Ibozéti, da te iwĩrĩzé wasu'u
4
Tawamhã Sauhu 'ra Ibozéti hã, Abine, Hebrõ ãma da te iwĩrĩ na te te waihu'u wamhã, ma tô oto isiptede hã tiwi ai'utõ. Ma duré uburé Izaraéu nhihudu norĩ hã tipẽ'ẽwara pese za'ra. 2 Ibozétihi te, dasi'wapéi 'manharĩ'wa norĩ nhib'ihâ'a maparane, tinhitob'ru norĩ nhipti'ai wa'õtõ ãma waptu na dasi'wapé na dawada'uri'wa norĩ hã ma tô tihâimana zahuré. Isisi zahuré hã Ba'ana na, duré Recabi na, Rimohõ 'ra zahuré hã, 'rinho'u Be'erote Bẽzamihĩ nhihudu norĩ te ãma hã. (E marĩ wa, Be'erote, Bẽzamihĩ nhihudu norĩ nhipti'a na hã duré 're hâimana mono wa. 3 Duréihã Be'erote ãma a'uwẽ 're ihâimana za'ra mono norĩ hã Gita'ĩ na 'ri nho'õmo nhisi u isisa'rei mono hã, õmem haré te ãhã na zama dame 're hâimana za'ra oto, dasiré'õ na a'uwẽ na hã.)4 Sau norĩ, Zonataha me hã, Zezereu ãma dâ'â zahuré wamhã, Mefibozéti, Zonataha 'ra ãma hã, 5 na ãma iwahub ré. Sau norĩ, Zonataha me idâ'â zahuré wasu'u hã wisi wamhã, pi'õ, Mefibozéti te te 're i'madâ'â mono hã ma tô sa'ra. Ma tô duré iré hã aimani. Tane nherẽ, waptu na sa'ẽtẽ iré watobro wa, ma tô tiwi waptãrã. Tahawa, ma timorĩ 'rãtẽ, Mefibozéti hã.
5 Tawamhã Recabi norĩ Ba'anahã me, Ibozétihi nhorõwa u ma tô tineb zahuré. Neb zahuré wamhã, ma tô aimasisi, sai pari wa'utu ré. 6 Pi'õ, 'ridawa ãma amnho trigu te te i'a'upõrĩ hã, ma tô nhono, tãma aptâ'â wa. Taha ré, Recabi norĩ, Ba'anahã me ari'iwi pese ma tô tizasi zahuré, 'ri para u hã. 7 Zasi zahuré wamhã, Ibozéti nhimiwaptâ u sõtõ pese ré, tame ma tô duré wĩrĩ zahuré. Tawamhã ma tô 'rã nhizâri zahuré. Te te 'rã nhizâri zahuré wamhã, ma tô siré âri zahuré. Tahawa, ma tô mara bâre tineb zahuré, ẽtẽ nhi'riti na Zodã pa u romharé inomro na. 8 Hebrõ u oto simasisi zahuré wamhã, ma tô Ibozétihi 'rã, te te tãma hâi'ré zahuré wa, apito Davihi ma wasu'u zahuré ãne:
— Ãhãta Ibozétihi 'rã wa'uihâ, asitob'ru Sau aré te te aiwĩrĩ da, te te sima i'aiwẽ 'ra 'rã. Ãhã na ma tô Uburé Danhib'apito hã ai'ruiwa'â, ĩte apito a hã, Sauhu na, duré isihudu norĩ na zama.
9-11 Tawamhã Davi asa ma te ãne ãma sada'âbâ zahuré:
— Rowasu'u'wa hã wa hã wa tô ârire, 'rinho'u Zicradi u te te ĩnhopẽtẽ da, ĩtẽme imorĩ hã. Tahawa wa tô duré ti'ru, da te wĩrĩ da hã. E marĩ wa. Õ hã rowasu'u iwẽ te te ĩma wasu'u da newa, ma tô rosa'rata. Tane nherẽ, ma tô ĩma wasu'u, Sauhu dâ'âzé hã. Tahawa, ãhã na awa'awi na hã wa za ropisutu Uburé Danhib'apito idâ'â'õ nhisi na, uburé marĩ ipipa wi te te 're ĩnho'reptui mono ma hã, ãne: Wa hã wa za aibâ daza'réi'wa norĩ ma hã rowasu'u'wai ma, te irob'manharĩzém nhipai u pese tãma rob'manharĩ zahuré, aibâ iwẽ tinhorõwa ãma sõtõ ré, te te iwĩrĩ zahuré ma hã! Tahawa awa'awi na hã wa za 'ruiwa'â, a norĩ wa'wa wĩrĩ aba wa, Ibozéti hã. Duré tahawa, wa za ti'ai hawimhã ai'ãma wamroi wa'wa.
12 Tawamhã Davi, tite dasi'wapéi 'manharĩ'wa norĩ ma, ma tô tãma 'ru za'ra, Recabi norĩ, Ba'anahã me te te siwi pãrĩ da hã. Taha pari duré te te siwi sib'rata nhihâri zahuré wamhã, duré te te siwi para nhihâri zahuré wamhã, ma tô Hebrõ 'rata â nhowada ãma hâiwi siwi sasõmri za'ra. Duré tawamhã Ibozétihi 'rã te te siwi âri wamhã, ma tô Abinehe ãma da te iti'azéb 're, ab're wa, Hebrõ ãma hã ãma siwi ti'a.