Davihi mreme 'rãsudu
23
à hã Davi, Zéséhé 'ra timreme na te te i'rãsutuzé. Ta hã pire na 're hâimana mono da, Zacoho te 'Re ihâimana u'âsi mono te te ipisudu, si'apito da. Duré Izaraéu nhihudu norĩ ma, isõ're'wa iwẽ na 're hâimana mono da, te te ipisudu hã ma tô ãne tinha, Davi hã:2 Uburé Danhib'apito pẽ'ẽzani hã te ĩnho'õmomhã te te 're nharĩ.
Te duré isadawa wasu'u hã ĩzaihâ na 're hâimana.
3 Izaraéu nhihudu norĩ te, 'Re ihâimana u'âsi mono hã ma tô rowasu'u.
Izaraéu nhihudu norĩ 'wawi 're isimapa mono hã ma tô ãne ĩma tinha:
“Ni'wa hã apito i'uwaibaba na te te 're ida'a'madâ'â mono hã, duré 'Re ihâimana u'âsi mono te te sima 're iwẽ mono zéb zarina, wazép sina te te 're ida'a'madâ'â mono hã,
4 ta hã aiwa mararé bâdâ 're i'rã pusi mono wam ne hâiwa nhirõtõ ãna,
duré tã 're ta'a mono pari, duroire bâtâ ro te te 're i'uiwẽ za'ra mono ne hã.”
5 Ãne te za 'Re ihâimana u'âsi mono hã ĩnhihudu ma iwẽ hã te te 're anhomri.
E marĩ wa. Õ hã ma tô tinhimiroti isi'utõrĩ õ na hã, duré i'uwaibaba sena na hã ĩma 'manha.
à hã uburé wa tô wa hã ĩsima wẽ.
Duré ã hã za ĩte te da'ãma i'ai'utézéb da hã.
Ĩma waihu'u pese di ãne hã, 'Re ihâimana u'âsi mono, za te te i'manharĩ na hã.
6 Tane nherẽ, iwasété norĩ hã te za ro'wa ne sãmra za.
Ni'wa hã tinhib'rata na te te duré iwaibu da hã mare di za.
7 Ta norĩ da hã da te ãma sãmra da hã te za isi'uwazi 'wa ré hã, duré niha wamhã wede 'wa ré hã sada tihâimana za'ra za.
Tawamhã te za õ norĩ ãmamhã ãma sazu za'ra ni za, si'unhama pese da, unhama na.
Davihi te dasi'wapéi 'manharĩ'wa norĩ, dama isa'rese za'ẽtẽ norĩ wasu'u
8 Ã hã dasi'wapéi 'manharĩ'wa norĩ, Davihi te, dama isa'rese za'ẽtẽ norĩ nhisi: Zosebi-Basebeti, Taquemoni na romnhisi hawimhã dawa'õtõ nhisi hã “Si'ubdatõ” na ãma hã. Tite isi'uwazi 'rã'wa na 800 na aibâ norĩ te te a'wapéi wamhã, ma tô uburé pese uprosi, dasi'wapéi wamhã.
9 Eliaza, Dodoho 'ra, A'oihi nhihudu hã dama isa'rese za'ẽne “Si'ubdatõ” ihâiba za'ra 'remhã. Tawamhã nimahã na, õ hã Davihi me, ma tô filisteu norĩ dasi'wapé da, nasi isi'rã'õtõ norĩ ma hã amhâzépa zahuré. Tawamhã ma tô Izaraéu nhihudu norĩ hã unhiniwĩ tãma tipraba za'ra. 10 Taha nherẽ, ma tô Eri'aza daza'u tihâiba. Ma tô filisteu norĩ hã a'wapé, nasi sib'rata hi sitete mono wa, tisi'wapézé sib'ézé 'wapa hã tinhib'rata hawi te te iwazere waihu'u õ zéb u. Tawamhã Uburé Danhib'apito hã ma tô taha bâtâ na hã sa'ẽtẽ na tãma tisõ, te te ãma i'ai'uté za'ra zéb da hã. Taha pari, dasi'wapé oto si'utõrĩ wamhã, ma tô Izaraéu nhihudu norĩ apâ hã oto ai'aba'ré, Eri'aza idâ'â za'ra norĩ nho'utu ubuzé te te i'azanizéb u.
11 Taha pari Sama, Agéhé 'ra hararita hã ma tô duré wei mo. Filisteu norĩ hã ma tô si'rã'õtõ Lei ãma, erwira na rob'rã nhisi, da te 're izuri mono zéb ãma. Tawamhã Izaraéu nhihudu norĩ hã ma tô filisteu norĩ ma sisa're. 12 Tane nherẽ, te Sama rob're 'wawi simapa da hã nhamra. Sa'riti wa, ma tô filisteu norĩ hã 'mapã. Tawamhã Uburé Danhib'apito, tô taha bâtâ na ma tô sa'ẽtẽ na te te da'ãma i'ai'utézé hã tãma tisõ.
13 Amnho tehârizéb u te te irosahutuzéb ãma, ma tô dawa'õno hã “Trinta na isisi” 'remhã si'ubdatõ aibâ hã ai'aba'ré, Adulã na 'ri wa'õtõ nhisi ãma ẽtẽ na ab're u hã, Davi ihâimanazéb u, A'uwẽ 'Rãihâ na romharé nhisi ãma filisteu norĩ te te sima i'ri nhoré za'ra wa, hâimana za'ra ré. 14 Tô taha wamhã, Davi hã te 'ri isiptete ãma tihâiba. Duré filisteu norĩ hã ma tô Belẽ ãma tihâimana za'ra. 15 Tawamhã Davi hã te te sima iwẽzéb zarina ma tô tinha ãne:
— Wa hã wa aré ĩsima wẽ upta, â zô ab're hawi suru na â hã ni'wa we te te ĩma a'âri wa, te hâ'rẽne da, Belẽ u 'ridawa za'ẽtẽ na 're idanhisisi mono zéb 'ratamhã!
16 Tawamhã dasi'wapéi 'manharĩ'wa norĩ si'ubdatõ dama isa'rese za'ẽtẽ norĩ hã ma tô filisteu norĩ te te sima i'ri nhoré za'ra zé wa'waibaba ro'rahâri za'ra. Tahawa, ma tô â zô ab're hawi â te te i'a'âri za'ra hã siwi ti'â, Davihi ma. Tane nherẽ, taha â hã te te hâ'rẽne õ di. Te te ihâ'rẽne õ wa'rãmi, ma tô sa'wa, tinhoprubzém na Uburé Danhib'apito ma. 17 Tawamhã ma tô tinha ãne:
— Uburé Danhib'apito, ma'ãpé ĩma ba'a, ã hã â hã te 're hâsi tõ mono da! Te hâ'rẽne 'wa'âhã, aré aibâ norĩ wapru te ihâ'rẽne ne hã, â we te te a'âri za'ra da, tãma romnhimimnhasi nherẽ, sô isi'aba'ré norĩ wapru hã!
Ãhã wamhã, õhõ â hã te te hâ'rẽne õ di.
Ãne ma tô dama iwasu'u za'ẽtẽ norĩ hã siwi 'manha, “si'ubdatõ” ihâiba za'ra norĩ hã.
18 Abisai, Zoabihi sisãnawã, (Zeru'izaha 'ra norĩ hã) ma tô danhib'ihâ'a na 're hâimana, “Trinta na dawa'õtõ” ma, dama isa'rese za'ẽtẽ norĩ ma hã. Ta hã ma tô tite isi'uwazi 'rã'wa na 300 na aibâ norĩ te te a'wapéi wamhã, duré uprosi. Tahawa, ma tô dama iwasu'u za'ẽtẽ na hã oto dama tihâiba, “Trinta na dawa'õtõ” 'remhã. 19 Tawamhã Abisai, “Trinta na dawa'õtõ” 'remhã isiré norĩ nhipai u dama isa'rese za'ẽne. Tahawa, ma tô oto si'i'rãnho'u tãma za'ra. Taha nherẽ, õ hã “Si'ubdatõ na dawa'õno” dama isa'rese za'ẽtẽ norĩ nei õ di.
20 Benaia, Zeoiadaha 'ra hã, 'rinho'u Cabze'eu na isisi ãmamhã, dasi'wapéi 'manharĩ'wa dama isa'rese za'ẽtẽ na hã te 're hâimana. Ta hã ma tô sib'ru na tinhiptede hã te te 're 'manharĩ. Ma tô duré moabita maparane isi'wapé tãma iwaihu'u pese norĩ hã tipã. Tawamhã nimahã bâtâ na rowahâzé pĩni 'rowi morĩ wamhã ab're u hã, ma tô hu'u zérépa hã duré tiwĩ. 21 Ezipsiu zama ma tô duré tiwĩ, aibâ isa'ẽtẽ uptabi hã, isi'uwazi 'rã'wa ré ihâiba hã. Tawamhã duré Benaia tite wede wãiwaré na ezipsiu te te 'wapéi wamhã, ma tô ite isi'uwazi 'rã'wa isib'rata hawimhã tiwi waze. Taha na ma tô tiwĩ. 22-23 Ãne ma tô marĩ hã Benaia hã te te 're ab'manharĩ. Tawamhã taha zama te dama iwasu'u za'rese za'ẽtẽ na hã 're hâimana, “Trinta na dawa'õtõ”, 'remhã. Tane nherẽ, duré “Si'ubdatõ na dawa'õno” dama isa'rese za'ẽtẽ norĩ nei õ di. Tahawa Davi, ti'madâ'â'wa norĩ nhib'ihâ'a da hã ma tô pisutu, ta hã.
24-39 Tawamhã “Trinta na dawa'õtõ” 'remhã, ãne isisi norĩ hã ma tô tihâimana za'ra: Azaéu, Zoabihi sisãnawã; Elana, Dodoho 'ra, Belẽ ãmamhã; Sama, Ericaha me hã, 'rinho'u Harodi na isisi ãma hã; Helesi, Peregui ãma hã; Ira, Iquesihi 'ra, Tecoa na 'ri nho'õmo nhisi ãma hã; Abi'ézé, Anatoti na 'ri nho'õmo nhisi ãma hã; Mebuna'i, Husa na 'ri nho'õmo nhisi ãma hã; Salmo, A'oi na 'ri nho'õmo nhisi ãma hã; Ma'ara'i norĩ, Herebihi me, Ba'anahã 'ra norĩ hã, 'rinho'u Netofa na isisi ãma hã; Ita'i, Riba'ihi 'ra, Gibea, Bẽzamihĩ nhihudu norĩ nhipti'a ãma hã; Benaia, Piratõ na 'ri nho'õmo nhisi ãma hã; Hida'i, ẽtẽ nhi'riti ãma romharé Ga'asi na romnhisi ãma hã; Abi-Abõ, Araba na romnhisi ãma hã; Azmaweti, Baurĩ na 'ri wa'õtõ nhisi ãma hã; Eriaba, Sa'abõ na 'ri wa'õtõ nhisi ãma hã; Zasẽhẽ 'ra, Zonata; hararita na a'uwẽ wamri hã, Sama norĩ, Aiãhã me hã, Sararihi 'ra norĩ hã; Eripéréti, Acasiba'ihi 'ra, Ma'aca na romnhisi ãma hã; Eri'ã, Aitopéhé 'ra, Gilo na 'ri wa'õtõ nhisi ãma hã; Hezro, Carmelu na 'ri nho'õmo nhisi ãma hã; Pa'ara'i, Arabi na romnhisi ãma hã; Igau, Natãhã 'ra, Zoba na romnhisi ãma hã; Bani, Gadihi nhihudu norĩ nhipti'ai ãma hã; Zereti, Amo na romnhisi ãma hã; Na'ara'i, Be'erote na 'ri nho'õmo nhisi ãma hã, Zoabihi ma isi'wapézé te te tãma 're i'a'wapéi mono, Zeru'iza na nhisi ma; Ira norĩ, Garebihi me hã, Zati na 'ri wa'õtõ nhisi ãma hã; duré Urias, hitita na a'uwẽ wamri norĩ ãma hã.
à norĩ hã dasi'wapéi 'manharĩ'wa dama isa'rese za'ẽtẽ norĩ, 37 na ihâiba za'ra hã.