— Wa hã Hanuhu ma, wa za ĩwẽ na si tãma 're ĩhâimana, imama Na'asi iwẽ na ĩma 're ihâimana mono ne.

Tahawa, ma tô dama romreme 'wapéi'wa hã itẽmemhã 'mazatõrĩ za'ra, Hanuhu ma, tinhimizawizé te te tãma hâi'ré da hã. Tane nherẽ, romreme 'wapéi'wa norĩ, 'ri nho'u Raba na isisi u sihutu wamhã, 3 ma tô amonita norĩ te, dama ipire norĩ hã tinhib'apito ma nharĩ za'ra, ãne:

— E ma tô irosa'ra, aimama te te 're iwazé mono zéb zarina, Davi aibâ norĩ we te te isatõrĩ za'ra zém na hã, tinhimizawizé te te aima hâi'ré da hã. Mare di. Taré te te we wapsãi'a za'ra mono da hã, ma tô we satõrĩ za'ra, 'ri nho'u te te siwi waihu'u wa, duré te te siwi prub da hã.

4 Tawamhã Hanu, Davihi te, rowasu'u 'wapéi'wa norĩ hã ma tô waibu. Te te waibui wamhã, ma tô i'u'rata amo niwĩp si watasu pari za'ra. Ma duré isãna hi zahâpâmhã i'uza hã tiwi hânhihâri za'ra. Taha pari, ma tô si'aba'ré da hã, duré oto satõrĩ za'ra. 5 Davi, ãne hã te te waihu'u wamhã, ma tô duré romreme 'wapéi'wa norĩ ihâiba amo aimawi hã satõrĩ za'ra, te te isõpẽtẽ za'ra da hã. E marĩ wa. Tãma rowazéb uptabi za'ra wa, õ norĩ ma hã. Davi hã timreme ma tô tãma sõmri za'ra, Zerico ãma a'â si'ubumro da, iwatasu apâ tãma pa za'ra wapsi, duré apâ hã itẽme te te sina siri za'ra da.

6 Amonita norĩ nhimi'manharĩzéb zarina ma tô Davihi nhiti'ruzé hã sisisiwimhã sa'wari za'ra. Tahawa, ma tô siriu norĩ dasi'wapéi 'manharĩ'wa 'ri nho'u Bete-Reobi ãma, duré 'rinho'u Zoba na isisi ãma 20 miu na ihâiba za'ra na hã awaibu. Ma'aca ãma apito, ma tô duré ti'â. Tame aibâ norĩ 're ihâimana za'ra mono norĩ zama, ma tô duré miu na ihâiba za'ra na awaibu. Duré 'rinho'u Tobi na isisi ãma hã, ma tô duré 12 miu na ihâiba za'ra na aibâ norĩ hã awaibu. 7 Davi hã ãne te te waihu'u wamhã, ma tô Zoabi hã satõ, Izaraéu nhihudu norĩ uburé dasi'wapéi 'manharĩ'wa norĩ isi'aba'réi pese si ré, te te da'wapé za'ra da. 8 Amonita norĩ wairébé wamhã, ma tô Raba dazasizéb ãma simire sina sô tihâimana za'ra, si'wapé za'ra da hã. Taha ré, Zoba hawi, Reobe hawi siriu norĩ, Tobi hawi, duré Ma'aca hawimhã aibâ norĩ ma tô ta norĩ zama simire sina sô tihâimana za'ra, romnho'a ãma.

9 Zoabi hã isitob'ru norĩ isõ're hawi, duré ibabarãi hawi za te te i'wapé za'ra na hã ma tô waihu'u siro. Tahawa, Izaraéu nhihudu norĩ dasi'wapéi 'manharĩ'wa isi'aba'réi pese norĩ hã ma tô pisutu za'ra. Taha pari, ma tô siriu norĩ nho're uwaibaba sada sõré, te te i'wapé za'ra da hã. 10 Tawamhã dasi'wapéi 'manharĩ'wa isi'mairẽme norĩ hã ma tô tisisãnawã Abisaihi ma sa'ré za'ra, amonita norĩ nho're uwaibaba, te te sõré da. 11 Zoabi hã te Abisaihi ma hã tinha ãne:

— Siriu norĩ te te ĩ'ãma i'ai'uté za'ra na a hã 'madâ'â za'ra wamhã, we ĩtẽme aimorĩ za ĩpawaptob da. Duré amonita norĩ te te ai'ãma i'ai'uté za'ra na, wa hã te 'madâ'â za'ra wamhã, wa za ãma atẽme hã mo, te aipawaptob da. 12 Sada asib'ru na! Wanhiptete na wa te a'wapé na, wate a'uwẽ norĩ zawi te hã, duré 'ri nho'õmo norĩ, 'Re ihâimana u'âsi mono te ma hã. Uburé Danhib'apito te te sima iwẽzéb zarina, marĩ te te i'manharĩ da si, iwẽ hã.

13 Tawamhã Zoabi norĩ, tite dasi'wapéi'wa norĩ me te te sahu za'ra da, te te oto sina tété za'ra wamhã, ma tô siriu norĩ hã tãma simani. 14 Amonita norĩ, siriu isisa'rei mono na te te 'madâ'â za'ra wamhã, te duré Abisaihi ma hã sisa're. Ma tô apâ 'ri nho'õmo u hã asisi. Tahawa, Zoabi te te 'wapé zazâri za'ra wa, ma tô Zeruzalẽ u hã apâ oto mo.

15 Siriu norĩ, Izaraéu nhihudu norĩ te te ãma i'ai'uté za'ra zé te te sina waihu'u za'ra wamhã, ma tô duré uburé apâ dasi'wapéi'wa norĩ hã sina ubumro. 16 Tawamhã apito Hadadeze, siriu norĩ bâtâ pusizém niwĩ â Eufrati na isisi pa zara niwĩ ihâimana za'ra norĩ zô ma tô tihârâ za'ra. Tahawa, ma tô oto ai'aba'ré, Herã u hã. Tawamhã Sobaque, Hadadezehe ma dasi'wapéi 'manharĩ'wa norĩ 'madâ'â'wa, ma tô isõwab za'ra hã mo. 17 Davi ãne hã te te waihu'u wamhã, ma tô tite dasi'wapéi 'manharĩ'wa Izaraéu nhihudu norĩ hã 'rã'õtõ. Te te 'rã'õtõ wamhã, Zodã pa â na te te saprĩ za'ra wi, ma tô te te ropãrĩ za'ra mono sina, sisõré pese na hã oto ai'aba'ré, Herã u. Tawamhã tame siriu norĩ, Izaraéu nhihudu norĩ nho'remhã te oto sada aimasa. Tawamhã dasi'wapé hã ma tô oto tinhana'rata. 18 Ma tô Izaraéu nhihudu norĩ, siriu norĩ duré te te wano'õ. Davi norĩ, tite dasi'wapéi 'manharĩ'wa norĩ me hã ma tô dasi'wapéi 'manharĩ'wa, dasi'wapézéb da wedewara zapore 'mapraba'wa norĩ hã siwi uprosi, 700 na. 40 miu na ma tô duré siwi uprosi, awaru na dasi'wapéi 'manharĩ'wa, siriu norĩ hã. Duré Sobaque, dasi'wapéi 'manharĩ'wa norĩ 'madâ'â'wa te te siwi i'u'a hã ma tô a'ubuni wi dârâ, tame dasi'wapézéb ãmam haré. 19 Hadadezehe nhimi'madâ apito norĩ hã, Izaraéu nhihudu norĩ te te ãma i'ai'uté za'ra zém na te te waihu'u za'ra wa, ma tô oto siwi waptẽ, rob'é'é da. Tahawa, ma tô oto isimi'madâ'â nhiptete zahâpâmhã 're hâimana za'ra. Tahawa siriu norĩ hã pahi za'ra di apâ, amonita norĩ te te duré ipawaptob za'ra da hã.