— Maparane aibâ norĩ hã te 'ri nho'õmo ãma 're hâimana zahuré, isibro pe, duré ihâiba amo hã isibrob'õ. 2 Isimarĩ pese ma, ahâ uptabi na te powawẽ duré pone'ẽrebâ norĩ hã 're hâimana za'ra. 3 Tane nherẽ, isimarĩ'õ ma, te pone'ẽrebâ si 're hâimana, te te dawi i'uipra hã. Ta hã ma tô te te 're 'madâ'â pese. Ma tô isõrõwa ãmamhã i'ra norĩ siré tiprédu. Ta hã ma tô tisa na te te 're sa. Tinhimihâsizé hã te duré te te tãma 're sa'ré, iwa te te 're hâsi mono da hã. Ipamhã te duré 're sõtõ. I'ra sipi'õ ne, te tãma 're hâimana, pone'ẽrebâ hã. 4 Tawamhã nimahã bâtâ na aibâ isibro pese nhorõwa u ma tô itẽme ta'maiwisi ni. Ta hã tinhimizama te te i'maiwĩrĩ da hã te te sima wẽ õ di, itẽme ida'maiwisi ma, dasa te te ãma i'manharĩ da hã. Tahawa, aibâ isibrob'õ nhimizama si ma tô tite upana ti'â, te te wĩrĩ da, dasa te te ãma i'manharĩ da hã aibâ isõrõwa u iwisi ma.

5 Tawamhã Davi, õ hã aibâ da hã ma tô tizahi. Tahawa te ãne tãma tinha:

— Wa ropisutu wa hã, Uburé Danhib'apito, 'Re ihâimana u'âsi mono idâ'â'õ nhisi na ãne: Aibâ, ãne te te i'manharĩ hã dâ'âre tô! 6 Õ hã te te iwa'âbâ da si, maparane si'uiwa na ãma isahu na te te iwazere hã, iwasété uptabi te te i'manharĩzéb zarina ãma.

7 Tawamhã Natã, Davihi ma, te ãne tinha:

— Ã hã aibâ hã, a hã te aiwasu'u. Tahawa, te ãne Uburé Danhib'apito, Izaraéu te, 'Re ihâimana u'âsi mono hã ai'ãmamhã tinha: “Wa hã wa tô Izaraéu 're asi'apito da hã aipisutu. Duré Sauhu wi hã wa tô asõ'reptu. 8 Te te 're ida'a'madâ'â mono zé hã wa tô aima tisõ. Duré ite pi'õ norĩ zama wa tô aima sõmri za'ra. Izaraéu 're, duré Zuda 're asi'apito da hã, wa tô aipisutu. Ãne hã zahadu ibâ na te aima sõmri õ 'wa'âhã, wa aré duré maparane ãma aima wapto. 9 E marĩ wa bété, ma tô ĩnhimiroti hã asiwi iwẽ'õ, marĩ iwasédé hã i'manharĩ zô hã. A hã, Urias hitita hã dasi'wapé na dâ'â da hã ma tô i'ru. Amonita norĩ ma hã ma tô isa'ré, te te siwi wĩrĩ da hã. Tahawa te oto imro hã aimro na aima tihâiba. 10 Tahawa, asiwi ĩwẽ'õ zahi wa, duré Uriasihi mro asima âri wa, te za ni'wam norĩ asihudu hã õne u'â 're dâ'â za'ra za, dasi'wapé na hã. 11 Ãne, wa duré wa hã Uburé Danhib'apito hã aima tinha: Aihawi a'uwẽ 'remhã te za ro'wa'rudu ipire hã aima sina waze. Atõmo nho'a wa za aimro norĩ hã aiwi waibu. Wa za duré aimawi aibâ ma hã sõmri za'ra. Tawamhã te za bâtâ na rowa'a na nherẽ, iré hã tinomro za'ra. 12 A hã ma tô aima'uri sina, asi'rem na si aima iwaihu'u pe hã ãne hã i'manha. Tane nherẽ, Izaraéu nhihudu norĩ uburé te te siwi 'madâ'â da i'manharĩzé, wa za bâtâ na hã oto tãma hâi'ré za'ra.”

13 Tawamhã Davi te ãne tinha, Natãhã ma:

— Wa hã wa tô ĩwasédé hã 'manha, Uburé Danhib'apito wi.

Tawamhã Natã ma te ãne ãma sada'â:

— Uburé Danhib'apito, aiwasédé hã te te ai'ãma 'madâ'â õ di za. Tahawa duré a hã atâ'â õ di za. 14 Tane nherẽ, ãne hã Uburé Danhib'apito wi iwẽ'õ pe hã 'manharĩ wa, te za ai'ra hã aiwi dârâ.

15 Ãne te te tãma waihu'u mono pari, ma tô Natã hã mo, tinhorõwa u.

Tawamhã Uburé Danhib'apito hã Uriasihi mro Bate-Sebaha 'ra, Davihi ma, te te tãma isõmri hã ma tô azâ, hâzé da hã. 16 Davi hã ma tô ai'uté séptâ'â da, 'Re ihâimana u'âsi mono ma ãma mre. Te duré sai ãna hâimana. Tahawa, 'ri 're wa'wa u duré sébré wamhã, ma tô mara wahuré na ti'ai wamhã nomro. 17 Tahawa, ma tô aré apito nhorõwa 'ri 're romhuri'wa norĩ hã Davi, siwi wahutu pibu hâiwi. Tane nherẽ, te te sima wẽ õ di, hâiwi isab da hã. Duré ime za'ra hã sai õ di. 18 Misi romhuri oto si'utõrĩ pari, ma tô ai'uté hã dârâ. Tawamhã romhuri'wa norĩ, ma tô Davihi ma tipahi za'ra, te te tãma irowasu'u za'ra da hã. Tahawa, te ãne sima ãma nharĩ za'ra:

— Ai'uté zahadu hâimana ré hã, Davi hã te te nasi wazada'âbâ za'ra õ di, wa te tãma robzanhamri za'ra wamhã. Tahawa, e niha wa za bété ai'uté idâ'âzém na hã tãma wasu'u za'ra ni. Ãhã wamhã bété, marĩ iwasédé hã 'râwi te te si'ãma 'manharĩ wamhã!

19 Davi hã romhuri'wa norĩ tipo're na'rata sadawa 'rasi sina te te sima irowasu'u za'ra zé, te te 'madâ'â waihu'u wamhã, ma tô duré ai'uté idâ'â na hã waihu'u. Tahawa, te sadanharĩ za'ra, ãne:

— E ai'uté hã ma tô dârâ.

— Ĩhe! Ma tô dârâ! — Ãne ma te ãma sada'âbâ za'ra.

20 Tawamhã Davi ma tô wahudu, ti'ai hawi. Ma tô oto si'upte. Ma tô duré siwarĩ. Duré ti'uza na ma tô ãma saprĩ. Taha pari te oto mo, Uburé Danhib'apito nhorõwa u hã ãma wata da. Tawamhã tinhimiromhurizé 'ri u apâ oto morĩ wamhã, ma tô dasa hã waptẽ. Duré dasa te te oto tãma a'âri za'ra wamhã, ma tô waptu na uprosi.

21 Tawamhã ite dama ipire norĩ hã te ãne tãma nharĩ za'ra:

— Wa norĩ, ãne hã wa te waihu'u za'ra õ di. 'Watébrémi hâimana ré hã, a hã ma tô ãma aiwa'õ. Duré asai õ di. Tazahã, dâ'â wim nherẽ, ma tô a hã aiwahu. Duré asa hã ma tô oto i'rẽ!

22 Tawamhã Davi, ãne ma te ãma sada'âbâ za'ra:

— Ĩhe! Ibâre bâ tô, ta hã! 'Watébrémi zahadu hâimana ré hã, wa hã tô marĩ te 'rẽne ãna wa tô ĩhâimana. Wa tô duré aiwa'õ. E marĩ wa. Uburé Danhib'apito ĩ'ãma siwamri wa, dâ'â ãna ĩma 're hâimana mono da ne. 23 Tane nherẽ, ma tô oto dârâ. E marĩ zô bâ, wa za bété ĩsai ãna ĩhâimana. E marĩ te 'manharĩ da bâ, apâ 're ihâimana mono da hã. Niwamhã wa za mo, 're ihâimana mono zéb u hã. Tane nherẽ, niwamhã we apâ te te ĩma sina isiri da hã, mare di za.

24 Tawamhã Davi, timro Bate-Seba hã ma tô pawapto, iwẽ na si pẽ'ẽ nomro da. Iré hâimana mono wamhã, ma tô duré i'ra hã tãma podo. Tawamhã Saloma na ma tô sisi, Davi hã. Tawamhã 'Re ihâimana u'âsi mono, 'watébrémi te te 're sawi pese mono wa, 25 ma tô tizadawa 'mahârâ'wa Natãhã ma ti'ru, Zedidia^a na te te sisi da.

26 Taha ré, Zoabi, 'rinho'u Raba na isisi, Amo na ti'ai wa'õtõ nho'õmo ãma hã ma tô i'wapé na hã te te ãma uzusi. Tawamhã 'ri nho'õmo ãma te te i'ai'utézéb u pesere, 27 ma tô romreme 'wapéi'wa norĩ, ãne romreme ré satõrĩ za'ra, Davihi u:

— Wa hã, Raba 'ri nho'u te sahui wamhã, wa tô duré si'utõrĩ wab da, â ubumrozé hã tiwi sõwada za'ra. 28 Tahawa, ma'ãpé ate dasi'wapéi 'manharĩ'wa norĩ si'mairẽme hã ãhã na 'rã'õtõ, a hã 'rinho'u âri da hã, sahu da. Wa hã te ĩsima wẽ õ di, ĩ'mahârâ za'ẽne, 're ihâimana mono da hã, te ãma i'ai'utézém na hã.

29 Tawamhã Davi tite dasi'wapéi'wa norĩ te te 'rã'õtõ wa, Raba u duré morĩ wamhã, ma tô 'rinho'u te te sahui wamhã, duré ãma ai'uté.

30 Romhâibarĩ Moroti na isisi ãma, amonita norĩ, 're iwata za'ra mono nhopre pire pibuzé hã, 34 na. Danhoprezé hã ẽtẽ waipo pré uptabi, oru 'manharĩ. Duré ẽtẽ waipo, ãma ihâiba, ma tô Davi hã waze, tinhoprezém na te te sima sẽrẽ da. Tawamhã marĩ iwa'âbâ za'ẽtẽ mono hã ma tô duré tidu, Raba hawimhã. 31 Tawamhã Davi, 'ri nho'õmo 're, a'uwẽ 're ihâimana za'ra mono norĩ te te 're iromhuri za'ra mono zéb da hã, ma tô wede'ézém na romhuri hã tãma pisutu za'ra, hâtâra 'rãpo na hã, duré hâtâra na hã, duré ti'ai u'ẽtẽ zebre na te te 're iromhuri za'ra mono zéb da hã. Tawamhã tô õne Amo na ti'ai wa'õtõ nho'õmo ãma uburé 'ri nho'u 're ihâimana za'ra mono norĩ te te ãma 're iromhuri za'ra mono zéb da hã aiwapsi ma tô tãma pisutu za'ra. Taha pari, Davi norĩ, tite dasi'wapéi 'manharĩ'wa norĩ me, ma tô Zeruzalẽ u hã apâ ai'aba'ré.