2 Tawamhã Davi hã nimahã bâtâ na hâiwahâ u suru na sõtõ pari, oto utu wamhã, ma tô tinhimiromhurizé 'ri nhisi hâpâ wa'waibaba 're mo, hâimo. Tô ta hawi ma tô tame pi'õ iwẽ uptabi hã si'upte ré 'madâ. 3 Tawamhã ma tô dama ti'ru, pi'õ hã ni'wa hã zô, da te dasiwi upsibi me da. Tahawa, ma tô tãma wasu'u za'ra ni, Eri'ãhã 'ra, Bate-Seba na isisi na hã, hitita Uriasihi mro na hã. 4 Tawamhã Davi, ma tô tite romreme 'wapéi'wa hã satõrĩ za'ra, sô si'aba'ré da. Te te itẽme siwi saprõni wamhã, ma tô Davi hã ãma panomro. (Taha õ ré, Bate-Seba ma tô tisihâiba upsõ hã sima 'rãsutu, pi'õi hâzé ãma hâimana pari hâiba wẽ da, tô ãma 're isi'upsõ za'ra mono zéb zarina.) Taha pari ma tô tinhorõwa u hã apâ mo. 5 Taha pari tiwasã na siwaihu'u wa, ma tô Davihi ma romreme hã tãma tisõ, da te tãma 'maiwasu'u da.

6 Tahawa, Davi, Zoabihi ma, ma ãne romreme hã tãma tisõ:

— Urias, hitita hã we ĩtẽme satõrĩ.

Tawamhã Zoabi ma tô itẽme satõ. 7 Urias oto itẽme wisi wamhã, ma tô Davi hã sadanha, Zoabi hã tite dasi'wapéi 'manharĩ'wa norĩ me hã niha dasi'wapé na hâimana za'ra zô. 8 Taha pari te Uriasihi ma tinha ãne:

— A'â asõrõwa u aimorĩ, suru na aiwa'utu da.

Tawamhã Urias hã ma tô oto watobro. Ihawi watobro wi, Davi hã ma tô dama ti'ru, isõprubzé hã isõrõwa u da te tãma âri da. 9 Tane nherẽ, Urias tinhorõwa u hã morĩ õ di. 'Râwi ma tô nhono, apito nhorõwa 'ridawa nho'õmo na 'ri u 're idanhisisi mono zéb ãma apito ma, rob'madâ'â'wa norĩ siré. 10 Davi, Urias 'ri tẽme imorĩ'õ na te te waihu'u wamhã, ma tô ãne sadanha:

— Rom na aihâimana hâ pari, we oto apâ i'aiwisizéb 'remhã, e marĩ wa, asõrõwa u hã aimorĩ õ di.

11 Urias, ma te ãma tãma wa'rã ãne:

— Izaraéu te, duré Zuda te aibâ norĩ me, te romhâ na tihâimana za'ra, dasi'wapé nho're na hã. Duré 'Re ihâimana u'âsi mono te, wedehâ're hã te isiré tihâimana za'ra. Duré ĩnhib'ihâ'a Zoabi hã, duré ite dasi'wapéi 'manharĩ'wa norĩ hã te te sima i'ri nhoré za'ra zéb ãma te tihâimana za'ra, rom nho'a ãma. E niha ãne nherẽ, wa za bété mo 'ri tẽmemhã, ĩsa da, duré te simizâri da hã, duré ĩmro ré ĩnhotõ da hã. Uburé marĩ tô iwazéb zahi nhisi na hã wa aima ropisutu, niwamhã ãne hã te i'manharĩ da hã, waihu'u õ di!

12 Tawamhã Davi te ãne tãma tinha:

— Tane ze te bâ, bâtâ 'rãsutu u a'â ãme aihâimana. Apâ awẽ aimorĩ da hã wa za aima rob'ru.

Tahawa, Urias tô taha bâtâ na hã ma tô Zeruzalẽ ãmamhã a'â nhamra. 13 Davi barana ime sa da, ma tô waptẽ. Ime sai wamhã, ma tô 'rãsiwamnarĩ na hâimana da hã marĩ na 'rãiwamna. Ãne nherẽ, Urias hã tô duré morĩ õ di, tinhorõwa u, taha mara na hã. Tisisuwazém na te te sima iwaptâ ãmap si ma tô duré nhono, rob'madâ'â'wa norĩ nhimiwaptâ ãma.

14 Awẽm na hã ma tô Davi romnhihâtâ, Urias te te i'âri da hã, Zoabihi ma. 15 Ãne ma tô Davi ãma romnhihâtâ: “Urias hã ma'ãpé sãrĩ danhowa, isi'wapéi'wa norĩ itete nho'õmo. Taha parimhã isiti aihâiba zarõtõ, da te u'a da, duré dâ'â da.”

16 Tahawa, Zoabi norĩ 'rinho'u te te oto siwi uirĩ wamhã, ma tô Uriasihi ma hã ti'ru, isitob'ru norĩ isiptete na tãma iwaihu'u pese niwĩ hâimana da hã. 17 Isitob'ru norĩ, Zoabihi te isiptete norĩ te te 'wapé za'ra da, 'ri nho'õmo hawi oto sô wairébé wamhã, ma tô siwi uprosi, ni'wam norĩ Davihi te da'madâ'â'wa norĩ hã. Tahawa, Uriasihi zama ma tô duré oto wĩrĩ ni.

18 Tawamhã Zoabi, ma tô Davihi ma romreme hã tãma tisõ, dasi'wapé na hã. 19 Ãne romreme 'wapéi'wai ma hã te tãma tinha:

— Uburé apito ma dasi'wapé na rowasu'u parimhã, 20 ãté te za asada sahi wa, asadanha, ãne: “E marĩ da, ma tô a norĩ wawa hã 'ri nho'õmo tẽmemhã 'râwi aihutu 'wa, õ norĩ 'wapé za'ra wa'aba da hã. 'Ri 'wawi wa'ra 'rãihâ hawi õ norĩ ti'i na te te i'asimrimi za'ra wa'aba zém na hã e asina waihu'u za'ra wa'aba ã bâ. 21 E niha a norĩ wa'wa hã ãma rosa'rata za'ra wa'aba õ di, duréihã Abimelequi, Zerubezetihi 'ra da te iwĩrĩzém na hã. 'Ri nho'u Tebe na isisi ãma, 'ri 'wawi wa'ra 'rãihâ nhisi hawi, pi'õ ẽtẽ tomhâpâ zapodo isisiwi te te ime na ma tô ta hã tiwĩ. E niha ãne nherẽ, ma tô 'ri 'wawi wa'ra 'rãihâ tẽme, a norĩ wa'wa 'râwimhã aihutu 'wa.” Ãne na apito te te asadanharĩ wamhã, ãma sada'âbâ za ãne: “Urias ate dama ipire zama hã ma tô wĩrĩ ni, hitita hã.”

22 Tawamhã romreme 'wapéi'wa oto morĩ wamhã, ma tô Davihi ma rowasu'u, Zoabi te te tãma i'ruzéb zarina. 23 Ãne romreme 'wapéi'wa te tãma rowasu'u:

— Wanhitob'ru norĩ, wanhipai u isiptete uptabi za'ra hã ma tô 'ri nho'õmo hawi wairé, romnho'a ãma te te iwa'wapé za'ra da hã. Tane nherẽ, wa norĩ hã wa tô sada aptete za'ra ni, apâ wa te wano'õ mono da hã 'ri nho'õmo tẽme 'ridawa nho'õmo na 're idanhisisi mono zéb u. 24 Tahawa, ti'i na 'ri 'wawi wa'ra 'rãihâ nhisi hawi te te wahâ za'ra wa, ma tô ni'wam norĩ ate dama ipire norĩ hã simro ni. Duré ate dama ipire Uriasihi zama hã ma tô dame dârâ, hitita hã.

25 Davi hã romreme 'wapéi'wai ma, ma te ãne ãma wa'rã asa:

— Ma'ãpé Zoabi, asimirowasu'u na hã pẽ'ẽ to na. Duré hâtâ'â ãna hâimana da, tãma rowasu'u na. E marĩ wa. Dasi'wapéi 're, ni'wa tidâ'âzé te te sina iwaihu'u dai õ wa. Tahawa, duré tãma rowasu'u na, 'ri nho'õmo ãma te te ãma i'ai'utézéb u siptete na te te tô a'wapé da hã.

26 Bate-Seba, imro, da te iwĩrĩ na te te waihu'u wamhã, ma tô ãma aiwa'õ. 27 Rosa'rata zé na ihâimana mono na ãma ronomro parip si i'amo aba zém na, ma tô Davi hã dama ti'ru, isimiromhurizéb u da te dasiwi itẽme saprõni da. Tahawa, ma tô oto imro na hã tãma tihâiba. Tahawa, ma tô oto iwa aiwabzu, Davi hã. Tane nherẽ, Uburé Danhib'apito ma tô wẽ'õ, Davi te te i'manharĩzé hã.