Esté
Vasti dama i'rãnho'õmo sipi'õ hã Apito Zersi zada ihâimanazé wasu'u
1
1-2 Persia na darom nhisi ãma, apito Zersi na isisi hã 're hâimana mono ré, ma tô ãne hã tiromhâiba. Ta hã ma tô 127 na daza'rui wa'õno hã te te 're a'madâ'â, India na daza'rui wamri hawi, Etiopia na daza'rui wamri u. 3 Apito hã te te 're ida'a'madâ'â mono zém na si'ubdatõ ãma iwahubzém na, ma tô dasa isa'ẽne hã 'manha, uburé tãma da'madâ'â'wa norĩ ma, duré tãma iromhuri'wa norĩ ma zama. Duré Persia ãma dasi'wapéi 'manharĩ'wa norĩ nhib'ihâ'a norĩ hã, Média ãma dasi'wapéi 'manharĩ'wa norĩ nhib'ihâ'a norĩ zama, duré dama i'rãnho'õmo norĩ hã, duré tô daza'rui wa'õtõ na isimarĩ pese norĩ hã, te tame simisutu siré dame tihâimana za'ra. 4 Tawamhã apito Zersi imropâ a'amoi 'remhã, ma tô dama ipire norĩ ma tinhimarĩ iwa'âbâ za'ẽtẽ norĩ hã, duré ihâiba na marĩ i'madâ'â ze 're ihâimana za'ra mono hã uburé pese tãma sina hâi'ré za'ra.5 Tawamhã imropâ a'amo si'utõrĩ pari, ma tô apito hã tinhimiromhurizé 'ri 'rãihâ 'ri mana ãma rob're norĩ ihâimana ãma dasa isa'ẽne hã dama 'manha, Susã na 'ri nho'õmo nhisi ãma uburé 're idahâimana za'ra mono norĩ ma, isibro pese norĩ ma, duré isibrob'õ norĩ ma. Tame dasa na dato isa'ẽtẽ na hã ma tô misi romhuri hã ãma ai'utõ. 6 Duré 'ri mana ãma ma tô zazahâ hâpa na dasiwi wamnarĩ ni, abazi isidi a na ihâ 'manharĩ na duré isidi uzé na zama. Ma tô wedenhorõ isõrõ surure pré na ãma dasiwi wasisi ni, isi'uwazi zapodo ẽtẽ waipo prã prata na i'manharĩ u hã te te tété da, duré 'ri uparizém na ẽtẽ 'manharĩ baihâire marmori na isisi na isa'o u. Waptâzé hã ti'a zebre na i'manharĩ i'uzé na, ẽtẽ baihâire marmori isisi na i'a na, waptâzé ihâ su'u na isi'utõrĩ'õ na zama, duré ẽne iwẽ uptabi na zama waptâzé hã. Duré 'ri mana ãma rob're ãma dasimasisizé ẽtẽ waipo pré oru na i'manharĩ i'uwa na hã, ẽtẽ waipo prã prata na zama i'manharĩ hã. 7 Sô idahãsi norĩ, hâsizé ẽtẽ waipo pré oru na i'manharĩ wamhã, te nasi âhu. Dasinei õ na ma tô uburé tihâimana za'ra. Tahawa apito tite uva 'rãi wa'u isé sima iwẽ na te te nasi dama sa'wari za'ra mono da hã, ma tô tãma 'ru za'ra, tite romhuri'wa norĩ ma hã. 8 Uburé norĩ, ma tô sima iwẽ na nasi âhu. E marĩ wa. Apito hã ma tô aré 'ri 'rãihâ ãma tite romhuri'wa norĩ ma waihu'u za'ra, sô ihãsi norĩ ma, te te nasi tãma 'wasari da, te te sima iwẽ za'ra zéb zarina.
9 Apito sipi'õ Vasti na isisi hã ma tô duré imro uburé sô ihãsi norĩ mro ma, dasa isa'ẽne hã 'manha, apito nhimiromhurizé 'ri 'rãihâ ãma.
10 Tawamhã 7 bâtâ ãma datoi wa dasa isa'ẽtẽ wamhã, ma tô apito uva 'rãi wa'u isé wa'u hã sa'ẽtẽ na nasi hâsi. Tahawa tãma hã rowẽ uptabi di. Tawamhã 7 na eunucu te te tãma 're iromhuri za'ra mono zô dahãsi da hã ma tô dama 'ru za'ra, ãne isisi norĩ zô: Meuma, Bizta, Harbona, Bidita, Abagata, Zeta, duré Carcasi. 11 Apito ma tô duré dama waihu'u, apito sipi'õ Vasti zô si'aba'ré da, itẽme morĩ da, apito sipi'õ te, danhopre waipo ré. Apito hã ma tô sima wẽ, pi'õ hã 'madâ'â zei uptabi wa, dama ipire norĩ hã, duré aimawi sô idahãsi norĩ hã ãma tob'uzu za'ra da, iwẽ na. 12 Tane nherẽ, apito sipi'õ hã ma tô wẽ'õ zahi, apito te te iwaihu'uzé hã. Tahawa apito hã ma tô sada ab'rui pese, isimiroti zarina imro hã hâimana õ wa.
13 Apito hã marĩ mono na te te sima 're rowairébé mono wana ré, ma tô a'â dama i'rãnho'õmo te, roti waihu'u pese 'wa norĩ hã, duré dahâimanazé waihu'u pese 'wa norĩ hã te te ãma 're sadanharĩ za'ra. Taha wa, tô ta norĩ zô ma tô tihârâ za'ra, dama roti'wa norĩ zô hã, 14 tãma i'umnhasi za'ẽtẽ za'ra, ãne isisi norĩ zô hã: Carsena, Seta, Adimata, Tarsi, Meresi, Marsena, duré Memucã. Ã norĩ hã 7 na ihâiba za'ra hã ma tô Persia ãma duré Média ãma dama ipire na dama 're hâimana za'ra, uburé danhimiromhurizém nhipai u pire na hã. Apito 'rata, apito ma dama roti'wa na ma tô duré 're hâimana za'ra. 15 Apito ma tô sadanha ãne:
— Wa hã apito Zersi, wa tô aré ĩma romhuri'wa norĩ hã satõrĩ za'ra, apito sipi'õ Vasti tẽme si'aba'ré da hã, te tãma i'ruzéb ré. Tane nherẽ, te te ĩzazei õ di. Tahawa dama i'rãnho'õmo nhimiroti 're ihâimana mono zéb zarina, e niha te za ãne wamhã, tãma tiromhâiba za.
16 Tawamhã Memucã te apito ma, duré ite dama ipire norĩ ma nharĩ za'ra ãne:
— Apito sipi'õ, aima si, duré ate ipire norĩ ma si te te marĩ hã 'manharĩ wasédé õ di. Uburé aibâ norĩ 'ri wa'õtõ mono bâ dama i'rãnho'õmo na 're ihâimana za'ra mono norĩ ma zama ma tô marĩ hã 'manharĩ wasété. 17 Tahawa, ãne hã uburé apito nhimi'madâ'âzéb 'remhã pi'õ norĩ hã te te waihu'u za'ra wamhã, te za isarina timro hã te te sima 're hâiba wazéb õ za'ra. Te za te te sima 're nharĩ za'ra ãne: “Apito Zersi hã ma tô aré sô da'mazatõ, sô da'maimorĩ da, apito sipi'õ Vastihi zô hã. Tane nherẽ, itẽme morĩ õ di.” 18 Tô ã bâtâ na te za pi'õ norĩ hã Persia ãma duré Média ãma dama ipire mro norĩ hã waihu'u za'ra, apito sipi'õ Vasti te te i'manharĩ wasété zé hã. Ta hã te za duré timro ma hã wasu'u za'ra. Tawamhã daro mono bâ pi'õ norĩ hã timro te te oto 're wazéb za'ra mono õ wamhã, te za duré imro si'aibâ norĩ hã sada 're sahi za'ra. 19 Tahawa, apito, asima wẽ wamhã, te za asisi hã ãma isã, marĩ na rotizéb u hã, apito sipi'õ Vasti hã niwamhã asõ're u sihâi'ré tõ da hã oto. Tahawa te za duré dama i'ru Persia ãma, duré Média ãma itepãi wasisi 're, ãhã roti na da te ãma rob'ui'éré da hã, niwamhã da te pari waihu'u tõ da. Taha parimhã Vasti hã te za iwaze za, taha nhipai u pi'õ iwẽ uptabi hã asima sẽrẽ da, isõwa're'remhã. 20 Tawamhã apito, asimiroti zahi waihu'u na uburé pese daro mono bâ da te oto ãma rob'mahârâ za'ra wamhã, te za uburé pi'õ norĩ timro hã te te 're wazéb za'ra, isibro pese norĩ hã, duré isibrob'õ norĩ zama.
21 Tawamhã apito, ite dama ipire norĩ me ma tô Memucã tinhimirosa'rada te te imezé hã siwi wẽsã. 22 Taha zarina, ma tô apito tinhimirob'ui'éré hã, daza'rui wa'õtõ mono na 're idahâimana za'ra mono norĩ ma hã me za'ra, romnhihâtâ na damreme mono bâ ãma irob'ui'éré na hã. Taha na, ma tô uburé damro si'aibâ norĩ ma 'ru za'ra, tinhorõwa za'ra mono bâ, te te 're rob'ru za'ra mono da hã.