— E wa za mo, Zuda ti'ai ãma nimahã 'ri nho'õmo ma, ĩsi'ĩ'rãnho'õmo da hã.

— Ĩhe, te za aimo! — Ãne ma te Uburé Danhib'apito hã ãma sada'â.

Te duré tawamhã 'ri ahâ nhisi na ãma sadanha ãne:

— E ma hã tawamhã.

— Hebrõ! — Ãne ma te asa ãma sada'â.

2 Tawamhã Davi, ma tô oto mo, Hebrõ u. Morĩ wamhã, ma tô timro norĩ hã siré saprõni zahuré. Aino'ã, 'rinho'u Zezereu hawimhã, duré ihâiba amo Abigaiu, Nabauhu mro aré imrotõ 'rinho'u Carmelu hawimhã. 3 Davi hã tite dasi'wapéi 'manharĩ'wa norĩ zama te 'ra ré siré hã te te simro. Ta norĩ hã ma tô Hebrõhõ waptoma 're hâimana za'ra, 'ri nho'õmo mono na. 4 Tawamhã Zuda ãma aibâ norĩ hã ma tô Hebrõ u ai'aba'ré. Tame ma tô Davi i'rãnho'õmo na tãma 're ihâimana za'ra mono da hã siwi 'rãti'i.

Tawamhã Davi, Giliadi ti'a niwĩ 'rinho'u Zabesi na isisi ãma 're ihâimana za'ra mono norĩ, Sau ãma te te iti'a za'ra zé te te waihu'u wamhã, 5 ma tô nima norĩ aibâ hã itẽme satõrĩ za'ra, ãne na romreme ré:

— Uburé Danhib'apito iwẽ si te te aima 're pisutu za'ra wa'aba mono, asimizawi aba zéb zarina, wate apito na asiwi iti'a za'ra wa'aba zém na hã asiwi 'manharĩ wẽ wa'aba wa. 6 Wa ĩsima wẽ upta, Uburé Danhib'apito iwẽ na si aima 're hâimana za'ra wa'aba mono da si, duré sena na aima umnhasi za'ra wa'aba sina, aima 're hâimana za'ra wa'aba mono da! Asiwi i'manharĩ wẽ wa'aba zéb zarina, ĩzama hã wa za duré te aima 're 'manharĩ wẽ za'ra wa'wa. 7 Tahawa ãhã na hã asiptete za'ra wa'aba, duré asib'ru za'ra wa'aba! E marĩ wa. Asib'apito za'ra wa'wa Sau hã ma tô dârâ. Tahawa ma tô duré Zuda ãma a'uwẽ norĩ siwi ĩ'rãti'i, apito na tãma 're ĩhâimana za'ra mono da.

8 Taha ré, Nehe 'ra Abine, Sauhu te dasi'wapéi 'manharĩ'wa norĩ nhib'ihâ'a hã ma tô Sauhu 'ra Ibozétihi me siré aimani zahuré dawi, Zodã pa pazara u, Ma'ana'ĩ na romnhisi u. 9 Tame Abine hã ma tô Ibozétihi ma, apito na 're hâimana mono da hã, tãma 'manha, ã norĩ ma romnhisi ma hã: Giliadi, Asé, Zezereu, Efraĩ, duré Bẽzamihĩ ma zama. Tô uburé Izaraéu nhihudu norĩ ma, apito na 're hâimana mono da hã ma tô tãma 'manha. 10 Ibozéti 40 na ãma iwahub ãma ma tô Izaraéu nhihudu norĩ ma isi'i'rãnho'õmo na hã ãma sãna'rata. Maparane wahum na ma tô te te 're da'a'madâ'â. Tane nherẽ, Zudaha nhihudu norĩ hã Davihi si te te siwi 're umnhasi. 11 Davi hã ma tô Hebrõ ãma ta norĩ nhib'ihâ'a na 're hâimana, 7 wahu aiwa ãma isipo'o na.

12 Abine duré Ibozétihi te dasi'wapéi 'manharĩ 'wa 'madâ'â'wa norĩ me, ma tô Ma'ana'ĩ hawimhã 'rinho'u Gibiã u hã ai'aba'ré. 13 Tawamhã Zoabi, ina Zeru'iza, Davihi te dasi'wapéi 'manharĩ 'wa 'madâ'â'wa norĩ me, ma tô Gibiã ãma pu'u 'rata te te sõpẽtẽ za'ra da hã ai'aba'ré. Tame ma tô pu'u zaihâ si'uiwa na tihâimana zara Davi norĩ hã, duré Abine norĩ hã. 14 Tawamhã Abine, te Zoabihi ma tinha, ãne:

— Ma'ãpé nima norĩ wate iprédupté wanho're tinhi'wa na, si'wapé za'ra da hã wa te tãma 'manharĩ za'ra na.

— Wẽ di tô! — Ãne ma te Zoabi ãma sada'â.

15 Tawamhã Ibozétihi niwĩ Bẽzamihĩ nhihudu norĩ dasi'wapéi 'manharĩ'wa 12 na ihâimana za'ra hã ma tô Davihi te 'wapé za'ra, 12 na ihâiba za'ra hã aiwa. 16 Isi'wapé za'ra mono bâ ti'rã na siwaibui wamhã, ma tô ti'a're si'uiwa na sihâzu, sib'ézé 'wapa na. Ãne wa, ti'ai u siré rere'e wamhã, ma tô duré siré tidâ'â za'ra. Tahawa 'rinho'u Gibiã 'rata taha romnhisi hã ãne: “Itehudu, sib'ézé 'wapa na dasipãrĩzé.”

17 Tô taha bâtâ na ma tô dasi'wapé sena na itede hã watobro. Watobro wamhã, Davihi te dasi'wapéi 'manharĩ'wa norĩ hã ma tô Abinehe ãma, Izaraéu nhihudu norĩ me hã ãma ai'uté za'ra. 18 Zeru'izaha 'ra si'ubdatõ ihâiba norĩ, Abisai, Azaéu, Zoabi, te tame siré tihâimana za'ra. Azaéu hã isi'aba'réi pe rom na aihâ isi'aba'réi pese ne. 19 Ta hã te Abinehe zarina awa'awi u'âsi wara. 20 Tawamhã Abine, sibabarãi u te te 'madâ'â wa, ma tô ãne 'mahâ:

— Azaéu, e a hã.

— Ĩhe, wa hã! — Ãne ma te sada'â.

21 Abine te ãne tãma tinha:

— We ĩzarina hã aimorĩ tõ, asimizazâri! Ma'ãpé nimahã dasi'wapéi 'manharĩ'wa zarina si aiwara, isimarĩ hã tiwi asima 'ma'âri da.

Ãhã nherẽ, te Azaéu isarina si morĩ u'â. 22 Tawamhã Abine te duré tãma nharĩ zahu ãne:

— We ĩzarina hã aimorĩ u'âsi tõ, asimizazâri! Te we rosa'rata nhiptede hã asina ĩma isõmri mo, te i'aiwĩrĩzéb da hã! Taha parimhã e niha wa za Zoabi asisãnawã hã 'madâ za itõmo u, ĩtõmo na hã.

23 Tane nherẽ, Azaéu hã isarina timorĩ hã te te sazâri õ di. Tahawa, Abine isi'uwazi 'rã'wa na siwa'rãmimhã ma tô ãma simri, Azaéu hã. Tawamhã Azaéu di'i 're 'rã'wazéb ré wamhã, ma tô iba u 'rã'wa watobro. Tahawa dâ'â siromo ma tô ti'ai u hã waptãrã. Ma tô iwaptã'ãzéb u nasi isihutu norĩ hã i'rata 'mazahâri za'ra ãma.

24 Tane nherẽ, Zoabi norĩ Abisaihi me, ma tô Abinehe zarina timorĩ na hã uzusi zahuré. Tawamhã bâdâ sébré wi, ma tô aimasisi zahuré Ama na ẽtẽ nhisi u, 'rinho'u Gi'a na bâtâ pusizém niwĩ 're ihâimana mono u, bâdâdi na supara 'ré na si ro 're isa'wari mono nho'õmo wa'waibaba Gibiã niwĩmhã. 25 Bẽzamihĩ nhihudu norĩ dasi'wapéi 'manharĩ'wa hã Abinehe mana wawimhã duré apâ te te sina ubumroi wamhã, ma tô ẽtẽ nhisiwi hâimo hã tihâimana za'ra. 26 Tawamhã Abine, Zoabi te 'mahâ ãne:

— E wasi'wapé na, wa za õne u'â wa te ãma uzusi u'âsi za'ra. Ãne wamhã, romhâimanazé isé na si te za tirob'rãsutu. Wa norĩ hã asisãnawã za'ra wa'wa! E niwamhã tãma waihu'u za'ra ã bâ bété, ate dasi'wapéi 'manharĩ'wa norĩ ma, wazarina tisi'aba'rézé te te isahâri za'ra zéb da hã.

27 Zoabi ma te ãne ãma sada'â:

— Wa hã, 'Re ihâimana u'âsi mono idâ'â'õ nhisi na hã, wa ãne aima ropisutu. A hã tane ĩma nharĩ õ 'wa'âhã, te aré tô ĩte dasi'wapéi 'manharĩ'wa norĩ hã õne haré asarina za'ra wa'aba ai'aba'ré, awẽm na irowa'azéb u.

28 Tawamhã Zoabi ma tô hârâ, danhimnhihârâzé hã. Tahawa, ma tô uburé ite dasi'wapéi'wa norĩ, Izaraéu nhihudu norĩ zarina timorĩ hã sahâri za'ra. Duré dasi'wapé hã tahawa ma tô awa'awi 'mazazâ, te te ãma 'rãiwa'õmo za'ra ãna, timorĩ na.

29 Tô taha mara bâre, te Abine norĩ tite dasi'wapéi 'manharĩ'wa norĩ me hã Zodã pa wa'waibaba ẽtẽ nhi'ridi romharé inomro na si simisutu ropãrĩ sina sõré pese na ai'aba'ré. Tawamhã ma tô oto Zodã pa â na hã saprĩ za'ra. Tawamhã awẽm na mararé bâre si'aba'réi wamhã, ma tô oto Ma'ana'ĩ u hã aihutu. 30 Tawamhã Zoabi, Abinehe zarina timorĩ te te 'rãiwa'õmo õ wamhã, ma tô uburé tite dasi'wapéi 'manharĩ'wa norĩ hã oto 'rã'õtõ. Tahawa ma tô oto waihu'u, 19 na sô iro'wanhi'riti za'ra na hã, Azaéu zamai ãna hã. 31 Tane nherẽ, Davihi te dasi'wapéi 'manharĩ'wa norĩ hã ma tô Abinehe te norĩ Bẽzamihĩ nhihudu hã 360 na siwi uprosi. 32 Tawamhã Zoabi norĩ, tite dasi'wapéi 'manharĩ'wa norĩ me, Azaéu hâiba te te siwi âri wamhã, ma tô siwi tisẽ, Belẽ ãma isisãnawã norĩ te, ab're 're. Taha pari ma tô duré mara bâre sisarina te te ropãrĩ za'ra mono sina, sõré pese na ai'aba'ré. Si'aba'réi wamhã, awẽ wi ma tô oto aihutu, Hebrõ u hã.