Davi hã da te ipisutuzé, si'apito da, Izaraéu ma, duré Zuda ma
5
Tawamhã Uburé Izaraéu nhihudu wa'õtõ norĩ hã, Davi te te siwi sõpẽtẽ da, Hebrõ u si'aba'réi wamhã, ma tô ãne tãma nharĩ za'ra:— Wa norĩ hã tô õ hã a'uwẽ, a hã, wasiwapru. 2 Nimahã na hã Sau hã wanhib'apito na wama 're hâimana za'ra mono ré, ma tô Izaraéu nhihudu norĩ ma dasi'wapéi'wa wada'uri'wa na hã aihâiba. Tawamhã Uburé Danhib'apito hã ma tô duré tinha, a hã isib'a'uwẽ norĩ wada'uri'wa na, duré ta norĩ ma i'rãnho'õmo na 're aihâimana mono da.
3 Ãne ma tô uburé Izaraéu nhihudu norĩ ma i'rãnho'õmo norĩ, Hebrõ u si'aba'réi wamhã, Davi hã siwi sõpẽtẽ. Tawamhã Davi, Uburé Danhib'apito nho'a te te ãma sina saze za'ra wa, ma tô oto siwi 'rãti'i, Izaraéu nhihudu norĩ ma si'apito da hã. 4 30 na ãma iwahub ãma ma tô si'apito. Ma tô duré 40 na ãma tiwahu, dama i'rãnho'õmo na 're hâimana mono ré hã. 5 Zuda na danhipti'ai wamri 're, Hebrõ ãma si'i'rãnho'õmo wamhã, ma tô 7 na wahu aiwa ãma isipo'o na hã te te 're da'a'madâ'â. Taha pari ma tô duré 33 na ãma iwahub ãma Zeruzalẽ ãma Izaraéu na danhipti'ai wamri 're duré Zuda ti'ai 're, te te 're da'a'madâ'â, simisutu na.
6 Tawamhã Apito Davi hã, tite dasi'wapéi 'manharĩ'wa norĩ me Zeruzalẽ u hã ma tô ai'aba'ré, te te siwi rési da hã. A'uwẽ zebuzeu na iwamri 'ri nho'õmo wa, 're ihâimana za'ra mono norĩ hã ma tô ãne rosa'rata za'ra, Davi hã za te te ãma i'ai'uté waihu'u za'ra õ na hã. Tahawa ma tô ãne tãma nharĩ za'ra:
— Ã wamhã, niwamhã a hã we i'asébré da hã mare uptabi di. Duré asébré da wamhã, itob'a norĩ si, imorĩ'õ norĩ me hã te aré asada tihâimana za'ra, 'ri 'wawi isimapa za'ra da hã.
7 Tane nherẽ, Davi hã ma tô Siãa 'rinho'u isiptede hã ti'â. Ãne wa, ma tô “Davihi te 'ri nho'õmo” na hã oto da te 're dasiwi 're wamri.
8 Davi hã tô taha bâtâ na, te tite dasi'wapéi 'manharĩ'wa norĩ ma nharĩ za'ra ãne:
— Ni'wa hã ĩnhitob'ru norĩ, zebuzeu itob'a norĩ imorĩ'õ norĩ me te te simro da, te te sima wẽ wamhã, te za â prabazéb da ab're, ti'ai 'rowi bâdâdi na ãzé, za te te 'wapé za'ra da.
Tahawa, te ãne da te dasima 're nharĩ u'âsi za'ra: “Itob'a norĩ, imorĩ'õ norĩ me hã, 'Re ihâimana u'âsi mono nhorõwa 'ri 'rãihâ u 're isisisi mono da hã mare di za.”
9 Davi hã ma tô 'ri nho'u isiptete ãma 're hâimana. Tahawa, ma tô “Davihi te 'ri nho'õmo na hã” oto sima sisi. Tahawa imana wawimhã ma tô 'ri 'wawi wa'ra 'rãihâ hã duré wahutu, bâtâ pusizém niwĩ ti'a za'wari 're ihâimana mono hawi, danhib'ihâ'a nhimiromhurizé 'ri 'rãihâ u. 10 Tawamhã Davi ma tô sidâpâsi 're siptete mono. E marĩ wa. 'Re ihâimana u'âsi mono danhipai u isiptete uptabi hã ime 're hâimana mono wa.
11 'Rinho'u Tiru ãma apito Hirã hã ma tô romreme 'wapéi'wa norĩ, Davihi u satõrĩ za'ra. Wede nhinihã wa'õno hã ma duré tãma sõmri za'ra. Wedepo'o na duré ẽtẽ za'ra na 'ri 'manharĩ'wa norĩ zama ma duré itẽmemhã satõrĩ za'ra. Tawamhã ma tô Davihi nhimiromhurizéb da, 'ri 'rãihâ hã ãma tãma 'manharĩ za'ra. 12 Ãne ma tô Davi hã sina waihu'u, Izaraéu nhihudu norĩ ma i'rãnho'õmo na 're ihâimana mono zéb da, Uburé Danhib'apito te te tãma ipisutuzém na hã, duré tinhib'a'uwẽ te te 're isawi pese za'ra mono zéb zarina, siptete u'âsi na i'rãnho'õmo na 're hâimana mono da, 'Re ihâimana u'âsi mono te te 're pawaptob u'âsi mono da.
13 Hebrõ hawi watobro parimhã, ma tô Zeruzalẽ ãma timro prã norĩ da, duré timro da hã Davi sima awaibu. Tawamhã ta norĩ zé're hawimhã ma tô i'ra si'aibâ hã duré i'ra sipi'õ hã tãma tipoto za'ra. 14 Davihi 'ra norĩ, Zeruzalẽ ãma ipoto za'ra norĩ nhisi hã ãne: Samua, Sobabi, Natã, Saloma, 15 Iba, Erisua, Nefegue, Zapia, 16 Elisama, Eriada, duré Eripéréti.
Filisteu norĩ ãma, Davi te te i'ai'utézé wasu'u
17 Filisteu norĩ, Davi, Izaraéu ãma dama i'rãnho'õmo na 're hâimana mono da, te te siwi i'rãti'izé te te waihu'u za'ra wamhã, ma tô ite dasi'wapéi 'manharĩ'wa norĩ hã wairé, te te siwi âri da. Ãne hã Davi te te waihu'u wamhã, ma tô ẽtẽ za'ra na 'ri nhiptete u hã mo. 18 Oto ẽtẽ nhi'riti wa Refa'ĩ na romharé nhisi u filisteu norĩ sihutu wamhã, ma tô tame tihâimana za'ra. 19 Tahawa, Davi hã te Uburé Danhib'apito hã sadanha ãne:
— E wa za filisteu norĩ hã a'wapé. E te za duré a hã ĩma isõ, te ãma i'ai'uté za'ra zé hã.
— Wa za aima tisõ za, ãma i'ai'uté za'ra zé hã. Tahawa ma'ãpé aimorĩ! — Ãne te Uburé Danhib'apito asa tãma tinha.
20 Tawamhã Davi, Baau-Perazĩ na romnhisi u morĩ wamhã, ma tô filisteu norĩ ãma tame ai'uté za'ra. Tahawa te ãne tinha:
— 'Re i'âpusi mono hã uburé pese marĩ te te 're i'marõpãrĩ za'ra mono ne, ma tô Uburé Danhib'apito, ĩnhitob'ru norĩ da, ti'a 'ridawa za'ra, si'utõrĩ da hã.
Tahawa, ã hã romnhisi hã Baau-Perazĩb na. 21 Tame filisteu norĩ ma tô tite romhâibarĩ hã rẽme za'ra. Tawamhã Davi norĩ, tite dasi'wapéi 'manharĩ'wa norĩ me te te waibui wamhã, ma tô oto siré 'wasa. 22 Tawamhã filisteu norĩ, Refa'ĩ na romharé nhisi u si'aba'réi wamhã, ma tô duré iwa apâ tihâimana za'ra.
23 Davi hã, Uburé Danhib'apito te te duré sadanharĩ zahu wamhã, ma tô ãne duré ãma sada'â:
— Isõ're hawi a'wapéi õ di za. Apâ ai'a're nhi'oto, ibabarãi hawi sô aiwatobro za'ra da, amorera nho're hawi asiwa'rãmi a'wapé da. 24 Amorera na wede nhisi hawi da te ropãrĩ za'ra mono sina, dasisõré pese na idasi'aba'rézé dapara 'ru hã wapari wamhã, asimire sina aihâimana za, a'wapé da hã. E marĩ wa. Asõwa wa hã ĩmorĩzé te wasu'u, filisteu norĩ te, dasi'wapéi 'manharĩ'wa norĩ na, za te ãma i'ai'uté za'ra zéb da hã.
25 Tawamhã Davi, Uburé Danhib'apito te te tãma i'ruzé te te 'manharĩ wamhã, ma tô filisteu norĩ ãma hã ai'uté za'ra, Zeba hawi, õ Geze u hã.