— E marĩ te za ã norĩ na hã i'manha.

Ziba, ma te sada'â ãne:

— Ã hã awaru po'repore norĩ, apito hawi a'uwẽ norĩ hã te te sima 're ibazadâ za'ra mono da hã wa we saprõni zahuré. Duré i'u'ẽtẽ wapu norĩ, rob'rãi norĩ me hã, aibâ norĩ ãma ĩsi'upari za'ra zéb da hã wa we tidu. Duré uva 'rãi wa'u isé hã a'ubuni wi supara'ré 're isa'wari mono ãma wasutu uptabi wa, te te i'âhuri da hã wa we tãma âri za'ra.

3 — E mame te Mefibozéti hã tihâiba, asib'ihâ'a Sauhu nhihudu hã. — Ãne te apito hã sadanha.

Ziba, ma te sada'â ãne:

— Zeruzalẽ ãma te ta hã nhamra u'â, te te sina rob'umnhasi wa, Izaraéu nhihudu norĩ, apâ roti hã za te te tãma sõmri õ'umnhasite, i'rada Sau isi'apitozé hã.

4 Tawamhã apito te Zibaha ma tinha ãne:

— Uburé Mefibozétihi nhimarĩ hã te za oto aima tihâimana za'ra, ate da.

Ziba ma te duré ãne ãma sada'â:

— Wa za aima aiwẽ'ẽ, ĩnhib'apito asõ're. Õne u'â ĩma 're aipẽ'ẽ toi u'âsi mono da si, ĩma iwẽ hã!

5 Tawamhã apito Davi hã ma tô 'rinho'u Baurĩ u hã wi. Wisi wamhã, Simei, Geraha 'ra, Sau sisãnawã siwadi 'ra ma tô itẽme mo. Te te sõpẽtẽ wamhã, ma tô rob'manharĩ wasétézé hã nasi ãma pisutu. 6 Simei hã te duré nasi hâ Davi ẽtẽ na. Ite dama roti'wa norĩ zama, te nasi ahâ, Davihi te dasi'wapéi 'manharĩ'wa norĩ te te siwi uirĩ za'ra nherẽ. 7 Tawamhã Davihi ãma rob'manharĩ wasétézé te te pisutu wa, te ãne tãma tinha:

— Ã hawi aiwatobro, asipãrĩ zeire! Duré marĩ 'manharĩ wasété zei 'waire! 8 A hã ma tô Sau isi'apitozé hã i'ârire. Tahawa, Uburé Danhib'apito te aima rob'manharĩre ãhã na hã, Sauhu hawi a'uwẽ norĩ ahâ uptabi na uprosi wa. Tahawa, 'Re ihâimana u'âsi mono awa'awi na ma tô isi'i'rãnho'õmozé ai'ra Absarõhõ ma hã tisõ. Duré aihâimanazéb 'remhã ro'wa'rutu di, i'asipãrĩ zeire!

9 Tahawa, te Abisai, Zeru'iza na ina nhisi hã tãma tinha ãne, apito ma:

— E marĩ da, ma tô iwapro, ã hã wapsã idâ te te ai'ãma iwasété da hã. Tahawa ma'ãpé ĩma rowairébé, wa hã sô ĩmorĩ da, te 'rãnhizâri da!

10 — Zeru'izaha 'ra norĩ, ã hã ate wa'aba õ di, romhâimanazé hã. — Ãne ma te apito Abisai norĩ ma, isisãnawã Zoabihi me hã asa ãma tãma wa'rãmi zahuré.

— Uburé Danhib'apito, rob'manharĩ wasétézé hã te te ĩ'ãma pisutu da, ã hã aibâ ma, te te 'rui wamhã, e 'wa hã te za bété sadanha, marĩ wa, ãne hã te te i'manharĩzém na hã.

11 Tawamhã Davi te Abisaihi ma, duré uburé ite dama ipire norĩ ma hã tãma nharĩ za'ra ãne:

— Tô ĩ'ra te te ĩwĩrĩ da, te te sima pibui wamhã, e marĩ da bâ, wa za bété ãma ĩtob'uzu, Bẽzamihĩ nhihudu tô õne hã te te sima iwẽzéb zarina te te i'manharĩzém na hã. Ã hã aibâ rowẽ na hâimana da hã tãma sa'ré za'ra wa'aba. Duré rob'manharĩ wasétézé te te ĩ'ãma pisutu da hã tãma sa'ré za'ra wa'aba. E marĩ wa. Uburé Danhib'apito ãne hã te te tô 'manharĩ da, te te tãma 'rui wa. 12 Ãté Uburé Danhib'apito si te za 'madâ, ĩnhimirobzépatazé hã. Ãté taha zarina te za marĩ iwẽ si ĩ'ãma pisutu, ã hã rob'manharĩ wasété nhowa're'remhã.

13 Tawamhã Davi norĩ tite aibâ norĩ me hã ma tô timorĩ na ãma uzusi za'ra. Simehe zama, te isiré isababab za'ra hã mo, ẽtẽ nhisi baba, Davihi ãma rob'manharĩ wasété zé te te ãma pisutu mono sina, duré ẽtẽ na te te hâ mono sina, duré ti'a na zama te te sazu mono sina.

14 Tawamhã apito norĩ tite aibâ norĩ me, sadâ'â uptabi za'ra na panho'u Zodã pa u hã ma tô aihutu. Sihutu wamhã, te tame oto tiwa'utu za'ra.

15 Absarõ norĩ hã ma tô Zeruzalẽ u uburé Izaraéu nhihudu norĩ me oto asisi. Sisisi wamhã, ma tô duré Aitopé ime za'ra hã tihâiba. 16 Husa'i hã romnhiwasi Davihi ma, te te 're iroti mono hã, Absarõ te te sõpẽtẽ wamhã, ma tô hârâ 'rãihâ na hâ ãne:

— Apito, rowẽ na si 're aihâimana mono! Apito, rowẽ na si 're aihâimana mono!

17 Tawamhã Absarõ te ãne sadanha:

— E mahãta asiwaihu'u ma, sena na i'aihâimanazé hã. E marĩ wa bété, ime hã aimorĩ õ di.

18 Husa'i ma te ãne ãma tãma wa'rã:

— E niha wa za bété ãne hã 'manha. Wa hã wa ĩhâiba, Uburé Danhib'apito ã hã a'uwẽ norĩ ma da, duré uburé Izaraéu nhihudu norĩ ma da hã te te ipisutu siré. Tahawa, wa za wa hã aime 're ĩhâimana. 19 Ãhã wamhã, e 'wa nhib'a'uwẽ na wa za bété 're ĩhâimana, ĩnhib'ihâ'a 'ra upana hã. Ãne aimama nhib'a'uwẽ na 're ĩhâimana mono ne, wa za ãhã na asib'a'uwẽ na aima 're ĩhâimana, wa hã.

20 Tawamhã Absarõ, te Aitopéhé ma tinha ãne:

— Wa ĩsima wẽ, ĩma rowaihu'u da. E marĩ, wa za 'manharĩ za'ra ni.

21 Aitopé, ãne ma te ãma sada'â:

— Aimama mro prã norĩ na, ma'ãpé marĩ hã ãma 'manharĩ za'ra na, isimiromhurizé 'ri 'rãihâ te te 're 'madâ'â za'ra mono da, te te irẽme za'ra norĩ ãma hã. Ãne wamhã, uburé Izaraéu nhihudu norĩ te za waihu'u za'ra, aimama nhitob'ru na oto i'aihâimana na hã. Ãne wamhã, te za duré asib'a'uwẽ norĩ hã sima rowẽ pese za'ra.

22 Tawamhã Absarõhõ ma, ma tô apito nhimiromhurizé 'ri nhisi hâpâ ãma romhâ 'manharĩ na 'ri hã siwi tisã. Duré tame ma tô uburé norĩ nho'remhã timama mro prã norĩ ãmamhã marĩ hã 'manha.

23 Taha wahu mono 'remhã, Aitopéhé nhimiroti te te dama 're i'ab'manharĩ mono hã, tô 'Re ihâimana u'âsi mono mreme ne hã ma tô da te 're mreme zamarĩ pese za'ra. Tane Davi norĩ hã Absarõhõ me ma tô duré isimiroti zarina ãma 're hâimana zahuré.