'Re ihâimana u'âsi mono te, wedehâ're, Zeruzalẽ u, da te dasiwi i'ârizé wasu'u
6
Davi hã, Izaraéu ãma dasi'wapéi 'manharĩ'wa iwẽ isiptete uptabi norĩ hã 30 miu na ma tô duré 'rã'õtõ. 2 'Rinho'u Ba'ara na isisi u ma tô te te oto simro, Zuda ãmamhã, ropoto zaripi papo wa'wa tisimasisizém na Uburé Danhib'apito iwaihu'u pe isãmra nhisi ãma ihâimana nhimiroti ré wedehâ're, te te siwi âri da. 3-4 'Re ihâimana u'âsi mono te, wedehâ're, wedewara zapore itéb 're, te te siwi isẽrẽ hã ma tô ẽtẽ ãma Abinadabihi nhorõwa 're isa mono ãma siwi si'ra. Abinadabihi 'ra norĩ, Uza, Ai'ôhô me ma tô wedewara zapore, wedehâ're te te i'âri ré hã 'mapraba zahuré. Ai'ô hã te isõwamhã mo. 5 Davi norĩ, uburé Izaraéu nhihudu norĩ me hã ma tô ai'wapsisi. Ma tô duré Uburé Danhib'apito ãma siptete za'ra sina tinho're za'ra na ãma tiwata za'ra. Tawamhã tinhipta'a za'ra zém na ma tô ãma ropta'a za'ra, isõrõ ta'a na hã, tãbõrĩ na hã, i'ra'rasi na hã, duré dasazém ne 'manharĩ baihâire na hã.6 Tawamhã Nacõhõ te, amnho tomhâi wazuzéb u oto sihutu wamhã, ma tô powawẽ norĩ hã tizaipraba zahuré. Tawamhã Uza ma tô tinhib'rada hã sô wẽ, 'Re ihâimana u'âsi mono te, wedehâ're te te sapari da. 7 Uburé Danhib'apito, Uzaha zada hã ma tô tizahi, te te wazéb õ wa. Tahawa ma tô tiwĩ. Tame ma tô Uza hã dârâ, wedehâ're zababa. 8 Davi ma tô ab'rui pese. E marĩ wa. Uburé Danhib'apito isahizéb zarina, Uzaha ma, te te rob'manharĩ wa. Tahawa ta hawim haré ã bâtâ na zama, romnhisi hã Periz-Uzaa na.
9 Tawamhã Davi, Uburé Danhib'apito ma, pahi wa, te ãne 'râwi sima tinha:
— E niha wa za ãhã na awa'awi na hã ĩsiré ti'â, 'Re ihâimana u'âsi mono te, wedehâ're hã.
10 Ãne wa, ma tô Davi hã sima rowairébé, wedehâ're te te siré âri tõ da, tite 'ri nho'õmo u hã. Ãne wa, te te aré âri da nherẽ, te te ãma saprĩ wa, ma tô Obedi-Edõhõ nhorõwa u si ti'â, Gati na 'ri nho'õmo u. 11 'Re ihâimana u'âsi mono te, wedehâ're ãma, a'amo tame si'ubdatõ ãma si'utõrĩ wa, ma tô Uburé Danhib'apito, Obedi-Edõhõ ma, iwẽ hã te te 're anhomri, i'ra norĩ ma zama isabâdâ hã.
12 Apito Davi ma tô waihu'u, wedehâ're u'âbâ, Uburé Danhib'apito, Obedi-Edõhõ sisãnawã norĩ ma, duré uburé marĩ tãma ihâimana za'ra ma, iwẽ hã te te i'apisutu mono zém na hã. Tahawa, Obedi-Edõhõ nhorõwa hawimhã ma tô waze, wedehâ're hã. Duré dato isa'ẽne ihâimanazém na ma tô oto ti'â, Davihi te 'ri nho'õmo u hã. 13 Tawamhã aibâ norĩ, wedehâ're te te siwi duri ré, 6 na ti'ai wa'õtõ pibuzém na tipara te te isõré ãma, ma tô Davi, 'Re ihâimana u'âsi mono ma, powawẽ iba'õmo na duré powawẽ zapu ihâipese na hã ãma tãma tinhoprub zahuré. 14 Davi hã sasedoti 'Re ihâimana u'âsi mono ma, da'ãma romhuri'wa norĩ si'uzazé ipano pa te te sima isẽrẽ ré, ma tô Uburé Danhib'apito ãma tinho're na wata sina hã ai'rẽ. 15 Ãne Davi norĩ, uburé Izaraéu nhihudu norĩ me, ma tô rowẽ te, sadawa'a'a mono sina, wedehâ're hã Zeruzalẽ u hã siwi ti'â, danhimnhihârâzé hã te te hãsi mono sina.
16 'Re ihâimana u'âsi mono te, wedehâ're oto 'ri nho'õmo u sébré wamhã, Sauhu 'ra Micau hã zanela 'ri zadazâri hawimhã ma tô 'madâ, apito Davi, si'rẽne mono ré, duré sarõtõ mono ré, Uburé Danhib'apito ãma wata mono sina. Tahawa, ma tô tipẽ'ẽ na hã ãma wẽ'õ pese.
17 Wedehâ're te te siwi i'âri hã ma tô siwi tisã isabzéb ãma, Davi romhâ 'manharĩ na 'ri te te sô i'manharĩ ãma hã. Tawamhã ma tô Uburé Danhib'apito ma hã tinhopru, abaze, da te izata pese za'ra mono na, duré danhoprubzé, ãma irowẽ za'ẽtẽ na zama. 18 Tawamhã abaze norĩ zata na duré danhoprubzé ãma irowẽ za'ẽtẽ na tinhoprubzé te te 'manharĩ pari, ma tô Davi, Uburé Danhib'apito Iwaihu'u pese nhisi na da'ahâ norĩ hã iwẽ na pawaptob za'ra. 19 Taha pari ma tô aibâ norĩ ma hâiba mono bâ, duré pi'õ norĩ ma hâiba mono bâ i'u'ẽtẽ wapu hã te te tãma sõmri, duré romnhi wa'õno isebre hã, duré uva 'ru i'rãi 'ré hã. Taha parimhã ma tô uburé tinhorõwa u hã oto te te ropé.
20 Davi hã ti'ra norĩ me oto hâimana da, tinhorõwa u apâ morĩ wamhã, ma tô Sauhu 'ra Micau hã watobro, te te sõpẽtẽ da hã. Tahawa, te ãne tãma tinha:
— E niha iwẽre, Izaraéu nhihudu norĩ te, apito te te irob'manharĩ hã! Isiséb'õre ne hã ma tô tihâiba hã tite romhuri'wa norĩ sipi'õi ma hã tãma hâi'ré za'ra.
21 Tawamhã Davi ma te ãne ãma tãma wa'rã:
— Wa hã Uburé Danhib'apito nho're wa tô ĩsi'rẽne, aimama nhibrob're te te ĩpisutu nho'remhã, aimama hawi a'uwẽ norĩ nhipai u zama. Uburé Izaraéu nhihudu norĩ ma, isib'a'uwẽ norĩ ma ĩ'rãnho'õmo na tãma 're ĩhâimana za'ra mono da hã, ma tô ĩpisutu. Wa za duré Uburé Danhib'apito ãma ĩwata na ĩsi'rẽne na hã ãma uzusi. 22 Wa za duré tãma ĩsina ti'awi pese, isõ'remhã. A hã ma tô ĩ'ãma hã irosa'ra, wa hã tô, marĩ dai õ na hã. Tane nherẽ, õ hã pi'õ norĩ ãma ĩma inharĩ za'ra norĩ hã te za siwi ĩwasu'u wẽ.
23 Ãne wa, Micau Sauhu 'ra hã niwamhã 'ra õ di.