— Wa norĩ hã, Davihi ãmamhã marĩ wama hâimana za'ra õ di! Tahawa, isiré 're iwahâimana za'ra mono da hã marĩ zôi õ di! Izaraéu nhihudu norĩ, oto apâ 'ri u wasi'aba'réi wa'aba!

2 Tawamhã ãne zarina uburé Izaraéu nhihudu norĩ, Davi te te siwi rẽme wamhã, ma tô Sebaha siré oto ai'aba'ré. Tane nherẽ, Zuda ti'ai 're aibâ norĩ, ma tô Davihi ãma sena na tihâimana za'ra. Tahawa, ma tô Zodã pa hawim haré isiré ai'aba'ré, Zeruzalẽ u hã.

3 Tawamhã Davi, ma tô Zeruzalẽ ãma tinhimiromhurizéb 'ri 'rãihâ u oto apâ mo. Morĩ wamhã, ma tô 10 na timro prã norĩ hã sõré, nimahã 'ri 're, isimiromhurizé 'ri 'rãihâ, te te aré sô i'madâ'â za'ra hã. Ma tô duré ti'ru, dasi'wapéi 'manharĩ'wa norĩ hã te te siwi 'madâ'â za'ra da hã. Uburé marĩ te te sima 're iwẽ za'ra mono hã ma tô duré tãma sõmri za'ra. Tane nherẽ, pi'õ norĩ ãmamhã te te 'mairomhâimana õ di. Tawamhã õ norĩ ma, ma tô pisutu za'ra, 'ri 're, 're hâimana u'âsi za'ra mono da hã, tidâ'âzéb u, imro tiwi 're idâ'â za'ra mono ne, 're ihâimana za'ra mono da hã.

4 Tawamhã apito, Amasaha ma, te ãne tinha:

— Ma'ãpé sô aihârâ za'ra na, uburé Zuda ti'ai 're aibâ norĩ zô. Tawamhã te za we ãwa awẽ amo na hã isiré apâ aiwisi za'ra.

5 Tawamhã Amasa ma tô watobro, aibâ norĩ zô hârâ za'ra da hã. Tane nherẽ, apito bâdâ te te tãma itizém na hã apâ te te sina siri õ di. 6 Tahawa, Davi te Abisaihi ma tinha ãne:

— Seba hã, Absarõhõ nhipai u te za wawi ro'wa'rutu pese za'ra. Tahawa, ma'ãpé ĩte aibâ norĩ hã waibu na, isarina ai'aba'réi wa'aba da. Ãnei õ wamhã, nima norĩ 'ri nho'u i'wawi wa'ra 'rãihâ ihâimana za'ra hã te za wawi ãma ate za'ra, ãma wawi isimani za'ra zéb da hã.

7 Tawamhã Zoabihi te aibâ norĩ, quereti norĩ hã, pereti norĩ hã, duré dasi'wapéi 'manharĩ'wa isib'ru norĩ hã ma tô Abisaihi siré ai'aba'ré. Ãhã wamhã, Zeruzalẽ hawimhã ma tô wairé, Sebaha zarina si'aba'ré da hã. 8 Tawamhã 'rinho'u Gibiã ãma ẽne itõmo za'ẽtẽ u oto sihutu wamhã, ma tô Amasa, siwi sõpẽtẽ. Zoabi hã dasi'wapé da, 're idasi'uza za'ra mono zém na uza ré, duré da'usisizém na sib'ézé 'wapa dasi'wapézéb da, da te 're i'wasari mono ãma sa'o ré hã ma tô tihâiba. Tawamhã te te itẽme sina rotété wi, ma tô sib'ézé 'wapa ti'ai u hã tiwi waptãrã. 9 Tawamhã Zoabi, te Amasa hã sadanha ãne:

— Ĩsiwaihu, e rowẽ di.

Tawamhã tinhib'rata nhimire niwĩ, ma tô Amasa hã iwatasu na ti'â, tob'rata hârâ na te te sawi da. 10 Tane nherẽ, Amasa te te 'madâ'â õ di, isib'rata hâiba amo niwĩ sib'ézé te te 're i'âri hã. Tawamhã Zoabi taha na, ma tô Amasa hã idi'i wimhã wa'ré. Te te wa'réi wamhã, ma tô isãna hã tiwi watobro. Ma tô duré ti'ai u hã tiwi ropé. Tahawa, ma tô awa'awi dârâ. Tahawa Zoabi hã te te duré ãma wa'ré zahu õ di, sib'ézém na hã.

Taha pari Zoabi norĩ, tisisãnawã Abisaihi me hã ma tô õne haré Sebaha zarina timorĩ na hã uzusi zahuré. 11 Tawamhã Zoabihi te, dasi'wapéi 'manharĩ'wa Amasaha hâiba 'rata 'râwi i'maza hã ma tô hârâ 'rãihâ na hâ ãne:

— Zoabihi niwĩ uburé i'aihâimana za'ra wa'aba norĩ, duré Davihi niwĩ i'aihâimana za'ra wa'aba norĩ, ma'ãpé Zoabihi zarina oto tô ai'aba'réi wa'aba!

12 Amasaha hâiba hã iwapru na hâiba zapré ré ma tô papo haré bâdâdi wa'wamhã nomro. Tahawa, Zoabihi pawapto'wa, uburé idanhimizahâri za'ra na hã te te da'a'madâ'â wamhã, ma tô Amasaha hâiba bâdâdi nhiti hã tisa. Ma tô duré dasisuwazém na hâiba zuwa. 13 Amasaha hâiba, bâdâdi nhiti da te dasiwi sa'réi pari, ma tô Zoabihi siré uburé aibâ norĩ hã Sebaha zarina oto ai'aba'ré.

14 Seba hã ma tô uburé Izaraéu nhihudu norĩ wamri mono nhipti'a na ro'razâ. Tahawa, ma tô 'rinho'u Abéu-Bete-Ma'aca na isisi u mo. Tawamhã uburé Bicrihi te a'uwẽ norĩ ma tô si'rã'õtõ. Ma tô duré isiré 'ri nho'õmo u hã asisi. 15 Zoabihi te dasi'wapéi 'manharĩ'wa norĩ hã ma tô oto aihutu. Sihutu wamhã, ma tô 'rinho'u hã siwi uirĩ. Tahawa, ma tô ti'a hã nasi siwi sa'wa, 'ri nho'õmo 'wawi wa'ra 'rãihâ tẽme. Ma tô duré 'ri nho'õmo 'wawi wa'ra 'rãihâ 'rowi ab're 'manharĩ na hã ãma siwi sãna'rata, waptã'ã da. 16 'Ri nho'õmo ãma te pi'õ i'rãi waihu'u pe hã 're hâimana. Ta hã ma tô hârâ 'rãihâ na hâ ãne:

— Asiwi ĩwapari aba! Asiwi ĩwapari aba! Zoabihi ma, ma'ãpé 'manharĩ aba, we ĩtẽme morĩ da ãwa, wa hã te tãma robzanhamri da!

17 Tawamhã Zoabi itẽme morĩ wamhã, te pi'õ hã ãne sadanha:

— E a hã Zoabi.

Ĩhe, wa hã! — Ãne ma te asa sada'â.

— Ĩwapari, za te aima inharĩzém na hã! — Ãne te pi'õ tãma tinha.

— Wa aiwapa tô! — Ãne ma ãma tãma wa'rã.

18 Tawamhã pi'õ te ãne oto tãma tinha:

— Ãne te duréihã da te ãma 're iromhõsi za'ra mono zéb zarina hã da te 're nharĩ za'ra: “'Rinho'u Abéu u hã ai'aba'réi wa'aba, roti hã asiwi waptẽrẽ aba da”. Ãne zarina, ma tô marĩ 're ihâimana za'ra mono zém na hã da te 're rowairébé za'ra. 19 Wate 'rinho'u hã sa'ẽtẽ uptabi di. Duré romharé na si iwa 're iromhâimana mono. Duré wa norĩ sena na Izaraéu nhihudu norĩ 'remhã 're iwahâimana za'ra mono. E tiha da, ma tô bété asima ipibu, 'rinho'u za iprubzém na hã. E te asima iwẽ, Uburé Danhib'apito te, prub da hã.

20 Tawamhã ãne ma te Zoabi asa hã ãma tãma wa'rã:

— Niwamhã tane hã te 'manharĩ waihu'u õ di za! Duré niwamhã, wa hã te iprub da hã mare di za. Duré ate 'rinho'u niwamhã te iwamnarĩ da hã ĩma hâimana õ di! 21 Tane hã ãma wanhimirowa'õtõ za'ra õ di. Aibâ Efraĩ nhipti'a niwĩ ẽtẽ ãma 're ihâimana mono, Bicrihi 'ra hã, Seba na isisi hã ma tô wate apito Davihi da hã, sada tiwasété na ãma sãna'rata. Taha aibâ si ma'ãpé asiwi sõmri aba, wa hã duré apâ ĩmorĩ hâ.

— Wa norĩ wa za 'ri 'wawi wa'ra 'rãihâ nhisi hawi i'rã wasiwi me ni, aima hã! — Ãne te pi'õ hã tãma tinha.

22 Tawamhã ãhã pari 'ri nho'õmo u pi'õ hã ma tô mo, a'uwẽ norĩ ma te te tãma waihu'u za'ra da hã. Tawamhã Sebaha 'rã, te te siwi sizâri wamhã, ma tô Zoabihi ma siwi time, 'ri 'wawi wa'ra 'rãihâ nhisi hawi. Tahawa danhimnhihârâzé ma tô hârâ. Te te hârâ wamhã, ma tô tite aibâ norĩ hã 'rã'õtõ. Ma tô uburé 'rinho'u hã siwi tirẽ, apâ 'ri u hã si'aba'ré da. Taha pari Zoabi hã ma tô apâ hã mo, Zeruzalẽ ãma apito Davihi 'rata hâimana da hã.

23 Zoabi hã, dasi'wapéi 'manharĩ'wa norĩ Izaraéu nhihudu 'madâ'â'wa na hã ma tô 're hâimana. Duré Benaia, Zoiadaha 'ra, ma tô a'uwẽ quereti norĩ nhib'ihâ'a na, duré pereti norĩ nhib'ihâ'a na hã 're hâimana. 24 Adonirã hã, dawada'uri pese na romhuri pire na te te 're iromhuri za'ra mono norĩ nhib'ihâ'a na ma tô 're hâimana. Duré Zosafa, Airudihi 'ra, apito zahâpâ dama roti'wa na hã ma tô 're hâimana. 25 Seva na isisi hã dama romnhihâtâ 'manharĩ'wa na ma tô 're hâimana. Duré Zadoqui norĩ, Abiataha me hã ma tô sasedoti na dama 're hâimana zahuré. 26 Ira hã, 'rinho'u Zai na isisi ãma 're ihâimana mono hã, Davihi te sasedoti na ma tô duré 're hâimana.