— Ĩzama wa za ãma asiré ĩmorĩ za'ra wa'wa.

3 Tane nherẽ, ma te ãne ãma sada'âbâ za'ra:

— Ãma aimorĩ õ di za, wasiré za'ra hã. E marĩ wa. Wa norĩ hã tãma wasisa'rei mono da wamhã, duré niha wamhã, wate dasi'wapéi 'manharĩ'wa norĩ aiwa ãma isipo'o na te te wawi uprosi wamhã, marĩ dai õ di za õ norĩ ma hã. Tane nherẽ, 10 miu na wahâiba za'ra nherẽ, a hã misi aihâiba nherẽ, wanhipai u tãma za'ra hã. Tahawa, wẽ di, 'ri nho'õmo 'rep si ãme i'aihâimana da hã, wa'uparizém na si wapawaptob za'ra da.

4 Tawamhã apito, ma te ãne ãma tãma wa'rãmi za'ra:

— Wa za 'manha tô, niha hã iwẽ asiwi isãmri za'ra wa'aba zéb zarina!

Tahawa apito te 'ridawa za'ẽtẽ zababa dasi'wapéi 'manharĩ'wa norĩ 10 miu na iwa'õtõ na te te ropãrĩ za'ra mono sina, sisõré pese na wairébé ré hã, duré 100 na iwa'õtõ na wairébé ré hã za. 5 Tawamhã ãne ma te tãma waihu'u Zoabihi ma hã, Abisaihi ma hã, duré Ita'ihi ma hã:

— Aima ĩwẽ za'ra wa'aba wamhã, ma'ãpé iprédupté Absarõ hã asiwi pibui wẽ wa'aba, u'a tõ da.

Ãne hã uburé dasi'wapéi 'manharĩ'wa norĩ hã ma tô da'madâ'â'wa norĩ ma, Davi te te tãma iwaihu'u za'ra zé hã wapari za'ra.

6 Tawamhã Davihi te dasi'wapéi 'manharĩ'wa norĩ, ma tô wairé roptehutu u, Izaraéu nhihudu norĩ te te 'wapé za'ra da hã. Tahawa, ma tô Efraĩ ti'ai 're marã ihâimana ãma ai'wapé za'ra. 7 Tawamhã Davihi te dasi'wapéi 'manharĩ'wa norĩ, Izaraéu nhihudu norĩ ãmamhã ma tô ãma ai'uté za'ra. Te te ãma i'ai'uté za'ra zé hã, iwasété uptabi. 20 miu na ma tô taha bâtâ na hã si'uprosi. 8 Tô taha rob'remhã dasi'wapé hã parapo wamhã, ma tô marãi ãmamhã aibâ norĩ hã ahâ uptabi na ai'utõ, rom na isi'wapé za'ra norĩ isi'utõrĩ nhipai u. 9 Taha ré, ma tô ni'wam norĩ Davihi te dasi'wapéi 'manharĩ'wa, Absarõ hã siwi sõpẽtẽ. Absarõ hã te awaru po'repo ba nhisi wara. Carvariu na wede nhisi zahâpâ te te ro'razâri wamhã, ma tô wede panhipti hã 'rã tété. Awaru po'repore hã te te tô tiwara na uzusi wamhã, ma tô Absarõ hã wede panhipti na isa'u da'o. 10 Tawamhã Davihi te dasi'wapéi 'manharĩ'wa misi aibâ, ma tô Absarõ 'madâ. Tahawa, te wasu'u Zoabihi ma ãne:

— Absarõ wede panhipti na isa'o hã wa tô 'madâ!

11 Tawamhã Zoabi, te ãma sadanha ãne:

— E ma i'madâ. Zapré tamem haré wĩrĩ õ di. Wa hã wa aré aima sõmri za'ra, 10 na ẽtẽ waipo prã prata na iwa'õtõ waré hã, duré misi da'usisizé hã.

12 Tane nherẽ, ma te aibâ ãne ãma tãma wa'rã:

— Tô aré a hã miu na prata 'manharĩ iwa'õtõ waré hã ĩma sõmri da nherẽ, wa hã te aré apito 'ra da, ĩnhib'rada isarõtõ da hã mare di. Uburé wa norĩ hã apito, tinhimiroti te te aima iwaihu'uzé hã wa tô wapari za'ra ni, Abisaihi ma, duré Ita'ihi ma, ãne: “Aima ĩwẽ za'ra wa'aba wamhã, ma'ãpé iprédupté Absarõ hã asiwi pibui wẽ wa'aba, u'a tõ da.” 13 Ĩnhimipari ãna ĩhâimana wa, Absarõ te wĩrĩ 'wa'âhã, te aré apito ãne na hã duré waihu'u. E marĩ wa. Õhõ ma uburé marĩ hã tãma waihu'u pese wa. Duré aré a hã ĩ'wawimhã i'aimapa da hã mare di.

14 — Asiré bâdâ sa'ẽtẽ na te isimini da hã mare di! — Ãne te Zoabi tãma tinha.

Tahawa, Zoabi si'ubdatõ isi'uwazi 'rã'wa ma tô timra. Taha na ma tô Absarõ zahadu hâiba ré wede nhisi panhipti na sa'o ré hã ãma sõ'utu zapu'u za'ra. 15 Tawamhã Zoabihi te dasi'wapéi 'manharĩ'wa norĩ, ma tô Absarõ hã siwi uirĩ. Tahawa, ma te oto siwi wĩrĩ pese.

16 Tawamhã Zoabi, ma tô danhimnhihârâzé hã hârâ, dasi'wapé oto simizazâri da. Tahawa, ite dasi'wapéi 'manharĩ'wa norĩ hã, Izaraéu nhihudu norĩ zarina timorĩzé te te sahâri za'ra wamhã, ma tô apâ oto ai'aba'ré. 17 Absarõhõ hâiba te te siwi âri wamhã, ma tô siwi time, marãi ãma ab're 'rehâ uptabi wa. Tahawa, ma tô ẽtẽ na hã siwi upsibi 'rãihâ pese. Ma tô duré Izaraéu nhihudu norĩ, tinhorõwa mono bâ hã simani.

18 Absarõ 're hâimana mono ré hã ma tô ẽtẽ na 'ri hã i'uirĩ na ihâimanazém na ãma 're idasipo're pu'u za'ra mono zéb da hã sima 'manha, ẽtẽ nhi'riti wa, romharé Apito norĩ na romnhisi ãma. E marĩ wa. I'ra hã tãma 'maihâimana õ wa, isisi hã õne u'â 're ihâimana mono zéb da hã. Tahawa, 'ri isa tinhisi na ma tô sisi. Ta hawim haré te ãhã na hã dama waihu'u pese na 're hâimana, Absarõhõ te 'ri na hã.

19 Tawamhã Aima'asi, Zadoquihi 'ra, te Zoabihi ma tinha ãne:

— Ĩma rowairébé, apito u ĩwara da, te tãma rowasu'u da, Uburé Danhib'apito i'uwaibaba na te te i'manharĩ na, isitob'ru norĩ wi te te isõ'reptuzém na hã.

20 Mare di. — Ãne ma te Zoabi ãma tãma wa'rã. — Ãhã na rowasu'u iwẽ, a hã i'âri da hã mare di. Nimahã na romhâimana zahu wapsi, te za tane hã i'manha. Ãhã na hã mare di. E marĩ wa. Apito 'ra hã dâ'â wa.

21 Tawamhã Zoabi, te tite romhuri'wa etiopihi ma tinha ãne:

— A hã te za aimo, apito ma, rowasu'u da hã marĩ i'madâ'âzém na.

Tawamhã Zoabihi nho're romhuri'wa siwẽ'ẽi pari, ma tô si'aba'ré na watobro, wara da.

22 Tane nherẽ, ma tô Aima'asi nasi ãne tãma tinha, te te tãma rowairébé da:

— Ma'ãpé ĩma rowairébé, ĩzama rowasu'u hã te âri da. Ĩma hã marĩ dai õ di, marĩ watobro wamhã.

— Ĩ'ra, e marĩ wa, te bété ãne 'manharĩ da hã asima iwẽ. E aipawa'â hã i'âri da ne, te irosa'ra. — Ãne te Zoabi hã tinha.

23 — Marĩ watobro wamhã, tô watobro. Wa ĩsima wẽ, tô ĩmorĩ da hã! — Ãne ma Aima'asi timreme na ãma tãma sahu.

— Mo oto tô aimorĩ! — Ãne Zoabi, ma te ãma tãma wa'rã.

Tawamhã oto watobro wa, panho'u Zodã pa u bâdâdi inomro na wara wamhã, ma tô romhuri'wa etiopi ãma hã sisa'u.

24 'Ridawa za'ẽtẽ na 'ri nho'õmo hawi rob u dapusizéb ãma, duré 'ri para u 'ri nho'õmo tẽme 're idanhisisi mono zé wa'wa, te Davi hã nhamra. Tawamhã rob'madâ'â'wa ma tô sai'u hâimo, 'ri 'wawi wa'ra 'rãihâ na. 'Ri nhisi hâpâ ãma te nhamra. Ta hã rob u te te rob'madâ'â wamhã, ma tô aibâ hã 'madâ, siwaprosi we iwara hã. 25 Tawamhã ma tô apito hã po're pu'u. Tahawa te apito ãne tãma tinha:

— Tô siwaprosi wei wara wamhã, rowasu'u wẽ te we ĩma ti'â.

Tawamhã we iwara hã ma tô oto wi.

26 Rob'madâ'â'wa, duré aibâ ihâiba amo siwaprosi we iwara na te te 'madâ'â wamhã, ma tô 'ridawa za'ẽtẽ 'madâ'â'wai ma hã 'mahâ ãne:

— 'Madâ'â pé! Aibâ ihâiba amo te we duré wara!

— Taha zama te rowasu'u wẽ hã duré we ti'â! — Ãne ma te Davi hã ãma sada'â.

27 Tawamhã rob'madâ'â'wa te ãne tãma tinha:

— Imorĩ'rata na we iwara hã, ĩma hã, Aima'asi, Zadoquihi 'ra!

— Ta hã aibâ iprédupté iwẽ. Ãté rowasu'u wẽ hã te we ti'â. — Ãne te apito hã tinha.

28 Tawamhã Aima'asi te hârâ 'rãihâ na apito hã 'mahâ ãne:

— Uburé rowẽ si!

Hi'rãtitõ isõ're tãma sãmra wamhã, duré ti'ubu na ti'ai u te te tãma ropto wamhã, ma tô tãma tinha ãne:

— Ate Uburé Danhib'apito ãma, wawata za'ra wa'aba, asada ihâimana za'ra norĩ ãma i'ai'utézé hã te te aima sõmri wa.

29 Tawamhã apito te ãne sadanha:

— E Absarõ aibâ iprédupté hã te rowẽ na tihâiba.

Tawamhã Aima'asi ma ãne ãma sada'â:

— Aima dawada'uri'wa Zoabi, we te te ĩma rob'rui wa, we ĩmorĩ wi, wa hã wa tô 'madâ, 're idasiwairõtõ mono hã. Tane nherẽ, marĩ na te ãma aima irowasu'u da hã te waihu'u õ di.

30 — A'â ã niwĩ asa na, asimipari da! — Ãne te apito hã tãma tinha.

Tawamhã Aima'asi hã ma tô a'â za. Te a'â mapa.

31 Tawamhã etiopi romreme 'wapéi'wa wisi wamhã, te apito ma ãne tãma rowasu'u:

— Apito, rowasu'u wẽ, wa we aima ti'â! Ã bâtâ na ma tô Uburé Danhib'apito hã asada ihâimana za'ra norĩ ãma i'ai'utézé hã aima tisõ.

32 — E bété Absarõ, iprédupté hã. E rowẽ na te tihâiba. — Ãne te apito hã sadanha.

Tawamhã romreme 'wapéi'wa, ma ãne ãma sada'â:

— Wa hã ĩma iwẽ uptabi aré, õhõ zô marĩ iwatobro ne, uburé asitob'ru norĩ zô, duré uburé asada ihâimana za'ra norĩ zô zama, marĩ sô iwatobro za'ra da hã.

33 Tawamhã apito wi, ma tô tiwi tirobzei'õ pese. Tahawa, 'ridawa za'ẽtẽ nhisiwi 'ri 're wa'õtõ u te te sai'uri wamhã, ma tô aiwa'õ. Tawamhã rob'ru te, te nasi sina siri õwamhã, duré apâ hã. Duré taha wamhã, sadari 'rãihâ sina te tinha ãne:

— Ĩ'ra! Ĩ'ra Absarõ! Absarõ ĩ'ra! Ĩma hã wẽ uptabi di aré, asibrob're ĩdâ'â da hã, ĩ'ra!