— Ĩma sa'ré na, aibâ norĩ hã 12 miu na te pisutu za'ra da. Tawamhã ã barana wa za watobro, Davihi ãma, te ro'wa'rutu da hã. 2 Wa za 'wapé, sadâ'â na hâimana ré, te te ãma wazere wa, duré robzei'õ na hâimana ré. Tawamhã pahi uptabi na hâimana wa, te za duré ite dasi'wapéi 'manharĩ'wa norĩ hã uburé sisa're. Tawamhã wa hã apito si wa za tiwĩ. Te wĩrĩ wamhã, 3 pi'õ apâ timro tẽme te te sina 're isiri za'ra mono ne, wa za ite aibâ norĩ hã uburé we atẽmemhã te simro. Duré misi aibâ wĩrĩ da hã, ma tô asima iwẽ. Tawamhã isiré a'uwẽ norĩ si wa za rẽme za'ra, rowẽ na 're hâimana za'ra mono da.

4 Absarõ hã, ã hã rowa'õtõ na roti ma tô wẽsã. Duré uburé Izaraéu nhihudu ma i'rãnho'õmo norĩ zama ma duré siwi wẽsã.

5 Tahawa, te Absarõ tãma nharĩ za'ra, ãne:

— Husa'i zô aihârâ aba, niha duré ta hã te te inharĩzé, wa te wasiwi wapari da.

6 Husa'i wisi wamhã oto, te Absarõ ãne tãma rowasu'u:

— Aitopé roti te te wama i'manharĩ za'ra hã ãne. E wa za wasiwi 'manharĩ ni. Duré mare wamhã, a hã te za wama iwaihu'u za'ra, marĩ, wa te wasiwi i'manharĩzéb da hã.

7 Husa'i, ma te ãne ãma sada'â asa:

— Aitopé, tinhimiroti ãhã na hã te te aima i'manharĩ za'ra wa'aba zé hã iwẽ hãi õ di. 8 A hã ma tô aimama 're ihâimana mono zé hã, duré ite aibâ norĩ 're ihâimana za'ra mono zé hã iwaihu, siptete uptabi na dasi'wapéi 'manharĩ'wa na 're ihâimana za'ra mono na hã. Ma tô duré iwaihu'u za'ra, siti'ru na 're ihâimana za'ra mono na hã, aiwa ursu marã na 're hâimana mono ré, i'ra da te tiwi 're simi'uri za'ra mono wa, 're isiti'rui mono ne hã. Aimama hã dasi'wapéi 'manharĩ'wa isimirosa'rata waihu'u pe. Tahawa duré mara na hã, tite dasi'wapéi 'manharĩ'wa norĩ 'ratamhã 're hâimana mono õ di. 9 Tahawa, ãhã na awa'awi na hã ãté ẽtẽ na ab're 're sima'uri nherẽ, niha wamhã duré nimomo rom na. Tawamhã Davi ate dasi'wapéi 'manharĩ'wa norĩ te te sahui wi, ni'wam norĩ ãne na te te iwapari za'ra hã, te za nharĩ za'ra ãne: “Absarõhõ te dasi'wapéi 'manharĩ'wa norĩ ãma hã ma ai'uté za'ra ni.” 10 Tawamhã dasi'wapéi 'manharĩ'wa norĩ sib'ru uptabi nherẽ, duré nima norĩ aiwa hu'u zérépa ne sahi uptabi nherẽ, te za tipahi pese za'ra. E marĩ wa. Uburé Izaraéu nhihudu norĩ ma hã tãma waihu'u pese za'ra di, aimama hã dasi'wapéi 'manharĩ'wa isiptete na hã, duré aibâ norĩ ime ihâimana za'ra isi'wapé waihu'u pe isiptete za'ra na hã. 11 Tahawa, te aima irotizé hã ãne: Ma'ãpé Izaraéu nhihudu norĩ uburé asima 'rã'õtõ, ti'ai wa'õtõ nho'õmo 're, uburé daza'rui mono bâ. Tawamhã pa zaihâ na supara'ré 're isimi'wara mono ne ahâ uptabi na asima 'rã'õtõ pari wamhã, te za a hã tô asi'uihâ na dasi'wapéi u hã isimroi mo. 12 Tawamhã Davi hã nimame ihâimanazéb ãma, wa za wasiwi sõpẽtẽ ni za, marĩ iwatobrozé, õ hã te te waihu'u wana ré. Ãne wamhã, ite aibâ norĩ i'masimani da hã mare uptabi di za. 13 Nimahã 'ri nho'u ẽtẽ na i'manharĩ u sébré da, wara wamhã, te za uburé wanhib'a'uwẽ norĩ hã wedenhorõ hã we siwi 'wasa, 'ri 'wawi wa'ra te te siwi ãma prub da hã, romharé u te te siwi sari da, ẽne hã isisiwimhã 'maihâimana ãna da, hâimomhã.

14 Tawamhã Absarõ te uburé Izaraéu nhihudu norĩ me hã nharĩ za'ra ãne:

— Husa'i tinhimiroti te te iwaihu'uzé hã wẽ di, Aitopé te te wama iwaihu'u za'ra zém nhipai u.

Ãne wa, ma tô Uburé Danhib'apito waprosi, Aitopéhé nhimiroti iwẽ hã da te dasiwi samarĩ tõ da hã, ãne zarina Absarõhõ nhisi wimhã Uburé Danhib'apito nhimihâzé hã waptã'ã da.

15 Tawamhã Husa'i, Absarõhõ ma, duré Izaraéu nhihudu norĩ i'rãnho'õmo ma, tinhimiroti te te tãma iwaihu'u za'ra zé, ma tô sasedoti Zadoquihi norĩ ma, Abiataha me tãma wasu'u zahuré. Duré Aitopé, tinhimiroti te te iwaihu'uzéb zama ma tô tãma wasu'u zahuré. 16 Tahawa, te ãne tãma nharĩ zahuré:

— Ma'ãpé waptu na, Davihi ma romreme hã sõmri wa'aba, da te tãma 'mairowasu'u da, barana hã õmem haré hâimana tõ da, a'ubuni wi supara'ré bâdâdi 're isa'wari mono na hã. Davi hã ãhã na awa'awi waptu na te te saprĩ panho'u Zodã pa na, tite aibâ norĩ ré hã uburé da te dasiwi uprosi tõ da!

17 Zonata norĩ, Aima'asihi me, te Rozé na â nhisi 'rata simipari sina hã tihâimana zahuré, 'ri nho'õmo u zasi zahuré ré, da te 'madâ'â zahuré tõ da, te te sima wẽ zahuré õ wa. Tawamhã nimahã na romhuri'wa sipi'õ, ma tô nasi itẽme tineb zahuré, romhâimanazém na te te tãma rowasu'u zahuré da hã. Ãne rowasu'u sidâpâsi, ma tô apito Davihi tẽme nasi tineb zahuré, te te tãma rowasu'u zahuré da hã. 18 Tane nherẽ, nimahã na ma tô ai'repudu hã 'madâ'â zahuré. Tahawa, te Absarõhõ ma wasu'u zahuré. Tahawa, ma tô Zonata norĩ, Aima'asihi me, 'rinho'u Baurĩ na isisi ãma aibâ 're ihâimana mono nhorõwa u hã sa'ẽtẽ tineb zahuré. Tame isõrõwa 'rata â zô ab're ihâimana 're, ma tô tizasi zahuré. 19 Tawamhã aibâ mro, ma tô dasisuwazé hã hânhozi, ab're zadawa nhisi wimhã. Amnho zu pe hã ma duré isisi wimhã ãma ropé, ni'wa te te upsibi me tõ da hã. 20 Tawamhã Absarõhõ te, dama ipire norĩ hã ma tô oto aihutu. Sihutu wamhã, ma tô pi'õ hã siwi sadanha ãne:

— E mame te tihâimana zahuré, Aima'asi norĩ, Zonataha me hã.

— Pa nho'õmo na ma saprĩ zahuré! — Ãne ma te pi'õ hã asa ãma tãma wa'rãmi za'ra.

Tawamhã aibâ norĩ hã sô 're rĩtĩ za'ra mono wamhã, te te siwi sõpẽtẽ zahuré õ di. Tahawa ma tô apâ Zeruzalẽ u hã ai'aba'ré. 21 Apâ si'aba'réi parip si, ma tô Aima'asi norĩ, Zonataha me ab're hawi pusi zahuré wa, apito Davi te te po're pu'u zahuré da hã itẽme tineb zahuré. Tawamhã ma tô Aitopé te te sada irowa'õtõzé hã tãma wasu'u zahuré. Tahawa ma tô ãne tãma nharĩ zahuré:

— Ma'ãpé sa'ẽtẽ pa na hã saprĩ na!

22 Tawamhã Davi, tite aibâ norĩ me hã ma tô panho'u Zodã pa na saprĩ za'ra. Bâdâ 'rãi watobro wana ré, ma tô uburé hã saprĩ pari za'ra.

23 Aitopé, isimiroti zarina idahâimana za'ra õ na, te te waihu'u wamhã, ma tô tite awaru po'repore sima bazadâ. Taha pari ma tô apâ mo, tite 'ri nho'õmo u hã. Tawamhã te te robza'ra wẽ pari, ma tô sisõ'reti 'râwi uihâ na. Tahawa, imama na, da te iti'azéb ãma ma tô dasiwi sẽrẽ ni.

24 Absarõ norĩ, tite dasi'wapéi 'manharĩ'wa norĩ me panho'u Zodã pa na te te saprĩ za'ra siwaprã hã, ma tô Davi hã 'rinho'u Ma'ana'ĩ na isisi u hã oto wi. 25 Nimahã na hã Absarõ ma tô Amasa na isisi hã Zoabihi nhowa're'remhã pisutu, dasi'wapéi 'manharĩ'wa norĩ 'madâ'â'wa na hâimana da hã. Amasa hã, Itra na aibâ nhisi 'ra, ismaelita. Ina hã Abigaiu, Na'asihi 'ra, Zeru'iza, Zoabihi na sisãnawãi 'ra. 26 Tawamhã Absarõ norĩ hã, Izaraéu nhihudu norĩ me, Giliadi ti'ai ãma hã ma tô sima 'ri nhoré za'ra.

27 Davi hã, Ma'ana'ĩ u wisi wamhã, ma tô Sobi, Na'asihi 'ra hã sõpẽtẽ, Amo ti'ai 're, 'rinho'u Raba ãma 're ihâimana mono hã ma tô sõpẽtẽ. Duré Maqui, Ami'éhé 'ra 'rinho'u Lo-Deba na isisi ãma 're ihâimana mono hã ma tô duré sõpẽtẽ. Bazira'i zama, Giliadi ti'ai 're, 'rinho'u Rogerĩ ãma 're ihâimana mono hã ma duré sõpẽtẽ. 28-29 Ã norĩ hã ma tô piza'a 'renho'a 'reptõ hã, duré ti'ai 'manharĩ na marĩ nhemezé piza hã, duré waptâ hã, dasa zama Davihi ma, duré ite aibâ norĩ ma hã 'wasa. Duré amnho trigu zama ma tô 'wasa, cevada hã, farinha trigu zub'a 'ré hã, uhi hã, amnho zazu hã, rob'rã erwira na isisi hã, ropĩ hã, abaze danhimizama hâiwa'u u'ẽne hã, duré nima norĩ pone'ẽrebâ zéré mapu hã. E marĩ wa. Õ norĩ ma hã waihu'u pese za'ra wa, Davi norĩ tite aibâ norĩ me mra te te isépata za'ra zém na hã, 'rubu na ihâimana za'ra zém na hã, duré wasutu uptabi na ihâimana za'ra zém na hã a'ubuni wi supara'ré 're isa'wari mono ãmamhã. Tahawa, ma tô ã norĩ marĩ hã tãma 'wasa tô.