2 Samuéu
Sau idâ'âzém na, Davi romreme te te iwaparizé wasu'u
1
Sau hã dâ'â parimhã, Davi, amalequita norĩ ãma te te i'ai'uté za'ra zém hawimhã, ma tô apâ hã oto mo. Tawamhã 'ri nho'u Zicradi ãma te maparane bâtâ na tihâiba. 2 Ãma awẽ wamhã, iprédupté, Sau norĩ te te sima i'ri nhorézém hawi imorĩ hã ma tô wi. Ãhã wana ré, robzei ãna sihâi'ré da hã ma tô ti'uza hã hâiwazu. Ma tô duré ti'rã nhisiwimhã ti'a hã ahi. Tawamhã Davi ihâimanazéb u oto itẽme wisi wamhã, ma tô hi'rãtitõ tãma nhamra. Ti'ubu na ti'ai u hã ma tô duré ropto, tãma iwazéb zarina. 3 Tawamhã Davi te sadanha ãne:— E ma hawi te we aimo.
— Wa hã, Izaraéu nhihudu norĩ te te sima i'ri nhoré za'ra zém hawimhã wa tô we dawi aimani! — Ãne ma te ãma sada'â.
4 Davi hã te ãne duré tãma tinha:
— Marĩ iwatobrozé hã ĩma wasu'u na!
Tahawa, te ãne ai'repudu hã tãma wasu'u oto:
— Wate dasi'wapéi 'manharĩ'wa norĩ hã ma tô dasi'wapéi hawimhã aimani za'ra. Ahâ uptabi na ma tô duré ai'utõ, wate aibâ norĩ hã! Sau norĩ zama, ti'ra Zonataha me ma tô tidâ'â zahuré.
5 — E niha ma tô merẽ Sau norĩ, Zonataha me idâ'â zahuré zé hã iwaihu. — Ãne te Davi hã sadanha.
6 Tawamhã ãne ai'repudu hã ma te duré ãma sada'â:
— Wa hã, ẽne Ziuboa na isisi u dasi'wapé ĩma waihu'u õ nherẽ, siwa'ru na nherẽ te rob'uwaimrami wamhã, wa tô Sau isi'uwazi 'rã'wa na si'upari sina sab ré hã 'madâ. Isitob'ru norĩ wedewara zapore na dasi'wapézém na hã, duré awaru na dasi'wapézém na hã, ma tô itẽme te te sina rotété za'ra. 7 Sipi'rai wa, te te ĩ'madâ'â wamhã, ma tô ĩ'mahâ. Tawamhã wa tô sada'â ãne: “E marĩ, ãhãta ãme wa ĩhâiba!” 8 Tawamhã Sau te ĩzadanha, wa hã ni'wa hã zô. Tahawa, wa ãma sada'â ãne, wa hã amalequita na hã. 9 Tawamhã te ãne ĩma tinha: “Ĩ'u'a za'ẽtẽ di. Wa za oto dârâ. Tahawa, we aimorĩ, ĩwĩrĩ da.” 10 Tawamhã wa hã isabzéb u itẽme ĩmorĩ wamhã, wa tô tiwĩ. E marĩ wa. Te waihu'u siromo wa, ti'ai u waptã'ã wi za idâ'âzém na hã. Tawamhã isõprezé, isipsisi me te tiwi isani zahuré hã wa tô we aima timra.
11 Tawamhã Davi ti'uza hã robzei'õ zé te, ma tô hâiwazu. Duré ite dasi'wapéi 'manharĩ'wa norĩ hã ma tô isine uburé õne hã 'manharĩ za'ra. 12 Ma tô ti'ru'ru. Ma tô duré wawa 'rãihâ na hã aiwa'õ za'ra. Sai ãna te duré a'â tihâimana za'ra, ãma ihâiwahâ za'ra zéb u, Sau norĩ ãma hã, Zonataha me, duré Izaraéu nhihudu norĩ, 'Re ihâimana u'âsi mono, Uburé Danhib'apito nhib'a'uwẽ isi'utõrĩ ãmab zama hã. E marĩ wa. Ahâ uptabi na si'utõrĩ wa, dasi'wapéi 'manharĩ'wa norĩ hã.
13 Tawamhã Davi te ai'repudu romreme te te itẽme i'âri hã sadanha ãne:
— E ma hawimhã, a hã.
Ãne ma te duré ãma sada'â:
— Wa hã, a'uwẽ amalequita. Tane nherẽ, wa ãme asipti'ai ãma 're ĩhâimana!
14 — E niha ma tô merẽ a hã sada asib'ru 'Re ihâimana u'âsi mono, Uburé Danhib'apito, apito da, te te ipisudu iwĩrĩ da hã. — Ãne te Davi hã sadanha.
15 Tawamhã tite aibâ norĩ te te i'mai'mahârâ ma hã, te ãne tãma ti'ru:
— Wĩrĩ, ã hã aibâ hã!
Ãhã wa, amalequita si'aibâ te te oto u'a wamhã, ma tô tiwĩ. 16 Tawamhã Davi te amalequita ma hã tinha ãne:
— A hã ma te tô ãma i'upa, ãne na hã. Tahawa asaihâ na ãma asiwasu'uzé hã te asada tihâiba, ãne na ãma i'asiwasu'uzé hã: “Wa hã wa tiwĩ, Uburé Danhib'apito, apito da, te te ipisudu hã.”
Davi hã Sau norĩ ãma Zonataha me isiwa'õzé wasu'u
17 Davi hã ma tô Sau norĩ ãma tinho're zahuré, i'ra Zonataha me, ãma ipẽ'ẽzé zahuré zém na hã. 18 Ma tô duré pisutu, Zudaha nhihudu norĩ ma, da te tãma waihu'u za'ra da hã. (Ã hã da'ãma dapẽ'ẽzézém na danho're na hã, ma tô ãma rob'ui'éré ni itepãiwasi Sena na 're ihâimana mono nhisi 'rem na.)
19 Izaraéu nhipti'ai ãma, wate i'rãnho'õmo norĩ ẽtẽ 'rãihâ ãma hã ma tô ai'utõ!
Duré wate dasi'wapéi 'manharĩ'wa isib'ru norĩ hã ma tô ti'ai u hã rere!
20 'Rinho'u Gati na isisi ãma ãne na hã wasu'u za'ra wa'aba tõ, duré Asquerõ 'ri nhi'riti na zama hã, filisteu nhipi'õ norĩ te te sima rowẽ za'ra tõ da, duré iwasété 'ra sipi'õ norĩ 're sarõtõ za'ra mono tõ da, te te ãma sima rowẽ za'ra wa.
21 Niwamhã tã norĩ atébré me hã, ẽne Ziuboa ãmamhã we 're rowaihi aba mono tõ! Duré tame rom na daburu ãmamhã amnho 're ai'rã zahu za'ra wa'aba mono tõ!
E marĩ wa. Tame dasi'wapéi 'manharĩ'wa norĩ isib'ru, ibaihâ 'manharĩ zapoto na 're isimapa za'ra mono zé hã robzapru te te upsibi za'ra wa, duré Sau, ãma 're isimapa mono zé hã tame tiwaipo te te simini wa.
22 Zonataha nhimnhi'ãsi na hã aré ãma idasisõpãrĩ pe. Duré Sauhu te sib'ézé 'wapa na hã niwamhã tinhitob'ru norĩ isiptede te te ãma 're 'mapãrĩ mono da hã te te ãma 're anhimini waihu'u mono õ di. Te te tô ãma 're anhimirei u'âsi.
23 Sau norĩ, Zonataha me hã, dama sawi uptabi zahuré di, duré dama wẽ uptabi zahuré di. Hâiba ré, niwamhã siwi siwãnhizari waihu'u zahuré õ di. Oto duré dâ'â zahuré nherẽ, sima siwãnhizari waihu'u zahuré õ di, hâiba ré zahuré wam ne!
Ta norĩ hã si'õmo wawẽ nhipai u hã waptu zahuré di aré. Hu'u zérépa nhipai u hã duré aré siptete uptabi zahuré di.
24 Izaraéu nhihudu nhipi'õ norĩ, Sau ãma hã ai'ru'ru wa'aba!
E marĩ wa. Õ hã ma tô pone'ẽrebâ zéré mapure zéré pré 'manharĩ na da'uza na hã te te 're ai'uza za'ra wa'wa, iwa'âbâ za'ẽtẽ na. Ma tô duré ẽtẽ waipo pré oru 'manharĩ na da'uza hã te te asada ãma 're ahâiwamnarĩ 'wa.
25 Dasi'wapéi 'manharĩ'wa isib'ru norĩ hã ma tô rere. Ma tô ai'utõ.
Zonata zama ma duré ẽtẽ ãma hã dârâ.
26 Ĩsisãnawã Zonata, wa ai'ãma aiwa'õ; ĩma i'asawi uptabi zarina!
Duré asimizawizé ĩma hã wẽ uptabi di, pi'õ nhimizawizé nhipai u hã.
27 Dasi'wapéi 'manharĩ'wa isib'ru norĩ hã ma tô rere. Isimnhi'ãsi norĩ hã ma tô duré ai'utõ, isiré za'ra.