Absarõ, tisi'wapé zô apâ isipi'razé wasu'u
15
Ronomro pari, ma tô Absarõ hã wedewara zapore, awaru na da te tãma wasisi da hã dama ti'ru, duré 50 na aibâ norĩ isõwa sisa'rei mono da hã. 2 Ta hã te robza'rã ré 're utu u'âsi. Te duré 'ri nho'õmo u 'ridawa za'ẽtẽ na 're idanhisisi mono zéb ãmamhã 're simasisi, bâdâdi nhitõ ãma. Duré apito Davi, marĩ na te te dama 're i'arowairébé mono zéb u 're danhisisi mono wamhã, te Absarõ hã dazô 're 'maihârâ. Te duré te te 're da'a'mazadanharĩ, nima hawi we 're ida'mane mono zô. Tahawa, te da te ãma 're sada'âbâ, nimahã Izaraéu nhihudu norĩ wa'õtõ wamri 'remhã. 3 Absarõ hã te tawamhã ãne te te dama 're anharĩ: “Ma'ãpé ãma rosa'rata! Asiniwĩ te tihâiba, roti na rob'ui'éré ré hã. Tane nherẽ, ni'wai õ di, te te i'aiwapari da hã, apito hawimhã, ai'ãma iromhâimanazém na hã.” 4 Te duré ãne na zama te te dama 're anharĩ: “Wa hã ãme da'ãma rowairébé'wai 'wa'âhã! Siwa'ru marĩ dama 're hâimana za'ra mono wa, niha da hã te aré ĩzô hã 're danhopré, da te ĩwi 're waptẽrẽ za'ra mono da hã. Ãhã wamhã, wa aré duré te dama 're ab'manharĩ, i'uwaibaba na, da te da'ãma 're irowairébé za'ra mono zém na hã.”5 Duré Absarõ, da te dasina 're tété za'ra mono wa, tãma 're da'masiwẽ'ẽi mono wamhã, ma tô te te 're da'atété. Duré ma tô te te 're da'azawi, datob'rata hârâ na hã. 6 Ãne ma tô Absarõ, Izaraéu nhihudu ma hã te te 're ab'manharĩ, apito Davihi wi, da te 're iwaptẽrẽ za'ra mono zé te te dama 're arowairébé mono da hã, itẽme 're danhisisi mono wamhã. Ãne ma tô Izaraéu nhihudu norĩ pẽ'ẽ na hã te te ãma 're ai'uté.
7 Tawamhã maparane si'uiwa na wahu pari, te Absarõ hã apito Davihi ma tinha ãne:
— Ĩma rowairébé, Hebrõ u ĩmorĩ da, Uburé Danhib'apito ma ĩnhimiropisudu te i'manharĩzé hã te ãma uwaimrami da. 8 Siria 're, Gesu ãma 're ĩhâimana mono ré, wa tô ropisutu ãne: “Uburé Danhib'apito, Zeruzalẽ u apâ ĩmorĩ da, te te ĩma rowairébé wamhã, wa za Hebrõ ãmamhã ãma ĩwata.”
9 Mo oto aimorĩ, rowẽ sina! — Ãne te apito hã tãma tinha.
Tawamhã Absarõ ma tô mo, Hebrõ u hã. 10 Tawamhã rowasu'u 'wapéi'wa norĩ, ma tô uburé Izaraéu nhihudu wa'õtõ wamri norĩ u hã ãne te te tãma rowasu'u za'ra da hã itẽmemhã satõrĩ za'ra:
— A norĩ wa'wa hã danhimnhihârâzém hârâ wapari za'ra wa'aba wamhã, te za inharĩ za'ra wa'wa za ãne: “Absarõ hã ma tô dama si'apito, Hebrõ ãma hã!”
11 Zeruzalẽ hawimhã, Absarõhõ siré 200 na aibâ norĩ hã ma tô wairé, te te iwaptẽrẽ za'ra zéb zarina. Tane nherẽ, te te sima irowa'õtõzé te te waihu'u za'ra ãna, ma tô duré ime uburé hã ai'aba'ré, te te ãma isazei wẽ za'ra zéb zarina.
12 Abaze zata na tinhoprubzé te te sõmri ré, ma tô Absarõ duré Aitopéhé zô zama hã da'mazatõ, 'rinho'u Gilo na isisi ãma 're ihâimana mono zô. Aitopé, ta hã Davihi ma roti'wa na dama 're ihâimana mono. Ãne ma tô apito da, iromhâimanazé hã aptete. Duré Absarõhõ siré norĩ hã ma tô sina hâ.
Davi hã, Zeruzalẽ hawi isimanizé wasu'u
13 Tawamhã romreme 'wapéi'wa, ma tô Davihi ma hã rowasu'u, Absarõhõ niwĩ Izaraéu nhihudu norĩ te te oto isaprĩ za'ra na hã.
14 Tawamhã Davi, uburé Zeruzalẽ ãma ihâimana za'ra norĩ, tite dama roti'wai ma hã te ãne tãma nharĩ za'ra:
— Absarõhõ wi wasimani za'ra da, wa te wasima wẽ za'ra wamhã, wasimani su'u za'ra wa'aba. Sa'ẽtẽ wasi'aba'réi su'u aba! Ãnei õ wamhã, ãmem haré te za wazasãmri za'ra. Te te wazasãmri za'ra wamhã, te za wa'ãma ai'uté za'ra. Duré uburé ni'wam norĩ 'ri nho'õmo ãma ihâimana za'ra norĩ hã te za uprosi za!
15 — Ibâre bâ, tô tane hã! Asib'a'uwẽ, wa norĩ hã wa tô mare siromo za'ra ni tô, aimreme uburé wa te i'manharĩ za'ra zéb da hã! — Ãne ma te asa ãma sada'âbâ za'ra.
16 Tawamhã apito watobro wamhã, ma tô ti'ra norĩ ré duré tite romhuri'wa norĩ ré hã mo. 10 na timro prã si ma tô rẽme za'ra, isimiromhurizé 'ri 'rãihâ, te te siwi i'madâ'â da hã.
17 Apito norĩ, uburé tinhib'a'uwẽ norĩ me 'ri nho'õmo hawi wairébé wamhã, ma tô 'ri da'rãsutu'wai ãma hã mazahâri za'ra. 18 Uburé romhuri'wa norĩ, te apito nho'remhã hâiwi aimasa, quereti norĩ hã, pereti norĩ hã, duré dasi'wapéi 'manharĩ'wa norĩ 600 na Gati hawim haré isiré isi'aba'ré norĩ hã te te ro'rahâri za'ra ré. 19 Tawamhã Davi, te isib'ihâ'a za'ra Ita'ihi ma hã tinha ãne:
— E marĩ zô, te wasiré hã ãma aimo. Apâ aimorĩ, apito itép siré si aihâimana da. A hã wasiré a'uwẽ õ di, asipti'a nhiti romhâ na aimani wa, 're i'aihâimana mono. 20 A hã ma tô duré suru na ãmemhã 're aihâimana mo. Tane nherẽ, e niha wa za bété ãma ĩme aimorĩ da hã aima waprosi. Nimomo ĩmorĩzé hã, wa hã te waihu'u õ di. Tahawa ma'ãpé apâ aimorĩ. Asiré norĩ hã apâ ãma simroi mono. Uburé Danhib'apito nhimizawizé hã duré iwẽ te te aima 're i'ab'manharĩ mono zé hã ai'ratamhã 're ihâimana mono da si iwẽ hã!
21 Tane nherẽ, Ita'i, ma te ãne ãma tãma wa'rã:
— Apito, wa hã wa za ropisutu, Uburé Danhib'apito idâ'â'õ nhisi na, asima iwẽzéb uwaibaba 're i'aimorĩzéb zarina wa hã asiré õne u'â 're ĩmorĩ da hã ĩma wẽ di. Niha hã wamhã, duré tô ãne u'âbâ ĩdâ'â wamhã, wa za tô dârâ. Marĩ õre di.
22 Wẽ di tô! Tane wamhã, ma'ãpé aimorĩ na ãma uzusi wasiré! — Ãne ma te Davi ãma sada'â.
Tawamhã Ita'i, uburé tite aibâ norĩ ré, ma timorĩ na uzusi, duré ihawi a'uwẽ norĩ ré hã.
23 Davihi siré 're ihâimana za'ra mono norĩ, oto wairébé wamhã, ma tô dawawa 'rãihâ na hã ta'ru'ru ni. Tawamhã apito, Cedurõ na romharé nhisi na te te saprĩ wamhã, ma tô uburé ite aibâ norĩ zama saprĩ za'ra, a'ubuni wi supara'ré 're isa'wari mono nho'õmo.
24 Sasedoti Zadoqui, isiré za'ra te tihâiba, duré levita norĩ zama. Ta norĩ hã te 'Re ihâimana u'âsi mono nhimiroti ré wedezane 'manharĩ iwazéb zahi hã siwi ti'â. Tawamhã ma tô wedezane 'manharĩ hã ti'ai wamhã, oto siwi tihi, uburé 'ri nho'õmo hawi a'â idawairébézéb u. Abiataha zama ma tô tame tihâiba, isiré za'ra. 25 Tawamhã apito, te Zadoquihi ma tinha ãne:
— 'Ri nho'õmo u apâ âri, 'Re ihâimana u'âsi mono te, wedehâ're 'manharĩ hã. Duré Uburé Danhib'apito, ĩzabâdâ tãma rowẽ wapsi, te za apâ ĩ'ãma siri za, wedezane 'manharĩ, te 'madâ'â da hã, duré 'ri iwa isabzé, te 'madâ'â da zama. 26 Tane nherẽ, ĩma toi õ wapsi, te te sima iwẽ na tô marĩ te te ĩ'ãma 'manharĩ!
27 Davi hã Zadoquihi ma, te zahadu tinha ãne:
— Ma'ãpé ĩwapari zadaihu'u! Ai'ra Aima'asi hã apâ saprõni. Duré Zonata, Abiataha 'ra zama ãma apâ saprõni. Apâ duré aimorĩ, aima rowẽ sina 'ri nho'õmo u hã. 28 Taha ré hã, wa hã wa za ĩnhimipari sina, a'ubuni wi supara'ré 're isa'wari mono u bâdâdi ãmamhã a'â nhamra za, aiwasu'u za'ra wa'wa hã we ĩtẽme iwisizéb u.
29 Tawamhã Zadoqui norĩ, Abiataha me, ma tô 'Re ihâimana u'âsi mono nhimiroti ré wedezane 'manharĩ hã Zeruzalẽ u apâ âri zahuré. Tame ma tô tihâimana zahuré.
30 Davi hã, Olivera na ẽtẽ nhisi na siwa'õ mono sina ma tô sai'u. Ãhã wamhã, te para ubana mo, duré si'rã'ubu sina robzei'õ zé te. Uburé ime isi'aba'ré norĩ hã ma tô si'rã'ubu za'ra. Ta norĩ zama ma tô ti'ru'ru. 31 Davihi ma, Aitopé, Absarõhõ niwĩ te te isaprĩ na, da te tãma wasu'u wamhã, te ãne tinha:
— Uburé Danhib'apito, ma'ãpé 'manharĩ, Aitopé, tinhimirotizém na, Absarõ te te sima irowa'õtõzé hã te te tiwi ãma 'wa'rutu da!
32 Davi hã ẽtẽ 'rãihâ nhisi u wisi wamhã, Uburé Danhib'apito ãma 're idawata za'ra mono zéb u, isiwaihu Husa'i na isisi, sena na te te 're i'umnhasi mono hã arquita na iwamri hã, ma tô tame sõpẽtẽ. Tawamhã Husa'i hã uza hâsi wazu ti. Duré ti'a, ti'rã nhisi wi te te sima i'ahiri ré, te tihâiba, tãma irobzei õ zarina. 33 Tawamhã Davi hã te ãne tãma tinha:
— Ãma ĩsiré hã aimorĩ õ di za, ĩpawaptob dai õ wa, ãne na hã. 34 Tane nherẽ, te za tô ĩpawapto za a hã, Aitopéhé nhimirotizé hã taré hâimana da. 'Ri nho'õmo u apâ aimorĩ wamhã, ãne Absarõhõ ma hã nharĩ za: “Apito, awa'awi na hã wa hã wa za oto aima te 're romhuri, aimama ma, te 're iromhuri mono ne.” 35 Sasedoti Zadoqui norĩ, Abiataha me te za tamemhã aime hã tihâimana zahuré. Tawamhã te za uburé tãma 're irowasu'u zahuré mo, apito 're iwapari mono zém na isimiromhurizéb ãma hã. 36 I'ra norĩ zama te za tamemhã aime tihâimana zahuré, Aima'asi norĩ hã, Zonataha me. Duré taha ré te za ta norĩ ma, romreme hã we 're i'anhomri mo, uburé a hã 're i'awaihu'u mono zé hã.
37 Tawamhã Husa'i, Davihi siwaihu hã ma tô wi 'ri nho'õmo u hã, Absarõ hã iwisi siwaprã.