— Ĩsani'wa, aimro da hã aibâ te aima 'masãmri da, wa ĩsima wẽ, asõrõwa aima hâimana da zama. 2 E ma tô ãma irosa'ra, Boazihi ãma ĩmro sisãnawã siwadi na hã. Ta hã ma tô romhuri hã aima ti'ru, ite romhuri'wa norĩ me romhuri da. Taha ta tô. Ã barana te za amnho hã pré'é, trigu teihi ne hã. 3 Ãne te za i'manha. Te za asi'upsõ. Taha parimhã, te za asisadaze. Te za duré asi'uza, ai'uza ihâi wẽ uptabi na. Taha pari, te za aimo, Boaz te te iromhurizéb u hã. Tane nherẽ, tãma asihâi'ré õ di za a'â, te te aiwaihu'u tõ da, i'rata i'aihâimana na hã. A'â tisa hã te te 'rãsutu, duré a'â tisa te te simizâri. 4 Taha pari, Boaz oto sõtõ da wamhã, nimame nomro zô 'madâ'â pese za. Sõtõ wapsi, te za itẽme aimo, inomrozéb u. Isisuwazé hã te za ihâzada'ré za'o, ipara ãma hã. Tame te za ano. Tawamhã te za aima tinha, tiha hã za i'manharĩ da hã.^a

5 Tahawa Ruti hã te tãma tinha, ãne:

— Uburé wa za tiha hã 'manha, ĩma iwaihu'uzéb zarina.

6 Tawamhã te nimahã na oto mo, amnho hã da te 're ipré'é za'ra mono zéb u. Wisi wamhã, ma tô uburé marĩ ab'manha, imaprewa te te tãma i'ruzéb zarina. 7 Tame Boaz oto sai pari wamhã, duré te te simizâri parimhã, tãma rowẽ di oto. Tahawa, te oto nhono, amnho za'wari 'rata. Tawamhã Ruti te itẽme sahutu, atãma hâire. Itẽme wisi wamhã, isisuwazé hã ma tô sima hâzada'ré za'o, ipara ãma hã. Tame ma tô oto nomro. 8 Tawamhã mara wa'wa ma tô toporo waptu na, Boaz hã. Topo'o wamhã, sahâ na ma tô nhamra. Tame ma tô pi'õ hã 'madâ. Te te 'madâ'â wamhã, ma tô ãma titob'uzu, ipara ãma inomro ãma hã.

9 Tahawa ma tô sadanha, ãne:

— E 'wa hã, a hã.

Tawamhã asa te tãma siwasu'u:

— Wa hã Ruti, aima romhuri'wa. Ma'ãpé aima romhuri'wa nhisiwimhã asisuwazé hã hâparapo na. E tihai wa. Ropire hawi wanho'reptui'wa na wama 're aihâimana mono wa, a hã.

10 Tawamhã Boaz ma tô ãma tãma wa'rã, ãne:

— Wa tô ĩsima wẽ, Uburé Danhib'apito si iwẽ hã te te aima 're pisutu mono da. Tô sena na aihâimana wẽ zém na ma asihâi'ré wẽ, aimaprebaba si'aibâ sisãnawã norĩ ma hã, aimaprebaba sipi'õ ipawapto wẽ zém nhipai u hã. E marĩ wa. A hã aibâ iprédupté isibro pese zô asima airĩtĩ õ wa, niha wamhã, duré isibrob'õ zô. 11 Tahawa, ãhã na hã aipahi tõ. 'Ri nho'õmo ãma hã dama aiwaihu'u pese di, a hã pi'õ, rob'uwaibaba na si 're i'aihâimana mono zém na hã. Tahawa, uburé wa za ab'manha, ĩwi iwaptẽrẽzéb zarina. 12 Sena tô wa hã asisãnawã norĩ siwadi. Tahawa, duré a hã za oto ĩnhimi'madâ. Tane nherẽ, iré hã aibâ asisãnawã siwadi 'râwimhã, ĩnhipai u hã. 13 Ãme a'â aihâimana za, awẽ u hã, mararé wa te sadaihu'u da, te te sima wẽ zô, te te i'ai'madâ'â da hã. Te te sima wẽ wamhã, wẽ di. Duré te te sima wẽ õ wamhã, wa hã Uburé Danhib'apito ma, 'Re ihâimana u'âsi mono ma, wa za ropisutu ĩsi'ãma hã, ai'madâ'â'wa na 're ĩhâimana mono da. Tahawa, ma'ãpé apâ anomro, asõtõ da.

14 Tawamhã Rutihi ãma ma tô ti'awẽ, Boazihi para ãma nomro ré. Zahadu robza'rã ré mara hâ prãi ré, ma tô udu Ruti hã, morĩ da, morĩ ré, da te dasiwi 'madâ'â tõ da. E marĩ wa. Boaz hã te te sima wẽ õ di duré, pi'õ itẽme imorĩ na hã da te iwaihu'u da hã.

15 Tawamhã Boaz ma tô tãma tinha, Rutihi ma, ãne:

— Asi'ubuzé hã wazere, ti'ai wa hiri da, hâparapo na.

Tame ma tô tihi, hâparapo na tisi'ubuzé hã. Tahawa Boaz ma tô oto sa'wa amnho hã iwa, 20 na ipire pibuzé hã. Taha pari, ma tô duré ti'â, isisé te te tãma hiri da. Tawamhã Ruti te oto apâ mo, 'ri nho'õmo u.

16 Tinhorõwa u oto wisi wamhã, ma tô imaprewa hã sadanha, ãne:

— Ĩsani'wa, e niha ma tô tiromhâiba.

Tahawa Ruti te tãma rowasu'u, Boaz hã uburé marĩ te te tãma i'ab'manharĩzém na hã. Te duré tãma rowasu'u a'â:

17 — Ã hã uburé ma tô ĩma tisõ, amnho hã. Tahawa, te ãne ĩma tinha: “Asõrõwa u, ai'uba na apâ asina siri õ di za, marĩ hã âri ãna hã aimaprebaba ma.”

18 Tawamhã Noẽmi te tãma tinha, ãne:

— Tahawa, ĩsani'wa, a'â asimipari atãma, pé niha ai'ãma romhâimana zô. E tihai wa. Boaz hã ã bâtâ na tiha na te te arowairébé õ nherẽ, iwa'utu da hã maze di.