ za'ra da hã, ma tô azarutu norĩ ahâ na da te simro, Susã na dahu nho'õmo nhisi u, Hegai na isisi ma, te te hâiba nhomri za'ra da, te te 'madâ'â za'ra da hã. Tamemhã, dawazari misi azarudu iwẽ uptabi, Esté na isisi hã te tihâiba. 9 Tawamhã Hegai ma tô wẽsã, Esté hã. Tahawa õhõ si ma tô 'madâ'â wẽ, uburé pi'õ norĩ nhipai u. Ma tô awa'awi ãma sãna'rata, te te ihâiba 'ma'wamarĩ wẽ na hã, duré dasa iwẽ aimawi te te nasi tãma isõmri na hã. Romhuri'wa norĩ iwẽ hã ma tô duré 7 na te te siwi i'madâ'â da hã sani za'ra, apito nhimiromhurizé 'ri 'rãihâ hawimhã. Tawamhã Esté duré romhuri'wa norĩ hã ma tô Hegai hã oto sõré, 'ri're wa'wa iwẽ uptabi 're, apito te, pi'õ norĩ nhimiwaptâ u.

10 Tawamhã Esté, Mordecai te te tãma i'ruzéb zarina, ma tô 'manha. Tahawa, ni'wai ma hã siwasu'u õ di, tite a'uwẽ wamri na hã, duré nimahã siwapru na hã. 11 Bâtâ mono na hã Mordecai, apito te, pi'õ norĩ nhimiwaptâ zahâpâ nho're wa'waibaba te nasi ne, niha Esté hã hâimana zô, duré niha za marĩ tãma ihâimanazéb da hã te te waihu'u da.

12 Azarutu norĩ, iwẽ na da te hâiba 'ma'wamarĩ za'ra mono ré hã ma tô ãma tiwahub za'ra, misi. Imropâ a'amoi 'remhã ma tô nasi dasiwi hâiba u'ré za'ra ni, mirra na wedewa'u tom nhisi isadaze pire na. Duré wahu aiwa ãma isipo'o hawimhã imropâ a'amoi 'remhã te iwa'u to zadaze ihâiba amo norĩ na nasi hâiba u'ré za'ra ni. Tawamhã nasi da te ãma ihâiba u'ré za'ra zé hã oto si'utõrĩ wamhã, azarudu hã misi si te nasi da te oto simro, apito Zersihi u. 13 Tawamhã azarutu norĩ hã apito mro norĩ 're ihâimana za'ra mono zém hawi, apito nhorõwa 'ri 'rãihâ u sidâpâsi sisãna're nasi si'aba'réi wamhã, ma tô tite marĩ te te sima iwẽ za'ra mono si nasi siré 'wasa. 14 Tawamhã te pi'õ norĩ hã sidâpâsi misi si nasi asisi, apito nhimiromhurizé 'ri 'rãihâ u hã. Duré awẽm na te nasi ai'aba'ré, apito mro norĩ 're ihâimana za'ra mono zé hâiba amoi u. Tame ma tô Saagasihi ma hâiba nhomri za'ra, te te 're 'madâ'â za'ra mono da hã. Ta hã eunucu hã, apito mro norĩ 'madâ'â'wa. Tawamhã, pi'õ norĩ hã apâ te te sina siri za'ra õ di, apito te te isõpẽtẽ za'ra da hã, te te wẽsãmri za'ra wapsi, sô i'maihârâ da si, isisi na.

15 Tawamhã Abiaiuhu 'ra Mordecaihi hidiba Estéhé zô dahârâzé ma tô oto iwa waptãrã. Ta hã azarudu, Mordecai te te iprédu, uburé te te siwi iwaihu'u za'ra norĩ, te te siwi iwẽsãmri za'ra. Tawamhã apito te te sõpẽtẽ da, oto wisi wamhã, ma tô Hegai eunucu, apito mro norĩ 'madâ'â'wa te te tãma ipisutu si siré tidu. 16 Tawamhã Esté, apito Zersi tẽme isõ're da te tãma hâiba hâi'ré da, ma tô dasiwi saprõni ni isimiromhurizé 'ri u, tebeti na a'amo 10 na isi'utõrĩ nhisi ãma, 7 na apito isi'i'rãnho'õmozém na ãma iwahubzéb ãma. 17 Tawamhã ta hã, apito ma wẽ uptabi di, isiré azarutu norĩ nhipai u. Te te iwẽsãmrizém na ma tô Esté hã ãma ai'uté. Ãma itob'uzuzém na hã ma tô duré ãma ai'uté, isiré azarutu norĩ te te i'manharĩ waihu'u za'ra õ na. Tahawa ma tô apito hã danhoprezém na oto sõpre, si'i'rãnho'õmo da, Vasti nho'wa're're. 18 Taha pari ma tô dasa isa'ẽne hã 'manha, Esté te te iwazéb zarina. Ma tô uburé dama ipire norĩ hã, duré uburé romhuri'wa norĩ hã waptẽrẽ za'ra. Ma tô duré roti hã 'manha, tô taha bâtâ na bâdâ i'ui'éré pré hâimana da, uburé daza'rui wa'õtõ mono na dama i'rãnho'õmo norĩ ma hã. Tawamhã ma tô tinhibzari hã te te dama sõmri, apito si ãma 're isõpru mono zé hã.

19 Azarutu norĩ hã, apito mro norĩ 're ihâimana za'ra mono zé hâiba amoi u da te simroi mono ré, ma tô Mordecai apito hã pisutu, dama i'rãnho'õmo na te te tãma 're romhuri mono da. 20 Esté hã Mordecai te te i'uwatizéb zarina, ni'wai ma hã siwasu'u õ di, Zudeu norĩ nho hidiba na, õ hã. Tahawa ma tô Mordecai timreme te te tãma i'manharĩzéb zarina tihâimana na hã ãma uzusi, ba'õtõ ré imreme wapari pese 'wa na 're ihâimana mono ne, te te prédu wamhã, õ hã.

21 Mordecai tô taha bâtâ mono na apito nhimiromhurizé 'ri 'rãihâ ãma tinhimiromhuri te te 'manharĩ siwaprã, maparane eunucu norĩ Bigtã na isisi, Teresi na isisi me, apito nhimiromhurizé 'ri 'rãihâ te te 're i'madâ'â zahuré mono, apito zada isahi zahuré zé hã, duré te te sima irowa'õtõ zahuré zé hã te te iwĩrĩ zahuré da hã, ma tô waihu'u. 22 Tawamhã Mordecai, Esté apito sipi'õi ma, ãne hã te te iwasu'u, ma tô apito ma hã wasu'u, Mordecai marĩ te te i'upsibi me hã. 23 Tawamhã sena zô da te aba mono wamhã, ma tô dasiwi upsibi me ni sena hã. Tahawa ma tô eunucu norĩ hã dasiwi butu wazi zahuré ni. Tawamhã apito ma tô dama waihu'u, uburé ãne na rowasu'u na da te ãma rob'ui'éré da, apito nho'a, ibaihâ 'remhã ti'ai wa'õtõ nho'õmo 're uburé marĩ 're ipusi mono zém na.