— Sau, duré ihawi a'uwẽ norĩ te hã i'upa, dapãrĩ na hã. Ta hã ma tô Gibiã ãma a'uwẽ norĩ hã uprosi.

2 Gibiã ãma a'uwẽ norĩ hã, Izaraéu nhihudu norĩ hãi õ di. Ta norĩ hã amoreu na a'uwẽ wamri ĩsurure, Izaraéu nhihudu norĩ te te tãma iropisutu za'ra, i'wawi 're simapa za'ra mono da hã. Tane nherẽ, ma tô Sau hã aré pibu, te te uprosi da, Izaraéu ti'ai 'rem norĩ ma, te te i'manharĩ wẽ zarina, duré Zuda ti'ai 'rem norĩ ma. Tawamhã Davi, Gibiã ãma a'uwẽ norĩ zô hârâ wamhã, 3 te ãne tãma nharĩ za'ra:

— E marĩ, wa za aima 'manharĩ za'ra wa'wa. Wa ĩsima wẽ, wa hã te wa'âbâ da, iwasété 'manharĩzé aima ihâimana za'ra wa'wa hã, ãne zarina 'Re ihâimana u'âsi mono nhib'a'uwẽ norĩ ma, iwẽ hã ãma pisutu za'ra wa'aba da.

4 Tawamhã ma te ãne ãma sada'âbâ za'ra asa:

— Sauhu ãma, duré ihawi a'uwẽ norĩ ãmamhã wanhimirob'madâ'â za'ra hã, ẽtẽ waipo pré oru na hã, duré ẽtẽ waipo prã prata na hã rowairébézé ihâimana da hã mare di. Duré wa te wasima wẽ za'ra õ di, Izaraéu nhihudu norĩ, wa te wasiwi i'maiwĩrĩ da hã.

— Tane wamhã, e marĩ te bété asima iwẽ za'ra wa'wa, wa hã te aima i'manharĩ za'ra wa'aba da hã. — Ãne te Davi hã sadanharĩ za'ra.

5 Tawamhã ãne ma te ãma sada'âbâ za'ra asa:

— Sau hã ma tô aré sima wẽ, te te wa'uprosi pese da hã, duré wasi'ma'rãnhipa tõ da, Izaraéu nhihudu norĩ za'rui 'remhã. 6 Tahawa ma'ãpé 7 na isihudu si'aibâ norĩ hã wama hâiba nhomri za'ra na, wa te sõ'reti za'ra da, Uburé Danhib'apito nho're, Gibea ãma, Sau 'ri nho'õmo wa ipotozéb ãma, si'apito da, Uburé Danhib'apito te te ipisudu hã.

Tawamhã apito, ma te ãne ãma sada'âbâ za'ra asa:

— Wa za tô aima hâiba nhomri za'ra wa'wa!

7 Tane nherẽ, Davi, Zonataha me ropisudu te te sima i'manharĩ zahuré zéb zarina, apito, Mefibozéti hã te te sa'réi õ di, Zonataha 'ra, Sau nhihudu, da te ĩwĩrĩ da hã. 8 Tane nherẽ, ma tô ti'â Armoni hã, duré Mefibozéti hã, maparane Risipaha 'ra norĩ hã, Ai'asihi 'razéb 'remhã, Sauhu ma, te te isõmri hã. Duré 5 na ma tô Merabihi 'ra norĩ hã waibu, Sauhu 'razéb 'rem norĩ hã, Adri'é, Bazira'ihi 'ra ma, te te isõmri hã, 'rinho'u Me'ora na isisi ãma 're ihâimana mono hã. 9 Tawamhã Davi 7 na hã a'uwẽ Gibiã norĩ ma, te te ihâiba nhomri za'ra norĩ hã ma tô 'Re ihâimana u'âsi mono nho'remhã sõ'reti za'ra, ẽtẽ 'rãihâ ãma. Tawamhã siré simisutu ma uburé tidâ'â za'ra. Rowahâzé 'rãsutu ãma cevada na amnho nhisi tehârizém na'rata ãma, ma tô ãne na marĩ hã watobro.

10 Tawamhã Risipa, Sauhu mro prã hã ma tô zazahâ hâiro hã ti'â. Ta hã ma tô ẽtẽ tõmo wawẽ nhisiwimhã hâparapo. Tawamhã tame ma tô tihâiba, amnho hã da te itehâri za'ra mono zéb na'rata hawim haré, tã hã 7 na ihâiba za'ra norĩ nhisiwi ipini waptã'ãzéb u. Tawamhã si norĩ ma hã ihâiba za'ra hã te te rẽme za'ra õ di bâtâ na hã, duré abaze norĩ ma barana ihâiba za'ra zô isihutu da hã te te tãma rẽme za'ra õ di.

11 Tawamhã Risipa te te i'manharĩzé te te waihu'u wamhã, 12 Davi hã ma tô mo, Zabesi-Ziliadi na romnhisi ãma 're ihâimana za'ra mono norĩ wĩ, Sauhu hi hã, duré i'ra Zonataha hi hã te te tiwi waibu za'ra da. Zabesi ãma 're ihâimana za'ra mono norĩ hã ma tô aré ihâiba zahuré hã siwi sani, Bete-Sã na 'ri nho'õmo nhisi ãma 're idasisõpẽtẽ za'ra mono zéb ãma, filisteu norĩ, Sau hã te te tô siwi iwĩrĩzé bâtâ na, ẽne hã Ziuboa na isisi wa, te te siwi isasõmrizéb ãma. 13 Tawamhã Davi, Sau norĩ hi hã, Zonataha hi me hã ma tô 7 na aibâ norĩ 'rãiwazi na da te isimro norĩ hi zu hã sa'ra. 14 Tawamhã Sauhu hi hã, Zonataha hi me hã ma tô Quisi, Sau mama ãma da te iti'azéb ãma siwi sé, 'rinho'u Zela na isisi ãma 're ihâimana mono 'ru wa, Bẽzamihĩ nhihudu norĩ nhipti'ai ãmamhã. Tawamhã apito te te i'ruzé hã uburé ma tô dasiwi 'manharĩ ni. Taha parip si, ma tô 'Re ihâimana u'âsi mono hã isimirowaptẽrẽ za'ra zém na hã ãma sada'âbâ za'ra, ite za'ra ti'ai wa'õtõ nho'õmo na hã.

15 Tawamhã dasi'wapé hã ma tô duré tihâiba filisteu norĩ 'remhã, Izaraéu nhihudu norĩ 're me hã. Davi norĩ hã tite dasi'wapéi 'manharĩ'wa norĩ me isi'aba'ré hã ma tô filisteu norĩ hã 'wapé za'ra. Tawamhã Davi dasi'wapé siwaprã hã wasutu uptabi di. 16 Tamemhã aibâ i'rãihâ Isbi-Benobi na isisi te hã ẽtẽ topsada brõzi 'manharĩ 'rã'wa pire pibuzé hã 5 kilu na, duré taha te sib'ézé 'wapa hã i'wa té. Tahawa, ma tô sima rosa'rata, Davi te te ãma wĩrĩ da aré. 17 Tane nherẽ, Abisai Zeru'izaha 'ra hã ma tô Davi hã sõ'reptu. Filisteu te te 'wapéi wamhã, ma tô tiwĩ. Tahawa, Davihi te dasi'wapéi 'manharĩ'wa norĩ, ma tô ropisudu hã ãma sima 'manharĩ za'ra, niwamhã isiré hã dasi'wapéi u hã 're pusi mono tõ da. Tahawa ma tô ãne tãma nharĩ za'ra:

— Apito, a hã Izaraéu nhihudu norĩ te, rob'uiwẽ'wa. Wa norĩ hã wa te wasima aiwẽ za'ra õ di, wa te wasiwi i'asimini da hã.

18 Taha parimhã filisteu norĩ 'wapézé ihâiba amo hã ma tô duré tihâiba, 'rinho'u Gobi na isisi ãma. Tawamhã Sibeca'i, 'rinho'u Husa na isisi ãma 're ihâimana mono hã ma tô aibâ i'rãihâ Safe na isisi hã tiwĩ.

19 Tawamhã filisteu norĩ 'wapézé ihâiba amo Gobi ãma duré hâimana wamhã, ma tô Elana, Zaihi 'ra, Belẽ ãma hã aibâ 'rãihâ Gulia na isisi hã tiwĩ, 'ri nho'õmo Gati na isisi ãma. Tawamhã aibâ 'rãihâ te, isi'uwazi 'rã'wa para'õtõ ubuzé hã zazahâ hâ zanhamri ne hã.

20 Tawamhã te duré Gati ãma dasi'wapé ihâiba amo hã tihâiba. Tamemhã aibâ i'rãihâ te 're hâimana, a'uwẽ 'rãihâ nhihudu hã 6 na isiptõmohi isib'rata si'uiwa na hã, duré tô 6 na ipara si'uiwa na ipara hi hã. 21 Ta hã, Izaraéu nhihudu norĩ zada hâimana wamhã, ma tô Zonata, Siméiaha 'ra hã, Davihi sisãnawã hã tiwĩ.

22 Ã norĩ maparane si'uiwa na hã, Gati ãma a'uwẽ 'rãihâ norĩ nhihudu hã ma tô Davihi nhib'ratamhã, duré ite dasi'wapéi 'manharĩ'wa norĩ nhib'ratamhã ai'utõ.