— Ma'ãpé we ĩ'ãma hã rosa'rata! Ãhãta wa ãme wa hã 're ĩhâimana, wede nhinihã na 'ri 'manharĩ 're. Tane nherẽ, te 'Re ihâimana u'âsi mono te, wedehâ're hã romhâ 'manharĩ na 'ri itoire 're, 're sa.

3 Natã, ma te ãma sada'â ãne:

— Uburé marĩ asima iwẽ na hã 're ab'manharĩ mono. E marĩ wa. Uburé Danhib'apito te asiré hã 're hâimana.

4 Tane nherẽ, tô taha mara na, ma tô Uburé Danhib'apito, Natãhã ma hã tinha ãne:

5 — Ma'ãpé aimorĩ, ĩnhib'a'uwẽ Davihi u, wa hã ãne te aima iwaihu'uzéb zarina, tãma ĩzadawa wasu'u da: “E a hã 'ri ĩma 'manharĩ da bâ, iwa 're ĩnhamra mono da hã. 6 Wa hã Izaraéu nhihudu norĩ, Ezitu hawi te we isani za'ra hawim haré, ã bâtâ 'remhã 'ri 'rãihâ 'remhã 're ĩhâimana mono õ di. 'Re ĩne mono ré hã wa tô romhâ 'manharĩ na 'ri 'rep si 're ĩhâimana. 7 Izaraéu nhihudu norĩ me 're ĩne mono sidâpâsi, niwamhã wa hã dama i'rãnho'õmo norĩ, te ipisutu za'ra hã te 'mazadanharĩ õ di, wede nhinihã na te te ĩma i'ri za'ra õ zém na hã.” 8 Ãhã wa tô, ĩnhib'a'uwẽ Davihi ma hã tãma ĩzadawa wasu'u na, wa hã, Uburé Danhib'apito Ĩwaihu'u pese uptabi, ãne te tãma inharĩzém na hã: “Wa hã pone'ẽrebâ a'ubuni wi 're i'a'madâ'â mono na 're iromhuri mono zém hawimhã wa tô aiwaze, ĩnhib'a'uwẽ Izaraéu nhihudu norĩ ma asi'i'rãnho'õmo da hã. 9 Wa hã nimomo uburé daza'rui mono bâ 're ane mono sidâpâsi, wa tô asiré õne u'â 're ĩhâimana. Tawamhã duré taha zarina uburé asitob'ru norĩ, a hã 're a'wapéi mono da, 're azasãmri mono sidâpâsi, wa tô uburé asitob'ru norĩ wi hã ai'ãma hã 're ĩsisaprĩ. Tawamhã wa za aima 'manha, dama asa'rese za'ẽtẽ da hã, ti'ai ãma uburé dama ipire norĩ dama sa'rese za'ẽtẽ na 're ihâimana za'ra mono ne. 10-11 Ĩnhib'a'uwẽ Izaraéu nhihudu norĩ ma, wa tô ro hã pisutu. Wa tô duré tame sõré, rowẽ u'âsi 're ihâimana za'ra mono zéb da, ãma hã. Ã hã ti'ai u isisisi hawim haré te a'uwẽ isipãrĩ ze norĩ hã sô 're pra u'âsi, te te 're sahui mono da hã. Ãne hã duré 're iromhâimana zahu mono da hã, mare di za. Wa hã wa ropisutu aima hã ãne: Wa za uburé asitob'ru norĩ wi hã te 're asõ'reptu. Duré asihudu norĩ hã wa za te aima 're anhomri. 12 Nimahã na atâ'â wa, aihi'rata norĩ zababa, da te ai'ãma ti'ai wamhã, wa hã wa za ai'ra norĩ dama i'rãnho'u isiptete na 're 'maihâimana mono da hã duré 'maipisutu. 13 Ta hã te za 'ri 'rãihâ hã ĩma 'manha. Wa hã wa za isihudu norĩ ma hã i'rãnho'õmo na ãma 're hâimana u'âsi za'ra mono da hã te tãma 're ab'manharĩ. 14 Wa hã za imama. Õhõ za ĩ'ra. Õ hã te te 're upai mono wamhã, wa za te tãma 're rob'manharĩ, damama norĩ ti'ra ma, te te 're irob'manharĩ za'ra mono ne. 15 Tane nherẽ, niwamhã ĩnhimizawizé te tiwi iwazere da hã mare di za, a hã asi'apito da, Sauhu ma, te i'manharĩ ne hã. 16 Õne u'â te za asihudu norĩ hã aima 're hâimana za'ra. Duré i'rãnho'u ate hã aima 're hâimana u'âsi mono da, wa za pisutu. Duré niwamhã 're i'asãmra mono zé ipire hã isi'utõrĩ da hã mare di za.”

17 Natã hã ma tô Davihi ma uburé wasu'u, 'Re ihâimana u'âsi mono te te tãma ihâi'rézé hã.

18 Tawamhã Davi, romhâ 'manharĩ na 'ri u ma tô ãzé. Sébré wamhã, ma tô nhamra, Uburé Danhib'apito nho're. Ãne te tãma mre:

— Uburé Danhib'apito, ĩte 'Re ihâimana u'âsi mono, wa hã marĩ dai õ nherẽ, ma tô uburé marĩ ĩma 're i'ab'manharĩ wẽ mo. Duré i'ra norĩ zama za sadai õ nherẽ. 19 E duré iwẽ hã ĩma 're i'anhomri mono hã suru bâ, te ãhã na awa'awi na romnhowam na ĩnhihudu norĩ ma hã asimiropisudu hã duré i'manha. Uburé Danhib'apito, ĩte 'Re ihâimana u'âsi mono, e niha ti'ai ãma a'uwẽ nherẽ, ma tô tãma isa'ré, te te ãne 'madâ'â da hã. 20 E marĩ na te aima inharĩ na sahu da bâ. Aima hã ĩwaihu'u pese di, tô wa hã asib'a'uwẽ wa. 21 Ãne hã ate 're i'aihâimana mono zé, asima 're iwẽ mono zéb zarina, ma tô a hã ĩma i'manha. Tahawa ma tô sa'ẽtẽ na marĩ te awaihu'u da hã ĩma isa'ré. 22 E niha i'asa'ẽtẽ uptabi, Uburé Danhib'apito, wate 'Re ihâimana u'âsi mono! Ni'wa hã asine hã ihâimana waihu'u'õ. Duré ai'ãma damreme, wa te 're iwapari za'ra mono hã tô, u aiwétési, 'Re ihâimana u'âsi mono hã. Duré aimawi asine hã 're da'maihâimana mono õ di. 23 E mahã a'uwẽ, te ti'ai ãma hã 're hâimana za'ra, asib'a'uwẽ Izaraéu norĩ ne hã. Ta norĩ si ma tô 're i'anho'reptui mo, asib'a'uwẽ si 're hâimana za'ra mono da. A hã ma tô asa'rese za'ẽtẽ zé hã dama ihâi'ré. Ma tô duré asib'a'uwẽ norĩ ma, marĩ isa'ẽne iwẽ uptabi hã tãma 're isõmri za'ra mo. Ezitu hawi asib'a'uwẽ awazere wamhã, ma tô duré aimawi a'uwẽ norĩ hã duré waihu'u pese newa, ihâiba'õ ãma 're iwata za'ra mono norĩ zama tãma iwazere za'ra, asib'a'uwẽ te te 're isasãmri za'ra mono zéb zarina. 24 Uburé Danhib'apito, a hã ma tô ate Izaraéu nhihudu norĩ ma hã tãma i'manharĩ za'ra, ate u'âsi na õne u'â aima 're hâimana za'ra mono da hã, duré ite na oto 'Re ihâimana u'âsi mono na tãma 're aihâimana za'ra mono da hã.

25 — Uburé Danhib'apito, wate 'Re ihâimana u'âsi mono, ma'ãpé ãhã na awa'awi na hã ĩ'ãma iropisudu i'manharĩ hã, duré ĩ'ra norĩ ãma i'manharĩ hã ãma uwaimrami pese, inharĩzéb zarina, za iromhâimanazéb da hã. 26 Ãne wamhã, aiwasu'u za'ẽtẽ u'âsi di za. Tahawa, te za õne u'â da te 're nharĩ za'ra, ãne: “Uburé Danhib'apito Iwaihu'u pe, Izaraéu nhihudu norĩ te, 'Re ihâimana u'âsi mono.” A hã te za duré ĩnhihudu norĩ 'remhã apito na sima 're ihâimana u'âsi za'ra mono da hã i'manha. 27 Uburé Danhib'apito, aiwaihu'u pese uptabi, Izaraéu nhihudu norĩ te, 'Re ihâimana u'âsi mono! Ĩnhiptede te ĩma tihâiba, ãma aima ĩmreme, te i'manharĩzéb da hã. E marĩ wa. Ma tô ĩma ihâi'ré, asib'a'uwẽ ma hã, a hã za i'manharĩzém na hã ĩnhihudu norĩ, sima 're isi'apito za'ra mono da hã romhutu'õmhã.

28 — Uburé Danhib'apito, a hã 'Re ihâimana u'âsi mono. Aimreme hã, tô sena uptabi. Ã hã asimiropisudu iwẽ hã ma tô ĩma i'manha. 29 Ãhã na wa za ãma aiwi rowaptẽ. Ĩnhihudu norĩ hã ma'ãpé iwẽ na hã pawaptob za'ra na, õne u'â atõmo nho'a 're ihâimana za'ra mono zém na te te ãma uzusi u'âsi za'ra mono da. Ãne na, a hã Uburé Danhib'apito, ĩte 'Re ihâimana u'âsi mono ma tô iropisu. Tahawa õne u'â, ĩnhihudu norĩ ãmamhã asimipawaptobzé 're ihâimana u'âsi mono da si iwẽ hã.