Amno norĩ wasu'u, Tamahã me
13
Davihi 'ra hã, Absarõhõ hidiba iwẽ uptabi hã te 're 'maihâimana, Tama na isisi hã. Ta hã ma tô Davihi 'ra hâiba amo Amno na isisi hã sawi â. 2 Õhõ ma, sawi uptabi wa, ma tô sô tihâzé. Amnohõ nhimirosa'rada hã tãma pire di, Tama tihidiba prã, romnhiwasi te te isõpẽtẽ da hã, waihu'u õ wa, marĩ te te ãma i'manharĩ da hã, õ hã zahadu ubuni na 're hâimana mono wa. 3 Tawamhã Amnohõ siwaihu te 're 'maihâimana, i'rã nhipe hã, isisi Zonadabi na, Siméia, Davihi sisãnawãi 'ra hã. 4 Tawamhã Zonadabi, te Amnohõ ma tinha ãne:— Apito 'ra, e marĩ wa, te bâtâ mono na robzei ãna hã aimasisi mo. Ma'ãpé ĩma asiwasu'u na.
Tawamhã Amno, ma te ãne ãma sada'â:
— Tama, te sawi âri pese wa, ĩmama hawi ĩsisãnawã Absarõhõ hidiba hã!
5 Tawamhã Zonadabi te ãne tãma tinha:
— Aimorĩ, waptâ anomro da, i'aihâzé ne hã. Tawamhã aimama te te asabu da, ãma atẽme morĩ wamhã, ãne tãma nharĩ za: “Ĩmama, ma'ãpé ĩhidiba Tama we ĩtẽme satõrĩ, ĩsa te i'rẽne da hã te te ĩma a da. Tawamhã te za ãme ĩhâimanazéb ãma ĩtõmo nho're dasa hã 'manha, duré tô si'uihâ na te te ĩma a'âri da.”
6 Tawamhã Amno ma tô oto nomro, ihâzé ne.
Tawamhã apito Davi te te sabu da, itẽme morĩ wamhã, ma tô Amno hã ãne tãma tinha:
— Ĩzawi na hã, ma'ãpé Tama we satõrĩ, dasai wapu ãme te te ĩma 'manharĩ ré te 'madâ'â da wa hã, duré tô si'uihâ na te te ĩma sõmri da.
7 Tawamhã Davi, ma tô dama ti'ru, isadawa para isimiromhurizé 'ri 're, Tamahã ma, da te 'mairowasu'u da, ãne:
— Mo oto Amnohõ nhorõwa u aimorĩ, dasa hã u, tãma 'ma'manharĩ da.
8 Tama oto morĩ wamhã, ma tô waptâ nomro ré sõpẽtẽ. Tawamhã amnho zub'a trigu te te âri wamhã, ma tô dasai wapu hã 'manha, itõmo nho're. Tahawa, duré te te oto sebre wamhã, 9 ma tô isebrezém hawimhã Amno te te i'rẽne da hã tãma 'maiwaze. Tane nherẽ, te te i'rẽne da hã te te sima wẽ õ wa, te ãne tãma tinha:
— Uburé dawairébé da, ma'ãpé dama rob'ru na.
Tawamhã uburé dawairébé da, te te dama rob'rui wa, ma tô tawairébé ni, rob u hã. 10 Taha pari te Amno, Tamahã ma tinha, ãne:
— Ma'ãpé, dasai wapu ĩnhimiwaptâ u we oto ĩma âri.
Tawamhã ma tô isimiwaptâ u hã oto tãma tisõ. 11 Tawamhã Amnohõ ma, te te oto tãma sõmri da wamhã, ma tô pa'â. Taha sina, te ãne tãma tinha:
— Ĩhidiba, ĩ'rata anomro!
12 Tane nherẽ, ma te ãne ãma tãma wa'rã:
— Ĩhitébré, tô'ã! Ãne hã ĩma rob'manharĩ tõ! Izaraéu 'remhã, ãne hã da te 're 'manharĩ za'ra mono õ di. Ai'rã siwamnarĩ zarina ãne hã 'manharĩ tõ! 13 E niha wa za duré tâibâ parimhã ĩsihâi'ré za, danho're u hã. Duré a hã te za asisimini, Izaraéu 'remhã, roti iwazéb'õ na hã. Ĩzawi na hã ma'ãpé a'â apito ma nharĩ. Ãhã wapsi te za i'uwaibaba zarina aima ĩhâiba nho.
14 Tane nherẽ, Tama te te inharĩzé te te iwapari da hã, Amno hã te te sima wẽ õ di. Tahawa, tãma siptete wa, ma tô tãma rob'manharĩ wasété.
15 Tawamhã te te tãma rob'manharĩ wasété pari, ma tô sima 'ruiwazere pese oto, iwana ré te te isawi nhipai u. Tahawa, te ãne tãma tinha:
— Ã hawimhã oto aiwatobro!
16 Tane nherẽ, Tama ma te ãne ãma tãma wa'rã asa:
— Ĩhitébré, ĩwatobro da hã maze di! E niha te a hã ĩma irob'ru, ĩmorĩ da hã. Ãne ĩma rob'rui wamhã, nimosi ĩma irob'manharĩ wasété nhipai u, te za duré aiwasété uptabi na ãma isisiwi!
Tane nherẽ, Amno te te sima wẽ õ di, te te ãma tãma iwa'rãmizé te te iwapari da hã. 17 Tawamhã tite romhuri'wa zô hârâ wamhã, te ãne tãma tinha:
— Wazere, ã hã pi'õ, ĩhawimhã! Rob u sãrĩ! 'Ridawa hã duré tété za asisa'u!
18 Tawamhã romhuri'wa, Tama rob u te te sãrĩ pari, ma tô 'ridawa hã tété. Tamahã uza hã da'uza hâpa, apito 'ra sipi'õ imro'õ, tô taha bâtâ mono na ãma 're isi'uza za'ra mono zém na. 19 Tawamhã ma tô 'ru'a, ti'rã nhisiwimhã sima ahi. Ti'uza hã ma duré hâiwazu. Taha pari ma tô oto watobro sadari 'rãihâ sina, tinhib'rata na si'ubu ubu sina. 20 Absarõ ihitébré hã te ãne sadanha:
— E Amno, marĩ iwasédé ma tô aima 'manha. Ĩhidiba, ni'wai ma hã wasu'u tõ. E marĩ wa, õ hã aihitébré prãi wa. Aipẽ'ẽ 'remhã te te aiwi ro'wa'ré tõ.
Ãne wa, ma tô Tama, Absarõhõ nhorõwa ãmamhã siwaprosi robzei ãna hã hâimana.
21 Apito Davi ãne hã te te waihu'u wamhã, ma tô ab'rui pese. 22 Absarõ, Amnohõ ma hã te te robzanhamri waihu'u õ di. Taré ma tô sada ab'rui pese. Duré tãma hã toi õ di. E marĩ wa. Tihidiba Tamahã ma, tinhiptete na te te tãma rob'manharĩ wasété wa.
23 Tawamhã maparane wahu pari, Absarõ tite pone'ẽrebâ te te azéré nhihâri wamhã, Baau-Hazo na 'ri wa'õtõ nhisi, Efraĩ te 'ri nho'õmo 'rata 're ihâimana mono ãma ma tô uburé apito 'ra norĩ waptẽrẽ za'ra, õwa si'aba'ré da. 24 Tahawa, apito ma, te te nharĩ da, itẽme morĩ wamhã, ma tô ãne tãma tinha:
— Ĩnhib'apito, wa hã wa ĩte pone'ẽrebâ hã azéré nhihâ. Tahawa, ĩma hã wẽ di, ãma i'aimorĩ da hã, duré aima romhuri'wa norĩ zama ãma isi'aba'ré da hã.
25 Tawamhã Davi asa ma te ãne ãma sada'â:
— Ĩ'ra, ãté mare di za. Aihĩni uburé ãma wasi'aba'réi wamhã, romhuri sa'ẽtẽ na wa za aima sõmri za'ra ni za.
Tawamhã Absarõ, sada hutu ãna te tô nasi tãma tinha. Tane nherẽ, apito imorĩ da hã te te sima wẽ õ wa, ma tô tãma tinha, Absarõhõ ma, tô oto morĩ da hã.
26 Tawamhã Absarõ te oto ãne tãma tinha:
— Wẽ di tô. Tane wamhã, ma'ãpé ĩno Amnohõ ma si rowairébé, taha si ãma ĩme morĩ da.
— E marĩ wa, te za bété õhõ si ãma asiré mo. — Ãne te apito hã sadanha.
27 Tane nherẽ, Absarõ sadahutu ãna te tô nasi tãma ti'ru, te te tãma rowairébé da, Davi hã te te tãma irowairébézéb u Amnohõ ma hã, duré uburé ti'ra norĩ ma si'aba'ré da hã te te irowairébé za'ra zéb u.
Tawamhã Absarõ, apito ma, dasa isa'ẽne hã te te 'manharĩ wamhã, 28 ma tô ãne tite romhuri'wa norĩ ma hã waihu'u za'ra:
— Asimiza'rese aihâimana za'ra wa'aba, Amnohõ da hã. Si'rãiwamnarĩ wamhã, wa hã wa za aima waihu'u za'ra wa'wa, za asiwi wĩrĩ aba da hã. Aipahi za'ra wa'aba tõ. E marĩ wa. Wa hã, aima za'ra wa'aba marĩ 'rui'wa na, za ĩhâimana dâ'âsina. Tahawa, asib'ru za'ra wa'aba wa, duré asima rowairébé za'ra wa'aba!
29 Tawamhã romhuri'wa norĩ ma tô Amno hã siwi tiwĩ, Absarõ te te tãma i'ru za'ra zéb zarina. Tawamhã uburé Davihi 'ra hâiba amo norĩ, tite awaru po'repore na sarõtõ za'ra wamhã, ma tô õne haré pahi te aimani za'ra.
30 Zahadu bâdâdi na si'aba'réi ré, ma tô Davi rowasu'u hã wapa, ãne: “Absarõ, ma tô uburé ai'ra norĩ hã uprosi. Ni'wa hã tiwi sisõ'reptui õ di!”
31 Tawamhã apito, hâiwi sab da, wahutu wamhã, ma tô ti'uza hã hâiwazu, robzei'õ zé te. Ma tô duré ti'ai u sime, si'uihâ na hã. Duré uburé isib'a'uwẽ norĩ, ime tame ihâimana za'ra norĩ zama ma tô ti'uza hã hâiwazu za'ra. 32 Tawamhã Zonadabi, Davihi sisãnawã Siméiaha 'ra hã, te tãma tinha, ãne:
— Apito, uburé ai'ra norĩ hã te te uprosi õ di. Amnohõ si ma siwaprosi dârâ. Ã hã, Absarõhõ nhimirosa'rada, ihidiba Tamahã da, Amno hã, tinhiptede te te i'manharĩzém hawim haré te te ãne tãma i'manharĩ da hã. 33 Tahawa, rowasu'u na, wa hã ãma ĩnhimizazei õ di, ai'ra norĩ uburé isi'utõrĩ na hã. Amnohõ si, ma te tô dârâ.
34 Tahawa, Absarõ hã ma duré tô aimani.
Tô taha ré, dasi'wapéi 'manharĩ'wa rob'madâ'â'wa na ihâiba hã ma tô da'ahâ na ẽtẽ hawi Horona'ĩ na 'ri nho'õmo nhisi u bâdâdi na, da te isi'ra za'ra hã da'a'madâ. Tawamhã apito u morĩ wamhã, ma tô ãne tãma rowasu'u:
— Niwam norĩ aibâ hã te ẽtẽ hawimhã Horona'ĩ u bâdâdi na we si'ra za'ra, ahâ na.
35 Tahawa, te Zonadabi, Davihi ma tinha, ãne:
— Ai'ra norĩ hã te tô apâ hã we ai'aba'ré, te iwasu'u za'ra zéb zarina aima.
36 Ãne hã timreme te te 'rãsutu wi, ma tô Davihi 'ra norĩ hã awa'awi asisi. Tawamhã ma tô wawa 'rãihâ na tisiwa'õ na hã ãma sãna'rata za'ra. Duré Davi norĩ zama, ma tô tite dama ipire norĩ me hã sa'ẽtẽ ti'ru'ru.
37 Tawamhã Absarõ simani wamhã, ma tô apito Tauma'i na isisi, Ami'udihi 'ra ãma hâimana da hã mo, 'rinho'u Gesu na isisi u. Tawamhã bâtâ sidâpâsi te 're siwa'õ, Davi hã ti'ra Amnohõ zô hã.