2 Moabita norĩ ãmab zama ma tô duré ai'uté. Ti'ai wa, simi'wara da, ma tô tãma 'ru za'ra. Taha pari ma tô wedenhorõ na pibu za'ra. Tawamhã maparane wedenhorõ na te te ipibu za'ra norĩ hã ma tô simro. Misi wedenhorõ na te te ipibu za'ra norĩ si ma tô rẽme za'ra, hâiba ré. Ãne wa, ma tô moabita norĩ hã pawa'âbâ ãna Davihi ma romhuri'wa na oto 're hâimana za'ra. Te duré tite rob'uiprazé hã te te tãma 're arĩ za'ra.

3 Tawamhã Davi, Zoba ãma apito Hadadeze, Reobehe 'ra hã panho'u Eufrati 'rata ti'a hã apâ te te duré âri õ'umnhasite, ma tô irési na hã ãma sõzâ. 4 Davi hã, Hadadezehe te, awaru na dasi'wapéi 'manharĩ'wa norĩ hã ma tô tiwi sitob za'ra 1.700 na, duré 20 miu na dasi'wapéi 'manharĩ'wa norĩ para na isiré te te ida'wapé za'ra norĩ hã. Awaru, wedewara zapore sari'wa norĩ hã ma tô duré tiwi azarãnhihâ, morĩ tõ da. Tawamhã 100 na wedewara zapore ihâimana za'ra sari'wa da si, ma tô awaru hã rẽme za'ra. 5 Damascu hawi siriu norĩ hã Hadadeze te te siwi pawaptob da hã ma tô itẽme ai'aba'ré. Tane nherẽ, Davi, ta norĩ hã 22 miu na ihâiba za'ra hã ma tô tiwi sõ'rebzâ. 6 Taha pari, ma tô õne haré dasi'wapéi 'manharĩ'wa norĩ õmemhã 'ri hã siwi sõré, õ norĩ nhipti'ai 'remhã. Tawamhã õ norĩ hã Davihi nhimiroti zahâpâ 're hâimana za'ra mono wa, te oto rowa'âbâ arĩ hã te te tãma 're sõmri za'ra. Tawamhã duré Uburé Danhib'apito, Davihi ma hã ma tô tisõ, uburé daza'rui mono bâ 're ine mono sidâpâsi te te da'ãma i'ai'uté mono zéb da hã. 7 Davi hã ma tô waibu duré, Hadadezehe te, dama ipire norĩ te, ibaihâ zapoto 'manharĩ na isimapazé hã ẽtẽ waipo pré oru 'manharĩ na hã. Tawamhã Zeruzalẽ u hã ma tô tidu. 8 'Ri nho'u Beta na isisi norĩ te, Berota'i na isisi me hã ma tô duré ẽtẽ topsata 'manharĩ brõzi iwa'âbâ za'ẽtẽ zama hã tidu, Hadadeze nhimi'madâ'â na aré 're ihâimana zahuré mono ãma hã.

9 Tawamhã apito To'i, 'rinho'u Hamati na isisi te hã ma tô Davi, Hadadezehe te uburé dasi'wapéi 'manharĩ'wa norĩ ãma te te i'ai'utézé hã waihu'u. 10 Tahawa, ma tô ti'ra Zurã hã satõ, Davihi tẽmemhã, te te sawi da, duré Hadadezehe ãma te te i'ai'utézém na hã te te ãma uze da. To'i hã, Hadadeze ma tô aré te te 're 'wapéi u'âsi. Tawamhã Zurã, Davihi ma, ẽtẽ waipo prã prata 'manharĩ norĩ hã, ẽtẽ waipo pré oru 'manharĩ norĩ hã, duré ẽtẽ topsada brõzi 'manharĩ norĩ me hã ma tô simisutu hã tãma duri za'ra. 11 Tawamhã apito Davi, ma tô Uburé Danhib'apito ma, pisutu zahi za'ra, aimawi a'uwẽ norĩ ãma te te ai'uté za'ra wa, isi'uwazi waipo prã prata norĩ, ẽtẽ waipo pré oru norĩ me, te te dawi iwaibu norĩ zu. 12 Te te iwaibu za'ra edomita norĩ wi hã, moabita norĩ wi hã, amonita norĩ wi hã, filisteu norĩ wi hã, duré amalequita norĩ wi hã. Tawamhã tô õne Hadadezehe wi te te tiwi iwaibu za'ra ma hã, ma tô duré rob'manha.

13 Davihi wasu'u za'ẽne hã ma tô duré oto sina hâimo pese, ẽtẽ nhi'riti siwa'aba wa, Rowarĩrĩzém na romharé nhisi ãma, edomita norĩ 18 miu na te te simroi pari, apâ wisi wamhã, tihâimanazéb u hã. 14 Edõ 're, ti'ai wa'õtõ mono bâ ma tô dasi'wapéi 'manharĩ'wa norĩ hã te te sõré, awã 'ri 're. Tawamhã ma tô uburé edomita norĩ hã isimiroti nhiptete zahâpâ 're hâimana za'ra. Uburé Danhib'apito hã ma tô Davihi ma, nimomo daza'rui mono bâ dazô 're ne mono sidâpâsi, te te da'ãma 're i'ai'uté mono zéb da hã te te tãma 're sõmri.

15 Uburé Izaraéu ti'ai 're, Davi, apito na dama 're hâimana mono wamhã, ma tô i'uwaibaba na si sena na õne u'â te te 're i'a'upari mono zé hã aiwapsi te te dama 're ab'manharĩ, tô isarina si. 16 Zoabi, ina Zeru'iza, ma tô dasi'wapéi 'manharĩ'wa norĩ wada'uri'wa na hã 're hâimana. Duré Zosafa, Airudihi 'ra hã apito zadawa para te da'uwati'wa na dama 're hâimana. 17 Zadoqui Aitubihi 'ra, Aimereti, Abiataha 'ra me hã te sasedoti na hã dama 're hâimana zahuré. Seraia hã te duré apito mreme nhihâtâ'wa na hã 're hâimana. 18 Benaia Zoiadaha 'ra, ma tô quereti norĩ nhib'apito na hã duré pereti norĩ nhib'apito na hã 're hâimana. Tawamhã Davihi 'ra norĩ hã te sasedoti na si we 're hâimana za'ra.