— E Sauhu hawi a'uwẽ hã te zahadu dâ'â ãna 're 'maihâimana. 'Re 'maihâimana mono wamhã, wa hã wa tô ĩsima wẽ, marĩ iwẽ te tãma i'manharĩ da hã, Zonataha hâiba u'âbâmhã.

2 Tawamhã Sauhu hawi a'uwẽ, Ziba na isisi romhuri'wa hã te 're hâimana. Taha ma, ma tô ni'wa hã tinha, Davihi u morĩ da, te te tãma rowasu'u da.

Tawamhã apito te sadanha ãne:

— E a hã, Ziba.

— Ĩhe, tô wa hã. Ma'ãpé, marĩ hã tô waihu'u! — Ãne ma te ãma sada'â asa.

3 Apito te duré ãne sadanha:

— E zahadu te Sauhu hawi a'uwẽ 're 'maihâimana, za marĩ iwẽ te tãma i'manharĩ da hã, 'Re ihâimana u'âsi mono ma, wa hã te iropisutuzéb zarina.

Tawamhã Ziba ma te ãne ãma tãma wa'rã asa hã:

— Ĩhe, iré hã. Zonataha 'ra, te 're hâimana, imorĩ'õ, ipara si'uiwa na ipara'õtõ uwa hã.

4 — E mame te tihâiba. — Ãne te apito hã ãma sadanha.

Ziba hã te ãne tãma wasu'u:

— Õme Ami'éhé 'ra Maquihi nhorõwa ãma te tihâiba, 'rinho'u Lo-Deba na isisi ãma.

5 Tawamhã apito Davi ma tô sô da'mazatõ, sô da'maimorĩ da hã.

6 Tawamhã Zonataha 'ra Mefibozéti, Sauhu nhihudu oto itẽme wisi wamhã, ma tô Davihi nho'remhã hi'rãtitõ nhamra, ti'ubu na ti'ai u te te ãma roptop sina, tãma iwazéb zarina. Tahawa, te Davi hã tãma tinha, ãne:

— Mefibozéti!

— Ma'ãpé, marĩ hã tô waihu'u! — Ãne ma te asa hã sada'â.

7 — Aipahi tõ!

Davi hã te duré ãne tãma tinha:

— Wa hã wa za Zonata aimama u'âbâmhã, iwẽ na hã aima 're ĩhâimana. Tahawa wa za duré uburé ai'rada Sauhu ma, ti'a, aré 're ihâimana mono hã apâ aima tisõ. Te za duré ĩsiré 're asai u'âsi mo oto.

8 Mefibozéti hã ma tô duré apâ tãma aiwẽ'ẽ zahu. Ma duré ãne ãma tãma wa'rã asa:

— E 'wa hã wa hã bété asib'a'uwẽ, wapsã idâ'â ne nherẽ, ĩ'ãmamhã ihâtâ'â da hã.

9 Tawamhã apito hã, Ziba Sauhu ma romhuri'wa zô hârâ wamhã, te ãne tãma tinha:

— Wa hã, asib'ihâ'a nhihudu Mefibozétihi ma, uburé Sauhu te, marĩ aré tãma 're ihâimana za'ra mono hã, duré i'ra norĩ ma zama, marĩ aré tãma 're ihâimana za'ra mono hã wa tô apâ tãma sõmri za'ra. 10 A hã, ai'ra norĩ hã, duré aima romhuri'wa norĩ me, te za ti'a na te te sada 're rob'ma'wamarĩ rob're da hã, asib'ihâ'a Sauhu nhihudu nhorõwa 'rem norĩ ma hã. Te za duré te te tãma 're tehâri za'ra, õ norĩ ma isa za'ra hã tãma 're hâimana za'ra mono da. Tane nherẽ, Mefibozéti te za õne u'â duré ĩme hã 're sai u'âsi, 're ĩsimasisi mono zéb ãmamhã. (Tawamhã Ziba hã 15 na i'ra, duré tãma romhuri'wa norĩ hã 20 na ihâiba za'ra hã.)

11 Tawamhã ma ãma sada'â ãne asa:

— Wa za uburé tô 'manha za, a hã i'ruzéb zarina.

Mefibozéti hã ma tô apito siré hã oto 're sa, i'ra uptabi ne.

12 Mefibozétihi 'ra, zahadu iprédu pese õ iré hã, Mica na isisi hã. Tawamhã uburé Zibaha nhorõwa 'rem norĩ hã ma tô oto Mefibozétihi ma romhuri'wa na hã tãma 're hâimana za'ra. 13 Ãne Mefibozéti, imorĩ'õ, ipara si'uiwa na ipara'õtõ uwa hã ma tô Zeruzalẽ ãma 're hâimana. Ma tô duré apito siré bâtâ sidâpâsi 're isai mono zéb ãma hã, ime 're sa.