2 Ãne tô taha bâtâ na rowẽ za'ẽne aré ihâiba hã te te da'ãma i'ai'uté za'ra zém na hã, ma tô robzei'õ hã ãma tiwi saprĩ za'ra. E marĩ wa. Te te waihu'u za'ra wa, apito Davi ti'ra zô isiwa'õzé hã. 3 Tahawa, apâ si'aba'réi wamhã, ma tô ari'iwi pese mreme ãna 'ri ahâ u hã asisi, dasi'wapéi 'manharĩ'wa norĩ dasi'wapéi wa, dama 're sisa're mono zép te, sisé wa, ari'iwi pese mreme ãna 're isisisi mono ne. 4 Tawamhã apito si'ubu ubu sina, ma tô sadari sina mreme 'rãihâ na nasi tinha ãne:

— Ĩ'ra! Ĩ'ra, Absarõ! Absarõ, ĩ'ra!

5 Tawamhã Zoabi, apito nhorõwa u ma tô mo. Morĩ wamhã, ma tô ãne tãma tinha:

— Ã bâtâ na hã ma tô ate dasi'wapéi 'manharĩ'wa te te siwi i'asõ'reptu za'ra norĩ hã asina isisém hiri za'ra, ai'ra si'aibâ norĩ me, ai'ra sipi'õ norĩ me, duré aimro norĩ me, aimro prã norĩ me zama. 6 Apito, asawi'wa norĩ hã ma tô asiwi iwẽ'õ pese za'ra. Duré aiwẽ'õ pese 'wa norĩ si, aima sawi za'ra di. Ma tô ate dama ipire norĩ ma, duré ate dasi'wapéi 'manharĩ'wa norĩ ma hã, asihâi'ré wasé, õ norĩ 're ihâimana za'ra mono zé marĩ dai õre na hã. Duré ãhã na hã wa hã wa tô aiwaihu'u, Absarõ ãhã na hâimana 'wa'âhã, aré aima irowẽ uptabi, duré uburé wa norĩ hã wasi'utõrĩ 'wa'âhã, i'upana. 7 Tahawa, ãhã na ma'ãpé aimorĩ, ate dasi'wapéi 'manharĩ'wa norĩ, aimreme wẽ na upari za'ra da, duré siptete za'ra da. Ãne hã 'manharĩ õ wamhã, ãhã na wa ropisutu, Uburé Danhib'apito nhisi na, awẽm na hã õ norĩ asiniwĩ i'maihâimana da hã mare di za. Ãhã wamhã, iwasété uptabi te za oto tihâiba za, aihâimanazéb 'remhã.

8 Tawamhã apito ma tô wahudu. Wahutu wamhã, ma tô 'ri ahâ u 'ridawa za'ẽtẽ na 're idanhisisi mono zéb 'rata nhamra. Tawamhã ite dasi'wapéi'wa norĩ, õme ihâimana na te te waihu'u za'ra wa, ma tô siwi uirĩ, imana wawimhã.

Taha ré, ma tô uburé Izaraéu nhihudu norĩ tinhorõwa mono bâ 'ri u hã sisa're. 9 Ma tô uburé ti'ai wa'õtõ nho'õmo mono bâ mreme nhiti'ru na te te sima nharĩ za'ra. Ãne te sima nharĩ za'ra:

— Apito Davi hã ma tô wanhitob'ru norĩ wi hã wanho'reptu za'ra. Filisteu wi hã ma tô wanho'reptu za'ra. Tane nherẽ, Absarõhõ u'âbâmhã, ma tô ti'ai wa'õtõ nho'õmo hawimhã oto watobro. 10 Wa norĩ hã wa tô aré Absarõ, wate apito da hã wasiwi pisutu ni. Tane nherẽ, ma tô dasi'wapéi u dârâ. E marĩ wa bété, wa te wasiwi pibui õ di, apâ we wa te wasiwi ãma siri da, apito Davihi ãma hã.

11 Tawamhã apito Davi, Izaraéu nhihudu norĩ te te sima inharĩ za'ra zé hã ma tô waihu'u. Tahawa, ma tô sasedoti Zadoqui norĩ, Abiataha me, Zudaha nhihudu norĩ ma i'rãnho'õmo norĩ tẽme hã satõrĩ zahuré, ãne na te te sadanharĩ za'ra da hã:

— E marĩ wa, te da'rãsutu u aihâimana za'ra wa'wa, apâ apito Davihi ãma isimiromhurizé 'ri 'rãihâ u ãma asiwi siri aba da, asima iwẽ za'ra wa'aba zém na hã, ãma aime za'ra wa'aba da hã. 12 A norĩ wa'wa hã ĩsisãnawã ĩsihâiba uptabi, duré ĩsiwapru uptabi. E marĩ wa, ma bété da'rãsutu ãmap si ĩpawaptob za'ra wa'aba da hã, duré apâ ĩ'ãma asiwi siri aba da hã asima iwẽ za'ra wa'wa.

13 Tawamhã Davi, ma tô duré Amasa hã tãma hâiba 'ru zahuré, te te tãma sadawa wasu'u zahuré da ãne:

— A hã ĩsisãnawã ĩsiwadi uptabi. Tahawa, awa'awimhã ã hawim haré te za Zoabihi nhowa're're, dasi'wapéi 'manharĩ'wa norĩ 'madâ'â'wa na hã 're aihâimana mo oto. Ãne, wa hã te 'manharĩ õ wamhã, 'Re ihâimana u'âsi mono hã te te ĩwĩrĩre tô!

14 Tawamhã Davi hã ma tô timreme na uburé aibâ Zudaha nhihudu norĩ hã sitẽme pizari za'ra. Tahawa, ma tô õ norĩ dama hâiba 'ru za'ra, da te tãma 'mairowasu'u da, uburé apâ tite dawada'uri'wa norĩ me hã te te sina siri za'ra da, õ norĩ 're ihâimana za'ra mono zéb u hã. 15 Davi hã apâ te te sina siri wamhã, ma tô panho'u Zodã pa u hã wi. Tawamhã Zudaha nhihudu aibâ norĩ hã ma tô ai'aba'ré, Gilgau na romnhisi u hã te te siwi sõpẽtẽ da hã, te te saprĩ ré â na te te siwi ipawaptob da hã. 16 Taha ré, Simei Bẽzamihĩ nhihudu, Geraha 'ra, 'rinho'u Baurĩ na isisi ãma 're ihâimana mono hã ma tô sa'ẽtẽ hã mo, Zodã pa u apito Davi te te sõpẽtẽ da hã. 17 Simehe me hã te Bẽzamihĩ nhihudu norĩ aibâ hã miu na tihâimana za'ra. Duré Ziba, Sauhu hawi a'uwẽ norĩ ma, romhuri'wa zama ma tô Zodã pa u hã mo, 15 na ti'ra norĩ ré, duré 20 na tite romhuri'wa norĩ ré. Tawamhã ma tô apito wana tamomomhã aihutu. 18 Sihutu wamhã, ma tô Zodã pa na hã saprĩ za'ra, apito nhib'a'uwẽ norĩ te te isaprĩ za'ra zém na te te pawaptob za'ra da, duré uburé apito te te sima iwẽzé, marĩ hã te te siwi 'manharĩ da.

Tawamhã apito, â na te te oto saprĩ da wamhã, ma tô Simei isõ'remhã sime, ti'ai u. 19 Tahawa, ma tô ãne tãma tinha:

— Apito, wa aiwi waptẽ, ĩ'ruiwapari tõ da, Zeruzalẽ hawi aiwatobrozé bâtâ na, iwasédé te aima i'manharĩzém na hã. Ma'ãpé ãma aipo're si'âri, wa hã te i'manharĩzém na hã. Niwamhã ãne na hã ãma rosa'rata tõ. 20 Wa hã ĩma waihu'u pese di, marĩ na te i'upazé hã. Tahawa, wa tô imorĩ'rata na hâiwa nhimi'e niwĩ a'uwẽ hã wei mo, ãhã na te asõpẽtẽ da.

21 Tawamhã Zeru'izaha 'ra Abisai hã ma tô ãne tãma tinha:

— Simei hã idâ'â da si, 'Re ihâimana u'âsi mono, apito da, te te ipisutu ma, iwasédé hã te te tãma pisutu wa.

22 Tane nherẽ, te Davi, Abisaihi norĩ ma, isisãnawã Zoabihi me hã tãma nharĩ zahuré ãne:

— Zeru'izaha 'ra norĩ, e marĩ hã aima hâimana aba bâ, ãne na hã! E te asima iwẽ wa'wa, marĩ ĩzada poto aba da. Ãhã na, wa hã Izaraéu norĩ te apito 'remhã, Izaraéu nhihudu norĩ hã ã bâtâ 'remhã da te i'maiwĩrĩ da hã mare di.

23 Tawamhã te Simeihi ma tinha ãne:

— Wa hã wa aima ropisutu, za da te aiwĩrĩ tõ da hã.

24 Tawamhã Mefibozéti, Sauhu nhihudu zama ma tô apito, te te sõpẽtẽ da hã mo. Tipara hã te te upsõi õ di. Duré tiwatasu hã te te sihâri õ di. Te te duré ti'uza hã hâ upsõi õ di, Zeruzalẽ hawi apito hã iwatobrozém hawim haré, te te da'ãma ai'uté pari, bâdâ apâ te te sina isirizéb u. 25 Tawamhã Mefibozéti, apito te te sõpẽtẽ da, Zeruzalẽ u oto wisi wamhã, ta hã ma tô ãne sadanha:

— Mefibozéti, e marĩ wa, ãma ĩsiré hã aimorĩ õ di.

26 Tawamhã ma te ãne ãma tãma wa'rã:

— Apito, aima waihu'u pese di, wa hã ĩmorĩ õ na 're ĩhâimana mono na hã. Tahawa, ĩma romhuri'wai ma, wa tô ti'ru, ĩte awaru po'repore hã, te te ĩma bazadâ da aré, ãma asiré ĩmorĩ da hã. Tane nherẽ, ma tô ĩte romhuri'wa hã ĩma sadawa hapese. 27 Taré ma tô sadawa nhipese sina hã aima ĩwasu'u. Tane nherẽ, a hã 'Re ihâimana u'âsi mono ma hâiwa ãma romhuri'wa ne hã. Marĩ sena hã aima waihu'u pese di. Tahawa marĩ iwẽ sãmrizéb zarina hã ma'ãpé 'manharĩ. 28 Uburé ĩmama hawi a'uwẽ norĩ hã ibâre hã i'uprosi za'ra da hã aré. Tane nherẽ, a hã asiré 're ĩsai mono da hã, ma tô ĩma ipisu. Tahawa, wa hã ĩma hâimana õ di oto, marĩ te aiwi iwaptẽrẽ zahu da hã.

29 Tawamhã apito, ma ãne ãma sada'â, asa hã:

— Marĩ na hã nharĩ zahu tõ. E marĩ wa. Wa hã wa tô rowairébé, Sauhu nhimarĩ hã aima wa'aba si sipo'o aba da hã, Zibaha me.

30 Tane nherẽ, Mefibozéti ma ãne ãma tãma wa'rã:

— Zibaha ma si, uburé marĩ hã tãma hâimana. Ĩma ipire hã apâ rowẽ na asõrõwa u asina isirizép si.

31 Bazira'ihi zama 'rinho'u Rogerĩ ãmamhã, Giliadi ti'a niwĩmhã ma tô tite 'ri nho'õmo hawimhã mo, Zodã pa â na apito siré te te saprĩ da hã. 32 Bazira'i hã ihi uptabi. 80 na ãma iwahu. Duré isibro pe ta hã. Tahawa apito, Ma'ana'ĩ ãma hâimana ré hã ma tô te te 're upari.

33 Tawamhã Bazira'ihi ma, te apito hã tinha ãne:

— Bazira'i, ĩsiré 're aihâimana mono da, Zeruzalẽ u hã ĩsiré ãma aimorĩ. Tawamhã wa za te 're ai'upari.

34 Tane nherẽ, ma ãma tãma wa'rã ãne:

— Wa hã 're ĩhâimana hâ mono õ di za. E marĩ zô, wa za bété Zeruzalẽ u hã ãma asiré mo. 35 Ĩ'ãma iwahu hã oto 80 na. Tahawa marĩ hã te oto 're awaihu'u mono õ di, iwẽ hã duré iwasédé hã. Duré marĩ te 're ihâsi mono hã sei waihu'u õ di oto. Duré isõ're'wa norĩ nho're hã te 're wapari waihu'u mono õ di oto. Tahawa, wa aré taré ropire hã te aima 're sõmri ĩsina, apito. 36 Ĩma hã ibâi õ di, ĩpawa'â sa'ẽtẽ na ĩma 're ihâimana mono da hã, ãne na hã. Tahawa, wa za taré suru na asiré hã mo za, Zodã pa na saprĩ parimhã. 37 Ma'ãpé ĩma rowairébé, apâ ĩmorĩ da si, 'ri u hã, ĩmama 'ru 'rata 'râwi ĩdâ'â da. Ãmemhã te tihâiba, ĩma romhuri'wa, Quima na isisi hã. Ma'ãpé õhõ si ãma asiré saprõni, marĩ asima iwẽzéb zarina tãma 'manharĩ da hã.

38 Tawamhã apito, ma ãne ãma tãma wa'rã:

— Wa za ãma ĩsiré saprõ tô. Uburé marĩ asima iwẽzéb zarina, wa za te tãma 're ab'manharĩ. Duré siwa'ru, wa za marĩ hã ĩwi 're i'awaptẽrẽ mono hã te aima 're ab'manharĩ za.

39 Tawamhã Davi, uburé tite dasi'wapéi 'manharĩ'wa norĩ me, ma tô Zodã pa â na oto saprĩ za'ra. Tawamhã apito ma tô Bazira'i hã tob'rata hârâ na sawi. Duré iwẽ hã ma tô tãma pisutu. Taha pari Bazira'i hã ma tô 'ri u hã apâ mo.

40 Tawamhã apito ma tô â na saprĩ, uburé Zuda ti'ai 'rem norĩ aibâ siré hã, duré Izaraéu ti'ai 'rem norĩ aiwa ãma isipo'o norĩ siré hã. Tawamhã ta hawi Gilgau na romnhisi u ma tô mo. Morĩ wamhã, ma tô Quima hã isiré mo. 41 Tawamhã uburé Izaraéu nhihudu norĩ isi'aba'ré hã ma tô Davihi ma nharĩ za'ra:

— Apito, e marĩ da, ma tô wasisãnawã norĩ Zuda ti'ai 'rem norĩ hã siwi ai'â, Zodã pa zara u te te we siwi asaprõni da hã, aihawi a'uwẽ norĩ ré, duré ate aibâ norĩ ré.

42 Tawamhã Zuda ti'ai 'rem norĩ aibâ hã ma te ãne ãma sada'âbâ za'ra:

— Apito hã wasisãnawã za'ra dâ'âsina, wa tô ãne hã wasiwi 'manharĩ ni tô. E niha da hã ma tô ãne zarina hã bété asahi za'ra wa'wa. E apito hã ma tô wasa hã wama wa'âbâ za'ra. E ma tô duré marĩ hã wama sõmri za'ra.

43 Tawamhã Izaraéu nhihudu norĩ te ãne tãma nharĩ za'ra:

— Asipai u pese za'ra wa'aba, te tô ibâre aré waniwĩmhã 're hâimana apito Davi hã, ãne nherẽ merẽ õ hã asisãnawã za'ra wa'wa. E marĩ da, ma tô wa norĩ hã tarére na hã wa'ãma irosa'rata za'ra wa'wa. Wa norĩ si wa tô imorĩ'rata na apito ma, nharĩ za'ra ni, we apâ wa te wasiwi ãma siri da hã!

Tane nherẽ, Zuda ti'ai 're aibâ norĩ te nasi siti'ru sina sa'ẽtẽ ãma sada'âbâ za'ra, Izaraéu nhihudu norĩ te te nasi ãma isada'âbâ za'ra nhipai u.