— Ma'ãpé ni'wa sô i'aiwa'õ ne, robzei ãna i'aihâimana ne hã tô aihâimana. Duré dazô 're dasiwa'õ za'ra mono wa, dasi'uzazé hã asima sẽrẽ. Duré asiwarĩrĩ tõ. Bâtâ ahâ na aipẽ'ẽzé te, robzei ãna i'aihâimana ne hã te za i'manha. 3 Tahawa ma'ãpé aimorĩ, apito ma, nharĩ da, za te aima inharĩzéb zarina.

Tawamhã Zoabi te oto tãma tinha, marĩ na za õ hã te te inharĩzéb da hã.

4 Pi'õ hã apito ihâimanazéb u morĩ wamhã, ma tô hi'rãtitõ tãma nhamra. Ti'ubu na ti'ai u ma tô duré tãma ropto, iwazéb zarina. Tawamhã te ãne tãma tinha:

— Apito, ma'ãpé ĩzawi na hã ĩpawapto na!

5 — E marĩ te tawamhã asima iwẽ. — Ãne te apito hã sadanha.

Tawamhã pi'õ, ma te ãma sada'â ãne:

— Ĩmro hã ma tô ĩwi dârâ. Wa hã ĩmrotõre ĩnhiptihai'õre. 6 Apito, ĩ'ra hã maparane aré. Nimahã bâtâ na ma tô a'ubuni wimhã si'ahâri zahuré. Tawamhã ni'wai õ di ãma isiwanhizari zahuré da hã. Tahawa, ma tô 'râwi sipã. 7 Tahawa, ma tô uburé ĩsiré a'uwẽ 'remhã ĩzada tihâimana za'ra. Te duré ĩwi waptẽrẽ zahi za'ra, ĩ'ra hã te tãma hâiba nhomri za'ra da, te te siwi wĩrĩ da, tisisãnawã hã te te wĩrĩ 'ru te. Ãne hã te te 'manharĩ za'ra wamhã, ĩ'ra ãna wa za oto 're ĩhâimana. Duré ĩma isi'atarẽme hã te za siwi sõ'rebzâ, ĩmro hã 'ra ãna da. Duré ti'ai ãma sisi ãna 're hâimana mono da hã te za ãne hã tãma 'manharĩ za'ra.

8 Tawamhã Davi ma te ãne asa ãma sada'â:

— 'Ri tẽme apâ aimorĩ. Ĩwétési, za té marĩ na hã ãma ĩsi'madâ.

9 — Apito, ĩsiré a'uwẽ norĩ me hã wama wẽ za'ra di za, a hã siwa'ru za marĩ na uburé wa'ãma i'asi'madâ'â za'ra zém na hã, upai wamhã, wate za'ra za i'upa ai'upana. Tawamhã ai'ra norĩ me hã aiwẽ uptabi na te za 're aihâimana za'ra wa'aba mo. — Ãne te pi'õ hã asa tãma tinha.

10 Tawamhã apito te ãne tãma tinha:

— Ni'wa te te duré aima amhâzépa wamhã, ma'ãpé we ãwa saprõni za. Tawamhã niwamhã te te aiwi iro'wa'ré zahu da hã mare di za.

11 Ãne te te tãma waihu'u wa, te pi'õ tawamhã duré tãma tinha ãne:

— Apito, ma'ãpé ĩzawi na hã Uburé Danhib'apito, ate 'Re ihâimana u'âsi mono ma, ĩ'ãma aimreme, ĩsisãnawã norĩ, ĩ'ra te te siwi 'ruiwa'âbâ da, rosa'rada te te sima i'manharĩ za'ra norĩ hã, ĩ'ra ihâiba amo te te siwi iwĩrĩ na iwasété uptabi hã te te i'manharĩ za'ra na te te sahu za'ra tõ da.

Tawamhã Davi te pi'õi ma ãne tinha:

— Wa za ropisutu, Uburé Danhib'apito idâ'â'õ nhisi na, ni'wa hã ai'ra te te i'upi da hã, mare di za.

12 Tawamhã pi'õ te duré ãne tãma tinha:

— Apito, wa za a'â duré tiha ihâiba amo na aima tinha.

— Ma'ãpé tô! — Ãne ma te asa ãma sada'â.

13 Tawamhã pi'õ te ãne sadanha:

— Apito, e tiha da, ma tô 'Re ihâimana u'âsi mono nhib'a'uwẽ ma i'manharĩzém na ãma i'upa. Ai'ra ma hã rowairébé õ di, apâ tisiré a'uwẽ'õ norĩ nhipti'ai hawi we imorĩzéb da hã. Ãne wa, ma te tô a hã ãma i'upa. Asihawi inharĩzém na hã ma ropire asima ihi. 14 Wa norĩ hã wa za uburé wadâ'â za'ra ni, aiwa â, ti'ai u 're sisa'wari mono wa, apâ da te dasiwi 're i'ubumroi waihu'u mono õ ne. Tane duré tô 'Re ihâimana u'âsi mono, 're idadâ'â za'ra mono norĩ ma, apâ dapẽ'ẽzani hã te te dama 're anhomri mono õ di, apâ 're idahâimana za'ra mono da hã. Tane nherẽ, apito, aima waihu'u pese di aré, aibâ tisiré a'uwẽ'õ norĩ nhipti'ai hawi, we apâ i'ãwisi da hã. 15 Apito, wa we atẽme mo, te aima nharĩ da, a'uwẽ norĩ te te ĩma amhâzépa za'ra wa. Tahawa wa tô rosa'rata, ãne: “Wa za mo, apito ma, te tãma nharĩ da, te tiwi iwaptẽrẽzém na, te te ĩzazei wa, te te ĩma ãma uwaimrami da.” 16 Tawamhã wa tô rosa'rata aré, ãma ĩzazei wa, ĩnho'reptu da na hã, ĩ'ra te te wĩrĩ da, duré te te ĩwĩrĩ da, rosa'rada te te ipibui wi hã, 'Re ihâimana u'âsi mono tinhib'a'uwẽ ma, ti'a te te isõmri hawi te te wazani da, te te sima iwẽ wi hã. 17 Tawamhã wa hã aima romhuri'wa, asimiropisutuzé te te ĩnho'reptu da hã, wa tô aré rosa'rata. E tihai wa. A hã apito, aiwa 'Re ihâimana u'âsi mono ma, hâiwa ãma romhuri'wa ne, uburé marĩ hã aima waihu'u pese wa. Uburé Danhib'apito, ate 'Re ihâimana u'âsi mono, asiré 're ihâimana mono da si iwẽ hã!

18 Tawamhã apito te ãne tãma tinha asa:

— Wa za asadanha. Sena na uburé pese te za marĩ na ĩma irowasu'u, ĩwi rob'udâ ãna.

— Ma'ãpé tô, asima iwẽzéb zarina tiha na ĩzadanharĩ! — Ãne ma te ãma tãma wa'rã.

19 — E Zoabihi zadawa zarina ãne hã 'manharĩ da, ma tô aipisutu. — Ãne te apito hã sadanha.

Tawamhã pi'õ, ma te ãma sada'â ãne:

— A hã sena aihâiba ré 're i'aihâimana mono zarina, wa sena na aima tinha, ni'wa hã asimizadanharĩzé wi siwazere waihu'u õ wa. Ĩhe tô, Zoabi ate dama ipire da'madâ'â'wa ma tô ĩma tinha, ãne hã te 'manharĩ da, duré tiha na te aima nharĩ mono da hã. 20 Ãne hã tiha na romhâimanazém na te te ãma saprĩ da hã, ma tô 'manha. A hã ai'rãi waihu'u pese di, 'Re ihâimana u'âsi mono ma, hâiwa ãma romhuri'wa ne. Tiha uburé 're iwairébé mono hã aima waihu'u pese di.

21 Tawamhã ronomro prãi wi, ma tô apito, Zoabihi ma tinha ãne:

— Wa tô oto rowairébé wa hã, marĩ asima iwẽzém na hã. Mo oto aimorĩ, Absarõ aibâ iprédupté hã we apâ saprõni da.

22 Tawamhã Zoabi, ma tô Davihi nho'remhã ti'ai u sime, tãma iwazéb zarina. Tahawa, te ãne tãma tinha:

— Apito, 'Re ihâimana u'âsi mono iwẽ na si te te 're i'aipawapto mono da si iwẽ hã! Ãhã na wa tô waihu'u, ĩma i'aipẽ'ẽtozém na hã. E marĩ wa. Wa hã aima romhuri'wa, te irowaptẽrẽzé, ãma ĩzazezé hã 'manharĩ wa.

23 Tawamhã Zoabi hâiwi sa wa, duré oto 'rinho'u Gesu na isisi u morĩ wamhã, ma tô Absarõ, Zeruzalẽ u hã oto apâ saprõ. 24 Tane nherẽ, apito, ma tô Absarõhõ hâiba na roti zahi 'manha, isimiromhurizé 'ri 'rãihâ 're, 're hâimana mono tõ da hã. Tahawa, te ãne tinha:

— Te ĩsima wẽ õ di, te i'madâ'â da hã!

Ãne wa, ma tô Absarõ tinhorõwa u hã mo, tame 're sãmra mono da. Tahawa apito nho're u hã sihâi'ré õ di.

25 Izaraéu norĩ nhipti'ai 'remhã ni'wa hã 're hâimana mono õ di, iwẽ i'madâ'â ze hã dama isa'rese za'ẽne iwẽ, Absarõhõ ne hã. Ta hã i'rãi hawimhã, ipara u hã 'manharĩ wẽ di. 26 Séré pa uptabi di. Tizéré hã misi haré wahup sidâpâsi te te 're sihâri, pire wa, duré pa wa. Iséré nhihâri pire pibuzé hã 2 kilu na, tô apito nhimipisutuzéb zarina, marĩ pire pibuzé wa. 27 I'ra hã si'ubdatõ ihâiba za'ra hã. Misi i'ra sipi'õ nhisi hã Tama na, pi'õ iwẽ uptabi, ta hã.

28 Absarõ hã maparane wahum na ma tô Zeruzalẽ ãmamhã 're hâimana, apito te te 'madâ'â ãna. 29 Tahawa, ma tô Zoabihi zô hã da'mazatõ, te te tiwi waptẽrẽ da, apito u imorĩzém na hã te te tãma nharĩ da, ihâiba na. Tane nherẽ, Zoabi hã te te sima wẽ õ di, imorĩ da hã. Tawamhã ma tô apâ duré da'mazatõ, sô da'maimorĩ da. Tane nherẽ, ma tô duré tiwi rowẽ'õ zahu. 30 Tahawa, te Absarõ, tite romhuri'wa norĩ ma nharĩ za'ra ãne:

— Ma'ãpé ãma rosa'rata za'ra wa'aba! Zoabihi te rob're, ĩte zababa te 're hâimana. Taha 'remhã te rob're cevada hã tihâiba. Tahawa mo oto ai'aba'réi wa'aba õwa, ãma tiwi sazu za'ra wa'aba da, buru hã unhama na.

Tahawa, ma tô oto ai'aba'ré. Si'aba'réi wamhã, ma tô Zoabihi wi iburu na hã ãma tiwi sazu za'ra.

31 Tahawa, Zoabi, Absarõhõ nhorõwa u te mo. Morĩ wamhã, te sadanha ãne:

— E marĩ da, ma tô aima romhuri'wa norĩ ĩburu na hã ãma siwi sazu, unhama na.

32 Tawamhã Absarõ, ma te ãne ãma sada'â:

— Wa hã wa ãma asô hâ. Wa ĩsima wẽ, apito u aimorĩ da hã ãne na tãma rowasu'u da: “E marĩ wamhã, wa tô bété apâ wei mo, Gesu na 'ri nho'õmo nhisi hawimhã. Ĩma hã aré wẽ di, õmep si 're ĩhâimana mono 'wa'âhã.”

Te duré zahadu tawamhã Absarõ tãma tinha ãne:

— Wa ĩsima wẽ, apito ma, te robzanhamri da hã. Te upai wamhã, te te ĩ'ru, da te dasiwi ĩwĩrĩ da hã.

33 Tawamhã Zoabi, apito ma, te te nharĩ da hã ma tô mo. Tahawa, apito, Absarõhõ zô te te da'mazatõrĩ wa, duré itẽme morĩ wamhã, ma tô apito nho'remhã hi'rãtitõ hã nhamra. Ma duré ti'ubu na ti'ai u hã ropto. Tawamhã apito tob'rata hârâ na hã ma tô sawi.