Davi tinho're na iwatazé 'Re ihâimana u'âsi mono ãma
22
à hã danho're hã, Uburé Danhib'apito ma, Davi isõ'rezé, Sauhu wi te te sõ'reptui wa, duré uburé isitob'ru norĩ wi zama te te sõ'reptui wa:2 Uburé Danhib'apito, ĩte ẽtẽ tõmo wawẽ tede, ĩte 'ri itede. Duré ĩnho'reptui'wa te ĩma 're hâimana.
3 Ĩte 'Re ihâimana u'âsi mono, ẽtẽ tõmo wawẽ itede, ãma 're ĩsima'uri mono zé.
Õ hã ĩte ibaihâ tete 'manharĩ zapoto na ĩsimapazé.
Õ hã duré ĩnho'reptui'wa, iwaihu'u pe.
Õ hã ĩte 'ri ĩsima iwẽ na ĩhâimanazé.
Õ hã Ĩnho'reptui'wa, dasipãrĩ wi te te 're ĩnho'reptui u'âsi mono.
4 Wa hã Uburé Danhib'apito wi, te rowaptẽrẽ wamhã, te za ĩnhitob'ru norĩ wi hã ĩnho'reptu.
Tahawa ma'ãpé Uburé Danhib'apito ãma 're aiwata za'ra wa'aba mono!
5 Â sisaru dapãrĩ'wa hã ma ĩ'uirĩ.
Te duré te te ĩwabzuri, ta hã.
6 Dadâ'âzé, ma wedenhorõ na hã ĩwasisi.
Duré ab're da'ãma ti'azé, damramizé hã ma tô ĩzô 'manha, te te ãma ĩ'âri da.
7 Te robzépata za'ẽtẽ wa, wa tô Uburé Danhib'apito wi rowaptẽ sa'ẽtẽ, te te ĩpawaptob da.
Tahawa, tite 'ri 'rãihâ ãma ĩmreme hã ma tô wapa. 'Re ĩzadari mono zé hã ma tô duré wapa.
8 Tawamhã ti'a te popo. Tahawa siptete na hâimana waihu'u õ di.
Ẽtẽ 'rãihâ nhana'rata norĩ duré sãsã'ã za'ra wamhã, ma tô tipopo'o za'ra, 'Re ihâimana u'âsi mono hã sahi sina hâimana wa.
9 Isisi're hawimhã ma romnhizé hã watobro.
Duré isadawa hawimhã ma tô pré'a hã wairé, duré uzâ dahâiba uprosi'wa hã.
10 Õ hã ma tô hâiwa hã 'ridawa. Tawamhã ma tô we si'ra, hâiwa'a i'rãdâ ipara zahâpâ ihâimana na.
11 Hâiwa ãma romhuri'wa querubĩ na isisi ba nhisiwi ma tô wara. Te duré sa'ẽtẽ wara, rowa'u'u zaripi na hã.
12 Hâiwa'a i'rãdâ'â na ma tô si'upsi. Ma tô duré hâiwa'a ihâza'õno hã, â ãma ihâimana za'ẽne te te siwi ihâiba uirĩ na hã tihâiba.
13 Tãsi'ubuzi hawi ma tô pré'a hã tiro'o za'ra isõ'remhã.
14 Tawamhã Danhipai u Uburé Danhib'apito ma tô we hâiwa rãrã hã awa'awi 'manha.
Imreme da te dasiwi iwaparizéb da hã, ma tô ãhã wamhã 'manha.
15 Õ hã tite ti hã te te sãmra wa, ma tô tinhitob'ru norĩ ãma hã ropé.
Duré isimirob'uiwẽ rowa'a ma, sisa'rei mono da hã, ma tô tãma 'manharĩ za'ra.
16 Uburé Danhib'apito, tinhitob'ru norĩ ma, sa'ẽtẽ te te tãma pri'i za'ra wamhã, duré sada siti'ru za'ra wa, tãirãrã'ã na si te te 'wapé za'ra wamhã, ma tô â na'rata uptabi hã sihâi'ré.
Ti'a na'rata mono hã ma tô duré sõ'awimhã tihâimana za'ra.
17 Uburé Danhib'apito hâimo hawi we ĩzô simiwẽ wamhã, ma tô ĩpatété.
Ma tô ĩwaze, â 'rehâ hawimhã.
18 Uburé Danhib'apito, ĩnhitob'ru isiptete norĩ wi, ma tô ĩnho'reptu, aré ĩzada isiti'ru za'ra norĩ wi hã.
Uburé õ norĩ hã isiptete si hã aré ĩma hã.
19 Ĩma ropire hâimana wamhã, ma tô õ norĩ hã siwi ĩ'wapé.
Tane nherẽ, Uburé Danhib'apito ma tô ĩ'wawi aimapa.
20 Isimimnhasi hawi ma tô ĩwaze.
Ma tô duré ĩnho'reptu, tãma ĩzawi pese uptabi wa.
21 Uburé Danhib'apito ma tô ĩ'upari wẽ. E marĩ wa. Wa hã sena na i'uwaibaba na si ĩhâimana wa, tãma.
Duré õ hã ma tô iwẽ hã te te ĩma 're anhomri, wa hã iwẽ na 're ĩhâimana mono wa.
22 Wa hã, Uburé Danhib'apito te te sima 're iwẽ mono zéb zarina si, wa marĩ hã te 're ab'manharĩ.
Duré niwamhã iwasédé hã te 'manharĩ waihu'u õ di, ĩte 'Re ihâimana u'âsi mono hã te irẽme na 're ĩhâimana mono da hã.
23 Wa hã wa tô uburé isimiroti hã te ãma tãma 're a'uwaimrami.
Duré niwamhã niha na isimiroti te iwapari õ na 're ĩhâimana mono õ di.
24 Uburé Danhib'apito ma hã waihu'u pese di, ĩwasédé te tiwi i'manharĩ'õzém na hã.
Duré iwasété nhiti romhâ na 're ĩhâimana mono na zama, tãma waihu'u pese di.
25 Ãne wa, te õ hã te te 're ĩ'upari wẽ. E marĩ wa. Sena na 're ĩhâimana mono na tãma waihu'u pese dâ'âsina, marĩ te i'upai'õzém na hã.
26 Uburé Danhib'apito, a hã te sena na 're aihâimana mo, sena na aima 're ihâimana za'ra mono norĩ ma hã.
Duré i'uwaibaba na si awa'awi ai'ãma 're inomro mono norĩ ma si, te duré i'uwaibaba na si tãma 're aihâimana za'ra mo.
27 Wẽ na 're ihâimana za'ra mono ma si, te duré aiwẽ uptabi na tãma 're aihâimana za'ra mo.
Tane nherẽ, te iwasété uptabi norĩ ma si, isitob'ru na hã 're aihâimana mo.
28 Wapu na 're isi'madâ'â za'ra mono norĩ hã te duré 're i'anho'reptui mo.
'Re isi'madâ'â ze za'ẽtẽ za'ra mono norĩ si te 're i'anhisém nomri mo.
29 Uburé Danhib'apito, a hã ĩte ĩma rob'uiwẽ'wa.
A hã te duré robra ĩ'ãma 're ihâimana mono hã 're i'a'uprosi mo.
30 A hã te ĩnhiptetezé hã ĩma 're isõmri mo, ĩnhitob'ru norĩ te ãma 're i'a'wapéi mono da hã, duré te ãma 're i'ai'uté za'ra mono zéb da, asimipawaptobzéb zarina.
31 Ã hã 'Re ihâimana u'âsi mono, te uburé marĩ hã i'uwaibaba na si te te 're ab'manharĩ. Te duré tinhimiropisutuzé hã te te ãma 're a'uwaimrami.
Õ hã aiwa ibaihâ tete 'manharĩ zapodo dasimapazém ne, te 're hâimana, sô 're irĩtĩ za'ra mono norĩ ma hã.
32 Uburé Danhib'apito si, misire 'Re ihâimana u'âsi mono te 're hâimana.
'Re ihâimana u'âsi mono si te ẽtẽ tõmo wawẽ tede hã wama 're hâimana za'ra.
33 Õ hã ĩsima'urizé, isiptede.
Te ĩsima iwẽzéb zarina, 're ĩne mono wamhã, te ĩ'wawimhã 're simapa.
34 Õ hã te te 're ĩrẽme mono õ di, ĩsi'marõwĩrĩ da hã.
Ma tô ĩdâ'â ãna te te duré 're ĩnhimizusi ẽtẽ 'rãihâ nhisiwimhã.
35 Õ hã dasi'wapé na te ĩma ãma 're sisanho u'âsi, umnhi'ã isiptete uptabi na 're ĩsi'wapéi mono da hã.
36 Uburé Danhib'apito, a hã ibaihâ tete 'manharĩ zapodo dasimapazé hã ma tô ĩma isõ, ĩnho'reptuzéb da hã.
Duré asimipawaptobzé hã ma tô te te 're ĩnhiptete.
37 A hã ĩrẽme waihu'u õ di, ĩsiwaprosi ĩnhitob'ru norĩ te te siwi ĩ'âri da hã.
Duré niwamhã misidi na wa hã ĩwaptã'ã õ di.
38 Ĩnhitob'ru norĩ zarina, wa hã 're ĩne mono wamhã, wa za te 're a'uprosi.
Ĩnhimizazâri da hã mare di, te ãma ai'uté za'ra õ ré hã.
39 Wa hã wa duré te 're azu pese. Tawamhã wahutu waihu'u za'ra õ di, õ norĩ hã.
Õ norĩ ãma te 're ai'uté za'ra mono wamhã, te ĩpara ãmamhã 're rere'e.
40 A hã te dasi'wapé da, ĩnhiptede hã ĩma 're isõmri mo. Taha zarina ĩnhitob'ru norĩ ãma, te 're ai'uté za'ra mono da hã, te ĩma 're i'manharĩ u'âsi mo.
41 Ĩma sisa'rei mono da hã te duré tãma 're i'manharĩ za'ra mo.
Tahawa wa hã ĩzada isahi za'ra norĩ hã, wa duré te 're apru.
42 Õ norĩ hã da te pawaptob za'ra da, dazô sõpré mono nherẽ, ni'wai õ di, te te isõ'reptu za'ra da hã.
Uburé Danhib'apito, te te siwi 'mahârâ nherẽ, te te sada'âbâ za'ra õ di.
43 Wa hã wa te 're aba'réi pese za'ra. Tahawa te õ norĩ hã 're siti'a zaprub za'ra.
Wa duré te 're awati'i, rowai'o 'ri nhi'riti na da te 're iwati'i za'ra mono ne.
44 A hã, te 're ĩnho'reptui u'âsi mo, ĩnhib'a'uwẽ, ĩzada 're ihâimana za'ra mono norĩ wa'wa hawi. Te duré apâ 're ĩnhimizusi u'âsi mo, daro mono bâ dama i'rãnho'õmo na 're ĩhâimana mono da hã.
A'uwẽ aré ĩma isa'rese'õ norĩ hã ãhã na te oto pawa'âbâ ãna ĩma romhuri'wa na 're hâimana za'ra.
45 Wasiré a'uwẽ'õ norĩ hã te ĩnho'remhã oto ĩma 're siwẽ'ẽ za'ra.
Te duré ĩnhimiroti te te 're wapari pese za'ra, marĩ te tãma 're a'rui mono wamhã.
46 Tinhiptede te duré te te 're simini za'ra.
Rẽrẽ'ẽ sina te duré ite za'ra 'ri isiptete hawimhã 're wairébé.
47 Uburé Danhib'apito te tô dâ'â'õ u'âsi na 're hâimana.
Ma'ãpé ãma 're aiwata za'ra wa'aba mono, ĩte ẽtẽ tõmo wawẽ tete ãma.
Ma'ãpé, 'Re ihâimana u'âsi mono hã dama 're wasu'u za'ra wa'aba mono, ẽtẽ tõmo wawẽ tede, ĩnho'reptui'wa hã.
48 Õ hã te te 're ĩ'ruiwa'âbâ, ĩnhitob'ru norĩ na.
Te duré ĩnhiptete zahâpâ daro mono bâ 're dahâimana za'ra mono da hã, te te 're da'anhoré.
49 Te duré ĩnhitob'ru norĩ wi hã 're ĩzani mo.
Uburé Danhib'apito, a hã te ĩma 're i'manharĩ mo, ĩnhitob'ru norĩ ãma te 're ai'uté mono da.
Duré aibâ isipãrĩ ze za'ra norĩ wi hã te ĩ'wawimhã 're aimapa mo.
50 Tahawa, wa hã dawamri mono bâ 're idahâimana za'ra mono norĩ wa'wamhã wa ai'ãma 're ĩwata.
Wa duré danho're na hã ai'ãma 're ĩwata.
51 'Re ihâimana u'âsi mono, te tite apito ma hã te te 're sõmri, sa'ẽtẽ na te te da'ãma 're i'ai'uté mono zé hã.
Te duré tinhimizawizé hã te te 're hâi'ré, te te sima ipisutu ma hã, Davihi ma hã. Te za duré isihudu norĩ ma, te te 're ahâi'ré u'âsi.