2 Davihi 'ra norĩ, 'rinho'u Hebrõ na isisi ãma ma tô tipoto za'ra ã norĩ hã: Ipoto'rada hã Amno, 'ri nho'u Zezereu ãma 're ihâimana mono Aino'ãhã zé're hawimhã. 3 Maparane ãma hã Quiriabe, Abigaiuhu 'ra, aré Nabau na imro nhisi imrotõ, 'ri nho'u Carmelu na isisi ãma hã 're ihâimana mono. Duré si'ubdatõ ãma hã Absarõ, Ma'acaha 'ra, Gesu na romnhisi ãma apito Tauma'ihi 'ra. 4 Maparane si'uiwa na ãma hã Adonia, Hagitihi 'ra. Duré 5 ãma hã Sefatia, Abita'uhu 'ra. 5 Imropâ ãma hã Itre'ã, Eglaha 'ra, Davihi mrozé 'remhã. Ã norĩ hã ma tô uburé Hebrõ ãma hã tipoto za'ra.

6 Sauhu niwĩ a'uwẽ norĩ hã, Davihi niwĩ a'uwẽ norĩ me hã zahadu we 're si'wapéi hâ za'ra mono ré hã, ma tô Abine hã Sauhu niwĩ a'uwẽ ihâimana za'ra norĩ hã we 're ihâimana nhiptete mono zé te te sina 're hâimo.

7 Sauhu ma, te imro prã hã tãma 're hâimana, Risipa na isisi, Ai'asihi 'ra hã. Nimahã bâtâ na Ibozéti hã ma tô Abine hã sadanha ãne:

— E marĩ wa, ma tô ĩmama mro prãi ré hã ano.

8 Ãne te te sadanharĩ wa, ma tô Abine hã sada tizahi pese. Tahawa te ãne tãma tinha:

— E ma tô ĩ'ãma irosa'ra, wa hã dahâiba za'réi wasété 'wa na hã. E ma tô duré ĩ'ãma irosa'ra, Zudaha nhihudu norĩ niwĩ 're ĩhâimana mono da, te isaprĩ na hã.

Te duré zahadu tãma tinha ãne:

— Sau aimama niwĩ 're ĩhâimana mono zém hawim haré, wa tô sena na õne u'â 're ĩhâimana, asisãnawã norĩ niwĩmhã, duré asiwaihu'u za'ra wa'aba niwĩmhã. Duré Davi hã te te ai'ãma ai'uté tõ da, wa tô te 're aipawapto, iwẽ na hã. Tane nherẽ, ãhã na ma tô ã hã pi'õi ré ĩnomro u'âbâ hã ĩwẽ'õ. 9-10 Uburé Danhib'apito, Davihi ma, ma tô ropisutu, Sauhu te i'rãnho'õmo mono na te te 're ida'a'madâ'â mono zé, isihudu norĩ hawimhã te te wazere da, Izaraéu ti'ai 're ma, duré Zuda ti'ai 're ma zama ãma si'apito da, uburé ropâ ti'ai wa'õtõ nho'õmo 're, te te ãma 're da'a'madâ'â mono da, Davi hã. Ãne hã wa hã te 'manharĩ õ wamhã, 'Re ihâimana u'âsi mono te te tô ĩwĩrĩre za!

11 Ibozéti hã, Abinehe ma pahi wa, niha hã te te tãma nharĩ waihu'u õ di.

12 Davi hã, Hebrõ ãma hâimana ré, ma tô Abine ãne romreme ré hã dama rowasu'u 'wapéi'wa norĩ hã 'mazatõrĩ za'ra:

— E 'wa, ã hã ti'ai 'remhã te za dama si'i'rãnho'u. Ma'ãpé wasisazezé hã wa te wasima 'manharĩ. Tawamhã wa hã wa za Izaraéu nhihudu norĩ hã uburé te ãma simro za, asiniwĩ ihâimana za'ra da hã.

13 Davi hã ma te ãne ãma tãma wa'rã:

— Wẽ di tô. Wasisazezé hã wa za tô wasima 'manharĩ ni. Tane nherẽ, te duré asa marĩ ĩma i'manharĩ da hã tihâiba. Ĩzabu da, we aimorĩ da wamhã, taré oto Sauhu 'ra Micauhu ãna we aimorĩ õ di za.

14 Tawamhã Davi, nima norĩ rowasu'u 'wapéi'wa ma tô satõrĩ za'ra, Ibozétihi ma, ãne na te te tãma 'mairowasu'u za'ra da hã:

— Ĩmro Micau hã ma'ãpé we apâ ĩma hâiba nhomri. E marĩ wa. Wa hã 100 na filisteu norĩ nhihâiwata nhihârizém na hã wa tô wa'âbâ siro, õhõ ãma ĩmrozéb da hã.

15 Tawamhã Ibozéti ma tô imro Pautiéu, Laisihi 'ra hawi da te wazere da hã dama ti'ru, Micau hã. 16 Tane nherẽ, Pautiéu siwa'õi mono sina ma tô bâdâdi na isarina hã mo, 'rinho'u Baurĩ na isisi tẽme isihutuzéb u. Tawamhã Abine ma te ãne tãma waihu'u:

— Apâ aimorĩ, 'ri u hã.

Tahawa, ma tô apâ hã oto mo.

17 Tawamhã Abine, Izaraéu nhihudu norĩ ma, i'rãnho'õmo norĩ u hã ma tô mo. Ãne te tãma nharĩ za'ra:

— A norĩ wa'wa hã te duréi Davi hã Izaraéu nhihudu norĩ ma, aima si'apito za'ra wa'aba da hã asima iwẽ za'ra wa'wa. 18 Ãhã na awa'awi hã ma tô oto bâdâ hã iwa waptãrã, niha ãma irob'manharĩzéb da hã. Ma'ãpé, Uburé Danhib'apito ãne te te inharĩzém na hã ãma aipo're pu'u za'ra wa'aba: “Ĩma romhuri'wa Davi hã wa za pisutu, ĩnhib'a'uwẽ Izaraéu nhihudu norĩ te te anho'reptu da hã, filisteu norĩ wi, duré uburé isitob'ru norĩ hâiba amo norĩ wi hã.”

19 Abine hã, a'uwẽ Bẽzamihĩ nhihudu norĩ ma zama, ma tô tãma nharĩ za'ra. Taha pari Hebrõ u te mo, Davihi ma, te te tãma rowasu'u da hã, Bẽzamihĩ nhihudu norĩ, duré Izaraéu nhihudu norĩ te te irowairébé za'ra zém na hã.

20 Tawamhã Abine hã 20 na aibâ norĩ ré, Davi te te sõpẽtẽ da, Hebrõ u hã ma tô mo. Morĩ wamhã, ma tô dato isa'ẽne, Davi hã tãma 'manharĩ za'ra. 21 Abine te Davihi ma tinha, ãne:

— Ãhã na awa'awi na hã wa za mo, uburé Izaraéu ti'ai 're a'uwẽ ãma, te aima ãma ai'uté za'ra da. Ãhã wamhã, te za sima aiwẽ za'ra, tãma asi'apito za'ra da hã. Tawamhã te za a hã uburé ti'ai wa'õtõ nho'õmo 're, 're i'a'madâ'â mono da hã asi'i'rãnho'u.

Davi hã, Abine morĩ da hã ma tô tãma sa'ré. Tahawa ma tô rowẽ na oto mo.

22 Suru na ronomro pari, Zoabi, Davihi te dasi'wapéi 'manharĩ'wai 'madâ'â'wa norĩ me ma tô apâ aihutu, waptu na te te ida'wapé za'ra hawimhã. Ta hawimhã ma tô marĩ hã ahâ uptabi na apâ 'wasa, tinhitob'ru norĩ wi te te iwaibu za'ra hã. Tane nherẽ, Abine, Davihi siré Hebrõ ãmamhã oto hâimana õ di. E marĩ wa. Rowẽ na imorĩzéb da hã bâdâ te te tãma sõmri wa. 23 Tawamhã Zoabi tite dasi'wapéi 'manharĩ'wa norĩ ré wisi wamhã, ma tô Abine hã tãma wasu'u za'ra ni, apito Davihi ma, te te tãma nharĩ da imorĩ na hã, duré bâdâ te te tãma sõmri wẽ te, apâ rowẽ sina sima iwẽ na imorĩ na hã. 24 Tahawa, Zoabi, apito ma, te te tãma nharĩ da hã ma tô itẽme mo. Ãne te tãma tinha:

— E marĩ ma tô i'manha. Abine ãwa wei morĩ wamhã, a hã marĩ tãma 'manharĩ ãna apâ morĩ da hã, ma tô bâdâ tãma isõ. 25 Taré aiwi hâimana nhipese na sima'uri sina ma tô wei mo, za nimomo i'aimorĩzé, ro taré te te iwaihu'u da si, duré uburé marĩ 're i'ab'manharĩ mono zé, te te ĩwaihu'u da si. Ãne hã aima waihu'u pese di!

26 Zoabi hã, Davihi 'rata isabzém hawi watobro wi, ma tô romreme 'wapéi'wa norĩ ma hã 'mairob'ru, Abinehe zarina 'masi'aba'ré da hã. Tawamhã Siraha te â zô ab're ãma te te siwi sasãmri wa, ma tô apâ ãma siwi siri. Tane nherẽ, Davi ãne hã te te waihu'u õ di. 27 Abine, Hebrõ u oto wisi wamhã, ma tô Zoabi hã 'ri nho'õmo te, 'ridawa za'ẽtẽ niwĩ saprõ, hâiba pisutu te te tãma robzanhamri da newa. Tame ma tô idi'i wimhã wa'ré. Ãne ma tô Abine Nehe 'ra hã wĩrĩ ni, Zoabihi sisãnawã Azaéu te te wĩrĩ 'ru te. 28 Davi, ãne hã te te waihu'u wamhã, te tinha:

— Uburé Danhib'apito ma hã waihu'u pese di, wa hã te ãma ĩ'upa õ zém na hã duré ĩnhib'a'uwẽ norĩ te te ãma i'upa za'ra õ zém na hã, Abine da te dasiwi iwĩrĩzém na. 29 Zoabi hã i'upai'wai wa, idâ'â wapru isisiwimhã sisa'warire, duré uburé isõrõwa 're, 're ihâimana za'ra mono norĩ nhisiwib zama! Duré tô isihudu we 're hâimana za'ra mono sidâpâsi, ihâiba 'remhã dahâirutu hâire izubru ré hã we ãma 're hâimana u'âsi za'rare mono, ihâiba za'ra na hã. Duré da'wa're hâirutu nhiminhi uprosi pe, isimimrami pe hã we tô ãma 're hâimana u'âsi za'rare mono. Duré pi'õ nhimiromhurizép si tãma i'manharĩ waihu'u pesere si we te te 're 'ma'wamarĩ za'rare mono! Duré sib'ézé 'wa pa na we si'utõrĩre mono, isihudu sidâpâsi. Duré ĩsa za'ra zéb zô, tiwi sô 're ro'wanhi'riti u'âsi za'rare mono!

30 Ãne ma tô Zoabi, tisisãnawã Abisaihi me, Abine hã wĩrĩ zahuré. E marĩ wa. Azaéu isisãnawã zahuré hã te te wĩrĩ wa, dasi'wapé Gibiã ãma hâimana siwaprã hã.

31 Tawamhã Davi, Zoabihi ma, duré ite dasi'wapéi 'manharĩ'wa norĩ ime ihâimana za'ra ma, ma tô tãma 'ru za'ra, ãne:

— Ma'ãpé, ai'uza hã hâiwazu za'ra wa'aba. Duré sa'u ihâiro na hã asima séme aba, Abinehe hâiba nhowa iré ai'ru'ru wa'aba mono da.

Apito Davi hã, te dahâiba hâi 'wapézéb zarina hã mo. 32 Tawamhã Hebrõ ãma ma tô Abinehe ãma hã dasiwi ti'a ni. Tame ma tô apito hã wawa 'rãihâ na ab're 'ratamhã aiwa'õ. Duré uburé a'uwẽ norĩ zama ma tô isine ãma aiwa'õ za'ra.

33 Tawamhã Davi, Abinehe ãma robzépatazém na ma tô tinho're ãne:

Tawamhã te duré apâ Abinehe ãmamhã ta'ru'ru ni.

35 A'uwẽ norĩ, taha bâdâ si'utõrĩ õ ré, Davihi ma, ma tô marĩ tãma 'ru pibu za'ra ni, te te 'rẽne da hã. Tane nherẽ, ma tô ropisudu hã 'manha ãne:

— 'Re ihâimana u'âsi mono hã te te ĩwĩrĩre za, wa hã ãhã bâdâ si'utõrĩ õ ré, marĩ te 'rẽne wamhã!

36 Ãne na da te wapari za'ra wamhã, ma tô dasiwi mreme wẽsãmri ni. Uburé apito te te 're i'ab'manharĩ mono zé hã te tô dasiwi da te 're wẽsãmri. 37 Ãne tô taha bâtâ na uburé apito Davihi nhib'a'uwẽ norĩ hã duré uburé Izaraéu ti'ai 're a'uwẽ norĩ hã Abine, da te iwĩrĩzém na, dame ihâimana õ na hã ma tô dasiwi waihu'u ni. 38 Tawamhã te ãne Davi hã tite dasi'wapéi 'manharĩ'wa norĩ 'madâ'â'wai ma hã tãma nharĩ za'ra:

— Ma'ãpé waihu'u za'ra wa'aba! Izaraéu ti'ai 're, dama i'rãnho'u isa'ẽne ma tô ã bâtâ na hã dârâ. 39 Wa hã, apito da, 'Re ihâimana u'âsi mono nhimipisutu nherẽ, ĩnhib'uware di, ãhã na hã. Zeru'izaha 'ra si'aibâ norĩ, ĩma hã isipãrĩ zei uptabi si hã! Uburé Danhib'apito, ã hã iwasété norĩ te te i'ahâri da si, ĩma iwẽ hã, tiwasédé te te i'manharĩ zahuré zéb zarina!