— Aimorĩ, Izaraéu ti'ai 'rem norĩ za'ratazé, duré Zuda ti'ai 'rem norĩ za'ratazé hã 'manharĩ da.

2 Tawamhã Davi, ite dasi'wapéi 'manharĩ'wa norĩ 'madâ'â'wa Zoabihi ma, ma tô ãne tãma ti'ru:

— Ma'ãpé ate ti'ai wa'õtõ nho'õmo 're, ate dawada'uri'wa norĩ ré, uburé Izaraéu nhihudu wamri mono norĩ tẽmemhã 're aimorĩ, hâiwa nhimi'e niwĩ daza'rui ihâimana u, duré hâiwa nhimire niwĩ daza'ru norĩ ihâimana za'ra u hã, a'uwẽ norĩ za'rada hã 'manharĩ da. Wa hã wa tô ĩsima wẽ, te waihu'u da, niha hâimana zô, wahâiba za'rata za'ra zé hã.

3 Tane nherẽ, ma te Zoabi, ãne apito ãma sada'â asa:

— Uburé Danhib'apito, wate 'Re ihâimana u'âsi mono, Izaraéu nhihudu norĩ za'rada hã te te i'manharĩ da si iwẽ hã, 100 na isisiwi ãhã na ihâimana za'ra nhipai u, sina 're ihâ'â u'âsi mono da si. Duré a hã 're aihâimana hâ mono da si ĩma iwẽ hã, ãne hã 'madâ'â da! Tane nherẽ, e marĩ da, ma tô bété asima iwẽ, ãne na daza'rada 'manharĩ da hã.

4 Tane nherẽ, apito ma tô 'manha, Zoabi norĩ tite dawada'uri'wa norĩ me te te tãma i'ru za'ra zé, te te 'manharĩ za'ra da. Tahawa ihawi wairébé wamhã, ma tô ai'aba'ré oto, Izaraéu nhihudu norĩ te te sa'rata za'ra da hã.

5 Tawamhã panho'u Zodã pa na ma tô saprĩ za'ra. Te te saprĩ za'ra wamhã, ma tô hâiwa nhimi'e niwĩ Aro'e na 'ri nho'õmo nhisi ãma sima 'ri nhoré za'ra, 'rinho'u romharé wa ihâimana wa, Gadihi nhihudu norĩ nhipti'ai ãma hã. Duré ta hawi si'aba'réi wa, hâiwa nhimire niwĩ 'rinho'u Zaze na isisi niwĩ, 6 ma tô timorĩ na Giliadi u te te ãma uzusi za'ra wamhã, duré Cadi na romnhisi u hã aihutu, hitita norĩ nhipti'ai 'reb u. Duré tawamhã Dã na romnhisi u si'aba'réi wamhã, ma tô ta hawi wẽ'ẽ za'ra bâtâ zasizém niwĩ, Sidõ na romnhisi u si'aba'ré da hã. 7 Taha pari ma tô duré wairé hâiwa nhimire niwĩ, si'aba'ré da, 'rinho'u Tiru na isisi ãma 'ri 'wawi wa'ra 'rãihâ ihâimana u. Tawamhã ta hawi ma tô oto uburé 'ri nho'õmo mono u 're nomro heveu norĩ u hã, cananeu norĩ u hã, duré Beseba na romnhisi u hã, hâiwa nhimire niwĩb ãma, Zuda ti'ai u hã. 8 Ãne ma tô, 9 na a'amo ãma si'utõrĩ za'ra pari, duré 20 na bâdâ hã ãma si'utõrĩ za'ra pari, apâ hã ai'aba'ré Zeruzalẽ u, ti'ai wa'õtõ nho'õmo 're, daza'rui mono bâ 're nomro mono parimhã. 9 Tawamhã Zoabi ma tô apito ma wasu'u za'ra, uburé aibâ norĩ dasi'wapéi 'manharĩ'wa da, ihâimana waihu'u pese za'ra hã ãne: 800 miu na Izaraéu ti'ai 'remhã, duré 500 miu na Zuda ti'ai 'remhã.

10 Tane nherẽ, Davi te te aza'rata pari, isimirosa'rata 'manharĩ hawi 'rãzé watobro wa, ma tô ãne tinha:

— Uburé Danhib'apito, wa hã wa tô ĩwasédé iwasété uptabi hã 'manha, a'uwẽ norĩ za'ratazé te i'ruzém na hã. Tahawa, ĩzawi na hã i'ruiwapari tõ. Duré ĩ'ãma 'madâ'â tõ! E marĩ wa, marĩ te i'manharĩzé hã wasété uptabi di.

11-12 Tawamhã Uburé Danhib'apito zadawa 'mahârâ'wa Gadi, Davihi te, sõtõ 'rowim ne marĩ 'madâ'â'wai ma, te ãne tinha:

— Aimorĩ, Davihi ma rowasu'u da, si'ubdatõ marĩ te tãma i'ruzahi 'remhã misi te te 'maipisutu da. Duré nimahã te te i'maipisutu zarina wa hã wa za 'manha.

Tawamhã awẽm na, Davi oto utu pari, 13 ma tô Gadi hã itẽme mo. Morĩ wamhã, ma tô 'Re ihâimana u'âsi mono te te tãma inharĩzé hã tãma wasu'u. Tahawa, te sadanha ãne:

— E ma hã te za asima ipisu. E si'ubdatõ wahum na asipti'ai 're mrab zépatazé hã hâimana da, e si'ubdatõ a'amo na asitob'ru norĩ ma hã 're asamroi mono da hã, duré e si'ubdatõ bâtâ na asipti'ai 're dahâzé ipire hâimana da hã. Ma'ãpé nimahã asima pisutu, duré awa'awi na ãma ĩzada'âbâzé hã 'Re ihâimana u'âsi mono ma, te sõmri da hã.

14 Tawamhã Davi, ma te ãne ãma sada'â asa:

— Ĩma robzei'õzém na hã wa robzépata. Tane nherẽ, aibâ norĩ te te ĩma irob'manharĩ za'ra da hã te ĩsima wẽ õ di. Uburé Danhib'apito si te te wama irob'manharĩ za'ra da si, iwẽ hã. E marĩ wa. Õhõ si wa'ãma 're siwamri mono dâ'âsina!

15 Tawamhã Uburé Danhib'apito, Izaraéu ti'ai 're a'uwẽ norĩ nhisiwi dahâzé ipire waptã'ã da hã, ma tô tãma rob'ru, awẽ wi irowa'azém hawi bâdâ hã te te ãma itizéb u. Tawamhã hâiwa nhimire niwĩ 're ihâimana za'ra mono hã, duré hâiwa nhimi'e niwĩ ti'ai wa'õtõ nho'õmo ãma hã, ma tô Izaraéu nhihudu norĩ hã ai'utõ, 70 miu na. 16 Tawamhã Uburé Danhib'apito te, hâiwa ãma romhuri'wa, Zeruzalẽ ãma a'uwẽ te te i'uprosi na, te te sãna'rata wi, ma tô oto Uburé Danhib'apito hã tinhimirosa'rata na ãma saprĩ, te te dahâ za'ra zahu tõ da. Tahawa ma tô hâiwa ãma romhuri'wa da'uprosi'wai ma tinha ãne:

— Tô'ã oto! Asimizazâri!

Tahawa, Uburé Danhib'apito te, hâiwa ãma romhuri'wa hã te Ara'una zebuzeu te, amnho pré'ézéb 'rata tihâiba.

17 Tawamhã Davi, hâiwa ãma romhuri'wa, a'uwẽ te te i'mapãrĩzé te te 'madâ'â wamhã, ma tô ãne tãma tinha, Uburé Danhib'apito ma hã:

— Ĩwétési marĩ na i'upai'wa na hã wa ĩhâiba. Wa hã wa tô ãma upa. E marĩ, te te 'manharĩ wasété za'ra bâ, ã norĩ hã. Taré ma tô ĩnhimiroti zarina 're hâimana za'ra, pone'ẽrebâ ne hã. Ĩma si, i'ra norĩ me hã wama irob'manharĩ za'ra da si, ibâre hã.

18 Tawamhã Gadi tô taha bâtâ na ma tô mo, Davihi u. Morĩ wamhã, te ãne tãma tinha:

— Aimorĩ, amnho pré'ézé Ara'una te u hã, tame 'Re ihâimana u'âsi mono ma danhoprubzéb da, ẽne hã sa'ra da sisisiwip si.

19 Tawamhã Davi, Uburé Danhib'apito te te tãma i'ruzé hã ma tô wapa. Tahawa ma tô mo, Gadi hã te te tãma iwaihu'uzéb zarina. 20 Tawamhã Ara'una sipapara te te rob'madâ'â wamhã, ma tô 'madâ, apito, duré ite dasi'wapéi 'manharĩ'wa norĩ me itẽme isi'aba'ré norĩ hã te te tãma nharĩ za'ra da. Tawamhã hi'rãtitõ tãma sãmra wa, duré ti'ubu na ti'ai u te te tãma ropto wa, Davihi nho'remhã, 21 ma tô ãne sadanha:

— Apito, e marĩ zô, te we aimo ãwamhã.

Tawamhã Davi, ma te ãma sada'â ãne:

— Wa wei mo, amnho pré'ézé ti'a te uipra da, Uburé Danhib'apito ma, danhoprubzéb da, ẽtẽ za'ra iwa te 'manharĩ wa, dahâzé hã si'utõrĩ pese hâ.

22 Tawamhã Ara'una te ãne tãma tinha:

— Apito, asima iwẽzéb zarina uburé waibu na, 'Re ihâimana u'âsi mono ma, ãma tãma asõprubzéb da hã. Ãhãta te powawẽ ẽtẽ za'ra 'rãihâ nhisiwi izata za'ra da hã tihâimana za'ra. Ãhãta te duré ibutu tété za'ra zé hã tihâimana za'ra. Duré wedepo hã te ãhãta tihâimana za'ra, amnho pré'ézé hã, mimi na ãma hâimana za'ra da hã.

23 Tawamhã Ara'una, apito ma, uburé te te sõmri za'ra wamhã, te duré ãne tãma tinha:

— Uburé Danhib'apito, 'Re ihâimana u'âsi mono, te te iwẽsãmri da si, tãma i'asõprubzé hã!

24 Tane nherẽ, ma te apito ãne ãma sada'â asa hã:

— Wẽ di aré tô. Tane nherẽ, wa hã te ĩsima wẽ õ di. Uburé wa za tô wa'â. Duré Uburé Danhib'apito, ĩte 'Re ihâimana u'âsi mono ma ĩnhoprubzé, te wa'âbâ za'ra õ nherẽ, te isõmri za'ra da hã mare di za.

Tawamhã Davi, ti'a amnho pré'ézé hã ma tô uipra, duré powawẽ norĩ hã, 50 na ẽtẽ waipo prã prata iwa'õtõ waré na. 25 Tawamhã tame, ma tô Uburé Danhib'apito ma, danhoprubzéb da, ẽtẽ za'ra hã 'manha. Te te 'manharĩ wamhã, ma tô tinhoprubzé te te ĩzata pese za'ra hã tãma sõmri za'ra, duré ãma dama 're irowẽ za'ẽtẽ za'ra mono zéb zama. Tahawa, Uburé Danhib'apito te te tiwi irowaptẽrẽzém na te te oto ãma sada'âbâ wamhã, ma tô Izaraéu nhihudu norĩ ãmamhã dahâzé ipire hã oto ai'utõ.